E dua dina na usutu e dredre me veivosakitaki na mate. Era sega ni vinakata e levu mera veitalanoataka. Ia e sega ni dua vei keda ena levea na ituvaki qori. Na bati gaga ni mate e vakararawataki keda kece.

E sega ni dua ena rawa ni tukuna ni sa tu vakarau ena gauna ena mate kina o nona itubutubu, watina se o luvena. E duidui na gauna eda sotava kina na leqa, eso e yaco ga vakasauri, so tale e yaco ni oti e dua na gauna balavu. Ia eda na sega ni drovaka rawa na mate, ni dua gona na wekada voleka e takali e mosimosi dina.

E kaya o Antonio a takali o tamana ena dua na vakacalaka e gaunisala: “E vaka ga e dua e lokataka na nomu vale qai kauta na ki. O sa sega ni rawa ni curu tale i loma, o sa vakanananutaka wale tu ga. Mo sa na ciqoma na veisau vou qo ena nomu bula. De dua o na via kinoca ena nomu nanuma ni sega ni dodonu me yaco, sa na sega ni rawa ni o cakava kina e dua na ka.”

O Dorothy sa yabaki 47 ena gauna e takali kina o watina, a vaqaqa voli eso na taro. E qasenivuli ni wilivola ni Sigatabu, ia e sega ni vakabauta ni itinitini ni ka kece o mate. E sega ni dua e vakacegui koya ena ka e lomatarotarotaka voli. A taroga e dua na italatala ni lotu Jiaji: “Na cava e yacovi keda nida mate?” E kaya vua o na italatala: “E sega ni dua e kila. Ena qai tukuna ga o gauna.”

E dina beka me na qai “tukuna ga o gauna” na ka e yaco nida mate? Eda na kunea e vei na isaunitaro e veivakacegui?