KE O itubutubu, o sa bau sotava na ituvaki e vakamacalataki mai cake? Ke vakakina, o dau vakasamataka na sala cava mo vakadodonutaki luvemu kina? Se mo vakadodonutaki koya se kua? Vakacava e cala me vakadodonutaki o luvemu?

Na vosa veivakadodonutaki ena iVolatabu e sega ni vakaibalebaletaka ga na veitotogitaki. E vakaibalebaletaki vakalevu ena veivakasalataki, veidusimaki, kei na veivakavulici. E sega vakadua ni tiko kina na vakasama ni ka e caka ena sala e veivakalolomataki se voravora.—Vosa Vakaibalebale 4:1, 2.

Nona veivakadodonutaki na itubutubu e vaka na teitei. Na dauteitei ena vakarautaka na qele, ena vakasuasuataka, qai taqomaka mai na meca ni itei se na co ca. Ni tubu na itei, ena kotiva na dauteitei me rawa ni tubu vinaka. E kila na dauteitei ni levu na ka e rawa ni cakava me bula vinaka kina nona itei. E levu tale ga na ka e rawa nira cakava na itubutubu mera qaravi ira kina na luvedra. Ia eso na gauna e bibi mera veivakadodonutaki, vaka ga na kena kotivi na itei. E bibi qori mera vukei totolo kina na gone ena so na ka era lekata, mera muria tiko ga kina na sala dodonu. Ia me qarauni na kotivi ni itei, ke sega ena vakavu leqa. Nodra veivakadodonutaki se veidusimaki tale ga na itubutubu e dodonu me caka vakayalololoma.

E ivakaraitaki vinaka vei ira na itubutubu o Jiova. Nona veivakadodonutaki vei ira nona tamata talairawarawa e vuravura e mana qai taleitaki. Sa rauta mera ‘vinakata nona veivakadodonutaki.’ (Vosa Vakaibalebale 12:1, NW) Era “taura matua” na veivakadodonutaki ra qai ‘sega ni laiva.’ (Vosa Vakaibalebale 4:13) O rawa ni vukei luvemu me ciqoma vakarawarawa na veivakadodonutaki  ena nomu vakatotomuria e tolu na sala e dau veivakadodonutaki kina o Jiova: (1) loloma, (2) yalorawarawa, kei na (3) dei.

Na loloma e yavu ni veivakadodonutaki i Jiova. E kaya na iVolatabu: “Ni sai koya sa lomana ko Jiova, sa vunauca ko koya; me vaka sa ia na tamata vua na luvena sa vinakata ko koya.” (Vosa Vakaibalebale 3:12) Kuria qori, o Jiova ‘sa loloma ka daulomasoli, sa vosovoso vakadede.” (Lako Yani 34:6) Qori na vuna ena sega kina ni dau veivakalolomataki qai voravora o Jiova. E sega tale ga ni dau tauca na vosa kaukaua, veivakalewai, se vosa mosimosi. Ni vosa va qori e rawa ni veivakamovoataki me vaka “nai seleiwau.”—Vosa Vakaibalebale 12:18.

Ia ena sega ni taucoko nona muria na itubutubu na ivakaraitaki uasivi ni veivakadodonutaki i Jiova. So na gauna e dau dredre mo lewa vinaka nomu cudru, ia mo nanuma tiko ni veivakadodonutaki e tau ena cudru e dau voravora, sivia tale, qai sega ni vuli kina o gone. Kena ikuri, na veivakadodonutaki e caka ena dela ni cudru e sega ni ivakaraitaki ni loloma dina. E vakaraitaka ga nona sega ni lewai koya rawa e dua.

Kuria qori na veivakadodonutaki e caka ena loloma dina kei na lewa matau ena yaga vakalevu vei luvemu. Raica na sala erau muria o Joji kei Nai, sa vakamacalataki oti mai.

“Dua na ka na neirau cudru ni yaco yani o Jope, ia keirau saga me keirau kua ni vakaraitaka ena gauna e vakamacalataka tiko kina na vu ni nona bera. Ni sa bogilevu, keitou vakatulewataka me keitou qai veitalanoa ena mataka. Ena siga tarava, sa qai rawa ni keirau vakatulewa vakadodonu, e tara tale ga na lomai Jope. E yalorawarawa me muria na ka e tukuni vua. Keirau raica ni noda sega ni lewai keda vinaka vakauasivi ena ituvaki vaka oya, ena sega ni wali rawa kina na leqa. Ena wali rawa ga kevaka eda vakarorogo e liu.”—Joji.

