Nǔ e Mɛsɛ́dó lɛ́ wa lɛ́ é 15:1-41
-
Nǔdindɔn ɖé fɔ́n ɖo Antyɔ́ci dó adagbigbo wú (1, 2)
-
È sɔ́ xó ɔ yi Jeluzalɛ́mu (3-5)
-
Mɛxó lɛ́ kpó mɛsɛ́dó lɛ́ kpó kplé ɖó kpɔ́ (6-21)
-
Wěmasɛ́dómɛ hǎgbɛ́ alixlɛ́mɛtɔ́ ɔ tɔn (22-29)
-
Mi nɔ zɔ nú hun (28, 29)
-
-
Wěmasɛ́dómɛ ɔ dó wǔsyɛ́n lanmɛ nú agun lɛ́ (30-35)
-
Pɔ́lu kpó Baanabási kpó mlɛ́ ali vovo (36-41)
15 Din ɔ, súnnu ɖé lɛ́ gosín Judée, bo jɛ nǔ kplɔ́n nɔví lɛ́ jí ɖɔ: “Ényí è ma gbo ada nú mi sɔgbe xá Mɔyízisɛ́n ɔ ǎ ɔ, Mawu ná hwlɛ́n mi gán ǎ.”
2 Amɔ̌, gbemanɔkpɔ́ syɛ́nsyɛ́n kpó nǔdindɔn ɖaxó kpó fɔ́n ɖo Pɔ́lu kpó Baanabási kpó, kpódó yě kpán tɛ́ntin. Énɛ́ ɔ, è bló tuto, bónú Pɔ́lu, Baanabási kpó nɔví ɖé lɛ́ kpó ná yi mɛsɛ́dó lɛ́ kpó mɛxó agun tɔn lɛ́ kpó gɔ́n ɖo Jeluzalɛ́mu, ɖó xó* énɛ́ wú.
3 Mɛ e ɖo agun ɔ mɛ lɛ́ é nyi súnnu énɛ́ lɛ́, bɔ yě ɖidó bo gbɔn Fenisíi kpó Samalíi kpó, bo ɖɔ lěe mɛ e ɖo akɔta ɖě lɛ́ mɛ lɛ́ é húzú nǔɖitɔ́ gbɔn é sín xó nú nɔví lɛ́ hlɛ́nhlɛ́n, bɔ énɛ́ dó awǎjijɛ ɖaxó nú nɔví lɛ́ bǐ.
4 Ée yě wá Jeluzalɛ́mu é ɔ, mɛ e ɖo agun ɔ mɛ lɛ́ é, mɛsɛ́dó lɛ́ kpó mɛxó agun tɔn lɛ́ kpó yí yě kpó xomɛnyínyɔ́ kpó, bɔ yě ɖɔ nǔ tobutóbú e Mawu wa gbɔn yě jí lɛ́ é nú yě.
5 Amɔ̌, mɛ e ɖo sinsɛngbɛ́ta Falizyɛn lɛ́ tɔn mɛ ɖ’ayǐ bo ko húzú nǔɖitɔ́ é ɖé lɛ́ sí te sín zinkpo yětɔn lɛ́ jí, bo ɖɔ: “É ɖo dandan ɖɔ è ní gbo ada nú yě, bo zɔ́n yě ɖɔ yě ní nyi Mɔyízisɛ́n ɔ.”
6 Énɛ́ wú ɔ, mɛsɛ́dó lɛ́ kpó mɛxó agun tɔn lɛ́ kpó kplé ɖó kpɔ́, bo ná gbéjé xó énɛ́ kpɔ́n.
7 Ée yě ɖɔ xó ɖó kpɔ́ syɛ́nsyɛ́n nú hwenu línlín* gúdo é ɔ, Piyɛ́ɛ sí te, bo ɖɔ nú yě ɖɔ: “Nɔví lɛ́ mi, mi tuun ganjí ɖɔ é ko lín din bɔ Mawu sɔ́ mì ɖo tɛ́ntin mitɔn, bónú mɛ e ɖo akɔta ɖě lɛ́ mɛ lɛ́ é ní dó sixú se wɛn ɖagbe ɔ sín xó ɖo nu ce, lobo ɖi nǔ.
