“Ni mina ŋwɛi hee kɛ shikpɔŋ hee; ejaakɛ tsutsu ŋwɛi lɛ kɛ tsutsu shikpɔŋ lɛ eho etee, ni ŋshɔ lɛ bɛ dɔŋŋ.”​—Kpojiemɔ 21:1, Jeŋ Hee Shishitsɔɔmɔ.

 “Ni mina ŋwɛi hee kɛ shikpɔŋ hee; ejaakɛ tsutsu ŋwɛi lɛ kɛ tsutsu shikpɔŋ lɛ eho etee, ni ŋshɔ bɛ dɔŋŋ.”​—Kpojiemɔ 21:1, Ga Biblia momo.

 Ŋmalɛ nɛɛ kɛ mfonirifeemɔ wiemɔ tsu nii kɛtsɔɔ akɛ, Nyɔŋmɔ Maŋtsɛyeli lɛ baaye adesai anɔyelii fɛɛ anajiaŋ. Maŋtsɛyeli lɛ baajie efɔŋfeelɔi kɛje shihilɛ mli, ni ebaaye adesai ni jɛɔ amɛsuɔmɔ mli amɛbaa amɛhe shi amɛhãa enɔyeli lɛ anɔ.

 “Okadii,” loo mfonirifeemɔ wiemɔi anɔ atsɔ akɛ Kpojiemɔ wolo lɛ mli saji lɛ hã. (Kpojiemɔ 1:1) No hewɔ lɛ, nilee yɛ mli akɛ wɔbaamu sane naa akɛ ŋwɛi kɛ shikpɔŋ ni atsĩ tã yɛ ŋmalɛ nɛɛ mli lɛ jeee ŋwɛi kɛ shikpɔŋ diɛŋtsɛ, shi mfonirifeemɔŋ nɔ. Kɛfata he lɛ, atsĩ mfonirifeemɔ “ŋwɛi hee” kɛ “shikpɔŋ hee” hu ta yɛ Biblia ŋmalɛi krokomɛi amli. (Yesaia 65:17; 66:22; 2 Petro 3:13) Kɛ́ wɔpɛi enɛɛmɛi kɛ ŋmalɛi krokomɛi amli lɛ, ebaaye ebua wɔ ni wɔnu shishi jogbaŋŋ.

 “Ŋwɛi hee.” Bei komɛi lɛ, Biblia lɛ kɛ wiemɔ “ŋwɛi” lɛ tsuɔ nii kɛdamɔɔ shi ehãa nɔyeli loo maŋtsɛyeli. (Yesaia 14:12-14; Daniel 4:25, 26) No hewɔ lɛ, wolo ko wie akɛ kɛ́ aawie gbalɛ mli ninai ahe lɛ, akɛ “ŋwɛi feɔ nɔyeli hewalɛ loo maŋtsɛyeli he mfoniri.” a No hewɔ lɛ, ekã shi faŋŋ akɛ “ŋwɛi hee” ni akɛtsu nii yɛ Kpojiemɔ 21:1 lɛ damɔ shi kɛhã Nyɔŋmɔ Maŋtsɛyeli lɛ. Atsĩ ŋwɛi nɔyeli nɛɛ, ni bei komɛi lɛ atsɛɔ lɛ “ŋwɛi Maŋtsɛyeli lɛ” tã yɛ Kpojiemɔ wolo lɛ kɛ Biblia woji krokomɛi amli. (Mateo 4:17; Bɔfoi 19:8; 2 Timoteo 4:18; Kpojiemɔ 1:9; 5:10; 11:15; 12:10) Etsɛŋ, Nyɔŋmɔ Maŋtsɛyeli lɛ ni enɔ Maŋtsɛ ji Yesu lɛ baaye “tsutsu ŋwɛi” ni ji nɔyelii ni adesai ni yeee emuu to shishi lɛ fɛɛ najiaŋ.​—Daniel 2:44; Luka 1:31-33; Kpojiemɔ 19:11-18.

