ÐÓ MǏ ɖò gbɛ̀ e wlú é ɖé mɛ wutu ɔ, mǐ ɖó na dó gǎn tawun cobo na mɔ fífá. Enyi mǐ na bo tlɛ ko mɔ fífá ɔ ɖó bǎ ɖé mɛ ɔ, hwɛhwɛ wɛ mǐ nɔ dó gǎn tawun, bonu é ni ma sún gló mǐ ó. Etɛ Xó Mawu tɔn ka ɖɔ bɔ é sixu d’alɔ mǐ, bɔ mǐ na mɔ fífá jɔ fífá e na nɔ ayǐ sɔyi é? Nɛ̌ mǐ ka sixu d’alɔ mɛ ɖevo lɛ bɔ ye lɔ na wà mɔ̌ gbɔn?

Cobonu mǐ na ɖu vivǐ fífá jɔ fífá tɔn ɔ, mǐ ɖó na ɖò ayijayǐ mɛ, bo na lɛ́ vo ɖò mǐɖée mɛ. Mǐ ɖó na lɛ́ zun xɔ́ntɔn vívɛ́ xá mɛ ɖevo lɛ. Taji bǐ ɔ, mǐ ɖó na zun xɔ́ntɔn vívɛ́ xá Mawu cobo na mɔ fífá e nɔ nɔ ayǐ sɔyi é. Nɛ̌ mǐ ka sixu wà mɔ̌ gbɔn?

Enyi mǐ setónú nú sɛ́n jlɔjlɔ Jehovah tɔn lɛ kpo nugbodòdó jlɔjlɔ tɔn lɛ kpo ɔ, xlɛ́xlɛ́ wɛ mǐ ɖè ɖɔ mǐ ɖeji dó wutu tɔn, bo lɛ́ jló na ɖó kancica ɖagbe ɖé xá ɛ nɛ. (Jel. 17:7, 8; Ja. 2:22, 23) Wǎgbɔ tɔn ɔ, é nɔ sɛkpɔ mǐ, bo nɔ sɔ́ fífá ayi mɛ tɔn dó d’ajɔ mǐ. Ezayíi 32:17 ɖɔ: “Hwɛjijɔ na hɛn fífá wá; é na na mɛ ayi jɛ ayǐ kpo jiɖiɖe kpo kaka sɔyi.” Mǐ sixu mɔ fífá nùjɔnǔ tɔn ɔ gbɔn tónúsíse nú Jehovah sín ayi mɛ gblamɛ.​—Eza. 48:18, 19.

Nùnina nukúnɖeji e gosin Tɔ́ mǐtɔn jixwé tɔn ɔ gɔ́n, bo nyí gbigbɔ mímɛ́ tɔn é sixu d’alɔ mǐ, bɔ mǐ na sɔnǔ nú fífá e nɔ nɔ ayǐ sɔyi é.​—Mɛ. 9:31.

Mɛsɛ́dó Pɔlu slɛ́ fífá bɔ é nyí “sínsɛ́n gbigbɔ tɔn” sín akpáxwé atɔngɔ ɔ. (Ga. 5:22, 23, nwt) Ðó gbigbɔ Mawu tɔn wɛ nɔ d’alɔ bɔ è nɔ mɔ fífá jɔ fífá wutu ɔ, mǐ ɖó na jó mǐɖée dó nú gbigbɔ mímɛ́ ɔ b’ɛ na d’alɔ mǐ bɔ mǐ na sɔnǔ nú fífá jɔ fífá. Mǐ ni ɖɔ xó dó ali e nu gbigbɔ mímɛ́ sixu d’alɔ mǐ, bɔ mǐ na mɔ fífá ɖè é wè jí.

