EDA na kila na isaunitaro qori nida dikeva vakalekaleka e rua na nona vakataulewa na Kalou ena iVolatabu​—na Waluvu ena siga i Noa kei na nodra vakarusai na kai Kenani.

KA ERA TUKUNA ESO: “E dau veivakalolomataki na Kalou ni vakarusai ira na kawatamata ena waluvu qai vakabulai Noa kei na nona vuvale.”

KA E KAYA NA IVOLATABU: E kaya na Kalou: “Au sa sega ni vinakata me mate na tamata ca; au vinakata ga me lesu mai na tamata ca mai na nonai tovo, ka me bula.” (Isikeli 33:11) A sega ni vinakata o Jiova mera rusa na tamata ena siga i Noa. Ia na cava ga a qai cakava kina?

E tukuna na iVolatabu ni vakataulewa ni Kalou vei ira na tamata ca ena gauna makawa, e “ivakaraitaki ni ka ena yacovi ira era sega ni doka na Kalou.” (2 Pita 2:​5, 6) Na ivakaraitaki cava e kotora na Kalou?

Kena imatai, e sega ni vinakata na Kalou me vakarusai ira na tamata, ia ena sega ni guilecava na ka era cakava na dau veivakalolomataki, ena saumi ira me vaka na nodra ivalavala. Ena nona gauna lokuci ena vakaotia kece na rarawa kei na veika tawadodonu.

Kena ikarua, e laurai ena ka e cakava na Kalou ena veigauna sa sivi ni dau vakasalataki ira vakayalololoma na tamata ni bera ni vakataulewa. A vakasalataki ira na tamata o Noa, ia e levu era vakalecalecava na nona ivakasala. E kaya na iVolatabu: “Era sega ni bau kauai me yacova ni tekivu na waluvu qai kuitaki ira kece.”​—Maciu 24:39.

Vakacava e muria tiko ga na Kalou na ivakarau qori? Io. Kena ivakaraitaki, a vakasalataki ira na Isireli ke ra muria na nodra ivakarau ca na veimatanitu era tiko wavoliti ira, ena ravuta na nodra vanua na kedra meca, vakarusa na nodra koroturaga o Jerusalemi, ra qai kau vakavesu. Era qai talaidredre na Isireli, era cabori ira mada ga na luvedra me isoro. A cakava kina o Jiova e dua na ka? Io. Ni bera ni vakataulewa a talai ira vakavica na nona parofita me vakasalataki ira na nona tamata mera veisautaka na nodra ivalavala. E tukuna mada ga: “Ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nonai talatala na parofita.”​—Emosi 3:7.

VUNA MO KAUAI KINA: Na ivakarau ni nona vakataulewa o Jiova ena veigauna sa oti e vakanuideitaki keda. Eda vakanamata ena nona vakataulewa  na Kalou vei ira era vakavuna tiko na veika rarawa. E kaya na iVolatabu: “Ni na muduki tani na daucaka ca . . . Ia ko ira na yalomalumalumu era na taukena na vanua; Ka na daumarau tiko e na veivakacegui vakaidina.” (Same 37:​9-11) Na cava o nanuma ena nona lewa na Kalou me vakabulai ira na tamata mai na rarawa? E vakaraitaka ni dau veivakalolomataki se dauloloma?

KA ERA TUKUNA ESO: “E vakaloloma dina nodra vakarusai na kai Kenani, e vaka ga na veivakamatematei e caka tu nikua.”

KA E KAYA NA IVOLATABU: “Ni sa dodonu na nonai valavala kecega [na Kalou]: A Kalou vosa dina, ka sega ni ca.” (Vakarua 32:4) Na nona dau vakataulewa na Kalou e sega ni tautauvata kei na ivalu vakatamata. Na cava na vuna? Baleta ni dau dikeva na lomada, qori na ka eda sega ni cakava rawa.

Kena ivakaraitaki, ena gauna a lewa kina na Kalou me na vakarusa na koro o Sotoma kei Komora, a via vakadeitaka na turaga yalodina o Eparama ke donu na vakatulewa qori. E sega ni vakabauta ni na rawa vua na Kalou dau lewadodonu me “vakarusa vata . . . na yalododonu kei nai valavala ca.” Ia a vakadeitaka vua na Kalou ni na sega ni vakarusa na koro o Sotoma ke tiko mada ga kina e tini na tamata yalododonu. (Vakatekivu 18:​20-33) Koya gona, e raica o Jiova ni sa rui torosobu na ivakarau ni lomadra.​—1 Veigauna 28:9.

E cakava tale ga qori na Kalou vei ira na kai Kenani, qai veiganiti mera vakarusai. Era kilai na kai Kenani nira dau veivakalolomataki, me vaka na nodra vakamai ira bulabula na gone. * (2 Tui 16:3) Era kila na kai Kenani ni a vakaroti ira na Isireli o Jiova mera taukena na nodra vanua. O ira gona era beca na ivakaro qori, era sega wale ga ni saqati ira na Isireli, era saqati Jiova tale ga, ni dau taqomaki ira na nona tamata.

Ia na Kalou o Jiova a vakabulai ira na kai Kenani era biuta na veika ca ra qai muria na nona ivakatagedegede cecere. Kena ivakaraitaki, a vakabulai o Reapi na yalewa saqamua ni Kenani kei na nona vuvale. Era vakabulai tale ga na lewe ni koro o Kipioni, dua na siti e Kenani, nira kerea mera vakabulai.​—Josua 6:25; 9:​3, 24-26.

VUNA MO KAUAI KINA: Eda vulica e dua na lesoni bibi ena lewa a tau vei ira na kai Kenani. Eda sa volekata yani na “siga ni lewa” a parofisaitaki tu “mera vakarusai kina o ira na sega ni doka na Kalou.” (2 Pita 3:7) Ke da lomani Jiova, eda na vakalougatataki ena gauna ena vakaotia kina na rarawa e tarai keda tu na kawatamata. Ena cakava qori ena nona vakawabokotaki ira na saqata na nona veiliutaki dodonu.

E vakasalataki keda vakayalololoma o Jiova ni nodra vakatulewa na itubutubu ena tarai ira na gone. E kaya na Vosa ni Kalou: “Mo ni digitaka mada na bula, mo ni bula kina, koi kemuni kei na nomuni kawa: mo ni lomani Jiova na nomuni Kalou, mo ni vakarorogo ki na nona vosa, mo ni kabiti koya talega.” (Vakarua 30:​19, 20) Vakacava e rawa ni tauca na vosa qori e dua na Kalou dau veivakalolomataki se dua e lomani ira na tamata qai vinakata mera vakatulewa vinaka?