Ðo 19 mai 2022 ɔ, Gbɛ̌ kplékplé akɔta lɛ́ tɔn sín wěɖegbɛ́ ayijayǐ tɔn se ɖo axɔ́súzɔ́watɔ́ ɖaxó 75 sín nu ɖɔ “nǔɖuɖuhwedómɛ e tíin gbɔn gbɛ ɔ bǐ mɛ, bɔ jɛmɛjí Covid-19 kpó ninɔmɛ ayǐ mɛ tɔn sín hǔzúhúzú kpó zɔ́n bɔ é syɛ́n d’é jí é lɛ́vɔ́ ɖo nylǎnylá d’é jí wɛ tawun gbɔn gbɛ ɔ bǐ mɛ, ɖó ahwan e fun wɛ è ɖe ɖo Ukraine é wú, lobɔ adɔ sixú gba nǔ ɖo fí ɖé lɛ́.” Énɛ́ gúdo zaan ɔ, xójláwéma The Economist ɖɔ ɖɔ “tagba gěgé ko gɔ́ gbɛ ɔ mɛ, amɔ̌, ɖó ahwan ɔ wútu ɔ, mɛ e xovɛ́ ɖo ya dó ná wɛ lɛ́ é ná lɛ́ jɛjí.” Biblu ko ɖɔ ɖ’ayǐ ɖɔ nǔɖuɖuhwedómɛ ná tíin ɖo hwe mǐtɔn nu; é ɖo mɔ̌ có, é lɛ́ d’alɔ mǐ bónú mǐ ná ɖí xwi xá.

•   Jezu ɖɔ ɖ’ayǐ ɖɔ: “Akɔta ɖě ná tɔ́n ahwan ɖě, bɔ axɔ́súɖuto ɖě ná tɔ́n ahwan ɖě, nǔɖuɖu ná hwe dó mɛ.”—Matíe 24:7.

•   Wěma Biblu tɔn e nɔ nyí Nǔɖexlɛ́mɛ é ɖɔ sɔ́xátɔ́ nǔjlɛ́dónǔwú tɔn ɛnɛ xó. Sɔ́xátɔ́ énɛ́ lɛ́ ɖokpó nɔ te nú ahwanfunfun. Sɔ́xátɔ́ ɖěvo bɔ dó éyɛ́ wú, bo nɔ te nú adɔ, énɛ́ wɛ nyí hwenu e nǔɖuɖu mimɔ ná vɛ́ wǔ bo ná lɛ́ v’axi tawun é. “Un kpɔ́n, lobo mɔ sɔ́ wiwi ɖokpó; mɛ e ɖo sɔ́ ɔ jí ɔ hɛn nǔdagan ɖokpó alɔ mɛ. Un se gbe ɖé . . . [bɔ gbe ɔ] ɖɔ: ‘Blěe kilóo ɖokpó géé jɛ́n è nɔ zé azɔ̌kwɛ́ gbe ɖokpó tɔn ɔ bǐ dó xɔ ná; ɔ́ji kilóo atɔn wɛ è nɔ zé azɔ̌kwɛ́ gbe ɖokpó tɔn ɔ bǐ dó xɔ ná.’”—Nǔɖexlɛ́mɛ 6:5, 6.

 Nǔɖɔɖayǐ Biblu tɔn énɛ́ lɛ́ e kúnkplá nǔɖuɖuhwedómɛ é ɖo jijɛnu wɛ din; Biblu ylɔ́ hwenu e mǐ ɖe din é ɖɔ “azǎn gǔdo gúdo tɔn lɛ́.” (2 Timɔtée 3:1) Nú a ná kplɔ́n nǔ ɖěvo lɛ́ dó “azǎn gǔdo gúdo tɔn lɛ́” kpó wezun e kan wɛ sɔ́xátɔ́ ɛnɛ e xó Nǔɖexlɛ́mɛ ɖɔ lɛ́ é ɖe é kpó wú hǔn, kpɔ́n video Gbɛ ɔ húzú sín 1914, bo lɛ́ xa xóta “Sɔ́xátɔ́ ɛnɛ lɛ́: Mɛ̌ mɛ̌ é ka nú yě?”

•   Wěɖexámɛ e nyɔ́ zán lɛ́ é ɖo Biblu mɛ, bo sixú d’alɔ mǐ bɔ mǐ ná ɖí xwi xá ninɔmɛ vɛ́ wǔ lɛ́, káká jɛ axi vívɛ́ nǔ lɛ́ tɔn kpó nǔɖuɖuhwedómɛ kpó jí. Kpɔ́n kpɔ́ndéwú ɖé lɛ́ ɖo xóta “Lěe è sixú nɔ gbɛ hwenu e è ma ɖó akwɛ́ káká ɖé ǎ é gbɔn é” mɛ.

•   Biblu lɛ́vɔ́ ná mǐ nukúnɖíɖó ɖɔ ninɔmɛ lɛ́ ná wá kpɔ́n te. É d’akpá ɖɔ hweɖénu ná wá bɔ ‘ji ná jɛ ɖo ayǐkúngban jí káká bo túnflá,’ bɔ mɛ bǐ ná ɖó nǔɖuɖu kɔn nyi kpɔ́. (Ðɛhan 72:16) Nú a ná ɖó mɔjɛmɛ ɖěvo lɛ́ dó nukúnɖíɖó e Biblu ná mɛ dó sɔgúdo wú é kpó nǔ e wú a sixú ɖeji d’é wú lɛ́ é kpó wú hǔn, xa xóta “Une espérance réelle pour des jours meilleurs.”