YOMARA, gɔ́ nú nɔví tɔn Marcelo kpó Hiver kpó nɔ nɔ gletoxo kpɛví ɖé mɛ ɖo Guatemala. Yomara jɛ Biblu kplɔ́n xá Kúnnuɖetɔ́ lɛ́ jí, bɔ nukɔnmɛ ɔ, nɔví tɔn lɛ́ wá xo kpóɖó n’i. Amɔ̌, wǔvɛ́ ɖé ɖo fínɛ́. Yě mɛ atɔn lɛ́ bǐ wɛ nyí nukúntɔ́nnɔ; yě ka nɔ sixú xa nǔ e è wlán dó nukúntɔ́nnɔ lɛ́ sín alɔ jí é ǎ. Énɛ́ wú ɔ, mɛ e nɔ kplɔ́n Biblu xá yě é nɔ xa akpáxwé nǔkplɔ́nkplɔ́n ɔ tɔn lɛ́ kpó wěmafɔ lɛ́ kpó nú yě.

Kplé lɛ́ yiyi lɔ nɔ vɛ́ wǔ nú yě. Yěɖésúnɔ nɔ sixú zun zɔnlin yi kpléxɔ Axɔ́súɖuto ɔ tɔn e sɛkpɔ́ yě hú gǎn é mɛ ǎ; cɛ́jú 40 wɛ yě ná bló cóbó yi kpléxɔ énɛ́ mɛ. Amɔ̌, nɔví e ɖo agun ɔ mɛ lɛ́ é bló tuto bo nɔ sɔ́ yě yi kplé lɛ́ bǐ jí. Hwenu e è jɛ wěmaxɔmɛvízɔ́ ɖe nú yě jí é ɔ, nɔví lɛ́ nɔ d’alɔ yě bɔ yě nɔ kplɔ́n azɔ̌ yětɔn, bo nɔ hɛn dó tamɛ.

Ðo mai 2019 ɔ, è jɛ kplé lɛ́ bló jí ɖo gletoxo yětɔn mɛ. Énɛ́ gúdo ɔ, asú kpó asi kpó gběxosín-alijítɔ́ hwebǐnu tɔn ɖokpó sɛ tɛn yi gletoxo ɔ mɛ. Yě wá gbeta ɔ kɔn bá d’alɔ nɔví nɔví atɔn lɛ́ bónú yě ná nyɔ́ nukúntɔ́nnɔ lɛ́ sín nǔwlánwlán xa, bo lɛ́ nyɔ́ wlán, có yěɖésúnɔ ka tuun lěe è nɔ wa mɔ̌ gbɔn é ǎ. Yě yi wěmasɛxwetɛn ɖokpó, bo yí wěma ɖěɖěe ná d’alɔ yě bɔ yě ná kplɔ́n lěe è nɔ xa nǔ e è wlán dó nukúntɔ́nnɔ lɛ́ sín nǔwlánwlán lɔ jí é gbɔn é, bo ná dó tuun lěe yě ná kplɔ́n mɛ ɖěvo lɛ́ gbɔn é.

Sun yɔywɛ ɖé gúdo ɔ, nɔví nɔví atɔn lɛ́ jɛ nǔwlánwlán e ɖo nukúntɔ́nnɔ lɛ́ sín alɔ jí lɛ́ é xa jí ganjí, bɔ énɛ́ zɔ́n bɔ xɔ́ntɔn e yě zun xá Jexóva é lɛ́ vɛ́ d’é jí. Gběxosín-alijítɔ́ hwebǐnu tɔn wɛ nú Yomara, Marcelo kpó Hiver kpó din. Marcelo lɛ́ nyí devízɔ́watɔ́ sinsɛnzɔ́wiwa tɔn. Yě nɔ hɛn alɔnu yětɔn ján ɖo aklúnɔzángbla lɛ́ bǐ mɛ dó wa nǔ gbigbɔ tɔn lɛ́. Akpakpa e nɔ sɔ́ yě é d’alɔ mɛ ɖěvo lɛ́ tawun.

Gǔdo e agun ɔ nɔ nú nɔví nɔví atɔn énɛ́ lɛ́ kpó wǎnyíyí kpó é su nukún yětɔn mɛ tawun. Yomara ɖɔ: “Sín hwenu e mǐ xo go Kúnnuɖetɔ́ lɛ́ azɔn nukɔntɔn ɔ é wɛ yě jɛ wǎnyíyí adodwé ɔ ɖe xlɛ́ mǐ jí.” Marcelo ɖɔ gɔ́ ná ɖɔ: “Mǐ ɖó xɔ́ntɔn ɖaaɖagbe gěgé ɖo agun mǐtɔn mɛ, bo ɖo kplékplé nɔví lɛ́ tɔn e gbɔn gbɛ ɔ bǐ mɛ, bɔ wǎnyíyí dɔn cá é mɛ.” Yomara kpó nɔví tɔn lɛ́ kpó ɖo nukún ɖó hwenu e ayǐkúngban ɔ ná húzú palaɖísi é wɛ, kpó akpakpa sɔ́ mɛ kpó.—Ðɛh. 37:10, 11; Eza. 35:5.