Ðo xwe élɔ́ mɛ ɔ, nǔ tají hú gǎn ɖěɖěe Kúnnuɖetɔ́ Jexóva tɔn lɛ́ ɖó nukún kpó akpakpa sɔ́ mɛ kpó é ɖokpó wɛ nyí video Sinsɛnzɔ́ Jezu tɔn sín tan sín akpáxwé 1tɔn ɔ kpínkpɔ́n. Mɛ lǐvi mɔ̌kpán ko kpɔ́n. Akpáxwé nukɔntɔn ɔ jɛ́n ka nɛ́ ɖo akpáxwé 18 lɛ́ mɛ! Azɔ̌ tɛ́ nɔví súnnu kpó nɔví nyɔ̌nu kpó mǐtɔn lɛ́ ka ɖo wiwa wɛ bónú è ná sixú sɔ́ nǔ nú akpáxwé énɛ́ lɛ́? Nɛ̌ mi lɔ ka ɖo gǔdo nɔ nú yě wɛ ɖo azɔ̌ énɛ́ kɔn gbɔn?

 Alaxɔ Australasie tɔn mɛ wɛ è yí Sinsɛnzɔ́ Jezu tɔn sín tan sín akpáxwé lɛ́ gěgé dó kan jí ɖe hú gǎn. Ðo fínɛ́ ɔ, gbɛtɔ́ 50 jɛ 80 mɔ̌ wɛ nɔ ɖ’alɔ ɖo fímu ɔ sín akpáxwé ɖokpó ɖokpó blóbló mɛ. a È nɔ ná nǔɖuɖu gbɛ̌ta ɔ bǐ hwemɛ kpó gbada kpó, lobo nɔ lɛ́ ná nǔ e yě ná gblá nu é yě. È nɔ bló tuto nǔ e è ná ɖa é tɔn jɛ nukɔn. Esther e nɔ w’azɔ̌ ɖo azɔ̌xɔsá e nɔ kpé nukún dó nǔɖuɖu ɖiɖa wú é tínmɛ ɖɔ: “Mǐ nɔ xɔ nǔ lɛ́ ɖo axisinɔ vovo sí, bo ná dó mɔ ajɔxanú ɖagbe e nɔ ɖa nǔ lɛ́ é xɔ dó axi ɖagbe mɛ. Mǐ nɔ lɛ́ vɔ́ nǔ lɛ́ jlá ɖó hwɛhwɛ ɖo nǔ ɖiɖa kpáxwé, bo ná dó nyi alɔ nú nǔhɛngú.” Ðo azǎn ɖokpó ɖokpó jí ɔ, mǐ nɔ zán ɖɔ̌la Amɛlíka tɔn ɛnɛ mɔ̌ nú nǔɖuɖu mɛ ɖokpó ɖokpó tɔn.

 É nyí nǔɖuɖu kɛ́ɖɛ́ sín hudó wɛ mɛ e ɖo alɔ ɖó ɖ’é mɛ wɛ lɛ́ é ɖó ǎ, loɔ, yě lɛ́ ɖó hudó xɛnyaɖomɛjí tɔn. Xɛnyaɖomɛjí ɖo ali tɛ́ nu? Ðo Australie ɔ, hwesivɔ́ nɔ hun ɖo azǎn gěgé jí, bɔ gbɛmɛ nɔ hɔ́n ganjí; é ɖo mɔ̌ có, gǎ e hwesivɔ́ nɔ da é ɖé lɛ́ sixú wa nǔ dó gbɛtɔ́ wú. Bo ná dó nya xɛ ɖo mɛ bǐ jí lěe é nyɔ́ bló gbɔn é sín hwesivɔ́ kpó nǔcikɔ e yǒzo nɔ dɔn wá é kpó sí ɔ, nɔví súnnu kpó nɔví nyɔ̌nu kpó azɔ̌syɛ́nsyɛ́nwatɔ́ lɛ́ nɔ gbá goxɔ lɛ́ kpó fí e è sixú fá kɔ ɖe lɛ́ é kpó. Yě nɔ lɛ́ tɛ́n kpɔ́n bɔ nǔsáwǔ e è nɔ sá dó cyɔ́n alɔ agbaza jí bónú hwesivɔ́ ma wa nǔ dó mɛ wú ó é nɔ tíin; awɛ kpó sin kpó lɔ nɔ ɖo fínɛ́. Kevin e nɔ w’azɔ̌ ɖo Azɔ̌xɔsá xóyídókanjí kpó video kpó tɔn é tínmɛ ɖɔ: “Gěgé nɔví súnnu kpó nɔví nyɔ̌nu kpó e ɖo azɔ̌ énɛ́ wa wɛ lɛ́ é tɔn wɛ nyí mɛɖéezéjótɔ́ e ma nɔ dɔ́ Betɛ́li ǎ lɛ́ é. Yě nɔ w’azɔ̌ énɛ́ kpó azɔ̌ gěgé ɖěvo lɛ́ kpó, kpó mɛɖéesɔ́hwe kpó, kpódó awǎjijɛ kpán. Yě mɛvo ɔ, mǐ sixú kpé azɔ̌ énɛ́ wú bo wa ǎ.”

