Bei komɛi lɛ, kɛ́ naagba yɛ gbalashihilɛ mli hefatalɔi komɛi ateŋ lɛ, amɛsusuɔ akɛ kɛ́ amɛtse gbãla lɛ no moŋ baahi ahã gbekɛbii lɛ fe ni gbekɛbii lɛ kɛ fɔlɔi ni daa nɛɛ amɛmiibe lɛ baahi shĩa kome mli. Shi ani nakai ji sane lɛ?

•  Te gbalatsemɔ saa bii lɛ ahe ehãa tɛŋŋ?

•  Kɛ́ mitse gbãla lɛ, ani mibi lɛ baaná miishɛɛ waa fe bɔ ni eyɔɔ bianɛ lɛ?

•  Mɛni esa akɛ male yɛ gbãla ni atseɔ koni no sɛɛ lɛ fɔlɔi enyɔ lɛ fɛɛ akwɛ bii lɛ he?

•  Ani nɔ ko yɛ ni abaanyɛ afee yɛ gbalashihilɛ mli naagbai lɛ ahe moŋ fe ni abaatse gbãla lɛ?

 Niiamlitaomɔ etsɔɔ akɛ gbalatsemɔ yeɔ gbekɛbii lɛ awui waa ni ehaoɔ amɛ. Ewaaa kwraa akɛ gbekɛbii ni fɔlɔi etse gbãla lɛ:

•   amli baafu, amɛbaaye amɛtsui waa, ni amɛbaaná jwɛŋmɔŋ naagbai

•   baafee nibii ni baaye amɛ loo mɛi krokomɛi awui

•   amɔdɛŋbɔɔ yɛ skul lɛ naa baaba shi kwraa loo amɛbaakpa skul yaa po

•   hela baafɔ amɛ mɔmɔ

 Kɛfata he lɛ, gbekɛbii babaoo shwaa amɛhe yɛ gbalatsemɔ lɛ he, kɛsusumɔ lɛ akɛ amɛ hewɔ ni atse gbãla lɛ loo kulɛ amɛbaanyɛ amɛtsĩ naa.

 Naagbai ni gbekɛbii kɛkpeɔ lɛ baanyɛ aya nɔ agba amɛnaa aahu kɛyashi amɛbaatsɔmɔ onukpai, ni ebaanyɛ ehã amɛnu he akɛ amɛhe bɛ sɛɛnamɔ. Agbɛnɛ hu, ebaawa kɛhã amɛ akɛ amɛbaahe mɛi krokomɛi amɛye. Ni wɔsɛɛ kɛ́ amɛkɛ naagbai kpe yɛ amɛgbalashihilɛ mli lɛ, ebawaŋ kwraa akɛ amɛbaatse gbãla.

 Sane lɛ nɔŋŋ ji akɛ: Eyɛ mli akɛ mɛi ni miitao amɛtse gbãla lɛ ekomɛi kɛɔ amɛhe akɛ, gbalatsemɔ ji nɔ ni baahi fe fɛɛ kɛhã gbekɛbii lɛ moŋ, shi niiamlitaomɔ ehã ana akɛ enɛ jeee anɔkwale. Yoo ko ni ji gbekɛbii ahe nilelɔ ni atsɛɔ lɛ Penelope Leach lɛ wie akɛ: “Gbalatsemɔ hãa gbekɛbii lɛ anii feɔ mɔbɔ waa.” a

 Biblia mli shishitoo mla: “Nyɛtaoɔ nibii ni hi hã mɛi krokomɛi, shi jeee nibii ni hi hã nyɛ pɛ lɛ.”​—Filipibii 2:4.

 Mɛi komɛi baahã sanebimɔ nɛɛ hetoo akɛ hɛɛ. Shi hã ehi ojwɛŋmɔŋ akɛ, bei pii lɛ, bɔ ni fɔlɔ lɛ nuɔ he amɛhãa lɛ, jeee nakai kwraa gbekɛ lɛ nuɔ he. Mɔ ni miitao etse gbãla lɛ miitao shihilɛ hee. Bei pii lɛ, bi lɛ sumɔɔɔ ni eshihilɛ tsakeɔ, eesumɔ ni efɔlɔi lɛ ahi shi ni amɛkatse gbãla.