8 Mawu e nɔ mɔ nǔ jɛ ayi mɛ é ɖe kúnnu ná, gbɔn gbigbɔ mímɛ́ níná yě gblamɛ, lěe é ná mǐ lɔ gbɔn é.
9 É ɖe vogbingbɔn ɖě xlɛ́ ɖo mǐ kpó yě kpó tɛ́ntin ǎ. É nyɔ́ wa ɔ, é slá wǔ nú ayi yětɔn, ɖó nǔɖiɖi yětɔn wú.
10 Énɛ́ wú ɔ, étɛ́wú mi ka ɖo Mawu tɛ́n kpɔ́n wɛ din, gbɔn agbanhɛnkpo e tɔ́gbó mǐtɔn lɛ́ kpó mǐɖésúnɔ kpó ɖě ma kpé wú bo hɛn ǎ é sísɔ́ ɖó kɔ jí nú ahwanvú lɛ́ gblamɛ?
11 Loɔ, mǐ ɖi nǔ ɖɔ lěe è hwlɛ́n mǐ, gbɔn fɛ́nú Aklúnɔ Jezu tɔn gblamɛ gbɔn é ɔ, è hwlɛ́n yě lɔ gbɔn mɔ̌.”
12 Énɛ́ ɔ, yě bǐ cí xwíí bo jɛ tó ɖó Baanabási kpó Pɔ́lu kpó jí, bɔ yě ɖɔ nǔjíwǔ kpó nǔdabaɖa kpó tobutóbú e Mawu bló gbɔn yě jí ɖo akɔta ɖě lɛ́ mɛ lɛ́ é sín xó nú yě.
13 Ée yě ɖɔ xó fó é ɔ, Jaki ɖɔ: “Nɔví lɛ́ mi, mi ɖótó mì.
14 Sinmɔ́ɔ* ko ɖɔ lěe Mawu nyi kɔ kpɔ́n mɛ e ɖo akɔta ɖě lɛ́ mɛ lɛ́ é azɔn nukɔntɔn ɔ, bo cyán mɛɖé lɛ́ ɖo yě mɛ, bɔ yě ná nyí togun e ɖó nyǐkɔ tɔn ta é gbɔn é sín xó tɛ́nwín lɛnwín.
15 Bɔ énɛ́ sɔgbe xá xó e è ɖɔ ɖo nǔwlánwlán gbeyíɖɔ lɛ́ tɔn lɛ́ mɛ é. È ɖɔ:
16 ‘Ðo nǔ énɛ́ lɛ́ gúdo ɔ, un ná lɛ́ kɔ wá, bo ná vɔ́ goxɔ* Davídi tɔn e ko mu é gbá; un ná vɔ́ dǒglin tɔn lɛ́ mɛ, bo ná jlá goxɔ énɛ́ ɖó,
17 bónú mɛ e kpo lɛ́ é ní dó sixú ba nyɛ Jexóva* vɛ́návɛ́ná ɖó kpɔ́ xá mɛ e ɖo akɔta ɖě lɛ́ mɛ lɛ́ é bǐ. Nyǐkɔ ce ɖo ta nú mɛ énɛ́ lɛ́ e ɖo akɔta ɖě lɛ́ mɛ lɛ́ é. Nyɛ Jexóva* wɛ ɖɔ mɔ̌. Nyɛ wɛ ɖo nǔ énɛ́ lɛ́ bló wɛ.
18 É ko lín din bɔ un wá gbeta ɔ kɔn bo ná wa nǔ énɛ́ lɛ́.’
19 Hǔn, gbeta e kɔn un wá é* wɛ nyí ɖɔ è kún ná dó ya nú mɛ e ɖo akɔta ɖě lɛ́ mɛ, bo ɖo Mawu gɔ́n wá wɛ lɛ́ é ó,
20 loɔ, è ní wlán sɛ́dó yě ɖɔ yě ní nɔ zɔ nú nǔ e vodúnsinsɛn hɛn blí lɛ́ é, nú agalilɛ,* nú nǔ e è glɔ́n agbɔ̌n ná bo hu é* kpó hun kpó.