 Nukɔntɔn ɔ, Xó Mawu tɔn e é sɔ́ d’ayi mɛ nú mɛ lɛ bɔ ye wlan é xixa ɖò gbesisɔmɛ na d’alɔ mǐ, bɔ mǐ na sɔnǔ nú fífá. (Ðɛh. 1:2, 3) Enyi mǐ ɖò tamɛ lin dó wɛn Biblu tɔn jí wɛ ɔ, gbigbɔ Jehovah tɔn nɔ d’alɔ mǐ, bɔ mǐ nɔ mɔ nukúnnú jɛ linlin tɔn lɛ wu dó nǔ gègě jí. Ði kpɔ́ndéwú ɔ, mǐ nɔ mɔ lee é nɔ nɔ fífá mɛ gbɔn é, kpo nǔ e wu fífá dó nyí nǔ taji n’i sɔmɔ̌ é kpo. Enyi mǐ zán nùkplɔnmɛ mɔhun e ɖò Xó Mawu tɔn mɛ lɛ é ɔ, mǐ nɔ ɖu vivǐ fífá ɖaxó tɔn ɖò gbɛzán mǐtɔn mɛ.​—Nùx. 3:1, 2.

Wegɔ ɔ, mǐ ɖó na xoɖɛ, bo byɔ gbigbɔ mímɛ́ Mawu tɔn. (Luk. 11:13) Jehovah d’akpá ɖɔ enyi mǐ byɔ alɔdo emitɔn ɔ, “fífá Mawu tɔn e hugǎn nukúnnúmɔjɛnǔmɛ gbɛtɔ́ tɔn bǐ ɔ na bló ayixa [mǐ]tɔn kpodo linlin [mǐ]tɔn lɛ kpo ɖó, bɔ [mǐ] na sixu nɔ bǔ ɖò Klisu Jezu mɛ.” (Fili. 4:6, 7) Enyi mǐ nɔ xoɖɛ dó ganjɛ gbigbɔ Jehovah tɔn wu ɔ, Mawu nɔ bló bɔ fífá ayi mɛ tɔn e mɛ ɖěɖee zun xɔ́ntɔn vívɛ́ xá ɛ lɛ é kɛɖɛ nɔ mɔ é nɔ gɔ́ gbɛzán mǐtɔn mɛ.​—Hlɔ. 15:13.

Nɛ̌ mɛɖé lɛ ka ko zán wěɖexámɛ Biblu tɔn enɛ bo bló huzuhuzu e jɛxa lɛ é, bɔ enɛ zɔ́n bɔ ye ɖu vivǐ fífá e nɔ nɔ ayǐ é tɔn xá Jehovah, yeɖesunɔ kpo gbɛtɔ́ hàtɔ́ yetɔn lɛ kpo gbɔn?

Ðò agun Klisanwun tɔn mɛ ɖò égbé ɔ, “gbɛtɔ́” ee nyí “xomɛsinnɔ” ɖ’ayǐ lɛ é ɖé lɛ tíìn, bɔ enyi ye ɖò nǔ wà xá mɛ ɖevo lɛ wɛ dìn ɔ, ye nɔ xlɛ́ ɖɔ mɛ nú nɔ ɖu ayi mɛ nú emi, emi nɔ nyɔ́ xomɛ, nɔ ɖó suúlu, bo nɔ lɛ́ fá xomɛ. * (Nùx. 29:22) Ðǒ ayi lee xó enɛ nyí nugbǒ gbɔn é wu dó wɛnjlatɔ́ Axɔsuɖuto ɔ tɔn wè elɔ lɛ wu; è d’alɔ ye bɔ ye ɖu ɖò xomɛsin jí, bo kplɔ́n fífá mɛ ninɔ xá mɛ ɖevo lɛ.

David ɔ, linlin tɔn nyanya lɛ nɔ tɔ́n ɖò xóɖiɖɔ tɔn mɛ. Cobonu é na zé gbɛzán tɔn jó nú Mawu ɔ, é nɔ mɔ xó ɖɔ dó mɛ ɖevo lɛ wu hwɛhwɛ, bo nɔ dó gbè vɛ́sin nú xwédo tɔn. É wá yá é ɔ, David mɔ ɖɔ emi ɖó na bló huzuhuzu lɛ, bo na huzu mɛfífá. Nɛ̌ é ka mɔ fífá gbɔn? É ɖɔ: “Un jɛ nugbodòdó Biblu tɔn lɛ zán jí ɖò gbɛzán ce mɛ. Nǔ e mɛ é tɔ́n kɔ dó é  wɛ nyí ɖɔ sísí e ɖò nyì kpo xwédo ce kpo tɛntin é lɛ́ jɛji.”

