Bɔfo Paulo ŋma akɛ: “Kɛ́ miitao mafee nɔ ni ja lɛ, minaa nɔ gbonyo hu yɛ mimli.” (Romabii 7:​21) Ani onu he nakai pɛŋ? Kɛ́ nakai lɛ, sane nɛɛ baanyɛ aye abua bo koni oye kaa ni baanyɛ ahã ofee efɔŋ lɛ nɔ.

•  Nɔ ni esa akɛ ole

•  Nɔ ni obaanyɛ ofee

•  Nɔ ni otipɛŋfoi kɛɔ

Bei pii lɛ, mɛi baanyɛ anyɛ onɔ koni ofee efɔŋ. Biblia lɛ kɛɔ akɛ “naanyobɔɔ gbonyo fiteɔ jeŋba kpakpa.” (1 Korintobii 15:33, shishigbɛ niŋmaa) Mɛi krokomɛi loo adafitswaa nibii baanyɛ ahã oná shwelɛ ni baahã oyanyiɛ “mɛi pii asɛɛ ni oyafee efɔŋ.”​—2 Mose 23:2.

“Shwelɛ ni onaa akɛ mɛi asumɔ osane ni amɛkpɛlɛ onɔ lɛ baanyɛ ahã ofee nibii ni amɛfeɔ lɛ eko koni amɛná ohe miishɛɛ kɛkɛ.”​—Jeremy.

Kɛhã he susumɔ: Mɛni hewɔ ebaanyɛ ewa kɛhã bo akɛ obaakpee kaa naa kɛ́ ohã bɔ ni mɛi krokomɛi naa bo amɛhãa lɛ kã otsui nɔ waa?​—Abɛi 29:25.

Sane lɛ nɔŋŋ ji akɛ: Kaahã otipɛŋfoi nyɛ onɔ ni oŋmɛɛ ohemɔkɛyeli lɛ he kɛsaa ni ofee efɔŋ.

Ná nɔmimaa yɛ nibii ni oheɔ oyeɔ lɛ mli. Kɛ́ oyiŋ feɔ bo enyɔɔnyɔ yɛ nɔ ni oheɔ oyeɔ lɛ he lɛ, obaatsɔ tamɔ koliko ni mɛi krokomɛi kudɔɔ. Ehi waa akɛ okɛ Biblia ŋaawoo nɛɛ baatsu nii, ekɛɔ akɛ: “Nyɛkaa nii fɛɛ nyɛkwɛa; nyɛmɔa nɔ ni hi lɛ mli kpɛŋŋ.” (1 Tesalonikabii 5:​21) Kɛ́ onu nibii ni oheɔ oyeɔ lɛ ashishi jogbaŋŋ lɛ, obaaná lɛ mlɛo akɛ okɛbaatsu nii ni obaaye kai ni baahã ofee efɔŋ lɛ anɔ.

Kɛhã he susumɔ: Mɛni hewɔ oheɔ oyeɔ akɛ Nyɔŋmɔ jeŋba he mlai lɛ ahe yɛ sɛɛnamɔ kɛhã bo lɛ?

“Mikpa shi mina akɛ, be fɛɛ be ni maye anɔkwa ni miŋmɛɛɛ saji ahe kɛsaaa lɛ, mɛi buɔ mi waa.”​—Kimberly.

Biblia mli nɔkwɛmɔnɔ: Daniel. Be ni Daniel ji oblanyo lɛ tɔ̃ɔ ni ‘ekpɛ mli yɛ etsui mli’ akɛ ebaabo Nyɔŋmɔ mla lɛ toi.​—Daniel 1:8.

Yɔsemɔ nibii ni baanyɛ afee naagba kɛhã bo. Biblia lɛ wieɔ “nibii ni ashweɔ yɛ oblahiiaŋ”​—ni ji shwelɛ ni mli wa waa ni anaa yɛ oblahiiaŋ lɛ he. (2 Timoteo 2:​22) Jeee bɔlɛnamɔ henumɔi pɛ he ekɔɔ, shi ekɔɔ shwelɛ ni oblahii kɛ oblayei naa akɛ amɛtipɛŋfoi akpɛlɛ amɛnɔ kɛ shwelɛ akɛ amɛ diɛŋtsɛ amɛkpɛ amɛyiŋ ni amɛfɔlɔi ayelikɛbuamɔ bɛ mli dani amɛtsɔmɔ onukpai lɛ hu he.