21 Ðó sín hwexónu ɔ, Mɔyízi ɖó mɛɖé lɛ́ bɔ yě nɔ jlá nǔwlánwlán tɔn lɛ́ gbɔn toxo lɛ́ bǐ mɛ, ɖó è nɔ xa nǔwlánwlán énɛ́ lɛ́ dó jǐ ɖo kplɔ́ngbasá lɛ́ ɖo gbɔjɛzán lɛ́ bǐ gbe.”
22 Énɛ́ wú ɔ, mɛsɛ́dó lɛ́ kpó mɛxó agun tɔn lɛ́ kpó, gɔ́ nú agun ɔ bǐ wá gbeta ɔ kɔn ɖɔ è ná cyán súnnu ɖé lɛ́, bo sɛ́ yě dó Antyɔ́ci, gɔ́ nú Pɔ́lu kpó Baanabási kpó. Yě sɛ́ Judási e è nɔ ylɔ́ ɖɔ Baasabási é kpó Silási kpó dó; yě mɛ we lɛ́ bǐ wɛ ɖo nukɔn nú azɔ̌ ɔ ɖo nɔví lɛ́ tɛ́ntin.
23 Nǔ e yě wlán sɛ́dó gbɔn jǐ yětɔn é ɖíe:
“Mǐ mɛ nɔví mitɔn mɛsɛ́dó lɛ́ kpó mɛxó agun tɔn lɛ́ kpó wɛ ɖo nǔ élɔ́ wlán sɛ́dó nɔví e ɖo Antyɔ́ci, Silíi kpó Silisíi kpó bo ɖo akɔta ɖě lɛ́ mɛ lɛ́ é wɛ: Mǐ dó gbe sɛ́dó mi!
24 Mǐ se ɖɔ mɛɖé lɛ́ gosín gɔ̌n mǐtɔn, bo wá ɖɔ xó e dɔn tagba wá nú mi lɛ́ é. Yě tɛ́n kpɔ́n bo ná bló bɔ mi ná zɛ gbě. Mǐ ka zɔ́n nǔɖé yě ǎ; énɛ́ wú wɛ
25 mǐ bǐ ɖó gbe kpɔ́ bo wá gbeta ɔ kɔn bo ná cyán súnnu ɖé lɛ́ bo sɛ́ yě dó mi, gɔ́ nú mɛ vívɛ́ná mǐtɔn Baanabási kpó Pɔ́lu kpó.
26 Yě mɛ énɛ́ lɛ́ sɔ́ gbɛ* yětɔn jó dó Aklúnɔ mǐtɔn Jezu Klísu sín nyǐkɔ tamɛ.
27 Énɛ́ wú ɔ, mǐ ɖo Judási kpó Silási kpó sɛ́ dó mi wɛ, bónú yě lɔmɔ̌ ní wá ɖɔ xó ɖokpó ɔ nú mi tlɔlɔ.
28 Ðó gbigbɔ mímɛ́ ko d’alɔ mǐ bɔ mǐ wá gbeta ɔ kɔn ɖɔ mǐ kún ná ɖó agban kpinkpɛn ɖěvo kɔ jí nú mi zɛ nǔ élɔ́ lɛ́ e ɖo dandan é wú ó:
29 mi ní nɔ nɔ zɔ nú nǔ e è sɔ́ dó sá vɔ̌ nú vodún lɛ́ é, hun, nǔ e è glɔ́n agbɔ̌n ná bo hu é* kpó agalilɛ* kpó. Ényí mi nɔ nɔ zɔ nú nǔ énɛ́ lɛ́ bǐ mlɛ́mlɛ́ ɔ, nǔ bǐ ná yi nú mi ganjí. É su gbeɖé!”
30 Énɛ́ ɔ, súnnu énɛ́ lɛ́ ɖidó, bo wá Antyɔ́ci, lobo xo gbɛ̌ta ɔ bǐ kplé, bo sɔ́ wěmasɛ́dómɛ ɔ nú yě.
