Etoɗen annden fii suka danndunooɗo kaawu mun. Kaawu makko hari ko o sahaabaajo innetenooɗo Puulusa. En anndaa innde suka on, kono hiɗen anndi ko o waɗunoo kon, no holli himo wondunoo e cuucal. Hiɗon faalaa anndude ko o waɗunoo kon ? —

Puulusa hari no ka kaso Yerusalaam. Ɓe nannguno mo sabu ko o waajotonoo kon fii annabi Iisaa. Yimɓe bonɓe goo aɲɲuno Puulusa. Ɓe haldi fii warugol mo. Ɓe wi’i : « Yewten Kumanndan on yo o addu Puulusa fii yo o ɲaawe. Hara hiɗen suuɗii ka laawol. Si Puulusa no feƴƴineede, waren mo ! »

Baaɗiraawo Puulusa on nani ɗun. Ko honɗun o waɗunoo ? O yahuno ka kaso, o sifanii Puulusa. Ko ɗon kisan Puulusa yeetii mo, yo o yahu o sifanoo kumanndan on fii ko ɓe haldi warugol mo kon. Hiɗon sikkude ɗun welanno mo fii yewtugol kumanndan on ? — Oo’o, ɓayri kumanndan on hari ko o aaden hittuɗo. Kono baaɗiraawo Puulusa on no wondunoo e cuucal e o sifanino Kumanndan on.

Kumanndan on annduno ko o haanunoo waɗude. O mooɓindirno suufaaɓe ko yahata 500 fii danndugol Puulusa ! O yeetii ɓe yo ɓe naɓu Puulusa Seezariiya on jemma ɗon. Wonkii Puulusa kin daɗuno ? — Ko goonga, yimɓe bonɓe ɓen waawaano mo sakkaade ! Ko ɓe fonndunoo kon laatanooki.

Ko honɗun jannguɗon e oo taariika ? — Onon kadi hiɗon waawi wondude e cuucal wano baaɗiraawo Puulusa on. Hiɗen haani wondude e cuucal siɗen yewtude fii Yahuwah. On waaway wondude e cuucal, yewton fii Yahuwah ? — Si on waɗii ɗun, on waaway danndude wonkii goɗɗo.