“Jeee akɛ wɔyɔseee hiɛdɔɔ ni yɔɔ ponografi he​—ejaakɛ wɔhiɛ yɛ wɔhe nɔ waa​—shi wɔyaleee akɛ ebaafee mlɛo kɛhã wɔbiyoo lɛ akɛ ebaakwɛ ponografi.”​—Nicole.

Nɔ ni wɔbaasusu he yɛ sane nɛɛ mli

•  Nɔ ni esa akɛ ole

•  Bɔ ni obaafee obu obi lɛ he yɛ ponografi he

•  Kɛji obi lɛ ekwɛ ponografi

 Nɔ ni esa akɛ ole

 Shihilɛ ko baahã gbekɛbii ana ponografi loo amɛkwɛ be ni amɛdarako. Niiamlitaomɔ tsɔɔ akɛ, amrɔ nɛɛ kɛ́ hooo kwraa lɛ, be ni gbekɛbii baaye afii 11 lɛ amɛhiɛ egba ponografi nɔ loo amɛkwɛ.

 Gbekɛbii ahiɛ baanyɛ agba ponografi nɔ, ni jeee akɛ amɛje gbɛ amɛyatao koni amɛkwɛ. Akɛ nɔkwɛmɔnɔ lɛ, amɛhiɛ baanyɛ agba ponografi nɔ be ni amɛmiitao nɔ ko yɛ Intanɛt lɛ nɔ loo be ni amɛmiikwɛ nibii yɛ soshia midia nɔ. Ponografi nibii baanyɛ apue be ni gbekɛbii lɛ miitswa vidio geems yɛ Intanɛt lɛ nɔ. Ayɛ ponografi henɔi srɔtoi, shi nɔ ni afɔɔ naa ji ehe mfonirii kɛ vidioi. Kɛ̃lɛ, ewaaa kwraa akɛ obaana saji ni kɔɔ bɔlɛnamɔ he kɛ nɔ ni atswaa aboɔ toi hu, ní abaanyɛ abo toi loo adaunlodi.

 Nɔ kroko hu ni esa akɛ fɔlɔi ajwɛŋmɔ ahi nɔ ji akɛ, mɛi komɛi kɛ ponografi nibii sɛndiɔ gbekɛbii lɛ yɛ smatfon kɛ ehenɔi lɛ anɔ. Afee niiamlitaomɔ ko ni abibii oblahii kɛ oblayei 900 kɛ sɛɛ saji, yei lɛ ateŋ aaafee oha mlijaa 90 kɛ hii lɛ ateŋ aaafee oha mlijaa 50 kɛɛ akɛ, amɛklasbii sɛndiɔ amɛ mfonirii kɛ vidioi ni mɛi hiɛ amɛhe yayai yɛ mli yɛ be kɛ beiaŋ.

 Bei pii lɛ, afeɔ yiwalɛ nibii yɛ ponografi ni ehe shi waa lɛ mli. Efɔɔ kaa akɛ, ponografi ni ehe shi waa ni ewaaa kwraa akɛ nine baashɛ nɔ lɛ mli eyi obɔ kɛ yiwalɛ nibii, ni efɔɔ kaa akɛ yei titri ji mɛi ni afeɔ amɛ yiwalɛ nii nɛɛ.

 Ponografi yeɔ gbekɛbii awui waa. Niiamlitaomɔ etsɔɔ akɛ, ewaaa kwraa akɛ gbekɛbii ni ekwɛ ponografi lɛ baafee nibii ni nyiɛ sɛɛ nɛɛ:

•   amɛbɔɔɔ mɔdɛŋ yɛ skul

•   amɛbaahao, amɛbaaná jwɛŋmɔŋ naagba, ni amɛbaanu he akɛ amɛhe bɛ sɛɛnamɔ

•   amɛbaasusu akɛ naagba bɛ he akɛ abaanyɛ mɛi anɔ ni akɛ amɛ aná bɔlɛ loo akɛ amɛ afee nibii tamɔ nakai

 Sane lɛ nɔŋŋ ji akɛ: Kɛ́ gbekɛbii kwɛ ponografi loo amɛhiɛ gba nɔ lɛ, ebaanyɛ eye amɛ awui, ni fɔlɔi ji mɛi titri ni baanyɛ aye abua amɛ.

 Biblia mli shishitoo mla: “Hã wiemɔi ni mijajeɔ mitsɔɔ bo ŋmɛnɛ lɛ akã otsui nɔ, ní otĩ mli shii abɔ otsɔɔ obii, ní owie he be ni ota shi yɛ oshĩa kɛ be ni onyiɛ gbɛ nɔ kɛ be ni okã shi kɛ be ni ote shi.”​—5 Mose 6:6, 7.