31 Ée yě xa é ɔ, yě j’awǎ, ɖó wǔsyɛ́n dó lanmɛ nú mɛ xó énɛ́ wú.
32 Bɔ ɖó Judási kpó Silási kpó lɔ nyí gbeyíɖɔ wútu ɔ, yě ɖɔ xó gěgé dó dó wǔsyɛ́n lanmɛ nú nɔví lɛ́, bo lɛ́ vɔ́ hlɔ̌nhlɔ́n ná yě.
33 Ée yě nɔ fínɛ́ nú hwenu ɖé gúdo é ɔ, nɔví lɛ́ nyi yě sɛ́dó mɛ e sɛ́ yě dó lɛ́ é gɔ́n, bo ɖɔ nú yě ɖɔ ali ná nyɔ́.
34 * ——
35 Pɔ́lu kpó Baanabási kpó ka cí Antyɔ́ci. Yě kpó mɛ gěgé ɖěvo lɛ́ kpó nɔ ɖo nǔ kplɔ́n mɛ wɛ, bo nɔ ɖo wɛn ɖagbe e kunkplá xó Jexóva* tɔn é jlá wɛ.
36 Azǎn yɔywɛ ɖé gúdo ɔ, Pɔ́lu ɖɔ nú Baanabási ɖɔ: “Din ɔ, mǐ ní* lɛ́ kɔ yi ba nɔví lɛ́ kpɔ́n, ɖo toxo e mɛ mǐ jlá xó Jexóva* tɔn ɖe lɛ́ é ɖokpó ɖokpó mɛ, bo ná kpɔ́n lěe yě ɖe gbɔn é.”
37 Baanabási kán ɖ’é jí bo ná kplá Jaan, ée è nɔ ylɔ́ ɖɔ Maki é.
38 Amɔ̌, Pɔ́lu ba ɖɔ é ní xwedó yě ǎ, ɖó é lɛ́ kɔ jó yě dó ɖ’ayǐ ɖo Panfilíi, bo nɔ gǔdo nú yě ɖo wɛnɖagbejíjlázɔ́ ɔ mɛ ǎ wútu.
39 Énɛ́ ɔ, yě sin xomɛ bo dɔn nǔ syɛ́nsyɛ́n, bɔ énɛ́ zɔ́n bɔ yě klán jó yěɖée lɛ́ dó. Baanabási kplá Maki, bɔ yě dó tɔjíhún bo ɖidó Cíplu.
40 Pɔ́lu kplá Silási, bɔ ée nɔví lɛ́ sɔ́ Pɔ́lu d’así nú Jexóva,* gbɔn fɛ́nú tɔn gblamɛ gúdo é ɔ, é ɖidó.
41 É gbɔn Silíi kpó Silisíi kpó gbé jí, bo nɔ ɖo wǔsyɛ́n dó lanmɛ nú agun lɛ́ wɛ.
Tínmɛ e ɖo do lɛ́ é
^ Alǒ “nǔdindɔn.”
^ Alǒ “dɔn nǔ tawun.”
^ Alǒ “Sinmɛnyɔ́ɔ.”
^ Alǒ “azava; xwé.”
^ Alǒ “linlin ce.”
^ Alǒ “nǔ e è hu bo ma lúlú hun tɔn kɔn nyi ayǐ ǎ é.”
^ Pɔnɛyíya ɖo Glɛ̌kigbe mɛ. Kpɔ́n Xógbe ɖé lɛ́ sín tínmɛ.
^ Alǒ “lǐndɔ̌n.”
^ Alǒ “nǔ e è hu bo ma lúlú hun tɔn kɔn nyi ayǐ ǎ é.”
^ Pɔnɛyíya ɖo Glɛ̌kigbe mɛ. Kpɔ́n Xógbe ɖé lɛ́ sín tínmɛ.
^ Alǒ vlafo, “Mǐ ní wa nǔ e wú mǐ kpé é bǐ bo.”
