Au susu ena levu na yasayasa e Los Angeles, mai Kalifonia, e Merika. Na yasayasa kece qori era kilai tani ena nodra dau bula vakailawalawa kei na vakayagataki ni wainimate gaga. Keitou le ono na gone, au ikarua ni qase.

E susugi keitou o Na ena lotu tawase. Ia niu sa itabagone, e rua noqu ivakarau ni bula. Ena Sigatabu au lewena sara tu na matasere e valenilotu. Na vo ni macawa, sa noqu bula ga na marau, vakasabusabutaki ni wainimate gaga kei na itovo vakasisila.

Au dau cudrucudru totolo, au voravora tale ga. Au na vakayagataka na ka ga au taura rawa me noqu iyaragi. Sega sara ga ni yaga na veika au vulica mai valenilotu. Au dau tukuna va qo, “E veisausaumi na Turaga—ia e vakayagataki au!” Niu tiko ena sekeneri ena icavacava ni veiyabaki ni 1960, au taleitaka e dua na ilawalawa vakapolitiki e valataka noda dodonu, e vakatokai me Black Panthers. Au lewena sara na isoqosoqo e koronivuli e valataka nodra dodonu na gonevuli. So na gauna ni keimami vakaduduile, e sogo sara ga kina vakalekaleka na koronivuli.

E sega ni tarova na noqu dau cudrucudru kei na ivalavala voravora na vakaduduile. Au tekivu vakaitavi sara ena kena vakayacori na itovo kaukaua vei ira na matatamata era cati. Kena ivakaraitaki, so na gauna keimami dau lai sarava vakailala na iyaloyalo ni gauna makawa me baleta nodra vakararawataki na kai Aferika era bobula tu e Merika. Ni vakacudrui keitou na ivakarau vakaloloma qori, keitou dau buturaki ira kina na itabagone yago vulavula era sarasara tale tiko ga e kea. Oti keitou lako ena yasayasa era tiko kina na yago vulavula mera buturaki tale ga.

E ivalavala voravora tale ga na tuakaqu kei na rua na taciqu. Niu sa voleka gona ni yabaki 20, keitou kilai levu ena mataqali itovo qori vaka kina na basulawa. Keitou dau veivala vakalevu kei ira na ovisa. Au vakailala tale ga kei na dua na ilawalawa voravora kilai levu, e lewena tiko e dua na taciqu. Sa torosobu tiko ga noqu ivakarau ni bula.

Rau iVakadinadina i Jiova na nona itubutubu e dua noqu itokani. Rau sureti au ina nodra soqoni vakaivavakoso, au mani gole kina. iMatai ni ka au liaca oya nira duidui sara na iVakadinadina. Era yadua kece na iVolatabu, ra cega  tale ga ni vakacagau tiko na soqoni. Era bau vunau mada ga na itabagone! E talei noqu sa qai kila ni tiko na yaca ni Kalou, o Jiova, au rogoca tale ga na kena cavuti. (Same 83:18) Era duikaikai na lewe ni ivavakoso qai sega na veivakaduiduitaki.

Au makutu na lako ina nodra soqoni, sega ga ni lomaqu na vuli iVolatabu. Dua na bogi niu tiko ena soqoni era a lako na noqu itokani ena dua na soqo. Era buturaka kina e dua na itabagone me yacova ni mate ni bureitaka nona jakete kulinimanumanu. Na siga e tarava era uvudavuitaka nodra laba. Ra nanuma ni sega ni bibi na ka ca era cakava. Levu era bala e valeniveivesu me yacova nodra mate. Au marau niu a sega ni maliwai ira ena bogi qori. Au via veisautaka noqu bula, au vuli iVolatabu sara.

Niu dau veivakaduiduitaki e liu, au kurabuitaka na veika au raica vei ira na iVakadinadina. Kena ivakaraitaki, e lako i vanuatani e dua na iVakadinadina yago vulavula, qai biuti ratou tu mai na luvena ena dua na vuvale eratou yago loaloa. Dua tale ga na vuvale yago vulavula ratou vakaicilitaka e dua na itabagone yago loaloa. Au vakadeitaka kina ni vakaibalebaletaki na vosa i Jisu ena Joni 13:35 vei ira na iVakadinadina i Jiova: “Na ka qo era na kila kece kina ni dou noqu tisaipeli, ke dou veilomani.” Au kila ni qo sara ga na isoqosoqo era duavata na lewena.

Niu vulica na iVolatabu au raica ni dodonu meu veisautaka na ivakarau ni noqu vakasama. Me veisau noqu rai, meu kauaitaka na bula veiyaloni, meu raica tale ga ni ivakarau ni bula vinaka duadua ga qo. (Roma 12:2) Yaco na gauna meu toso kina vakayalo, au papitaiso sara meu iVakadinadina i Jiova ena Janueri 1974.

Niu sa papitaiso oti se vinakati tiko ga meu lewa vinaka na noqu dau cudru. Dua kena ivakaraitaki, au cakacaka tiko vakavunau e veivale, au qai cicimuria e dua e se qai butakoca sara ga na retio ni noqu motoka. Niu voleka ni toboki koya, e kolotaka ga na retio qai gutuwa. Gauna au talanoataka kina, e tarogi au sara e dua na qase ni ivavakoso, “Stephen ke o toboki koya, na cava o na cakava vua?” Na taro qori au vakasama tale kina, uqeti au meu saga tiko ga na bula veiyaloni.

Au tekivu veiqaravi vakaitalatala vakatabakidua ena Okotova 1974, meu vakayagataka e 100 na aua e veivula meu veivakavulici kina ena iVolatabu. Oti au lai veiqaravi tale ga ena valenivolavola liu ni iVakadinadina i Jiova e Brooklyn, mai Niu Yoka. Au lesu i Los Angeles ena 1978 meu lai qaravi tinaqu ni tauvimate tiko. Oti e rua na yabaki au vakamautaki Aarhonda. E tokoni au sara vakalevu ena veiqaravi vei Na me yacova nona vakacegu. Keirau qai lai vuli kei Aarhonda ena Koronivuli o Kiliati, oti keirau lesi i Panama, na vanua keirau se veiqaravi tiko ga kina vakadaukaulotu.

Mai na gauna au papitaiso kina, dau yaco eso na ka e rawa sara ga ni vakavuna meu cudru katakata. Au saga meu kua ni tiko kei ira na via vakacudrui au seu cakava eso tale na ka me ruru kina noqu cudru. Levu era vakacaucautaka noqu sasaga, wili kina o watiqu. So mada ga na gauna au kurabui tale! Au sega ni vinakata me nanumi niu rawata ga qori vakataki au. Ia au vakabauta ni veisautaka noqu bula na iVolatabu.—Iperiu 4:12.

E vakainaki noqu bula niu vulica na iVolatabu, au guta tale ga kina na bula veiyaloni. Sa oti noqu dau veibuturaki, au veivakavulici ga vakayalo. Au vuli iVolatabu mada ga kei na dua keirau dau veimecaki ena sekeneri! Ni papitaiso keirau mai lewe ni bure vata tu me dua na gauna. Keirau se veitokani tiko ga nikua. Me yacova mai qo, keirau vakavulica ena iVolatabu vakaveiwatini e le 80 mera iVakadinadina i Jiova.

Au vakavinavinaka vakalevu vei Jiova ni vakatakila vei au na bula marau e vakainaki niu duavata kei ira na lewe ni mataveitacini.