ULUTAGA LEVU | RAI NI KALOU ME BALETA NA IVALU
Rai ni Kalou me Baleta na iValu ena Gauna Makawa
E vakasaurarataki vakalevu e dua na matatamata. Era masuta wasoma na Kalou mera vakabulai, ia era sega ni vukei ena gauna vata qori. Qo o ira na Isireli, era nona dauveiqaravi na Kalou ena gauna makawa. E vakasaurarataki ira na matanitu kaukaua o Ijipita. (Lako Yani 1:13, 14) Sa dede sara nodra waraka tu na lewe i Isireli me vakaotia na veiliutaki voravora nei Ijipita na Kalou. Ia e qai yavala ena nona gauna lokuci. (Lako Yani 3:7-10) E kaya na iVolatabu ni valuti ira sara ga na Ijipita na Kalou. E totogitaki ira ena vica na kuita warumisa, oti qai vakarusa na tui Ijipita kei na nona mataivalu ena Wasa Damudamu. (Same 136:15) E vakadinadinataka na Kalou o Jiova ni “dauvala qaqa” ena vukudra na nona dauveiqaravi.—Lako Yani 15:3, 4.
Ni vakaitavi sara ga na Kalou ena nona valuti o Ijipita, e vakaraitaka qori ni tokona eso na ivalu. Ena so tale na gauna, e dau vakadonuya mera lai valu na Isireli. Kena ivakaraitaki, e vakaroti ira mera valuta na matanitu o Kenani ni sa rui ca. (Vakarua 9:5; 20:17, 18) E dusimaki Tui Tevita tale ga e Isireli me valuta na matanitu dau veivakasaurarataki o Filisitia. E tukuna mada ga vua na ka me cakava me qaqa kina.—2 Samuela 5:17-25.
E matata ena itukutuku vakaivolatabu qori ni gauna e rivarivabitaki kina nodra bula na Isireli, nira vakalolomataki se vakasaurarataki, ena vakadonuya na Kalou na ivalu mera taqomaki kina na nona dauveiqaravi, vaka kina na sokalou dina. Ia dikeva mada qo e tolu na vuna bibi e dau vakadonuya kina na ivalu na Kalou.
-
LEWA GA NA KALOU O KOYA ME VAKAITAVI. E kaya na Kalou vei ira na Isireli ena dua na gauna: “Ena sega ni vinakati moni vala ena ivalu qo.” Na vuna? Ni na vala sara ga ena vukudra. (2 Veigauna 20:17; 32:7, 8) E levu na gauna e dau cakava qori me vaka sa tukuni oti mai. So tale na gauna e vakaroti ira nona dauveiqaravi ena gauna makawa e Isireli mera vakaitavi ena ivalu e vakadonuya, okati kina na kena taqomaki na Vanua Yalataki—Vakarua 7:1, 2; Josua 10:40.
-
LEWA GA NA KALOU NA GAUNA NI IVALU. E dodonu mera wawa tiko ga ena vosota na dauveiqaravi ni Kalou me yacova na gauna sa lokuca tu o koya mera qai valuti kina na dau veivakasaurarataki kei ira na tamata ca era tu yavoliti ira. Me yacova na gauna qori, mera kua ni lewa ga vakataki ira mera vala. Ke ra cakava qori, e sega ni vakadonuya o koya. E vakaraitaka na iVolatabu ni gauna era lai vala kina vakataki ira na Isireli qai sega ni vakadonuya na Kalou, e dau tini ca ga. *
-
E vakaitavi na Kalou ena nodra valuti na kai Kenani, ia e vakabula eso me vakataki Reapi kei na nona vuvale
SEGA NI VINAKATA NA KALOU ME DUA E MATE, OKATI KINA O IRA NA DAU CAKA CA. E iVurevure ni bula na Kalou o Jiova, a Buli keda tale ga. (Same 36:9) E sega gona ni vinakata meda mate. Ia era tiko eso era dau lawaki ca nira veivakalolomataki ra qai veivakamatei sara mada ga. (Same 37:12, 14) Me tarovi qori, e vakadonuya na Kalou nodra valuti na dau caka ca. Ia ena veiyabaki era lai valu tiko kina na Isireli, e se “dauyalololoma” tiko ga na Kalou qai ‘berabera ni cudruvi’ ira na vakalolomataki ira tiko na Isireli. (Same 86:15) Kena ivakaraitaki, ni bera ni valuta e dua na koro o Isireli, ena “kacivaka” e liu “na tiko sautu,” me rawa nira veisau, mera kua ni valuti. (Vakarua 20:10-13) Na nona cakava qori na Kalou, e vakaraitaka kina ni “sega ni vinakata me mate na tamata ca” e “vinakata ga me veisautaka na nona itovo na tamata ca me bula.”—Isikeli 33:11, 14-16. *
Eda raica gona ni tiko na vuna e vakadonuya kina na Kalou na ivalu, oya me vakaoti kina na veivakalolomataki kei na ivakarau ca. Ia na Kalou ga e lewa na gauna kei koya e vakaitavi ena ivalu. Cava o nanuma, e dau vakariri na Kalou me vakaitavi ena ivalu, me vakadavedra tale ga kina vakalevu? Sega. E cata na itovo kaukaua. (Same 11:5) Vakacava mada na gauna e tekivu veiqaravi kina vakaitalatala e vuravura na Luvena, o Jisu Karisito, sa veisau kina na rai ni Kalou me baleta na ivalu?
^ para. 7 Kena ivakaraitaki, dua na gauna era druka na Isireli nira valuti ira na Amalekaiti kei ira na kai Kenani, ni sega ni vakadonuya na Kalou. (Tiko Voli mai na Lekutu 14:41-45) Ni oti e vica vata na yabaki, e lai vala tale ga o Tui Josaia ena dua na ivalu a sega ni vakadonuya na Kalou, mani mate kina.—2 Veigauna 35:20-24.
^ para. 8 Era sega ni kacivaka na tiko sautu na Isireli ni bera nira valuti ira na kai Kenani. Na vuna? Ni a soli vei ira na kai Kenani e 400 na yabaki mera veisautaka kina nodra itovo ca. Nira qai lai valuti ira na kai Kenani na Isireli, sa dredre sara ga mera veisautaki. (Vakatekivu 15:13-16) Sa dodonu ga mera vakarusai kece. Ia era vakabulai eso nira veisautaka nodra itovo.—Josua 6:25; 9:3-27
Rawa ni o Wilika Tale ga
NA VALE NI VAKATAWA
Reapi “Okati me Yalododonu ena Nona Cakacaka”
Nida wilika na italanoa kei Reapi, eda kila vakacava ni kauaitaki keda kece o Jiova? Na cava eda vulica ena nona vakabauta?
NA VALE NI VAKATAWA
Nona Vakataulewa na Kalou—E Vakaraitaka ni Dau Veivakalolomataki?
Me saumi na taro qori, raica mada e rua na ivakaraitaki ni nona vakataulewa na kalou e volai ena iVolatabu—na Waluvu ena siga i Noa kei na nodra vakarusai na kai Kenani.
