O na rairai taroga, ‘Ke sa kila tu na Kalou na ka au vakasamataka kei na ka au cakava, na cava tale meu masu kina?’ E taro vinaka qori. E sega beka ni tukuna o Jisu ni Kalou e ‘kila na ka eda vinakata ni bera mada ga nida kerea’? (Maciu 6:8) A kila tale ga qori o Tui Tevita e Isireli makawa, a vola kina: “Ni sa sega e dua na vosa e na gusuqu, sa sega ni kilai deivaki kece sara ga vei kemuni Jiova.” (Same 139:4) Na cava gona meda masuta kina na Kalou? Me saumi na taro qori, meda dikeva mada na ka e kaya na iVolatabu me baleta na nodra masu na dauveiqaravi ni Kalou. *

E kaya na iVolatabu ni Kalou o Jiova * e kila na ka kece, ia e tukuna tale ga ni sega wale ga ni nona inaki me kumuna na itukutuku me baleti ira na nona dauveiqaravi. (Same 139:6; Roma 11:33) E sega ni katumi rawa na ka e nanuma, ia e sega ni vaka na kompiuta me maroroi itukutuku wale ga. E kauaitaka na Kalou na ka e tu e lomada, e vinakata meda toro voleka vua. (Same 139:23, 24; Jemesa 4:8) Qori na vuna e uqeti ira kina nona imuri o Jisu mera dau masu, veitalia ke sa kila rawa tu o Tamana na veika eda gadreva. (Maciu 6:6-8) Na levu ga ni noda talaucaka vua na lomada, na levu tale ga ni noda volekati koya.

Ena so na gauna eda na rairai sega ni kila na ka meda kerea nida masu. Ena gauna va qori meda nanuma tiko o Jiova e kila na ka e tu e lomada ke sega mada ga nida cavuta nida masu, ena vakarautaka gona o koya na veika eda gadreva. (Roma 8:26, 27; Efeso 3:20) Na noda kila ni o Jiova ena vukei keda ena sala tale eso, qori ena vakavolekati keda vua.

E vakadeitaka vei keda na iVolatabu ni Kalou Kaukaua Duadua e dau sauma na nodra masu na nona dauveiqaravi yalodina, e vakamacalataka tale ga na vuna ena sega ni rogoca kina na nodra masu eso. Kena ivakaraitaki, na gauna e takalevu kina na itovo kaukaua e Isireli makawa, na Kalou a dusimaki Aisea na parofita me vakaroti ira ena gauna oya: “Ni dou sa masu vakavuqa, ka’u na sega ni rogoca: a ligamudou sa lomoci e na dra.” (Aisea 1:15) Kena ibalebale, o ira era beca na lawa ni Kalou se duatani na inaki ni nodra masu ena sega ni rogoci na nodra masu.—Vosa Vakaibalebale 28:9; Jemesa 4:3.

Ena yasana adua, e kaya na iVolatabu: “Se cava ga eda kerea me salavata kei na nona inaki, ena rogoci keda o koya.” (1 Joni 5:14) E kena ibalebale beka ni na sauma na Kalou na ka kece era kerea vua na nona dauveiqaravi? Sega. Dikeva mada na ivakaraitaki ni yapositolo o Paula, a kerea vakatolu vua na Kalou me kauta laivi na ‘votonikau e votoki koya voli.’ (2 Korinica 12:7, 8) A rairai vakaibalebaletaka tiko o Paula ni vakararawataki koya tiko na mosi ni matana! E rawa vei Paula me veivakabulai, e veivakaturi tale ga, ia e vinakati me vosota na mate e tauvi koya tiko. (Cakacaka 19:11, 12; 20:9, 10) E duatani na sala e sauma kina o Jiova na masu i Paula, ia e vakavinavinakataka na veivuke ni Kalou.—2 Korinica 12:9, 10.

Eso e volatukutukutaki ena iVolatabu e saumi vakacakamana na nodra masu. (2 Tui 20:1-7) Ia e dau yaco vakavudua qori ena gauna mada ga vakaivolatabu. Era yalolailai eso na vakabauta nira nanuma ni sega ni sauma na Kalou na nodra masu. A taroga o Tui Tevita: “I Jiova, sa vakaevei na kena dede na nomuni guilecavi au? ena tawa mudu beka?” (Same 13:1) Ia ni vakasamataka na turaga yalodina qori na nona dau vakabulai koya o Jiova, a vakadeitaka me vakararavi tiko ga vua. Ena qaqanimasu vata qori, a tomana o Tevita: “Ia koi au, ka’u sa vakararavi ga e na nomuni loloma.” (Same 13:5) Me vakataki Tevita, e levu na dauveiqaravi ni Kalou nikua era gumatua ena masu me yacova nira sa kila na sala e sauma kina na Kalou na nodra kerekere.—Roma 12:12.

E vakarautaka na Kalou na veika eda gadreva dina.