Rachel ɔ, fí e é sù ɖè é wà nǔ dó linlin tɔn wu. É yí gbè ɖɔ: “Kaka jɛ dìn ɔ, un kpò ɖò xwi ɖí xá xomɛsin wɛ, ɖó un sù ɖò xwédo e nɔ sìn xomɛ é ɖé mɛ.” Etɛ ka d’alɔ ɛ bɔ é huzu mɛfífá hugǎn? Xósin tɔn ɖíe: “Ðɛxixo bo ganjɛ Jehovah wu.”

David kpo Rachel kpo ɔ, kpɔ́ndéwú wè kpowun wɛ ye nyí, bo xlɛ́ ɖɔ enyi mǐ zán nugbodòdó Biblu tɔn lɛ, bo byɔ Mawu ɖɔ é ni na gbigbɔ tɔn mǐ bonu é na d’alɔ mǐ ɔ, mǐ na mɔ fífá. Nugbǒ wɛ ɖɔ mǐ ɖò gbɛ̀ nyanya ɖé mɛ, amɔ̌, mǐ hɛn ɔ mǐ na ɖó fífá ayi mɛ tɔn e na gɔ́ sò nú nǔwaɖókpɔ́ e ɖò xwédo mǐtɔn kpo Klisanwun hàtɔ́ lɛ kpo tɛntin é. Jehovah byɔ mǐ ɖɔ mǐ ni “nɔ fífá mɛ xá gbɛtɔ́ lɛ bǐ.” (Hlɔ. 12:18) Nǔ ka sixu nyí mɔ̌ dóó à? Nyɔna tɛ lɛ ka nɔ tɔ́n sín gǎndido bo na xò fífá kàn mɛ?

Enyi mǐ yì kúnnuɖegbe ɔ, mǐ nɔ ylɔ mɛ lɛ ɖɔ ye ni wá ɖu lè wɛn fífá tɔn e kúnkplá Axɔsuɖuto Mawu tɔn é tɔn. (Eza. 9:5, 6; Mat. 24:14) Awǎjijɛnú wɛ é nyí ɖɔ mɛ gègě ko yí gbè na. É sín enɛ wu bɔ linlin nukúnɖiɖo ɖě sɔ́ tíìn ǎ tɔn, alǒ, xomɛ sinsin ɖó nǔ e ɖò jijɛ lɛlɛ̌ dó mɛ wɛ lɛ é wu tɔn sɔ́ nɔ ɖí bú ye ǎ. É nyɔ́ wà ɔ, ye ɖó nukúnɖiɖo nùjɔnǔ tɔn ɖé nú sɔgudo dìn, b’ɛ nɔ sísɛ́ ye bɔ ye “nɔ ba fífá, bo nɔ jɛhun d’eji.”​—Ðɛh. 34:15.

Amɔ̌, mɛ lɛ bǐ wɛ nɔ yí wɛn mǐtɔn ganji ǎ, é hwe bǐ ɔ, mɛɖé lɛ nɔ gbɛ́ azɔn nukɔntɔn ɔ. (Jaan 3:19) É ɖò mɔ̌ có, gbigbɔ Mawu tɔn nɔ d’alɔ mǐ, bɔ mǐ nɔ xwlé wɛnɖagbe ɔ ye ɖò fífá mɛ kpodo sísí kpo. Mɔ̌ mɛ ɔ, mǐ nɔ xwédo alixlɛ́mɛ e Jezu na dó sinsɛnzɔ́ ɔ wu b’ɛ ɖò Matie 10:11-13 mɛ é. Finɛ ɖɔ: “Enyi mi byɔ xwé ɖé gbè hǔn, mi ɖɔ: ‘Fífá ni nɔ xwé ɔ jí.’ Enyi fífá jɛxa mɛ e ɖò xwé enɛ gbè lɛ hǔn, fífá mitɔn ni nɔ ye jí; é ma ka jɛxa ye ǎ hǔn, fífá mitɔn ni lɛkɔ xwedó mi.” Enyi mǐ xwedó wěɖexámɛ Jezu tɔn ɔ, mǐ sixu lɛkɔ bɔ fɛn na tɔ́n fífá mǐtɔn ǎ, bɔ mǐ sixu lɛ́ ɖó nukún ɖɔ mǐ na d’alɔ mɛ ɔ ɖò sɔgudo.