 Bɔ ni obaafee obu obi lɛ he yɛ ponografi he

 Le anɔkwalei ni kɔɔ he. Susumɔ he okwɛ akɛ mɛɛ be obi lɛ baanyɛ ana nɔ ko ni kɔɔ ponografi he, ni nɛgbɛ ewaŋ akɛ ebaana yɛ. Akɛ nɔkwɛmɔnɔ lɛ, kɛ́ etee skul lɛ, ani enáa hegbɛ eyaa Intanɛt lɛ nɔ ni mɔ ko kwɛɛɛ nɔ ni efeɔ?

 Bɔɔ mɔdɛŋ ni ole obi lɛ fon lɛ he nibii ni obaanyɛ okɛtsu nii kɛkudɔ saji kɛ nibii ni enine baanyɛ ashɛ nɔ lɛ, ni ole apps kɛ gemisii ni yɔɔ efon lɛ nɔ. Akɛ nɔkwɛmɔnɔ lɛ, apps komɛi yɛ ni kɛ́ atsɔ nɔ akɛ mɔ shãra lɛ, nɔ ko yɛ ni atsɛɔ lɛ “disappearing,” kɛ́ akɛ no tsu nii lɛ, ehãa ponografi nibii ni mɔ lɛ nine eshɛ nɔ lɛ yeɔ be fioo kɛkɛ lɛ elaaje yɛ efon lɛ nɔ. Agbɛnɛ hu, Intanɛt lɛ nɔ vidio geem babaoo yɛ ni kɛ́ aatswa lɛ, ehãa mɛi ni tswaa kwɛɔ ponografi ni enyɛɔ ehãa amɛfeɔ tamɔ amɛkɛ mɔ ko miiná bɔlɛ po yɛ geem lɛ mli.

 “Mi diɛŋtsɛ miniiashikpamɔ miwieɔ lɛ: Kɛ́ obi lɛ yɛ smatfon lɛ, esa akɛ bo akɛ fɔlɔ lɛ ole bɔ ni akɛtsuɔ nii ahãa kɛ nibii ni yɔɔ nɔ, esa akɛ ole bɔ ni obaafee okudɔ nibii ni yɔɔ nɔ lɛ, bɔ ni obaafee ogbɔ nibii ni ebaanyɛ ena lɛ anɔ, ni agbɛnɛ hu esa akɛ ole bɔ ni obaafee ona nɔ ni obi lɛ feɔ yɛ efon lɛ nɔ.”​—David.

 Feemɔ bɔ fɛɛ bɔ ni obaanyɛ ni obi lɛ akana ponografi ko, ekakane ehe saji, ni ekabo toi hu. Feemɔ nibii ni hãŋ ená hegbɛ ena ponografi nɔ ko. Akɛ nɔkwɛmɔnɔ lɛ: Sɛtimɔ obi lɛ fon lɛ kɛ ilɛtrɔnik nibii krokomɛi ni yɔɔ shĩa lɛ bɔ ni baahã etsĩ ponografi nibii agbɛ. Kwɛmɔ ni ohã nɔ ni Blɔfo tsɛɔ lɛ parental controls lɛ atsu nii yɛ fon lɛ kɛ ilɛtrɔnik nibii krokomɛi lɛ anɔ. Agbɛnɛ hu, esa akɛ ole obi lɛ fon kɛ nibii krokomɛi anɔ paswɛd.

 “Miyɔse akɛ ebaahi akɛ mahã parental controls ni yɔɔ wɔfon kɛ ilɛtrɔnik nibii krokomɛi anɔ lɛ atsu nii, makudɔ program ni mibi lɛ baanyɛ akwɛ yɛ wɔ-TV ni Intanɛt yɔɔ nɔ lɛ nɔ, ni agbɛnɛ hu male PIN loo paswɛd ni yɔɔ esmatfon lɛ nɔ lɛ.”​—Maurizio.

 “Kɛ́ mibi hii lɛ miikwɛ vidio yɛ amɛtsũi lɛ amli lɛ, miŋmɛɛɛ amɛ gbɛ ni amɛŋa amɛshinaa lɛ. Kɛ́ je na ni be shɛ ni amɛbaayawɔ lɛ, mihãaa amɛkɛ amɛfon kɛ ehenɔi lɛ aya amɛtsũ lɛ mli.”​—Gianluca.

