Cava sa Sega Kina na Veidokai me Baleta na Bula?
VUNA ME DOKAI KINA NA BULA
Ena rawa ni vakaleqai na noda bula, kei na noda itikotiko ke da sega ni doka na bula.
-
Na vakatavako e vakavuna na kenisa, ena dredre kina ina yago me valuta na mate qori. E rauta ni 90 na pasede era mate ena kenisa ni yatevuso. E rawa ni vu mai qori ena nodra vakatavako, se era ceguva na kena kubou.
-
Na veivanavanai e vakavuna nodra lomabibi e levu e veiyabaki. E kaya e dua na ripote ena Stanford University: “E laurai ena dua na vakadidike ni o ira mada ga na dro bula mai na [veivanavanai e koronivuli], e rawa nira rarawa qai lomabibi tu ena dua na gauna balavu.”
-
O ira era gunu se vakayagataka na wainimate gaga nira draiva tiko, ena rawa ni yaco kina na vakacalaka vei ira na taubale e gaunisala. Ke da sega ni doka na bula, ena rawa ni vakaleqai kina nodra bula o ira e sega na nodra cala.
KA O RAWA NI CAKAVA
Taqomaka nomu bula. E se rawa tiko ga ni o biuta na ivalavala e veivakaleqai me vaka na vakatavako, vakayagataki ni vape, gunu vakasivia se wainimate gaga. Qori e rawa ni vakaleqa na nomu bula, e vakaraitaka tale ga ni o sega ni doka nodra bula eso tale, okati kina ratou nomu lewenivuvale.
Mo dau qaqarauni. Me vinaka tiko na ituvaki ni nomu vale me kua ni yaco kina na vakacalaka. Qaqarauni ni o draiva, me vinaka tale ga na ituvaki ni nomu lori. Mo kua ni vakalaiva e dua me vakasaurarataki iko mo cakava e dua na ka e rawa ni o lai mavoa se mate kina.
Mo dau veinanumi. Na noda doka na bula e okati kina na noda rai me baleti ira na dui matatamata, vanua era cavutu mai kina kei na nodra isususu. Na veivakaduiduitaki kei na veicati e vakavuna na ivalu kei na itovo kaukaua e veiyasa i vuravura.
SALA ERA VAKARAITAKA KINA NA VEIDOKAI NA IVAKADINADINA I JIOVA
Era dau vakavulici ira eso tale ena sala mera bulabula kina. Na nodra porokaramu ni veivakavulici ena iVolatabu sa vukei ira e levu mera biuta na ka era bobula tu kina, me vaka na gunuvi vakasivia ni alakaolo se wainimate gaga.
Era muria na ivakatagedegede ni tataqomaki ena nodra cakacaka ni tarataravaki. O ira na bolecakacaka era vakavulici ena sala me kua ni yaco kina na vakacalaka nira veivuke ena tara ni nodra vale ni soqoni, se so na vanua ni vuli vakalou. E dau dikevi wasoma na veivale qori me rawa ni vakadeitaki ni sa muri tiko na lawa ni tataqomaki ena vanua qori.
Era dau veivuke ni yaco na leqa tubukoso. Ena yabaki sa oti, era veivuke ena rauta ni 200 na leqa tubukoso a yaco e veiyasa i vuravura. E vakayagataki tale ga kina e rauta ni 12 na milioni na dola e cautaki mera vukei kina na vakaleqai.
Ena 2014 a veitauvi e dua na mate na ebola ena Ra kei Aferika, a yaco tale ga qori ena Democratic Republic of Congo ena 2018. Era sa qai vakavulici ira na lewenivanua na ka mera cakava me kua ni tete kina na mate rerevaki qori. Era lesi tale ga eso mera lai vosa ena ulutaga, “E Veivakabulai na Talairawarawa.” Era vakarautaka na vanua ni vuluvulu ena icurucuru ena vanua ni nodra sokalou, ra qai vakamacalataka na bibi ni kena sava na liga kei na ka me caka mera taqomaki kina mai na mate rerevaki qori.
E Sierra Leone, e kacivaki ena dua na siteseni ni retio na nodra vakavinavinakataki na iVakadinadina i Jiova na nodra vukei ira na tacidra vakayalo, kei ira na sega ni iVakadinadina i Jiova mera taqomaki mai na mate rerevaki na ebola.
Qo e dua na Vale ni Soqoni e vakarautaki kina na vanua ni sava liga ni veitauvi na ebola ena 2014, e Liberia
a Na ivakasala yaga qori e vakaraitaka na kena kauaitaki na taqomaki ni nodra bula na lewenivuvale, kei ira eso tale ena Tokalau e Loma.
