Nǔ e Mɛsɛ́dó lɛ́ wa lɛ́ é 8:1-40
8 Hu e è hu Etyɛ́ni é nyɔ́ Sólu nukúnmɛ.
Bɛ́sín gbe nɛ́ gbe ɔ, è jɛ ya dó nú agun e ɖo Jeluzalɛ́mu é jí syɛ́nsyɛ́n. Ahwanvú lɛ́ bǐ gba kpé Judée kpó Samalíi kpó gbé jí; mɛsɛ́dó lɛ́ kɛ́ɖɛ́ jɛ́n ma wa mɔ̌ ǎ.
2 Amɔ̌, mɛ e nɔ tɛ́ dó Mawu wú lɛ́ é sɔ́ Etyɛ́ni sín cyɔ, bo yi ɖi, lobo ví i ɖésú.
3 Sólu ka jɛ ahwan tɔ́n agun ɔ jí syɛ́nsyɛ́n. É nɔ byɔ́ xwé lɛ́ gbe gǎnnugǎnnu ɖěbɔdóɖěwú, bo nɔ dɔn súnnu kpó nyɔ̌nu kpó bǐ tɔ́n, lobo nɔ bɛ́ yě dó gan mɛ.
4 É ɖo mɔ̌ có, ahwanvú ɖěɖěe gba kpé lɛ́ é nɔ ɖo xó Mawu tɔn sín wɛn ɖagbe jlá wɛ gbɔn gbě énɛ́ lɛ́ jí.
5 Mɔ̌ ɖokpó ɔ, Filípu yi toxo Samalíi tɔn* mɛ, bo jɛ Klísu sín xó ɖɔ nú mɛ lɛ́ jí.
6 Ahwan ɔ bǐ nɔ hɛn ayi dó nǔ e ɖɔ wɛ Filípu ɖe é wú, hwenu e yě nɔ ɖo tó ɖó è wɛ, bo nɔ ɖo nǔjíwǔ e bló wɛ é ɖe lɛ́ é kpɔ́n wɛ é.
7 Gbigbɔ nyanya ɖo mɛ gěgé jí; gbigbɔ nyanya énɛ́ lɛ́ nɔ sú xó syɛ́nsyɛ́n, bo nɔ gosín mɛ e jí yě ɖe lɛ́ é jí. Gɔ́ ná ɔ, è gbɔ azɔn nú mɛ e xwe ayǐsó lɛ́ é kpó afɔkponɔ kpó gěgé.
8 Énɛ́ wú ɔ, mɛ e ɖo toxo énɛ́ mɛ lɛ́ é j’awǎ tawun.
9 Nya ɖé ka ɖo toxo ɔ mɛ, bo nɔ nyí Sinmɔ́ɔ; káká jɛ hwenɛ́nu ɔ, majíki wɛ é nɔ bló, bɔ é nɔ jí wǔ nú mɛ e nɔ nɔ Samalíi lɛ́ é. É nɔ ɖɔ ɖɔ émí nyí mɛ nukúnɖéjí.
10 Yě bǐ, bɛ́sín mɛ kpɛví bǐ e ɖo yě mɛ é jí, káká jɛ mɛ ɖaxó bǐ ɔ jí, nɔ sɔ́ ayi ɖó jǐ tɔn, bo nɔ ɖɔ: “Nya élɔ́ wɛ nyí Hlɔ̌nhlɔ́n Mawu tɔn e è nɔ ylɔ́ ɖɔ Ðaxó é.”
11 Yě nɔ sɔ́ ayi ɖó jǐ tɔn, ɖó é sɔ́ hwe ǎ bɔ majíki e é nɔ bló é nɔ jí wǔ nú yě.
12 Amɔ̌, ée yě ɖi nǔ nú Filípu e ɖo Axɔ́súɖuto Mawu tɔn kpó nyǐkɔ Jezu Klísu tɔn kpó sín wɛn ɖagbe jlá wɛ é ɔ, súnnu kpó nyɔ̌nu kpó bǐ bló batɛ́mu.
13 Sinmɔ́ɔ lɔ húzú nǔɖitɔ́, bɔ ée é bló batɛ́mu gúdo é ɔ, é nɔ ɖo Filípu xwedó wɛ, lobɔ nǔjíwǔ kpó nǔdabaɖa kpó, éé bló wɛ Filípu nɔ ɖe lɛ́ é nɔ jí wǔ n’i.