 Tsɔɔmɔ obi lɛ nɔ ni esa akɛ ele yɛ ponografi he. Mami ko ni atsɛɔ lɛ Flavia lɛ wie akɛ, “fɔlɔi komɛi sumɔɔɔ ni amɛkɛ amɛbii lɛ awie ponografi he kɛsusumɔ lɛ akɛ, amɛbii lɛ náŋ ponografi he naagba.” Ekolɛ, fɔlɔi komɛi hu baaye amɛtsui akɛ, ‘Kɛ́ mikɛ mibii lɛ wie ponografi he lɛ, amɛbaayatao eko amɛkwɛ.’ Susumɔi tamɔ nɛkɛ lɛ yɛ oshãra waa. Fɔlɔi ni hiɛ kã shi lɛ baabɔ mɔdɛŋ ni amɛtsɔɔ amɛbii lɛ oshãrai ni yɔɔ ponografi he dani eba akɛ amɛbaana eko. Mɛɛ gbɛ nɔ obaatsɔ ofee nakai?

 Tsɔɔmɔ obii lɛ nɔ ni esa akɛ amɛfee kɛ́ amɛna nɔ ko ni kɔɔ ponografi he. Akɛ nɔkwɛmɔnɔ lɛ, kɛɛmɔ amɛ akɛ, kɛ́ eba lɛ nakai lɛ amɛŋamɔ amɛhiŋmɛi loo amɛgbe amɛfon kɛ ehenɔi lɛ. Agbɛnɛ hu, wo amɛ hewalɛ koni kɛ́ amɛna nɔ ko tamɔ nakai loo amɛnu he sane lɛ amɛhã ole. a

 “Mikɛ mibinuu lɛ bɔi oshãrai ni yɔɔ ponografi he lɛ he wiemɔ be ni eji gbekɛ bibioo. Be ni eye aaafee afii 11 lɛ, gbi ko ni eetswa geem ko ni edaunlodi ewo esmatfon lɛ nɔ lɛ, ponografi nɔ ko ba nɔ. Ni mɛseji komɛi nyiɛ sɛɛ ni miiwo lɛ hewalɛ koni esha ehe mfoniri ni esɛndi. Akɛni no mli lɛ, wɔtsɔ hiɛ wɔsusu nɔ ni esa akɛ efee lɛ he hewɔ lɛ, amrɔ nɔŋŋ ni ebakɛɛ mi nɔ ni eba.”​—Maurizio.

 Ye obua obii ni edara lɛ koni amɛye shwelɛ ni anáa akɛ abaakwɛ ponografi, abaabo ehe saji atoi, loo abaakane ehe saji lɛ anɔ. Akɛ nɔkwɛmɔnɔ lɛ, ye obua obi lɛ koni eŋmala gbeekpamɔ komɛi eshwie shi, emli saji lɛ ekomɛi afee mlai ni kɔɔ weku lɛ he; etsɔɔ nɔ ni kɛ́ ehiŋmɛi yagba ponografi nɔ lɛ ebaafee, kɛ nɔ hewɔ ni ebaasumɔ ni efee nakai. Yɛ gbeekpamɔ nɛɛ mli lɛ, hã eŋmala nɔ ni baajɛ mli aba kɛ́ eje gbɛ ekwɛ ponografi, ekomɛi ji abuŋ lɛ, efɔlɔi nyɛŋ amɛhe lɛ amɛye, ni ekɛ Nyɔŋmɔ teŋ naanyobɔɔ lɛ hu baafite. b

 “Be ni gbekɛbii lɛ daraa lɛ, ye obua amɛ ni amɛsusu bɔ ni kɛ́ amɛkwɛ ponografi lɛ ebaaye amɛ awui wɔsɛɛ lɛ he koni no ahã amɛtsi amɛhe kɛje ponografi he.”​—Lauretta.

 “Kɛ́ wɔbii lɛ ná le oshãrai ni yɔɔ ponografi he kɛ bɔ ni Yehowa naa lɛ ehãa lɛ, ebaaye ebua amɛ ni amɛtsi amɛhe kɛje he.”​—David.

 Bɔɔ mɔdɛŋ ni okɛ amɛ afɔ sanegbaa. Ekolɛ, ebaawa kɛhã bo akɛ obaahe sane nɛɛ oye, shi yɛ anɔkwale mli lɛ, gbekɛbii sumɔɔ ni amɛkɛ amɛfɔlɔi agba bɔlɛnamɔ he saji, ni ponografi hu fata he. Yoo ko ni atsɛɔ lɛ Dame Rachel de Souza, ni enitsumɔ ji efã hegbɛi ni gbekɛbii ni yɔɔ England lɛ yɔɔ ahe lɛ, wie akɛ, “bii sumɔɔ ni amɛkɛ amɛfɔlɔi awie bɔlɛnamɔ saji ahe kɛ́ amɛdarako po, ni amɛsumɔɔ ni amɛfɔ he wiemɔ. Gbekɛbii sumɔɔ ni amɛwie saji nɛɛ ahe bɔ ni sa afi ni amɛye lɛ, ni be ni amɛdaraa lɛ, ehe baahia ni amɛle sane nɛɛ he nibii krokomɛi hu.”