Kɛhã he susumɔ: Biblia lɛ kɛɛ akɛ “mɔ fɛɛ mɔ lɛ, nɔ ni kaa lɛ ji nɔ ni lɛ diɛŋtsɛ eshweɔ ni gbalaa lɛ ni lakaa lɛ lɛ.” (Yakobo 1:​14) Mɛɛ shwelɛ kaa bo waa?

“Bo diɛŋtsɛ kwɛmɔ akɛ mɛɛ kaa ewa kɛhã bo akɛ obaaye nɔ. Taomɔ nii amli yɛ bɔ ni obaafee oye nakai kaa lɛ nɔ lɛ he, ni oŋmala nɔ ni obaafee kɛye nɔ lɛ oshwie shi. Kɛ́ ofee nakai lɛ, be kroko kɛ́ okɛ nakai kaa lɛ kpe lɛ, obaana lɛ mlɛo akɛ obaaye nɔ.”​—Sylvia.

Biblia mli nɔkwɛmɔnɔ: David. Ehã mɛi krokomɛi kɛ nibii ni lɛ diɛŋtsɛ eshweɔ lɛ hã efee efɔŋ. Shi David kase nii kɛjɛ etɔmɔi lɛ amli ni emia ehiɛ efee nibii kpakpai. Esɔle ehã Yehowa akɛ: “Bɔɔ tsui ni he tse yɛ mimli ohã mi, ni okɛ mumɔ hee, mumɔ ni fĩɔ shi, awo mimli.”​—Lala 51:10.

Ye nɔ. Biblia lɛ kɛɛ: “Kaahã efɔŋ miiye onɔ kunim.” (Romabii 12:21) Enɛ tsɔɔ akɛ esaaa akɛ ohãa kaa yeɔ onɔ. Obaanyɛ ohala akɛ obaafee nɔ ni ja.

Kɛhã he susumɔ: Te obaafee tɛŋŋ oye ohe nɔ ni ofee nɔ ni ja kɛ́ okɛ shihilɛ ko ni baanyɛ aka bo ni ofee efɔŋ lɛ kpe?

“Misusuɔ bɔ ni manu he mahã kɛ́ miŋmɛ gbɛ ni kaa ko ye mi nɔ lɛ he. Ani mihe baajɔ mi? Kɛ́ nakai po lɛ, ekolɛ, hiŋmɛitswaa fioo ko kɛkɛ. Ani mihe baajɔ mi sɛɛ mli? Dabi, emli baawo wu moŋ. Ani sɛɛnamɔ yɛ he? Dabi!”​—Sophia.

Biblia mli nɔkwɛmɔnɔ: Paulo. Eyɛ mli akɛ ekpɛlɛ nɔ akɛ enaa shwelɛi fɔji moŋ, shi ebɔ mɔdɛŋ eye nɔ. Eŋma akɛ: “Miwaa migbɔmɔtso lɛ yi ni miyeɔ lɛ nyɔŋ.”​—1 Korintobii 9:​27, shishigbɛ niŋmaa.

Sane lɛ nɔŋŋ ji akɛ: Kɛ́ okɛ kaa kpe lɛ, bo obaakpɛ oyiŋ kɛji obaaye nɔ loo obaahã eye onɔ.

Kaimɔ akɛ, kaa ko bɛ ni hiɔ shi kɛyaa naanɔ. Oblayoo ko ni eye afii 20 ni atsɛɔ lɛ Melissa lɛ wie akɛ: “Nibii ni ka mi waa be ni miyaa sɛkɛndre skul lɛ, amrɔ nɛɛ amɛjeee nɔ ko kwraa kɛhã mi. Enɛ hãa minaa akɛ kai ni mikɛkpeɔ bianɛ lɛ hu baaho aya be ko kɛ̃, ni wɔsɛɛ lɛ, maná miishɛɛ waa akɛ miye nakai kai lɛ anɔ.”