Nǔ e Mɛsɛ́dó lɛ́ wa lɛ́ é 20:1-38
20 Ée hunnyahunnya ɔ xwɛ é ɔ, Pɔ́lu sɛ́ wɛn dó ahwanvú lɛ́, bo dó wǔsyɛ́n lanmɛ nú yě, lobo dó éɖabɔ nú yě; bɔ énɛ́ gúdo ɔ, é wlí ali tɔn bo ɖidó Masedwáni.
2 É gbɔn xá gěgé mɛ ɖo fínɛ́, bo ɖɔ xó gěgé dó dó wǔsyɛ́n lanmɛ nú nǔɖitɔ́ lɛ́, lobo wá yi Glɛ̌ki.
3 É nɔ fínɛ́ xɔ sun atɔn, bɔ hwenu e é ja tɔjíhún dó gbé, bo ná yi Silíi é ɔ, Jwifu lɛ́ blá gbě tɔn. Énɛ́ wú ɔ, é wá gbeta ɔ kɔn, bo ná lɛ́ kɔ gbɔn Masedwáni.
4 Mɛ e xwedó è lɛ́ é wɛ nyí: Sopatlɔ́si vǐ súnnu Pilúsi Beléenu ɔ tɔn, Alisitáki kpó Sekundúsi kpó, éé gosín Tɛsaloníki é, Gayiwúsi Dɛɛbéenu ɔ kpó Timɔtée kpó, gɔ́ nú Ticíku kpó Tlofímu kpó, éé gosín tokpɔn Azíi tɔn mɛ é.
5 Súnnu énɛ́ lɛ́ jɛ nukɔn nú mǐ, bo ɖo te kpɔ́n mǐ ɖo Tlowási.
6 Amɔ̌, ée wɔ̌xúxú e mɛ è ma dó tɔ́n ǎ é sín xwe wá yi é ɔ, mǐ dó tɔjíhún sín Filípu, bɔ ɖo azǎn atɔ́ɔ́n vlamɛ ɔ, mǐ wá yě gɔ́n ɖo Tlowási, bo nɔ fínɛ́ xɔ azǎn tɛ́nwe.
7 Ðo azǎn nukɔntɔn aklúnɔzángbla ɔ tɔn jí ɔ, mǐ kplé ɖó kpɔ́ bo ná ɖu nǔ; énɛ́ ɔ, Pɔ́lu jɛ xó ɖɔ nú mɛ e kplé lɛ́ é jí, ɖó é xweyǐgbe ayǐhɔ́ngbe tɔn wútu; é gbɛ kan dó xóɖiɖɔ tɔn nu káká jɛ zǎnxwete.
8 Zogbɛ́n gěgé ɖo xɔ e ɖo síngbó jí, bɔ mǐ kplé ɖ’é mɛ é mɛ.
9 Dɔ̌nkpɛvú ɖé nɔ nyí Etíki, bo ɖo ayǐjínjɔ́n ɖo flɛtɛ́li nu. Amlɔ sa ɛ tawun hwenu e Pɔ́lu ɖo xó ɖɔ wɛ é, káká bɔ é byɔ́ amlɔ mɛ bǐ, bo j’ayǐ sín síngbó atɔngɔ́ ɔ jí, lobɔ kúkú tɔn jɛ́n è wá sɔ́.
10 Amɔ̌, Pɔ́lu jɛ te, bo mlɔ́ jǐ tɔn, bo zé è dó awa mɛ, lobo ɖɔ: “Mi ma sɔ́ ná alě ɖě ó, ɖó é ɖo gbɛ.”
11 Énɛ́ gúdo ɔ, é lɛ́ kɔ yi síngbó ɔ jí, bo fɛ́n wɔ̌xúxú, lobo jɛ nǔ ɖu jí. É lɛ́ gbɛ kan dó xóɖiɖɔ ɔ nu nú hwenu gěgé, káká jɛ ayǐtéhɔ̌nnu, bɔ énɛ́ gúdo ɔ, é ɖidó.
12 Bɔ mɛ lɛ́ kplá nyaví ɔ gbɛɖe tɔn ɖidó, bɔ énɛ́ dó gbɔ nú yě titewungbe.
13 Din ɔ, mǐ yi tɔjíhún ɔ kɔn, bo sún hǔn ɖidó Asɔ́si, bo jló ná yi sɔ́ Pɔ́lu ɖo dɔ̌n, lěe é ko ɖe gbe tɔn nú mǐ gbɔn ɖ’ayǐ é, ɖó é lin ná zɔn afɔ yi dɔ̌n.