 Akpáxwé video ɔ tɔn ɖé lɛ́ ɖe bɔ ényí è yí yě ɖo alaxɔ ɔ mɛ, vlafo ɖo gbowungbo jí fí e è bló tuto ná bá yí nǔ dó kan jí ɖe é, alǒ xóyídókanjí xɔsá ɔ, é ná ná nǔ e ba wɛ è ɖe é ganjí ǎ. Ðo ninɔmɛ mɔ̌hun lɛ́ mɛ ɔ, gbɛ̌ta nǔ yíyí tɔn ɔ nɔ gbɔ bo nɔ ba fí ɖěvo bo nɔ yi yí akpáxwé énɛ́ lɛ́. Hwɛhwɛ ɔ, gbɛ̌ta ɔ nɔ yi fí línlín lɛ́ bo ná dó yí hwexónu sín tan e ɖo Biblu mɛ lɛ́ é dó kan jí, ɖó kuláan kan, ali e è tɛ́ kpé ná lɛ́ é (pavée), xɔ hwe mǐtɔn nu tɔn ɖě ɖe hwe ɔ nu ǎ wútu. Yě ɖó ná nɔ dó agban awu yětɔn lɛ́ kpó azɔ̌wanú yětɔn lɛ́ kpó tɔn, bo ná nɔ bɛ́ yi, lobo hɛn azɔ̌wanú lɛ́ ganjí bónú nǔɖé ní ma kán tó ɖo yě wú ó. Cóbónú è ná jɛ nǔ lɛ́ yí dó kan jí jí ɔ, titoblónúnǔtɔ́ gbɛ̌ta ɔ tɔn sín alɔgɔ́tɔ́ nɔ mɔ nǔ jɛ wú ɖɔ kuláan, sin mímɛ́ kpó adadokpá kpó ɖe. Nɔví e ɖo ayǐ ɔ jí lɛ́ é nɔ yí mɛ e ɖo gbɛ̌ta ɔ mɛ lɛ́ é ɖé lɛ́ dó xwégbe; mɛ ɖěvo lɛ́ nɔ dɔ́ vagɔ́ɔn mɔ̌to lɛ́ tɔn lɛ́ mɛ, alǒ otɛ́li lɛ́, kabǐ goxɔ lɛ́ mɛ.

 Ényí è ná yi yí nǔ lɛ́ dó kan jí ɖo fí ɖěvo ɔ, é nɔ byɔ́ akwɛ́zínzán hú gǎn, nɔ ɖu hwenu gěgé, bo nɔ lɛ́ dɔn agbɔ̌n nú mɛ e ɖo alɔ ɖó ɖo azɔ ɔ mɛ wɛ lɛ́ é bǐ. Énɛ́ wú ɔ, ɖo 2023 ɔ, Hǎgbɛ́ alixlɛ́mɛtɔ́ ɔ yí gbe bɔ è ná zán ɖɔ̌la Amɛlíka tɔn lǐvi 2.5 dó xɔ nǔ dǒ ɖɔhun e nɔ xlɛ́ video é ɖé; é nɔ bló bɔ é nɔ cí ɖɔ fí ɖěvo séé wɛ è ɖe ɖɔhun. Nǔnywɛ́ xwítíxwítí sín nǔ énɛ́ nɔ bló bɔ yɛ e nɔ tɔ́n ɖo nukún tɔn mɛ é nɔ za wě tawun, bɔ wě e é za é nɔ zɔ́n bɔ é nɔ cí ɖɔ kɔ́xota yí video ɔ ɖe wɛ è ɖe ɖɔhun. Wǎgbɔ tɔn ɔ, mǐ sixú nyi alɔ nú akwɛ́ gěgé zínzán ɖo nǔyídókanjí hwenu ɖo fí ɖěvo lɛ́. Darren e ɖo wěɖegbɛ́ alaxɔ Australasie tɔn mɛ é tínmɛ ɖɔ: “Nǔ lɛ́ yíyí dó kan jí kpó azɔ̌wanú video tɔn énɛ́ kpó nɔ zɔ́n bɔ nǔ sɔ́ nɔ ci kɔ nú mɛ e ɖo alɔ ɖó ɖo azɔ̌ ɔ mɛ wɛ lɛ́ é dín ǎ, bɔ gbɛ̌ta ɔ hɛn ɔ, é nɔ vɔ́ nǔ ɖokpó ɔ lɛ́ yí azɔn nabí e é byɔ́ é. Ði kpɔ́ndéwú ɔ, ényí mǐ ɖo nǔ lɛ́ yí dó kan jí wɛ tlɔlɔ ɖo hɛnkɛ́n ɔ, hwenu kléwún ɖé jɛ́n mǐ nɔ ɖó bo ná yí hwe gba amizɛ́n, ɖó é nɔ nɔ te nú hwenu gěgé ǎ. Amɔ̌, kpó azɔ̌wanú video tɔn énɛ́ kpó ɔ, è sixú vɔ́ hwe gba amizɛ́n ɔ zán, káká jɛ hwenu e mǐ mɔ nǔ e ba wɛ mǐ ɖe é dó é.”

