E raica toka e dua na goneyalewa lailai na kena kumukumuni me vaka na o na kubou mai na vale ni buli iyaya. E nanuma ni qori na vanua e buli kina na o. Ena rairai lasa ni cala nodra rai na gone ena so na ituvaki va ya. Ia ena so tale na ituvaki e rawa ni veivakaleqai na rai cala. Kena ivakaraitaki, ena rawa ni yaco e dua na leqa levu ke sega ni wiliki vinaka na ivakamacala ena dua na tavaya ni wainimate.

E vakarerevaki sara ke cala na rai me baleta na veika vakayalo. Kena ivakaraitaki, e cala nodra rai eso ena veika e vakavulica o Jisu. (Joni 6:48-68) Era rawa ni vulica e levu na ka vei Jisu, ia era sega ni via rogoci koya.

Dua na ka totoka ke o dau wilika na iVolatabu me dusimaki iko. Ia vakacava e dau cala ena so na gauna na nomu rai me baleta na ka o wilika ena iVolatabu? Sa yaco qori vei ira e levu. Raica mada qo e tolu na tikinivolatabu e cala kina nodra rai e levu.

• E cala nodra rai e levu me baleta na ivakaro vakaivolatabu qo, “mo [“rerevaka,” VM] na Kalou dina.” Era nanuma ni vakaibalebaletaka tiko ya na rere ni domobula. (Dauvunau 12:13) Ia e sega ni vinakata na Kalou mera domobulataki koya nona dauveiqaravi. E kaya: “Mo kua ni rere niu tokoni iko. Kua ni taqaya niu nomu Kalou. Au na vakaukauataki iko, io, au na vukei iko.” (Aisea 41:10) Na noda rerevaka na Kalou e kena ibalebale ga noda vakalagilagi koya kei na noda dokai koya.

• Era taura cala e levu na tikinivolatabu qo: “E vagauna na ka kece ga, . . . na gauna ni sucu kei na gauna ni mate.” Era nanuma ni sa lewa oti na Kalou na gauna meda mate kina. (Dauvunau 3:1, 2) Ia na tikinivolatabu qori e vakamacalataka tiko na ka e dau yaco ena noda bula na tamata, wili kina na mate. E tukuna na Vosa ni Kalou ni rawa ni vakatau tale ga ena noda vakatulewa na balavu ni noda bula. Kena ivakaraitaki, e kaya na iVolatabu: “Na rerevaki Jiova e vakabalavutaka na bula.” (Vosa Vakaibalebale 10:27; Same 90:10; Aisea 55:3) E dina vakacava qori? Na noda doka na Vosa ni Kalou ena uqeti keda meda cata na itovo e rawa ni vakaleqa noda bula, me vaka na mateni kei na veiyacovi tawadodonu.—1 Korinica 6:9, 10.

• Ni tukuni ena iVolatabu ni na ‘maroroi me vakamai’ na lomalagi kei na vuravura, era nanuma e levu ni na vakarusa na vuravura qele na Kalou. (2 Pita 3:7) Ia e yalataka na Kalou ni na sega ni vakarusai na vuravura, “sa vakataudeitaka na yavu ni vuravura, . . . ena sega ni yavalati mai na kena vanua me tawamudu, io me tawamudu.” (Same 104:5; Aisea 45:18) Ena sega ni vakarusai na vuravura, ena vakarusai ga na ituvaki ca ni vuravura qo. Vakacava na lomalagi? Na lomalagi e rawa ni vakaibalebaletaka ena so na gauna na macawa, vanua eda raica nira tu kina na kalokalo, kei na nona itikotiko na Kalou. Qori tale ga ena sega ni vakarusai.

E vakadinadinataki ena tolu na ivakaraitaki sa vakamacalataki oti, ni dau cala nodra rai e levu me baleta na iVolatabu. De dua era na beitaka na Kalou eso ra qai lomatarotarotaka, ‘Ke vuku na Kalou qai kila kece na ka, na cava e sega ni vakarautaka kina e dua na ivola e matata na ka kece e volai kina qai kilai rawarawa?’ Raica mada e tolu na vuna e dau cala kina nodra rai e levu me baleta na iVolatabu.