14 Énɛ́ ɔ, ée é xwedó mǐ wú ɖo Asɔ́si é ɔ, mǐ sɔ́ ɛ dó tɔjíhún mɛ, bo ɖidó Mitilɛ́nu.
15 Mǐ dó tɔjíhún sín fínɛ́ ayǐhɔ́ngbe tɔn, bo wá Cíyo, amɔ̌, azǎn e bɔ d’é wú é gbe ɔ, mǐ nɔ te kléwún ɖo Samɔ́si, bɔ ayǐhɔ́ngbe tɔn ɔ, mǐ wá Milɛ.
16 Pɔ́lu wá gbeta ɔ kɔn, bo ná dó tɔjíhún gbɔn Efɛ́zi nukɔn dín, bo ma wá zán hwenu ɖěbǔ ɖo tokpɔn Azíi tɔn mɛ ó, ɖó é jló ná yá wǔ jɛ Jeluzalɛ́mu ɖo Pantekótuxwe ɔ sín azǎn gbe, ényí é sixú kpé wú ɔ nɛ́.
17 É ɖo mɔ̌ có, é ɖo Milɛ, bo sɛ́ wɛn dó mɛxó agun tɔn e ɖo Efɛ́zi lɛ́ é ɖɔ yě ní wá.
18 Ée yě wá gɔ̌n tɔn é ɔ, é ɖɔ nú yě ɖɔ: “Mi tuun lěe un zán gbɛ gbɔn ɖo tɛ́ntin mitɔn, sín azǎn nukɔntɔn e gbe un wá tokpɔn Azíi tɔn mɛ é ganjí;
19 kpó mɛɖéesɔ́hwe ɖaxó kpó wɛ un wa mɛsɛntɔ́zɔ́ nú Aklúnɔ; un ya avǐ, bo lɛ́ gbɔn mɛtɛ́nkpɔ́n lɛ́ mɛ, ɖó gbě ce e Jwifu lɛ́ blá é wú.
20 Mi lɛ́ tuun ɖɔ un kún gɔn nǔ ɖěɖěe ná nyí le* nú mi lɛ́ é ɖěbǔ ɖɔ nú mi ó, un kún ka lɛ́ gɔn nǔ kplɔ́n mi ɖo agbawungba ó; bo lɛ́ wa mɔ̌ sín xwé ɖé gbe jɛ xwé ɖé gbe.
21 Un ka lɛ́ ɖe kúnnu mlɛ́mlɛ́ nú Jwifu kpó Glɛ̌kinu kpó bǐ ɖɔ hwɛ yětɔn lɛ́ ɖó ná vɛ́ nú yě,* bɔ yě ná lɛ́ kɔ wá Mawu gɔ́n, bo ɖó ná lɛ́ ɖi nǔ nú Aklúnɔ mǐtɔn Jezu.
22 Din ɔ, un xweyǐgbe Jeluzalɛ́mu, ɖó gbigbɔ mímɛ́ ɖɔ nyi ní yi dɔ̌n dandan, có un ka tuun nǔ e ná jɛ dó jǐ ce ɖo dɔ̌n é ǎ.
23 Nǔ ɖokpó e un tuun é wɛ nyí ɖɔ sín toxo ɖé mɛ jɛ ɖěvo mɛ ɔ, gbigbɔ mímɛ́ gb’akpá nú mì azɔn mɔ̌kpán ɖɔ gan mɛ yiyi kpó wǔvɛ́ lɛ́ kpó ɖo te kpɔ́n mì.
24 É ɖo mɔ̌ có, gbɛ* nyiɖésúnɔ tɔn nyí nǔɖéwanú* nú mì ǎ; nǔ ɖokpó e myá nukún nú mì é wɛ nyí ɖɔ má kán wezun e Aklúnɔ Jezu sɔ́ dó afɔ nú mì é yi fó, lobo wa sinsɛnzɔ́ e é zɔ́n mì é yi fó; énɛ́ wɛ nyí ɖɔ má ɖe kúnnu mlɛ́mlɛ́ dó fɛ́nú Mawu tɔn sín wɛn ɖagbe ɔ wú.
25 “Din ɔ, un tuun ɖɔ mɛ ɖě kún ɖo mi mɛ e un jlá Axɔ́súɖuto ɔ lɛ́ é mɛ, bo ná lɛ́ wá mɔ nukún ce mɛ gbeɖé ó.