 “Be ni midaa lɛ, saji komɛi yɛ ni mifɔlɔi kɛ mi ewieee he. Miná kulɛ, nakai bei amli lɛ amɛkɛ mi fɔɔ sanegbaa. Amrɔ nɛɛ ni mibatsɔ mami lɛ, mibɔɔ mɔdɛŋ akɛ mikɛ mibii lɛ baafɔ bɔlɛnamɔ he sanegbaa yɛ be kɛ beiaŋ, wɔgbaa sane lɛ bɔ ni amɛnyɛɔ amɛjɛɔ amɛtsuiŋ amɛwieɔ.”​—Flavia.

 Kɛji obi lɛ ekwɛ ponografi

 Ye ohe nɔ, omli akafu. Kɛ́ oná ole akɛ obi ekwɛ ponografi, ebo ehe saji toi, loo ekane ehe saji lɛ, bɔɔ mɔdɛŋ ni oye ohe nɔ. Ekolɛ, lɛ diɛŋtsɛ lɛ egba enaa waa, enaa ekpɛ ehe, loo eenu fɔyeli he yɛ nɔ ni eba lɛ hewɔ. Kɛ́ okɛ mlifu tsu saji ahe nii lɛ, ebaawo bɔ ni enuɔ he ehãa lɛ mli wu, ni ebaahã ewa kɛhã lɛ akɛ kɛ́ aleenɔ ni wɔsɛɛ ko lɛ, nɔ ko tamɔ nakai ba lɛ, ekɛ bo baagba he sane.

 Le anɔkwalei fɛɛ ni yɔɔ sane lɛ mli. Kaamu sane naa akɛ ole nɔ ni ba lɛ fɛɛ, moŋ lɛ bi saji kɛle nɔ ni hã obi lɛ kwɛ ponografi lɛ. Akɛ nɔkwɛmɔnɔ lɛ, mɔ ko ni kɛsɛndi lɛ aloo lɛ diɛŋtsɛ eyatao? Ani eji nɔ ko ni ba shi kome pɛ, aloo ekwɛ ponografi dã? Ani fon loo tsɔne ni ekwɛ yɛ nɔ lɛ, asɛt lɛ bɔ ni hãŋ ponografi nibii aba nɔ loo parental controls yɛ nɔ? Kɛ́ nibii nɛɛ yɛ nɔ lɛ, ani no tsɔɔ akɛ efee nɔ ko koni enyɛ ekwɛ ponografi lɛ? Kaimɔ akɛ, oti ni ma ohiɛ ji, ni oye obua obi lɛ koni ejɛ etsuiŋ ewie anɔkwale lɛ fɛɛ​—jeee ni owo ehe gbeyei.

 Feemɔ nɔ ko yɛ he. Akɛ nɔkwɛmɔnɔ lɛ, kɛ́ obi lɛ ejeee gbɛ ni ekwɛ ponografi lɛ, ekolɛ ehe baahia ni okwɛ akɛ parental controls kɛ nibii krokomɛi ni yɔɔ efon lɛ nɔ ni kulɛ esa akɛ etsĩ ponografi lɛ naa lɛ miitsu nii jogbaŋŋ lo.

 Kɛ́ ona akɛ eje gbɛ etao ponografi lɛ ni ekwɛ lɛ, feemɔ shiŋŋ ni ojɛ suɔmɔ mli okɛ tsɔsemɔ ni sa lɛ ahã lɛ. Okɛ obi lɛ asusu ŋmalɛi tamɔ Hiob 31:1, Lala 97:10, kɛ Lala 101:3 lɛ he kɛye obua lɛ ni ena nɔ hewɔ ni ehe miihia ni etsi ehe kwraa kɛje ponografi he lɛ. c No sɛɛ lɛ, hã ele akɛ daa otsi lɛ okɛ lɛ baagba sane kɛkwɛ bɔ ni ekɛ ŋaa ni owo lɛ tsuɔ nii ehãa, ni obaakwɛ kɛji ehe baahia ni ofee nibii krokomɛi kɛye obua lɛ.