Wěma wegɔ́ e è wlán sɛ́dó Kɔlɛ́ntinu lɛ́ é 6:1-18
6 Ðó mǐ ɖo azɔ̌ wa ɖó kpɔ́ xá Mawu wɛ wútu ɔ, mǐ lɛ́ ɖo byɔ̌byɔ́ mi wɛ ɖɔ mi ní ma yí gbe nú fɛ́nú Mawu tɔn dó wǔvɔ́ ó.
2 Ðó é ɖɔ: “Ðo wǔjɔmɛ hwenu ɔ, un se xó towe, bɔ ɖo hwlɛngánzángbe ɔ, un d’alɔ we.” Éɖíe! Wǔjɔmɛ hwenu wɛ mǐ ɖe din. Hwlɛngánzángbe wɛ mǐ ɖe din.
3 Mǐ nɔ nyí afɔklɛ́nnú nú mɛ ɖo ali ɖěbǔ nu ǎ, bónú è ní ma wá mɔ nǔjɛdo ɖě ɖo sinsɛnzɔ́ mǐtɔn wú ó;
4 é nyɔ́ wa ɔ, mǐ nɔ ɖe mǐɖée xlɛ́ ɖo ali bǐ nu ɖɔ mǐ nyí sinsɛnzɔ́watɔ́ Mawu tɔn gbɔn nǔ élɔ́ lɛ́ gblamɛ: mǐ nɔ dɛ ɖo mɛtɛ́nkpɔ́n gěgé, wǔvɛ́ lɛ́, hwenu vɛ́ wǔ lɛ́ kpó tagba lɛ́ kpó nu,
5 è nɔ xo mǐ, è nɔ bɛ́ mǐ dó gan mɛ, adǎkaxotɔ́ lɛ́ nɔ nyi ahwan xísí dó mǐ, mǐ nɔ w’azɔ̌ syɛ́nsyɛ́n, zǎn ɖé lɛ́ mɛ ɔ, mǐ nɔ d’amlɔ ǎ, nǔɖuɖu nɔ hán mǐ hweɖélɛ́nu;
6 mǐ nɔ zán gbɛ mímɛ́, mǐ nɔ zán gbɛ sɔgbe xá nǔ e mǐ tuun é, mǐ nɔ ɖó suúlu, mǐ nɔ nyɔ́ xomɛ, mǐ nɔ jó gbigbɔ mímɛ́ dó b’ɛ nɔ xlɛ́ ali mǐ, mǐ ɖó wǎnyíyí e ma nyí yɛmɛnúwiwa tɔn ǎ é,
7 mǐ nɔ ɖɔ nǔgbó, mǐ nɔ ɖeji dó hlɔ̌nhlɔ́n Mawu tɔn wú; mǐ nɔ hɛn ahwanfunnú nǔjlɔ́jlɔ́wiwa tɔn lɛ́ dó ɖisílɔ* kpó amyɔlɔ* kpó mɛ,
8 è nɔ sɔ́ mǐ su bo nɔ lɛ́ dó hɛ̌n mǐ, è nɔ ɖɔ xó nyanya dó mǐ wú bo nɔ lɛ́ ɖɔ xó ɖagbe dó mǐ wú. È nɔ kpɔ́n mǐ dó mɔ mɛblɛ́tɔ́, amɔ̌, nǔgbóɖɔtɔ́ wɛ mǐ nyí,
9 è nɔ kpɔ́n mǐ dó mɔ mɛ e è ma tuun ǎ é, amɔ̌, è tuun mǐ, è nɔ kpɔ́n mǐ dó mɔ mɛ e ko ɖibla* kú é, amɔ̌, mǐ ɖo gbɛ ganjí, è nɔ kpɔ́n mǐ dó mɔ mɛ e è dɔn tó ná* é, amɔ̌, è hu mǐ ǎ,
10 è nɔ kpɔ́n mǐ dó mɔ mɛ e wǔ kú é, amɔ̌, mǐ nɔ j’awǎ hwebǐnu, è nɔ kpɔ́n mǐ dó mɔ wamamɔnɔ, amɔ̌, mǐ nɔ dó dɔkun nú mɛ gěgé, è nɔ kpɔ́n mǐ dó mɔ mɛ e ma ɖó nǔɖé ǎ é, amɔ̌, mǐ ɖó nǔ lɛ́ bǐ.