 “Shikpɔŋ hee.” Biblia lɛ kɛɔ akɛ afiteŋ shikpɔŋ diɛŋtsɛ ni wɔyɔɔ nɔ nɛɛ, ni akɛ ekroko hu yeŋ najiaŋ kɔkɔɔkɔ. (Lala 104:5; Jajelɔ 1:4) Belɛ, mɛni ji mfonirifeemɔ shikpɔŋ lɛ? Bei pii lɛ, Biblia lɛ kɛ wiemɔ ni ji “shikpɔŋ” lɛ tsuɔ nii kɛdamɔɔ shi kɛhãa adesai. (1 Mose 11:1; 1 Kronika 16:31; Lala 66:4; 96:1) No hewɔ lɛ, ekã shi faŋŋ akɛ “ŋwɛi hee lɛ” damɔ shi kɛhã adesai akuu ko ni jɛɔ amɛsuɔmɔ mli amɛbaa amɛhe shi amɛhãa Nyɔŋmɔ ŋwɛi nɔyeli lɛ. “Tsutsu shikpɔŋ” lɛ loo adesai ni teɔ shi amɛwoɔ Nyɔŋmɔ Maŋtsɛyeli lɛ baaho aya.

 “Ŋshɔ lɛ bɛ dɔŋŋ.” Wiemɔi krokomɛi ni yɔɔ Kpojiemɔ 21:1 lɛ kɛ gbeekpamɔ naa lɛ, akɛ “ŋshɔ lɛ” hu tsu nii akɛ mfonirifeemɔŋ wiemɔ. Akɛni efɔɔ kaa akɛ ŋshɔkei kuɔ ni ŋshɔ lɛ feɔ hamahama hewɔ lɛ, akɛ ŋshɔ lɛ damɔ shi kɛhã adesai kuɛŋtilɔi ni feɔ basabasa, ni amɛhiii shi yɛ Nyɔŋmɔ mlai anaa lɛ. (Yesaia 17:12, 13; 57:20; Kpojiemɔ 17:1, 15) Amɛ hu amɛbaaho amɛya, no ji, abaajie amɛ kɛje shihilɛ nɛɛ mli. Lala 37:10 lɛ kɛɛ: “Eshwɛ be fioo kɛkɛ, ni onaŋ mɛi fɔji lɛ dɔŋŋ; obaayakwɛ he ni amɛyɔɔ lɛ, shi onaŋ amɛ yɛ jɛmɛ.”

 Kpojiemɔ wolo lɛ gbaa wɔ nibii ni baaya nɔ yɛ “Nuŋtsɔ lɛ gbi lɛ nɔ.” (Kpojiemɔ 1:10) Biblia mli gbalɛ hãa wɔnaa akɛ, nakai gbi lɛ je shishi yɛ afi 1914, be ni Yesu bɔi nɔyeli akɛ Nyɔŋmɔ Maŋtsɛyeli lɛ nɔ Maŋtsɛ lɛ. b Shi eyeee shikpɔŋ muu lɛ fɛɛ nɔ amrɔ nɔŋŋ. Anɔkwa, gbalɛi krokomɛi tsɔɔ akɛ, je lɛŋ shihilɛ mli baaya nɔ awo wu waa yɛ “Nuŋtsɔ lɛ gbi lɛ” klɛŋklɛŋ fã lɛ mli. Atsɛɔ “Nuŋtsɔ lɛ gbi lɛ” klɛŋklɛŋ fã lɛ akɛ naagbee gbii lɛ. (2 Timoteo 3:1-5, 13; Mateo 24:3, 7; Kpojiemɔ 6:1-8; 12:12) Kɛ́ nakai gbii ni mli shihilɛ wa, ni emli eyi tɔ kɛ naagbai lɛ ba naagbee lɛ, Nyɔŋmɔ Maŋtsɛyeli lɛ baajie mfonirifeemɔŋ ŋwɛi kɛ shikpɔŋ lɛ kɛje shihilɛ mli, ni ekɛ ehee ni miishɛɛ kɛ ekomefeemɔ baahi mli lɛ baaye najiaŋ. Maŋtsɛyeli lɛ shishi bii, ni ji “shikpɔŋ hee” lɛ, amii baashɛ amɛhe waa, amɛbaaná shihilɛ kpakpa kɛ gbɔmɔtsoŋ hewalɛ ni eye emuu.​—Kpojiemɔ 21:3, 4.

 Kwɛmɔ Kpojiemɔ wolo lɛ hiɛkpamɔ vidio kuku nɛɛ.