Biblia lɛ tsɔɔ akɛ ehi, ni ehe miihia akɛ mɔ ko baasumɔ ehe bɔ ni sa. Enɛ biɔ ni mɔ lɛ akwɛ ehe jogbaŋŋ, ejie bulɛ kpo etsɔɔ ehe, ni enu he akɛ ehe miihia. (Mateo 10:31) Nɔ najiaŋ ni Biblia lɛ baawo mɔ ko hewalɛ ni esusu lɛ pɛ ehe lɛ, etsɔɔ moŋ akɛ, mɔ aná suɔmɔ ni sa ahã ehe.

Namɔ klɛŋklɛŋ esa akɛ wɔsumɔ?

1.   Esa akɛ wɔkɛ wɔtsui fɛɛ asumɔ Nyɔŋmɔ klɛŋklɛŋ. Biblia lɛ tsɔɔ akɛ, kitã ni fe fɛɛ ji: “Suɔmɔ Yehowa, o-Nyɔŋmɔ lɛ, kɛ otsui fɛɛ.”—Marko 12:28-30; 5 Mose 6:5.

2.   Kitã ni ji enyɔ ni fe fɛɛ ji: “Suɔmɔ onyɛmi gbɔmɔ tamɔ bo diɛŋtsɛ ohe.”—Marko 12:31; 3 Mose 19:18.

3.   Eyɛ mli akɛ mla pɔtɛɛ ko bɛ Biblia lɛ mli ni tsɔɔ akɛ mɔ asumɔ ehe moŋ, shi famɔ akɛ “suɔmɔ onyɛmi gbɔmɔ tamɔ bo diɛŋtsɛ ohe” lɛ hãa anaa akɛ, tɔ̃mɔ bɛ he akɛ mɔ ko baasumɔ ehe bɔ ni sa.

Namɔ klɛŋklɛŋ Yesu sumɔ?

 Yesu hã ana bɔ ni esa akɛ mɔ asumɔ Nyɔŋmɔ, enyɛmi gbɔmɔ, ni nakai beiaŋ nɔŋŋ lɛ esumɔ lɛ diɛŋtsɛ ehe, ni efã ekaselɔi lɛ ni amɛfee nakai.—Yohane 13:34, 35.

1.   Esumɔ Yehowa Nyɔŋmɔ klɛŋklɛŋ ni ekɛ ehe hã koni egbe nitsumɔ ni Nyɔŋmɔ kɛhã lɛ lɛ naa. Ekɛɛ akɛ: “Bɔ ni afee ni je lɛ ale akɛ misumɔɔ Tsɛ lɛ, miifee bɔ ni Tsɛ lɛ ewo mi kitã akɛ mifee lɛ pɛpɛɛpɛ.”—Yohane 14:31.

2.   Yesu sumɔ enyɛmi gbɔmɔ, no ji eye ebua mɛi aahu po akɛ ekɛ ewala hã yɛ amɛhewɔ.—Mateo 20:28.

3.   Ejɔɔ ehe, eye nii, ni ekɛ esɛɛnyiɛlɔi lɛ kɛ mɛi ni yɔɔ ewiemɔ lɛ he miishɛɛ lɛ ná amɛhewɔ miishɛɛ, ni ekɛ no tsɔɔ akɛ esumɔɔ lɛ diɛŋtsɛ ehe bɔ ni sa.—Marko 6:31, 32; Luka 5:29; Yohane 2:1, 2; 12:2.

Kɛ́ osumɔ mɛi krokomɛi fe bo diɛŋtsɛ ohe lɛ, ani no baahã miishɛɛ loo bulɛ ni oyɔɔ kɛhã ohe lɛ nɔ agbɔ?

 Dabi, ejaakɛ abɔ wɔ tamɔ bɔ ni Nyɔŋmɔ, mɔ ni su titri ji suɔmɔ lɛ, yɔɔ lɛ. (1 Mose 1:27; 1 Yohane 4:8) Enɛ tsɔɔ akɛ abɔ wɔ koni wɔsumɔ mɛi krokomɛi. Kɛ́ wɔsumɔ wɔhe lɛ, wɔnáa miishɛɛ, shi kɛ́ wɔsumɔ Nyɔŋmɔ fe nɔ fɛɛ nɔ, ni wɔkɛ wɔjwɛŋmɔ ma nibii kpakpai ni wɔbaanyɛ wɔfee wɔhã mɛi anɔ lɛ, wɔnáa miishɛɛ waa. Biblia lɛ kɛɛ, “Nɔhãmɔ hãa mɔ náa miishɛɛ fe hemɔ.”—Bɔfoi 20:35.

 Ŋmɛnɛ lɛ, mɛi babaoo susuɔ akɛ, kɛ́ osumɔɔ bo diɛŋtsɛ ohe fe mɔ fɛɛ mɔ lɛ, no baahã oná miishɛɛ. Amɛkɛ wiemɔ ni ji, “suɔmɔ ohe” lɛ eye “suɔmɔ onyɛmi gbɔmɔ” lɛ najiaŋ. Kɛ̃lɛ, niiashikpamɔ ehã ana akɛ, mɛi ni yɔɔ gbɔmɔtsoŋ hewalɛ ni amɛyɔɔ miishɛɛ ji mɛi ni kɛ Biblia mli ŋaawoo ni nilee yɔɔ mli ni nyiɛ sɛɛ nɛɛ tsuɔ nii lɛ. Nakai ŋaawoo lɛ kɛɔ akɛ: “Mɔ ko mɔ ko akaya nɔ etao nɔ ni lɛ diɛŋtsɛ ebaaná he sɛɛ, shi moŋ nɔ ni mɔ kroko baaná he sɛɛ.”—1 Korintobii 10:24.