11 Mǐ ɖɔ xó nú mi mɛ Kɔlɛ́ntinu lɛ́ nyi wɛn, mǐ lɛ́ yí wǎn nú mi tawun.*
12 Wǎnyíyí e mǐ ɖó nú mi é ɖó dogbó ǎ, loɔ, wǎnyíyí e midɛɛ lɛ́ ɖó nú mǐ é wɛ ɖó dogbó.
13 Énɛ́ wú ɔ, un ɖo xó ɖɔ nú mi wɛ, vǐ ce lɛ́ ɖɔ xó ná wɛ un ɖe ɖɔhun ɖɔ mi ní gbló ada nú wǎnyíyí mitɔn.
14 Mi ma dó kɔ agbanhɛnkpo ɖokpó ɔ mɛ xá* nǔmaɖitɔ́ lɛ́ ó.* Ðó étɛ́ nǔjlɔ́jlɔ́wiwa kpó sɛ́ngbigba kpó ka kpé dó? Alǒ, étɛ́ wěziza kpó ablu kpó ka ɖó ɖo bǔ?
15 Gɔ́ ná ɔ, nǔwaɖókpɔ́ tɛ́ ka ɖo Klísu kpó Beliyáli* kpó tɛ́ntin? Alǒ, étɛ́ nǔɖitɔ́ ɖé ka ɖó ɖo bǔ xá nǔmaɖitɔ́ ɖé?
16 Kancícá tɛ́ ka ɖo tɛ́npli Mawu tɔn kpó bǒcyɔ lɛ́ kpó tɛ́ntin? Ðó tɛ́npli Mawu gbɛɖe ɔ tɔn wɛ mǐ nyí; lěe Mawu ɖɔ gbɔn é ɔ: “Un ná nɔ tɛ́ntin yětɔn bo ná ɖi zɔnlin ɖo tɛ́ntin yětɔn, un ná nyí Mawu yětɔn, bɔ yě ná nyí togun ce.”
17 “Jexóva* ɖɔ: ‘Énɛ́ wú ɔ, mi tɔ́n sín tɛ́ntin yětɔn bo klán miɖée ɖó vo, mi ma sɔ́ ɖ’alɔ nǔ blíblí wú ɖě ó’”; “‘énɛ́ ɔ, un ná yí mi.’”
18 “Jexóva* Nǔbǐwúkpétɔ́ ɔ lɛ́ ɖɔ: ‘Un ná húzú tɔ́ nú mi, bɔ mi ná húzú vǐ súnnu kpó vǐ nyɔ̌nu kpó nú mì.’”
Tínmɛ e ɖo do lɛ́ é
^ Vlafo bo ná dó fun ahwan.
^ Vlafo bo ná dó jɛ ahwan mɛɖée jí.
^ Alǒ “jɛxá.”
^ Alǒ “gbɛ́ nǔ ná.”
^ Alǒ “mǐ hun ayi mǐtɔn lɛ́ nú mi.”
^ Alǒ “Mi ma kpé nǔɖé xá.”
^ Xókwín Glɛ̌kigbe tɔn e ɖo fí é sín tínmɛ wɛ nyí ɖɔ è ɖo agbanhɛnkpo e ma sɔgbe ǎ é ɖokpó ɔ glɔ́.
^ È ɖe sín xókwín Ebléegbe tɔn e tínmɛ tɔn nyí “nyí nǔɖéwanú ǎ” é mɛ. É nɔ dó gesí Satáan.