Ni kerekere e dua na gone vei rau nona itubutubu, e tiko na vuna vinaka erau na sega ni vakayacora kina nona kerekere ena gauna vata ga oya. E va qori tale ga na Kalou, ena rairai sega ni sauma o koya na noda masu ena sala kei na gauna eda namaka tiko. Ia eda rawa ni vakadeitaka ni na vakarautaka na Dauveibuli na ka eda gadreva dina ena gauna kei na sala e veiganiti, me vaka e dua na tama dauloloma.—Luke 11:11-13.

Ena sala eda sega tu ni kila.

Ia vakacava ke da masulaka meda vakacegui mai na dua na leqa eda sotava tiko? Ni sega ni saumi vakacakamana na noda masu, e kena ibalebale ni sa na sega tu ga ni sauma o Jiova na noda masu? E vinaka meda vakasamataka ke sa vukei keda na Kalou ena so na sala eda sega tu ni kila. Kena ivakaraitaki, de dua ena vukei keda e dua noda itokani voleka ena gauna sara ga eda gadreva kina. (Vosa Vakaibalebale 17:17) De dua a uqeti koya o Jiova me vukei keda. Kena ikuri, e sauma o Jiova na noda kerekere ena ka eda wilika ena iVolatabu. Eda na raica kina na ivakasala veiganiti meda vosota kina na ituvaki eda sotava tiko.—2 Timoci 3:16, 17.

Na Kalou ena sega ni kauta laivi na veika dredre eda sotava, ia ena vakaukauataki keda meda vosota. (2 Korinica 4:7) Kena ivakaraitaki, ni kerei Tamana o Jisu me kauta laivi na ituvaki dredre e sotava tiko, e kauaitaka me kua ni vakarogorogocataki na yaca ni Kalou, mani tala o Jiova na nona agilosi me vakaukauataki Luvena. (Luke 22:42, 43) Ena rairai vakayagataka tale ga na Kalou e dua na noda itokani me vakaukauataki keda ena gauna sara ga eda gadreva kina. (Vosa Vakaibalebale 12:25) Meda dau yadrava gona na sala ena sauma kina noda masu na Kalou, ni sega ni dau kilai eso na sala e rawa ni cakava kina qori.

Gauna veiganiti e sauma kina na noda masu.

E kaya na iVolatabu ni tiko na nona “gauna lokuci” na Kalou Cecere Duadua me vakacegui ira na yalomalumalumu. (1 Pita 5:6) Koya gona, ni berabera na saumi ni noda masu, meda kua ni nanuma ni sa sega ni kauaitaki keda o Jiova. Ia ni uasivi nona rai, e sega ni vakabekataki ni dikeva na Dauveibuli dauloloma na ka eda kerea me salavata kei na ka e kila ni ganiti keda.

Kena ivakaraitaki: Kaya mada ke kerei iko na luvemu tagane me dua na nona basikeli. Vakacava ena totolo ga nomu vakayacora na ka e kerea? Ke o kila ni se gone qai sega ni kena gauna me vodo basikeli, o na rairai volia na nona basikeli ena dua tale na gauna. Toso na gauna o na qai vakayacora na ka e kerea ni o raica ni sa veiganiti. Na Kalou tale ga ena vakaceguya na ka e ‘gadreva na lomada’ ena gauna veiganiti ke da gumatua tiko ga ena masu.—Same 37:4.

E uqeti ira na lotu vaKarisito dina na iVolatabu mera kua ni guilecava na yaga ni masu. Era na rairai tukuna eso, ‘E rawarawa na kena tukuni, ia e dredre me caka.’ Ke da se vosota tiko na ituvaki dredre se na veika tawadodonu e caka vei keda, eda na rairai oca ni waraka na Kalou me sauma na noda kerekere. Ia e ka vakayalomatua meda dau vakasamataka na veika a vakavulica o Jisu me baleta na noda dau gumatua ena masu.

 A cavuta o Jisu na vosa vakatautauvata me baleta e dua na yada dravudravua a sega ni cegu ena nona gole tiko vua na turaganilewa me vakataulewa dodonu. (Luke 18:1-3) A bese ni via vukei koya na turaganilewa ena imatai ni gauna, e muri qai kaya: “Au sa na raica mada ga me tau vua na lewadodonu, de lakolako au na ciba tale ena levu ni nona veivakasosataki.” (Luke 18:4, 5) Ke sa rawa ni vukea e dua na yada dravudravua na turaganilewa tawayalododonu ni leqataka na kena irogorogo, sa na qai wacava sara na nona kauai na Kalou me tauca na lewadodonu vei ira “era tagi vua ena siga kei na bogi.” Me vaka a tukuna o Jisu, ena “raica [na Kalou] me tau vakatotolo vei ira na lewadodonu.”—Luke 18:6-8.

E dina ni so na gauna eda dau vakacauoca na kerekere, ia meda kua ni soro. Noda gumatua ena masu e vakaraitaka nida vinakata me vukei keda na Kalou. Eda kila tale ga ni Kalou e dau sauma noda kerekere, qori eda na volekati koya kina. Io, eda rawa ni vakadeitaka ni o Jiova ena sauma noda masu, ke da kerekere tiko ga ena vakabauta.—Luke 11:9.