“No hewɔ lɛ, nyɛbaa nyɛhe shi yɛ Nyɔŋmɔ nine ni wa lɛ shishi, koni ewó nyɛnɔ yɛ be ni sa mli, be mli ni nyɛshɛrɛɔ nibii ni hãa nyɛyeɔ nyɛtsui lɛ fɛɛ nyɛshwieɔ enɔ lɛ, ejaakɛ ejwɛŋɔ nyɛhe.”​—1 Petro 5:6, 7, Jeŋ Hee Shishitsɔɔmɔ.

 “Hewɔ lɛ nyɛbaa nyɛhe shi yɛ Nyɔŋmɔ nine ni wa lɛ shishi, koni ewo nyɛnɔ yɛ be ni sa mli, nyɛŋɔa nyɛhaomɔ fɛɛ nyɛfɔa enɔ, ejaakɛ lɛ ejwɛŋɔ nyɛnɔ.”​—1 Petro 5:6, 7, Ga Biblia momo.

 Bɔfo Petro kɛ wiemɔi nɛɛ wo Kristofoi hewalɛ koni amɛná nɔmimaa akɛ amɛbaanyɛ amɛsɔle amɛhã Nyɔŋmɔ, ni amɛkɛɛ lɛ amɛnaagbai kɛ nibii fɛɛ ni yeɔ amɛtsui lɛ. Nyɔŋmɔ sumɔɔ heshibalɔi, ni ebaajɔɔ amɛ waa.

 “Nyɛbaa nyɛhe shi yɛ Nyɔŋmɔ nine ni wa lɛ shishi.” Yɛ Biblia lɛ mli lɛ, kɛ́ atsĩ Nyɔŋmɔ nine tã lɛ, bei pii lɛ ekɔɔ ehewalɛ ni ekɛkpɔ̃ɔ mɔ, kɛ ehewalɛ ni ekɛbuɔ mɔ he lɛ he. (2 Mose 3:19; 5 Mose 26:8; Ezra 8:22) Kɛ́ Kristofoi kɛ amɛhiɛ fɔ̃ Nyɔŋmɔ nɔ lɛ, no tsɔɔ akɛ amɛmiiba amɛhe shi amɛmiiwo enine shishi. Amɛle akɛ amɛnyɛmɔi yawaa he ko, ni amɛ diɛŋtsɛ amɛnyɛŋ amɛkpee kai ni baa amɛnɔ lɛ naa. (Abɛi 3:5, 6; Filipibii 4:13) Amɛyɛ hekɛnɔfɔɔ akɛ Nyɔŋmɔ yɛ hewalɛ ni ekɛbaaye ebua amɛ yɛ be ni sa mli, kɛ gbɛ ni hi fe fɛɛ nɔ.​—Yesaia 41:10.

 “Koni ewó nyɛnɔ yɛ be ni sa mli.” Mɛi ni toɔ amɛtsui shi kɛkpeɔ kai anaa lɛ baanyɛ aná nɔmimaa akɛ, yɛ naagbee mli aahu lɛ, Nyɔŋmɔ baajwere amɛ. Eŋmɛŋ gbɛ ni aka etsuji kɛya naanɔ, loo aka amɛ fe bɔ ni amɛbaanyɛ naa amɛdamɔ. (1 Korintobii 10:13) Moŋ lɛ, kɛ́ amɛtee nɔ amɛfee ekpakpa lɛ, bɔ fɛɛ bɔ ni fee lɛ, Nyɔŋmɔ baajɔɔ amɛ “yɛ be ni sa mli.”​—Galatiabii 6:9.

 “Be mli ni nyɛshɛrɛɔ nibii ni hãa nyɛyeɔ nyɛtsui lɛ fɛɛ nyɛshwieɔ enɔ lɛ, ejaakɛ ejwɛŋɔ nyɛhe.” Kristofoi baanyɛ amɛshɛrɛ nibii yeɔ amɛtsui lɛ fɛɛ amɛshwie Nyɔŋmɔ nɔ, loo amɛŋɔ amɛfɔ̃ enɔ kɛtsɔ heshibaa mli ni amɛbaajɛ amɛsɔle amɛhã Yehowa lɛ nɔ. Niiamlitaomɔ ko tsɔɔ mli akɛ: “Feemɔ wiemɔ ni ji ashɛ afɔ̃ lɛ tsɔɔ, ni mɔ ko kɛ hewalɛ baajie nɔ ko kɛje enɔ. Etsɔɔ nɔ ko ni mɔ lɛ jeɔ gbɛ efeɔ.” Kɛ́ Kristofonyo ko shɛrɛ nibii ni hãa eyeɔ etsui, loo enaagbai lɛ eshwie Nyɔŋmɔ nɔ lɛ, etsuiyeli lɛ baaba shi, ni ebaaná nɔ ni Biblia lɛ tsɛɔ lɛ akɛ “Nyɔŋmɔ toiŋjɔlɛ” lɛ. (Filipibii 4:6, 7) Ebaanyɛ ená nɔmimaa akɛ, Nyɔŋmɔ miisumɔ ni eye ebua lɛ, ejaakɛ mɔ lɛ le akɛ, Nyɔŋmɔ jwɛŋɔ ehe, ni Nyɔŋmɔ baanyɛ ekɛ ehewalɛ lɛ awaje lɛ.​—⁠Lala 37:5; 55:22.

 Yitso 5 lɛ ji sane ni gbeɔ klɛŋklɛŋ wolo ni bɔfo Petro ŋma eyahã Kristofoi lɛ naa. (1 Petro 1:1) Kristofoi ni hi shi yɛ nakai beiaŋ lɛ kɛ naagbai srɔtoi ni ka amɛhemɔkɛyeli kpe, ni ekolɛ eye amɛtsui, ni nakai nɔŋŋ eji yɛ Kristofoi ni yɔɔ ŋmɛnɛ lɛ hu agbɛfaŋ. (1 Petro 1:6, 7) Akɛni Petro le naagbai ni amɛkɛkpeɔ lɛ hewɔ lɛ, aaafee afi 62-64 Ŋ.B lɛ, eŋma amɛ wolo kɛwo amɛ hewalɛ, ni eshɛje amɛmii.​—1 Petro 5:12.

 Be ni Petro muɔ ewolo lɛ naa lɛ, ewo mɛi ni kɛ amɛhemɔkɛyeli lɛ he kai kpeɔ lɛ ŋaa, ni ewo amɛ hewalɛ. Etsɔɔ akɛ, kɛ́ amɛtee nɔ amɛba amɛhe shi, ni amɛkɛ amɛhiɛ fɔ̃ Nyɔŋmɔ nɔ lɛ, amɛbaanyɛ amɛná nɔmimaa akɛ Nyɔŋmɔ baawa amɛ koni amɛfi shi. (1 Petro 5:5-10) Bɔ ni Petro wiemɔi lɛ wo Kristofoi ni yɔɔ ebeiaŋ lɛ hewalɛ lɛ, nakai nɔŋŋ ebaanyɛ ewo Kristofoi ni awaa amɛyi ŋmɛnɛ lɛ hu hewalɛ.

 Kwɛmɔ 1 Petro wolo lɛ hiɛkpamɔ vidio kuku nɛɛ.