Hɛɛ, ebaabo toi. Saji ni wɔkaneɔ yɛ Biblia lɛ mli, kɛ mɛi ashihilɛ mli niiashikpamɔi tsɔɔ akɛ Nyɔŋmɔ hãa sɔlemɔi ahetoo. Biblia lɛ kɛɔ akɛ: “Mɛi ni sheɔ [Nyɔŋmɔ] gbeyei lɛ, efeɔ nɔ ni amɛtaoɔ ehãa amɛ, eboɔ amɛbolɔmɔ (sɔlemɔ) toi, ni ehereɔ amɛyiwala.” (Lala 145:19) Shi kɛ́ Nyɔŋmɔ baabo osɔlemɔ toi loo eboŋ toi lɛ, edamɔ bo onɔ titri.

Nɔ ni Nyɔŋmɔ taoɔ yɛ mɛi ni sɔleɔ lɛ adɛŋ

•   Esa akɛ wɔsɔle wɔhã Nyɔŋmɔ, shi jeee Yesu, Maria, hetselɔi (saints), ŋwɛi bɔfoi, loo amagai. Yehowa Nyɔŋmɔ pɛ ji ‘sɔlemɔ Toibolɔ.’—Lala 65:2, Ga Biblia hee.

•   Esa akɛ wɔsɔle wɔbi nibii ni kɛ Nyɔŋmɔ suɔmɔnaa nii loo etaomɔ nii ni yɔɔ Biblia lɛ mli lɛ kpãa gbee.—1 Yohane 5:14.

•   Esa akɛ wɔkɛ wɔsɔlemɔi lɛ atsɔ Yesu nɔ kɛhã Nyɔŋmɔ; wɔkɛ no feemɔ tsɔɔ akɛ wɔyɔseɔ hegbɛ ni Yesu yɔɔ lɛ. Yesu kɛɛ akɛ: “Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.”—Yohane 14:6.

•   Esa akɛ wɔkɛ hemɔkɛyeli asɔle. Kɛ́ wɔhemɔkɛyeli faaa lɛ, esa akɛ wɔbi ni afata he ahã wɔ.—Mateo 21:22; Luka 17:5.

•   Esa akɛ wɔkɛ heshibaa asɔle, ni ejɛ wɔtsuiŋ tɔ̃ɔ. Biblia lɛ kɛɔ akɛ: “Yehowa yɛ ŋwɛi shɔŋŋ moŋ, shi kɛ̃lɛ ehiɛ kã heshibalɔ he”—Lala 138:6.

•   Esa akɛ wɔkã he wɔsɔle. Yesu kɛɛ akɛ: “Nyɛyaa nɔ nyɛbia, ni abaahã nyɛ.”—Luka 11:9.

Nɔ ni Nyɔŋmɔ kpaaa gbɛ yɛ mɛi ni sɔleɔ lɛ adɛŋ

•   Ohewolo nɔ su loo maŋ nɔ ni ojɛ. “Nyɔŋmɔ kwɛɛɛ mɛi ahiɛiaŋ, moŋ lɛ, yɛ jeŋmaŋ fɛɛ jeŋmaŋ mli lɛ, mɔ ni sheɔ lɛ gbeyei ni efeɔ nɔ ni ja lɛ, lɛ ji mɔ ni ekpɛlɛɔ enɔ.”—Bɔfoi 10:34, 35.

•   Akɛ wɔbaadamɔ shi loo wɔkula shi yɛ gbɛ krɛdɛɛ ko nɔ. Obaanyɛ osɔle ohã Nyɔŋmɔ be ni ota shi, okoto shi, okula shi, loo odamɔ shi.—1 Kronika 17:16; Nehemia 8:6; Daniel 6:10; Marko 11:25.

•   Kɛ́ osɔle ni anu jio, osɔle ni anuuu jio. Nyɔŋmɔ boɔ sɔlemɔi ni asɔleee ni mɛi anu lɛ po toi.—Nehemia 2:1-6.

•   Kɛ́ sane ni okɛfɔɔ ehiɛ lɛ tsii jio, etsiii jio. Nyɔŋmɔ woɔ bo hewalɛ akɛ ‘oshɛrɛ oyeyeeyefeemɔi lɛ fɛɛ oshwie enɔ lɛ, ejaakɛ esusuɔ ohe.’—1 Petro 5:7.