26 Énɛ́ wú wɛ un ylɔ́ mi, bónú ɖo égbé ɔ, mi ní nyí kúnnuɖetɔ́ ɖɔ mɛ ɖěbǔ sín hun kún ɖo kɔ nú mì ó,
27 ɖó un hwlá nǔ e nyí jlǒ* Mawu tɔn é ɖě mi ǎ.
28 Mi hɛn ayi dó miɖée wú, bo lɛ́ kpé nukún dó lɛ̌ngbɔ́hwan ɔ blěbú wú, ɖó gbigbɔ mímɛ́ sɔ́ mi, bɔ mi nyí nukúnkpénǔwútɔ́ lɛ̌ngbɔ́hwan énɛ́ tɔn, bónú mi ná nyí lɛ̌ngbɔ́nyitɔ́ nú agun Mawu tɔn e é xɔ kpó Vǐ éɖésúnɔ tɔn sín hun kpó é.
29 Un tuun ɖɔ nú un yi gúdo ɔ, adǎnkanlin hla lɛ́ ná byɔ́ mi mɛ; yě ná wa nǔ xá lɛ̌ngbɔ́hwan ɔ kpó xomɛnyínyɔ́ kpó ǎ.
30 Gɔ́ ná ɔ, mɛɖé lɛ́ ná sí te ɖo tɛ́ntin mitɔn bo ná nɔ sló kɔ nú nǔgbó ɔ, dó bló bɔ ahwanvú lɛ́ ná zɛ gbě, lobo xwedó yě.
31 “Énɛ́ wú ɔ, mi ní nɔ acéjí, bo lɛ́ flín ɖɔ zǎn kéze káká nú xwe atɔn ɔ, un kún gɔn akpá gba nú mi mɛ ɖokpó ɖokpó kpó ɖasin kpó kpɔ́n ó.
32 Din ɔ, un sɔ́ mi dó alɔ mɛ nú Mawu, bo jó mi nú fɛ́nú tɔn sín xó; xó énɛ́ sixú bló bɔ mi lí dǒ, bo lɛ́ bló bɔ mi ná ɖu gǔ e mɛ mímɛ́ lɛ́ bǐ ná ɖu é.
33 Mɛ ɖěbǔ sín kpatágan, siká alǒ avɔ jló mì kpɔ́n ǎ.
34 Miɖésúnɔ tuun ɖɔ alɔ ce élɔ́ lɛ́ wa azɔ̌, bo sú hudó nyiɖésúnɔ tɔn lɛ́ kpó mɛ ɖěɖěe ɖo kpɔ́ xá mì lɛ́ é tɔn kpó sín do.
35 Un ɖe xlɛ́ mi ɖo nǔ bǐ mɛ ɖɔ, azɔ̌syɛ́nsyɛ́nwiwa gbɔn mɔ̌ gblamɛ wɛ mi ɖó ná nɔ d’alɔ mɛ e ma ɖó gǎn ǎ lɛ́ é, bo ɖó ná lɛ́ hɛn Aklúnɔ Jezu sín xó lɛ́ ayi mɛ ɖe; éɖésúnɔ ɖɔ: ‘Nǔnámɛ nɔ ná awǎjijɛ mɛ hú nǔyíɖomɛsí.’”
36 Ée é ɖɔ xó énɛ́ lɛ́ fó é ɔ, é kpó yě bǐ kpó jɛ kpo bo xo ɖɛ.
37 Nǔgbó ɔ, yě mɛ bǐ ya avǐ tawun, bɔ yě kplá así kɔ nú Pɔ́lu bo kí si n’i kpó wǎnyíyí kpó,
38 ɖó ɖɔ e é ɖɔ ɖɔ yě kún sɔ́ ná mɔ nukún émítɔn mɛ gbeɖé ó é kú wǔ nú yě tawun. Énɛ́ gúdo ɔ, yě kplá ɛ jɛ tɔjíhún ɔ kɔn.
Tínmɛ e ɖo do lɛ́ é
^ Alǒ “ná wa ɖagbe.”
^ Kpɔ́n Xógbe ɖé lɛ́ sín tínmɛ: “Hwɛvɛ́númɛ.”
^ Alǒ “lǐndɔ̌n.”
^ Alǒ “xɔ akwɛ́ ɖěbǔ.”
^ Alǒ “linlin.”