1. E vakarautaki na iVolatabu me baleti ira na yalomalumalumu kei ira na yalorawarawa mera vakavulici. A kaya o Jisu vei Tamana: “Au vakavinavinaka vei kemuni, Tamaqu, na Turaga ni  lomalagi kei na vuravura, ni oni vunia matua na ka kece qo vei ira na vuku kei ira na vuli vinaka, oni qai vakatakila ga vei ira na gone lalai.” (Luke 10:21) O ira ga e donu nodra rai e rawa nira kila na ka e volai ena iVolatabu. Levu na gauna e dau cala nodra rai me baleta na iVolatabu o ira na dokadoka me vakataki ira na “vuku kei ira na vuli vinaka.” Ena yasana adua, era kila vinaka na iVolatabu o ira era yalomalumalumu qai yalorawarawa mera vakavulici me vakataki ira na “gone lalai.” Sa vakarautaka dina vakamaqosa na Kalou na iVolatabu!

2. E vakarautaki na iVolatabu me baleti ira era kerea na veivuke ni Kalou mera kila kina na ka e tukuni ena nona Vosa. E tukuna o Jisu ni na vinakati na veivuke meda kila vinaka na ka e vakavulica. O cei ena veivuke? E kaya o Jisu: “Na dauveivuke, na yalo tabu ena tala mai o Tamaqu ena yacaqu, ena qai vakavulica vei kemudou na ka kece.” (Joni 14:26) Kena ibalebale na igu kaukaua ni Kalou se na yalona tabu ena vukei keda meda kila vinaka na veika eda wilika ena iVolatabu. Ia ena sega ni solia na Kalou na yalo tabu vei ira era sega ni kere veivuke vua. Qori na vuna ena buawa kina vei ira na ka era wilika ena iVolatabu. Na yalo tabu ena uqeti ira tale ga na sa kila toka e levu na ka ena iVolatabu, mera vukei ira na se sasaga tiko mera kila vinaka na iVolatabu.—Cakacaka 8:26-35.

3. Eso na tikinivolatabu ena qai vakamatatataki ena kena gauna donu. Kena ivakaraitaki, a tukuni vua na parofita o Taniela me vola e dua na itukutuku me baleta na gauna se bera mai. A tukuna vua na agilosi: “O iko Taniela, mo tabonaka na vosa qo mo dregata na ivola me yacova na gauna ni icavacava.” E levu ena veisenitiuri sa oti era sega ni kila na veika era wilika ena ivola i Taniela. O Taniela mada ga a sega ni taura rawa na ibalebale ni so na ka a vola. A kaya ena yalomalumalumu: “Ia niu rogoca au sega ni kila na kena ibalebale.” Eda na qai kila ena gauna lokuci ni Kalou na ibalebale dina ni parofisai a vola o Taniela. A kaya tale na agilosi: “Mo lako Taniela ni sa tabonaki na vosa qo qai dregati me yacova na gauna ni icavacava.” O cei ena kila na itukutuku ni Kalou? “Ena sega ni dua na tamata ca ena kila rawa, era na kila ga na yalomatua.” (Taniela 12:4, 8-10) Io, ena qai vakatakila na Kalou na ibalebale ni so na tikinivolatabu ena kena gauna donu.

A cala tale ga ena so na gauna nodra rai na iVakadinadina i Jiova me baleta na iVolatabu. Ia na gauna e vakamatatataka kina na Kalou na nona Vosa, era yalorawarawa tale ga na iVakadinadina i Jiova mera veisautaka nodra rai. Qori era vakatotomuri ratou kina na yapositolo i Jisu, eratou dau yalomalumalumu ni veisautaka nodratou rai ni vakadodonutaki ratou o Jisu.—Cakacaka 1:6, 7.

Eda na rairai sega ni kauaitaka sara vakalevu nona rai cala e dua na goneyalewa lailai me baleta na buli ni o. Ia e bibi meda kauaitaka na noda rai me baleta na ka e vakavulica na iVolatabu. De dua eda sa dau wili iVolatabu tiko, ia e vinaka meda kerea nodra veivuke eso tale ena kena vakamatatataki na veika eda wilika ni levu na itukutuku ena iVolatabu e titobu na kena ibalebale. O cei era rawa ni vukei iko? O ira era yalomalumalumu nira vulica na iVolatabu, era nuitaka na veivuke ni yalo tabu ni Kalou mera kila kina na iVolatabu, era vakabauta tale ga nida sa donuya tu qo na gauna e vinakata na Kalou meda kila vinaka kina na iVolatabu. Yalovinaka, veitaratara kei na dua na iVakadinadina i Jiova se rai ena nodra website na jw.org. E yalataka na iVolatabu: “Ke o tagica tale ga na lomavuku . . . , o na kila na ka e baleta na Kalou.”—Vosa Vakaibalebale 2:3-5.