‘Kwɛmɔ Shikpɔŋ Kpakpa’ wolo lɛ, ji wolo ko ni map srɔtoi ni kɔɔ Biblia mli saji komɛi ahe yɔɔ mli. Biblia lɛ tsĩ hei, maji, kɛ shikpɔji babaoo komɛi atã. Kɛ́ okɛ wolo nɛɛ mli map srɔtoi lɛ tsu nii be ni okaneɔ Biblia lɛ, ebaahã onu nibii ashishi jogbaŋŋ ni Biblia lɛ kasemɔ hu baaŋɔɔ onaa. Wolo ni ji ‘Kwɛmɔ Shikpɔŋ Kpakpa Lɛ’ baaye abua bo ni ole hei ni saji ni okaneɔ yɛ Biblia lɛ mli lɛ ba yɛ, ni ofee jɛmɛ he mfoniri. Ebaahã ona bɔ ni nibii tamɔ shikpɔji, fai, gɔji, maji, kɛ ekrokomɛi ni fata he lɛ sa saji ni abɔ he amaniɛ yɛ Biblia lɛ mli lɛ ahe ehã.

Map fɛfɛji kɛ akrabatsai srɔtoi babaoo ni kɔɔ Biblia mli saji ahe eyi wolo ni ji ‘Kwɛmɔ Shikpɔŋ Kpakpa Lɛ’ mli obɔ. Akɛ kɔmpiuta efee akrabatsai, mfonirii, kɛ nibii krokomɛi ni yɔɔ wolo nɛɛ mli lɛ jogbaŋŋ, ni ahã efee fɛo hu koni kɛ́ okɛ miikase nii lɛ, onu shishi jogbaŋŋ.

Biblia mli saji ahe map nɛɛ baahã ona

• hei ni Abraham, Isak, kɛ Yakob fãfãa gbɛ kɛtee

• hei ni Israelbii lɛ tsɔmɔ be ni amɛshi Ejipt kɛyaa Shiwoo Shikpɔŋ lɛ nɔ lɛ

• he ni Israel maŋ lɛ yɔɔ, koni onyɛ okɛto hei ni maji ni ji ehenyɛlɔi lɛ hu yɔɔ lɛ he

• hei ni Yesu fã gbɛ kɛtee yɛ esɔɔmɔ nitsumɔ lɛ mli yɛ shikpɔŋ nɛɛ nɔ

• shikpɔji ni maŋtsɛyelii tamɔ Babilon, Grees, kɛ Roma ye nɔ lɛ adaramɔ

Obaanyɛ ona Biblia mli saji ahe map nɛɛ yɛ Buu-Mɔɔ INTANƐT NƆ WOJIATOOHE lɛ yɛ Intanɛt lɛ nɔ; awooo he nyɔmɔ ko.