14 Hwenu e mɛsɛ́dó lɛ́ se ɖo Jeluzalɛ́mu ɖɔ mɛ e ɖo Samalíi lɛ́ é yí xó Mawu tɔn é ɔ, yě sɛ́ Piyɛ́ɛ kpó Jaan kpó dó yě.
15 Ée yě yi dɔ̌n é ɔ, yě xo ɖɛ dó yě jí, bónú gbigbɔ mímɛ́ ní wá jǐ yětɔn.
16 Ðó gbigbɔ mímɛ́ ko wá yě ɖě jí ǎ, batɛ́mu kɛ́ɖɛ́ jɛ́n è bló nú yě ɖo nyǐkɔ Aklúnɔ Jezu tɔn mɛ.
17 Yě sɔ́ alɔ ɖó yě jí, bɔ gbigbɔ mímɛ́ wá yě jí.
18 Sinmɔ́ɔ mɔ ɖɔ ényí mɛsɛ́dó lɛ́ sɔ́ alɔ ɖó mɛ lɛ́ jí ɔ, gbigbɔ mímɛ́ nɔ wá yě jí. Énɛ́ wú ɔ, é ɖɔ nú mɛsɛ́dó lɛ́ ɖɔ émí ná ná akwɛ́ yě,
19 lobo ɖɔ: “Mi ná acɛ énɛ́ nyi lɔ, énɛ́ ɔ, ényí un sɔ́ alɔ ɖó mɛ ɖěbǔ jí ɔ, gbigbɔ mímɛ́ ná nɔ wá mɛ ɔ jí.”
20 Piyɛ́ɛ ka ɖɔ n’i ɖɔ: “Kpatágankwɛ́ towe kpó hwi kpó bǐ ní dɔn, ɖó a lin ɖɔ émí sixú sɔ́ akwɛ́ dó xɔ nǔ e Mawu nɔ ná mɛ vɔ̌nu é.
21 Nǔɖé nyí towe ɖo xó élɔ́ mɛ ǎ, nǔɖé ka lɛ́ kan we ɖ’é mɛ ǎ, ɖó ayi towe jlɔ́ ɖo Mawu nukɔn ǎ.
22 Énɛ́ wú ɔ, linlin nyanya énɛ́ e a ɖó é ní vɛ́ nú we,* bónú a ní sa vo nú Jexóva,* énɛ́ ɔ, ényí é nyɔ́ bló ɔ, é ná sɔ́ linlin nyanya e ɖo ayi towe mɛ é kɛ we.
23 Ðó un mɔ ɖɔ aɖǐvɛ́ baɖabaɖa wɛ nú we, bɔ a lɛ́ nyí kannumɔ nú nǔagɔwiwa.”
24 Sinmɔ́ɔ yí gbe nú yě ɖɔ: “Mi sa vo nú Jexóva* dó ta ce mɛ, bónú nǔ e mi ɖɔ lɛ́ é ɖěbǔ ní ma xá mì ó.”
25 Ée yě ɖe kúnnu bǐ mlɛ́mlɛ́, bo ɖɔ xó Jexóva* tɔn gúdo é ɔ, yě lɛ́ kɔ ɖidó Jeluzalɛ́mu, bo ɖo wɛn ɖagbe ɔ jlá gbɔn gletoxo Samalíinu lɛ́ tɔn gěgé mɛ wɛ.
26 Wɛnsagun Jexóva* tɔn ɖɔ nú Filípu ɖɔ: “Sí te, bo ɖidó tofɔligbé, bo sɔ́ ali e gosín Jeluzalɛ́mu yi Gaza é.” (Gbětótló mɛ li ɖé wɛ.)
27 Énɛ́ ɔ, Filípu sí te ɖidó, bo mɔ agooɖojǐe* Etiopíinu ɖé. Nya ɖé wɛ bo ɖó acɛ ɖo axɔ́si Etiopíi tɔn sín acɛkpikpa mɛ, bo nɔ kpé nukún dó axɔ́si ɔ sín dɔkun lɛ́ wú. Jeluzalɛ́mu wɛ é yi bo yi sɛn Mawu,
28 bo lɛ́ kɔ wá xwe xwé, bo ɖo ayǐjínjɔ́n ɖo kɛkɛ́ví tɔn mɛ, bo ɖo gbeyíɖɔ Ezayíi sín wěma xa dó aga wɛ.
