Jeee adesai amɔdɛŋbɔi baahã toiŋjɔlɛ aba shikpɔŋ lɛ nɔ, moŋ lɛ Nyɔŋmɔ Maŋtsɛyeli lɛ, ni ji ŋwɛi nɔyeli ni Kristo Yesu yeɔ nɔ lɛ kɛ toiŋjɔlɛ nɛɛ baaba. Kadimɔ nɔ ni Biblia lɛ tsɔɔ wɔ yɛ hiɛnɔkamɔ ni nɔ bɛ nɛɛ he.

1.   Nyɔŋmɔ ‘baafo tai asɛɛ yɛ shikpɔŋ lɛ nɔ fɛɛ,’ koni ekɛhã shi ni ewo akɛ ebaahã “mɛi ni feɔ nibii ni sa ehiɛ lɛ aná toiŋjɔlɛ yɛ shikpɔŋ lɛ nɔ” lɛ aba mli!​—Lala 46:10; Luka 2:14, Good News Translation.

2.   Nyɔŋmɔ Maŋtsɛyeli lɛ baajɛ ŋwɛi eye shikpɔŋ muu lɛ fɛɛ nɔ. (Daniel 7:14) Ákɛ jeŋ muu fɛɛ nɔyeli lɛ, ebaajie maŋhedɔɔ ni ji nɔ titri ni kɛ bei loo tai babaoo baa lɛ kɛje shihilɛ mli.

3.   Atsɛɔ Yesu, ni ji Nyɔŋmɔ Maŋtsɛyeli lɛ Nɔyelɔ lɛ akɛ “Toiŋjɔlɛ Lumɔ,” ni ebaakwɛ ni ‘toiŋjɔlɛ sɛɛ akafo kɔkɔɔkɔ.’​—Yesaia 9:6, 7.

4.   Akɛni ‘Yehowa miihi mɛi ni feɔ yiwalɛ nibii’ hewɔ lɛ, eŋmɛŋ gbɛ ni mɛi ni etswa amɛfai shi akɛ amɛkpaŋ nɔmɔ loo tawuu lɛ ahi Maŋtsɛyeli lɛ shishi.​—Lala 11:5; Abɛi 2:22.

5.   Nyɔŋmɔ tsɔɔ etsuji loo mɛi ni boɔ lɛ toi lɛ bɔ ni ahiɔ shi yɛ toiŋjɔlɛ mli. Be ni Biblia lɛ tsɔɔ nibii ni jɛɔ tsɔsemɔ nɛɛ mli kɛbaa lɛ, ekɛɛ akɛ: “Amɛbaatswia amɛtawuu klantei kɛfee tsina kɔii anaa dadei, ni amɛbaatswia amɛkpɔlɔi hu kɛfee kaklai ni akɛsaa tsei ahe. Jeŋmaŋ ko wóŋ klante nɔ yɛ jeŋmaŋ ko nɔ, ni amɛkaseŋ tawuu hu dɔŋŋ”​—Yesaia 2:3, 4.

 Amrɔ nɛɛ po lɛ, Nyɔŋmɔ miitsɔɔ Yehowa Odasefoi akpekpei abɔ ni yɔɔ je lɛŋ fɛɛ lɛ bɔ ni ahiɔ shi yɛ toiŋjɔlɛ mli ahãa. (Mateo 5:9) Wɔjɛ wekui srɔtoi babaoo amli yɛ shikpɔji srɔtoi 230 kɛ sɛɛ anɔ moŋ nɛ, shi wɔkpoɔ akɛ wɔkɛ mɛi baawu ta.