O Smita * e dua na marama yabaki 35 e Dhaka, mai Bangladesh. E kilai ni dauyalololoma, veikauaitaki, daucakacaka qai marautaka nona bula vakawati. E dau taleitaka me vukei ira tale ga na tamata mera kila na veika sa vulica me baleta na Kalou. Ia eratou kidacalataka nona lewenivuvale kei nona itokani ni a tauvimate vakasauri qai mate ena loma ga ni dua na macawa.

Na veika e kilai kina o Smita, e kilai tale ga kina o James kei watina rau yabaki 30 vakacaca. E rau gade ena dua na vulaitubutubu vei nodrau itokani ena ra kei Mereke. Ia rau sega ni suka tale i Niu Yoka na vanua rau vakaitikotiko kina, ni rau laucoqa mate e gaunisala. Dua na ka na nodra rarawa na wekadrau kei ira era cakacaka vata.

Nikua, e takalevu tale ga e veiyasa i vuravura na rarawa kei na veika ca. Kena ivakaraitaki, era mate ena ivalu na lewenivanua kei na sotia. O ira tale ga e sega nodra cala e vakayacori vei ira na itovo kaukaua kei na basulawa. E veitauvi na mate rerevaki, levu tale ga era mate ena vakacalaka se mani vakacava nodra yabaki ni bula, vutuniyau se tauvanua. E ravuravu na leqa tubukoso ena dua na yasayasa qai sega ni wasea e dua. E takalevu na veivakaduiduitaki kei na ivalavala tawadodonu. De dua o sotava tale ga qori.

E sega gona ni kurabuitaki ke da taroga:

• Cava era sotava kina na tamata vinaka na veika ca?

• Me beitaki beka na Kalou ena veika qori?

• Vakacava e dodonu me yaco ga, se era vakavuna na tamata?

• E baleta beka na revurevu ni veika ca e vakayacori ena bula sa oti?

• E tiko beka e dua na Kalou kaukaua, ke vakakina, na cava e sega ni taqomaki ira kina na tamata vinaka mai na ka e veivakaleqai?

• Ena oti na rarawa kei na veika ca?

Ni bera ni saumi na veitaro qori, dikeva mada e rua na taro: Na cava eda sotava kina na veika ca? Na cava tale ga ena cakava na Kalou?