Mǐ nɔ lɛ́ gɔ́ sò nú fífá hwenu e mǐ sɛkpɔ gǎn e ɖò tò nu lɛ é kaka jɛ ye mɛ ɖěɖee klán gbè xá azɔ̌ mǐtɔn lɛ é jí kpo sísí kpo é. Ði kpɔ́ndéwú ɔ, é sín linlin agɔ e acɛkpikpa e ɖò tò Aflika tɔn mɛ lɛ é ɖokpo ɖó é wu, b’ɛ gbɛ́ ɖɔ è kún na gbá Kpléxɔ Axɔsuɖuto ɔ tɔn lɛ ó. Bo na dó ɖeɖɛ xó ɔ ɖò fífá mɛ ɔ, è ɖè mɛsɛ́dó e ko wà sinsɛnzɔ́ ɖò Aflika tò enɛ mɛ é, b’ɛ na yì mɔ afɔsɔ́ɖótetɔ́ ɖaxó tò ɔ tɔn ɖò Londres ɖò Angleterre. É ɖó na ɖɔ xó nú gǎn ɔ dó fífá sín azɔ̌ e wà wɛ Kúnnuɖetɔ́ Jehovah tɔn lɛ ɖè ɖò Aflika tò enɛ mɛ é wu. Nɛ̌ nǔ lɛ ka wá yì ɖó?

É ɖɔ: “Hwenu e un jɛ fí e è nɔ yí mɛ ɖè é ɔ, un mɔ ɖɔ mɛ e nɔ yí mɛ é ɔ, gbè e un ko kplɔ́n é sín akɔ mɛ wɛ é gosin, ɖó nǔsisɔ tɔn wutu wɛ un lin mɔ̌. Enɛ wu ɔ, un dó gbè è dó gbè éɖesunɔ tɔn mɛ. É kpaca ɛ, bɔ é kanbyɔ mì ɖɔ: ‘Etɛ ka hɛn mi wá?’ Un ɖɔ n’i kpodo sísí kpo ɖɔ un jló na mɔ afɔsɔ́ɖótetɔ́ ɖaxó ɔ. É tɛ kàn sɛ́dó gǎn ɔ, b’ɛ wá mɔ mì, bo dó gbè mì dó gbè ayǐ ɔ jí tɔn mɛ. Enɛ gudo ɔ, é xwè sɔ bo ɖótó mì hwenu e un ɖò nǔ tín mɛ n’i wɛ dó lee azɔ̌ Kúnnuɖetɔ́ lɛ tɔn nyí azɔ̌ fífá gbɔn é wu é.”

Tinmɛ e nɔví ɔ na kpo sísí kpo é ɖè nukúnnúmɔjɛnǔmɛ agɔ e afɔsɔ́ɖótetɔ́ ɔ ɖó dó azɔ̌ mǐtɔn wu é kpo linlin agɔ e é ɖó d’ewu é kpo habǔ síìn. Táan ɖé lɛ gudo ɔ, acɛkpikpa Aflika tò enɛ tɔn yí gbè nú xɔgbigbázɔ́ mǐtɔn e è gbɛ́ é. Nɔví lɛ j’awǎ tawun dó xó enɛ e fó dó fífá mɛ é wu! Nugbǒ ɔ, nǔ wà xá mɛ ɖevo lɛ kpo sísí kpo nɔ hɛn lè ɖagbe gègě wá; fífá lɔ ɖò lè enɛ lɛ mɛ.

Égbé ɔ, togun Jehovah tɔn nɔ ɖu vivǐ paladisi gbigbɔ tɔn e mɛ fífá gɔ́ é ɖé tɔn. A na gɔ́ sò nú fífá mɔhun, enyi a sɔnǔ nú akpáxwé sínsɛ́n gbigbɔ tɔn enɛ tɔn ɖò gbɛzán towe mɛ ɔ nɛ. Taji bǐ ɔ, nǔ towe na nyɔ́ Jehovah nukúnmɛ, bɔ a na mɔ fífá e túnflá bo na nɔ ayǐ sɔyi é ɖò gbɛ̀ yɔyɔ̌ Mawu tɔn mɛ.​—2 Pi. 3:13, 14.