E kaya o Paul, e dua na tagane vakawati, e rua na luvena: “Gauna e tubu kina na isau ni iyaya, e lailai na kakana qai sau levu. Keimami dau laini dede tu ena voli kakana, ia ni keimami qai yaco yani e liu, sa sega na ka e vo. Era suivotu na lewenivanua ena levu ni nodra walokai, so era rebo ga e tolonisala. Na iyaya lalai mada ga meda bula kina e veisiga sa sau levu sara ga. E bau lutu tale ga na kaukaua ni ilavo. Sega tale kina ni vo na noqu ilavo ena baqe, inisua kei na peniseni.”

E kila vinaka o Paul ni na bula ga nona vuvale ke rawata na “vuku.” (Vosa Vakaibalebale 3:21) E kaya: “Au daunilivaliva, ia au sega ni digia na cakacaka e soli vei au, lailai sara na ka au rawata kina. So era saumi au ena kakana kei na iyaya ni vale. Keu saumi ena va na uma sovu, au na vakayagataka e rua, volitaki e rua. E 40 na noqu luvenitoa, au volitaki ira nira sa lelevu, au volia tale e 300. Dua na gauna, au solia e 50 na toa, au rawata kina e rua na 50 na kilokaramu na taga sila qaqi. Ena dua na gauna balavu, qo sara ga na ka keitou kania tiko vakavuvale kei ira eso tale.”

E kila tale ga o Paul ni ka vakayalomatua me nuitaka na Kalou. Ena vukei keda na Kalou nida muria na nona ivakaro. E kaya o Jisu me baleta na ka meda bula kina e veisiga: “Dou kua . . . ni lomaocaoca, ni . . . sa kila tu na Tamamudou ni bibi vei kemudou na ka qori.”—Luke 12:29-31.

E ka ni rarawa ni o Setani na meca ni Kalou e sa vakacalai ira tiko e levu mera vakabibitaka ga na veika vakayago. Era lomaocaocataka kina vakalevu na veika era gadreva, na ka mera bula sara ga kina, kei na kena era dau vinakata wale tu ga. Levu era dinau, era qai vakila ni o koya “na daukerekere e bobula vei koya e solia vua na ka.”—Vosa Vakaibalebale 22:7.

Eso tale era vakatulewa ca. E kaya o Paul: “Levu  keimami tiko veitikivi era biuta nodra vuvale kei na nodra itokani mera lai qara na bula vutuniyau e vanuatani. So vei ira na lako qori e sega mada ga nodra ivolatara ni cakacaka. Era dau vuni ke ra veivaqaqai yani na ovisa, ra moce tale ga e tolonisala. Era sega ni nuitaka na Kalou me vukei ira. Ia keitou saga me keitou walia vakavuvale na neitou leqa vakailavo, salavata kei na nona veivuke na Kalou.”

E kaya tale o Paul: “E tukuna o Jisu: ‘Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca. Na siga kece sa dui tu ga na kena ca.’ E qaqa ni noqu masu gona e veisiga me ‘solia’ na Kalou ‘na kakana e rauti keitou nikua’ me keitou bula kina. E vukei keitou dina, me vaka ga e yalataka o Jisu. Eso na gauna keitou na sega ni vakacegui ena ka keitou vinakata. Dua na gauna niu laini meu lai voli kakana, au sega mada ga ni kila na cava e volitaki tiko. Niu qai yaco yani e liu sa vo tu ga na kakana na yogurt. Au sega ni dau taleitaka. Ia e kakana, keitou mani vakayakavi kina. Au vakavinavinaka vua na Kalou ena gauna kece qori, keitou sega vakadua ni walokai vakavuvale ni keitou moce ena bogi.” *

“Na gauna qo sa vinaka neitou bula vakailavo. Ia mai na veika keitou sotava, keitou vulica ni bibi noda nuitaka na Kalou meda kua ni lomaocaoca vakalevu. Ena vukei keda o Jiova * ke da saga meda cakava tiko ga na lomana. Keitou vakila na dina ni Same 34:8: ‘Tovolea mada qai raica ni vinaka o Jiova, e marau na tamata e vakaruru vua.’ Keitou sega gona ni nuiqawaqawataka ke mani vakaleqai tale neitou bula vakailavo.

“Sa qai matata qo ni sega ni bibi noda cakacaka se ilavo, me tiko ga na ka meda kana kina. Keitou waraka tiko nikua na vakayacori ni yalayala ni Kalou: ‘Ena levu na covuata e vuravura.’ Ia na gauna mada ga qo, ‘ke sa tiko na kakana, na isulu, meda lomavakacegu ena veika qo.’ E vakayaloqaqataki keda na veiuqeti ni iVolatabu: ‘Me kua ni laurai ena nomuni bula ni oni lomana na ilavo, ni lomavakacegu ga ena ka e sa tiko vei kemuni. Ni a kaya: “Au na sega sara ni laivi iko se biuti iko.” O koya gona, meda yaloqaqa da qai kaya: “E dau vukei au o Jiova, au na sega ni rere.”’” *

Ke dua e via “lako vata kei na Kalou” me vaka sa cakava tiko o Paul kei na nona vuvale, ena bibi me laurai vua na vakabauta dina. (Vakatekivu 6:9) Ke da leqa tiko vakailavo nikua se dua na gauna se bera mai, eda vulica e dua na ka bibi ena ivakaraitaki ni vakabauta i Paul kei na nona vuku.

Ia vakacava ke vakavuna tiko noda lomaocaoca na leqa ni bula vakavuvale?