E levu kina na basulawa kei na itovo voravora. E vanua dredre, ia au bula rawa kina. Au sega ni kilai tinaqu qai keirau sega ni veimaliwai vinaka kei tamaqu.

Au tekivu butako niu se yabaki 10. Au tekivu dro mai vale niu sa yabaki 12. Qai levu na gauna e dau lai kauti au mai o tamaqu vei ira na ovisa. E dau voravora noqu itovo, au dau vakatubuca, au sega tale ga ni taleitaka e dua. Au dro tale mai vale niu sa yabaki 14, au vakaitikotiko e gaunisala qai tekivu vakayagataka na wainimategaga. Ena bogi, au basu motoka meu moce kina, qai biubiu ni bera ni kida na mataka. Oti au na gole ena vanua e tu kina na wai meu tavoi.

Au dau butako ena rumu saumi kei na nodra vale ni gade na vutuniyau ena bogi. Qori e vakavuna meu rogo kina qai sega ni dede au sa lewena e dua na ilawalawa voravora kilai levu, tekivu tale ga meu butako baqe. Era dokai au na noqu ilala ni voravora noqu itovo. Au dau kau dakai e veivanua kece, ena noqu gauna mada ga ni moce. Sa ivakarau ni noqu bula na vosavosa ca, vakayagataki ni wainimategaga, veidauci, itovo voravora kei na butako. Era dau vakasasataki au na ovisa, au dau curu suka e valeniveivesu.

Au sega ni kila ni sa iVakadinadina i Jiova kei rau na luvena. Ratou sureti au ena dua na nodra soqoni ena Kingdom Hall. Au tomani ratou niu via kila se o cei o ira. Ni noqu ivakarau meu dau qaqarauni, au vakatulewataka  meu dabe e muri meu raici ira na curu mai. Au kauta tale tu ga na noqu dakai.

E veisautaka noqu bula na soqoni qori. E vaka ga au tiko ena dua tale na vuravura. Era kidavaki au ena mata mamarau, laurai tale ga e matadra nira yalololoma qai daudina. E duatani sara mai na ivakarau ni bula au raica e veisiga.

Au vakatulewataka meu vuli iVolatabu kei ira na iVakadinadina. Na levu ni ka au vulica, au raica kina ni dodonu meu veisautaka na noqu ivakarau ni bula. E uqeti au na ka e tukuna na Vosa Vakaibalebale 13:20: “Ena vuku mai ko koya sa malele vata kei ira na vuku: Ia ko koya era veitokani vata kei na lialia ena rusa.” Au mani vakatulewataka meu muduka na noqu dau veimaliwai kei ira na noqu ilala. E sega ni rawarawa qori, ia e vukei au o Jiova.

Au muduka na noqu dau vakatavako kei na vakayagataki ni wainimategaga. Au kotiva na uluqu, luvata noqu sau qai tinia na noqu dau vosavosa ca. Sa qai vakadua meu lewa vinaka na ka au cakava ena noqu bula.

Au sega ni dau taleitaka na wilivola, e sega gona ni rawarawa meu wilika na iVolatabu qai vakasamataka vakatitobu. Ia ena noqu sasaga vagumatua, au bucina kina meu lomani Jiova. Ia sa tekivu me beitaki au na noqu lewaeloma. E vakayalolailaitaki au na noqu dau veinanuyaka ni na sega ni rawa vei Jiova me vosoti au ena vuku ni veika au dau cakava. Ia e vakayaloqaqataki au na ivakaraitaki ni nona vosoti Tui Tevita ena cala bibi a cakava.—2 Samuela 11:1–12:13.

E sega tale ga ni rawarawa meu wasea na noqu vakabauta. (Maciu 28:19, 20) Baleta au lomaleqataka au na sotava e dua au vakamavoataka ena gauna sa oti. Ia e veisau qori ni toso na gauna. Noqu vukei ira na so tale mera kilai koya na Tamada vakalomalagi Dauveivosoti, au vakila kina na vakacegu dina.

Levu vei ira na noqu ilala era sa mate so era tu e valeniveivesu. Sa qai vakainaki qo na noqu bula, au vakanamata tale tu ga ena gauna se bera mai. Au vulica meu dau yalomalumalumu, talairawarawa qai lewa vinaka na noqu cudru. Qori e vinaka kina na noqu veimaliwai kei ira na so tale. Ena gauna qo, au marautaka na noqu vakawati kei Carmen kei na neirau vukei ira eso tale mera vulica na iVolatabu.

Au dau butako ena baqe e liu, nikua au sa dau sasamaki kina!