29 Énɛ́ ɔ, gbigbɔ mímɛ́ ɖɔ nú Filípu ɖɔ: “Sɛkpɔ́ kɛkɛ́ví énɛ́.”
30 Filípu kán wezun, bo sɛkpɔ́ kɛkɛ́ví ɔ, bo se bɔ agooɖojǐe ɔ ɖo gbeyíɖɔ Ezayíi sín wěma xa dó aga wɛ. Bɔ Filípu ɖɔ: “A ka mɔ nukúnnú jɛ nǔ e xa wɛ a ɖe é mɛ a?”
31 É ɖɔ: “Ényí mɛɖé ma d’alɔ mì ǎ ɔ, nɛ̌ un ka sixú mɔ nukúnnú jɛ mɛ gbɔn?” Énɛ́ ɔ, é byɔ́ Filípu ɖɔ ní byɔ́ kɛkɛ́ví ɔ mɛ, bo jínjɔ́n akpá émítɔn.
32 Akpáxwé Nǔwlánwlán mímɛ́ lɛ́ tɔn e xa wɛ é ɖe é ɖíe: “È kplá ɛ, bo ná yi hu lɛ̌ngbɔ́ ɖɔhun. Lɛ̌ngbɔ́ví e cí xwíí ɖo fúnkpatɔ́ tɔn nukɔn é ɖɔhun ɔ, é kɛ nu ǎ.
33 Hwenu e è ɖo winnyá dó è wɛ é ɔ, è ɖɔ hwɛ jlɔ́jlɔ́ n’i ǎ. Mɛ̌ ka ná ɖɔ jijimɛ tɔn sín dǒyidǒslɔ́? Ðó è sú kún dó nú gbɛ tɔn sín ayǐkúngban jí.”
34 Agooɖojǐe ɔ ɖɔ nú Filípu ɖɔ: “Kɛnklɛ́n, mɛ̌ wú gbeyíɖɔ ɔ ka ɖɔ xó élɔ́ dó? Éɖésúnɔ wú wɛ a, alǒ mɛ ɖěvo?”
35 Filípu yí xó, bo bɛ́sín akpáxwé Nǔwlánwlán mímɛ́ lɛ́ tɔn énɛ́ jí, bo jlá wɛn ɖagbe e kunkplá Jezu é agooɖojǐe ɔ.
36 Ée yě ɖo yiyi wɛ é ɔ, yě wá jɛ fí ɖé, bɔ sin ɖo fí ɔ, bɔ agooɖojǐe ɔ ɖɔ: “Kpɔ́n! Sin ɖíe. Étɛ́ ka gbɛ́ ɖɔ nyi ní ma bló batɛ́mu ó?”
37 * ——
38 Énɛ́ ɔ, agooɖojǐe ɔ ɖɔ bɔ è ɖó kɛkɛ́ví ɔ te, bɔ é kpó Filípu kpó bǐ byɔ́ sin ɔ mɛ, bɔ Filípu bló batɛ́mu n’i.
39 Ée yě tɔ́n sín sin ɔ mɛ é ɔ, gbigbɔ Jexóva* tɔn sɔ́ Filípu sín fínɛ́ bléwún, bɔ agooɖojǐe ɔ sɔ́ mɔ ɛ ǎ. Amɔ̌, é ɖidó kpó xomɛhunhun kpó.
40 Filípu ka wá mɔ éɖée ɖo Acidɔ́di. É gbɔn gbě énɛ́ jí, bo nɔ ɖo wɛn ɖagbe ɔ jlá wɛ gbɔn toxo lɛ́ bǐ mɛ, káká bo wá Sezalée.
Tínmɛ e ɖo do lɛ́ é
^ Alǒ vlafo, “toxo Samalíi tɔn ɖokpó.”
^ Kpɔ́n Xógbe ɖé lɛ́ sín tínmɛ: “Hwɛvɛ́númɛ.”
^ Alǒ “axɔ́súzɔ́watɔ́.”