“E vakacudrui au dina na nona mokuti ganena o luvequ tagane. Ia au sega ni vakataulewa sara ena gauna vata ya ni levu dina na noqu cudru, au mani vakatalai koya ga ina nona rumu. Ni sa malumu na noqu cudru, sa qai rawa niu vakamacalataka vakamalua vua ni sega ni dodonu na ka e cakava qai vakaraitaka vua ni vakararawataki tacina dina. Na iwalewale e vakayacori qori e ciqoma kina o koya na veivakadodonutaki. Mani kere veivosoti vei tacina, mokoti koya sara.”— Nai.

 Io, na veivakadodonutaki e okati tale ga kina na tau ni itotogi, ia e bibi me caka vakayalololoma.

Na veivakadodonutaki i Jiova e dau caka ena sala e ‘veirauti ga.’ (Jeremaia 30:11; 46:28) Ni kilai keda vinaka, kila tale ga na keda ituvaki. Era na muria vakacava qori na itubutubu? E vakamacalataka o Sitiveni, “dina ni keirau rarawataka na nona caki voli o Nani, keirau saga me keirau nanuma tale ga ni o koya se gone, bera ni yalomatua.”

E saga tale ga me cakava qori na wati Nai, o Ropate. Ni ratou talaidredre na luvequ, au dau vakataroga: ‘Qo e vakavudua ga se sa na tiki ni nona bula? E wawale beka se tauvimate vakalailai? E ivakatakilakila beka ni dua na leqa e levu cake?’

Na itubutubu yalorawarawa ena nanuma ni se tubu cake tiko o gone qai sega ni yalomatua vakataki ira. A vakadinadinataka qori o Paula ena nona vola: “Niu se gone, au dau vosa vagone, au vakanananu vagone, au vakasama vagone.” (1 Korinica 13:11) E kaya o Ropate: “Noqu dau vakasamataka lesu na ka au dau cakava ena gauna au se gone kina, e vukei au meu lewai au vinaka.”

E bibi me donu tiko ga na nomu rai kei na nomu sega ni namaka vakasivia vua na ka, ena gauna vata qori mo vakadodonutaki koya ni talaidredre. Me nanuma tiko na itubutubu ni vakaiyalayala ga na ka e rawata o gone. Ena vinaka kina nomu veivakadodonutaki ena laurai tale ga ni o yalorawarawa.

E kaya na Malakai 3:6: “Koi au ko Jiova, ka’u sa sega ni veivukiyaki.” Era nuitaka na tamata i Jiova na ka dina qori, e vakacegui ira tale ga. Era na nuidei tale ga na gone ke o dei ena nomu veivakadodonutaki. Ia ke o dau veiveisau ni o cudru se rarawa, ena vakayalolailaitaki luvemu qai vakavu veilecayaki.

E kaya o Jisu: “Me ‘Io’ ga na Io, me ‘Sega’ na Sega.” E yaga qori ena nomu veituberi. (Maciu 5:37) Vakasama vakayalomatua ni bera ni o tukuna e dua na itotogi o na tauca ke beci nomu lewa. Ke tiko e dua na itotogi o kaya vei luvemu ni o na tauca, mo tauca sara vua na itotogi ya.

Me dei tale ga na veivakadodonutaki e bibi mo drau dau veitalanoa kei watimu. E vakamacalataka o Ropate: “Niu vakadonuya vei ratou na gone e dua na ka, ia au sega ni kila ni sega ni vakadonuya o tinadratou, au na veisautaka na noqu vakatulewa meu tokoni watiqu.” Ke drau sega ni duavata na itubutubu ena sala me wali kina e dua na ituvaki, e bibi mo drau veitalanoataka drau qai duavata ena ka sa vakatulewataki.

Ena yaga vakalevu na nomu veivakavulici ke o vakatotomuria na nona yalololoma, yalorawarawa, kei na dei ni nona dau veivakadodonutaki o Jiova. Nomu veidusimaki vakayalololoma ena vukei luvemu me yalomatua qai nuitaki ni sa uabula. E kaya na iVolatabu: “Vakatavulica na gone e na sala e dodonu me lako kina: Ia ni sa qase mai, ena sega ni lako tani mai kina.”—Vosa Vakaibalebale 22:6.