 È ɖó hudó gbɛtɔ́ kanweko donu mɔ̌kpán kpó gbɛ̌ta gěgé kpó tɔn bónú yě ná ɖ’alɔ ɖo video Sinsɛnzɔ́ Jezu tɔn sín tan sín akpáxwé lɛ́ ɖokpó ɖokpó mɛ. Nɛ̌ nǔ ka cí nú yě dó gǎn tobutóbú e dó wɛ nɔví lɛ́ ɖe bo ná dó kpé nukún dó yě wú é wú?

 Amber e bló kilomɛ́tlu 700 jɛjí sín xwé tɔn gbe ɖo Melbourne, bo wá ɖ’alɔ ɖo tuto ɔ mɛ é wlán ɖɔ: “Ée un wá jɔmɛhúnjayǐtɛn ɔ lě é jɛ́n nɔví e ɖo Betɛ́li lɛ́ é jɛ nukún kpé dó wǔtu ce jí dó nǔjɔnǔ mɛ. Gěgé nɔví énɛ́ lɛ́ tɔn nɔ ylɔ́ mì nú mǐ ná ɖu nǔɖé, alǒ nu tíi ɖó kpɔ́. Ðo fí e mǐ nɔ yí nǔ lɛ́ dó kan jí ɖe é ɔ, mɛ lɛ́ bǐ nɔ bló bɔ un nɔ vo ganjí bɔ un nɔ lɛ́ mɔ ɖɔ yě yí wǎn nú mì. Un mɔ nyɔ̌ná gěgé ɖo tomɛyiyi énɛ́ hwenu. É tlɛ cí nú mì ɖɔ vɔ̌sísá wɛ é nyí ɖɔhun ɖěbǔ lɔ ǎ!”

 Derek nɔ w’azɔ̌ xá video blóbló sín gbɛ̌ta ɔ. É ɖɔ: “Azɔ̌xɔsá gěgé wɛ nɔ gǔdo nú mǐ sín bǐbɛ́mɛ tuto ɔ tɔn. É su nukún ce mɛ ɖɔ nɔví súnnu kpó nɔví nyɔ̌nu kpó e sɔ́ hwenu, nǔɖókan kpó hlɔ̌nhlɔ́n kpó yětɔn dó sá vɔ̌ ná ɖó tuto énɛ́ wú lɛ́ é wɛ lɛ́ lɛ̌ dó mì. Yě nɔ d’alɔ, ɖo gbesisɔmɛ, bo nɔ lɛ́ nyɔ́ xomɛ. É ɖo wɛn ɖɔ, Jexóva kɔn nyɔ̌ná dó mǐ kpó yě kpó bǐ jí. Un kú d’é jí ɖɔ é kún nyí nǔ e azɔ̌ mǐtɔn ná é kɛ́ɖɛ́ wɛ nɔ ɖu ayi mɛ n’i ó, é nyɔ́ wa ɔ, é nɔ lɛ́ ɖ’ayi lěe mǐ w’azɔ̌ ɔ gbɔn é wú.”

 Mi wa nǔ nú gǔdo e mi nɔ nú video ɖěbɔdóɖěwú élɔ́ blóbló gbɔn nǔníná mitɔn lɛ́ káká jɛ ée mi ná gbɔn donate.mr1310.com jí é.