 Be ni mɛi ni ŋma wolo ni ji, The Unexpected Legacy of Divorce lɛ epɛi gbalatsemɔi akpei komɛi amli amɛkwɛ sɛɛ lɛ, amɛŋma akɛ: “Sane lɛ yɛ faŋŋ akɛ, kɛ́ atse gbãla lɛ, gbekɛbii lɛ náaa miishɛɛ tamɔ be ni amɛfɔlɔi lɛ tseko gbãla lɛ. Moŋ lɛ, gbekɛbii lɛ wieɔ yɛ faŋŋ mli akɛ, ‘Be ni mifɔlɔi lɛ tse gbãla lɛ, nakai gbi lɛ ni mimiishɛɛ fɛɛ tã.’” Wolo lɛ kɛfata he akɛ, gbekɛbii lɛ nuɔ he akɛ “amɛbɛ shweshweeshwe dɔŋŋ yɛ je lɛ mli, ejaakɛ naanyobɔɔ ni kã mɛi enyɔ ni amɛsumɔɔ waa lɛ ateŋ lɛ efite.”

 Sane lɛ nɔŋŋ ji akɛ: Kɛ́ fɔlɔi tse gbãla lɛ, ebaawa akɛ gbekɛbii lɛ amii baashɛ amɛhe.

 Biblia mli shishitoo mla: “Tsui ni ekumɔ lɛ, egbɔjɔɔ mɔ.”​—Abɛi 17:22.

 Fɔlɔi ni etse gbãla lɛ susuɔ akɛ amɛbaanyɛ amɛkwɛ amɛbii lɛ jogbaŋŋ tamɔ bɔ ni fɔlɔi ni tseko gbãla lɛ feɔ lɛ. Shi kɛ́ atse gbãla lɛ, ewa akɛ fɔlɔi enyɔ lɛ fɛɛ baanyɛ akwɛ bii lɛ jogbaŋŋ. Niiamlitaomɔ etsɔɔ akɛ, bei pii lɛ fɔlɔi ni etse gbãla lɛ:

•   Náaa be tsɔ amɛhãaa amɛbii lɛ

•   ateŋ mɔ fɛɛ mɔ tsɔɔ bii lɛ nɔ kroko, no ji, amɛtsɔɔ bii lɛ nibii ni teɔ shi amɛwoɔ amɛhe

•   ŋmɛɔ gbɛ ni gbekɛbii lɛ feɔ nɔ fɛɛ nɔ ni amɛsumɔɔ akɛni fɔlɔi lɛ nuɔ fɔyeli he, loo etɔ amɛ lɛ hewɔ

 Gbekɛ ni fɔlɔi etse gbãla lɛ baanyɛ anu he akɛ, esaaa akɛ eboɔ efɔlɔi lɛ agbɛtsɔɔmɔi atoi. Ejaakɛ efɔlɔi lɛ eyafeee nɔ ni ja, no ji, amɛyeee shi ni amɛwo amɛhe akɛ amɛhãŋ amɛmli agbala kɔkɔɔkɔ lɛ nɔ. No hewɔ lɛ, gbekɛ lɛ shwieɔ eyiŋ akɛ, ‘Mɛni hewɔ kwraa po esa akɛ mabo amɛ toi?’

 Sane lɛ nɔŋŋ ji akɛ: Kɛ́ fɔlɔi tse gbãla kɛsusumɔ akɛ amɛbaanyɛ amɛkwɛ amɛbii lɛ tamɔ mɛi ni tseko gbãla feɔ lɛ, amɛnáŋ lɛ mlɛo kɔkɔɔkɔ. Ni naagbai ni gbekɛbii lɛ kɛkpeɔ lɛ amli wala kwraa po fe amɛfɔlɔi lɛ anɔ lɛ.

 Biblia mli shishitoo mla: “Nyɛkawoa nyɛbii amlifu, koni amɛnijiaŋ akaje wui.”​—Kolosebii 3:21, shishigbɛ niŋmaa.

 Akɛni bei pii lɛ, kɛ́ atse gbãla lɛ ebiɔ mɔdɛŋbɔɔ waa dani anyɛɔ ajeɔ shihilɛ hee shishi hewɔ lɛ, kulɛ ebaahi akɛ, akɛ nakai mɔdɛŋbɔɔ lɛ atsu nii kɛbaa gbãla lɛ yi ni ekafite. Wolo ko ni ji The Case for Marriage lɛ wie akɛ: “Kɛ́ naagbai yɛ gbalashihilɛ ko mli loo miishɛɛ bɛ mli lɛ, no etsɔɔɔ akɛ nakai ebaahi daa loo anyɛŋ afee he nɔ ko ni ehi. Kɛ́ naagba yɛ gbalashihilɛ mli hefatalɔi komɛi ateŋ ni amɛtseee gbãla lɛ, be ni be shweɔ mli lɛ, bei pii lɛ, yɛ amɛteŋ mɛi komɛi agbɛfaŋ lɛ, amɛgbãla lɛ hiɔ ni amɛmii shɛɔ amɛhe kwraa fe tsutsu lɛ po.” Yɛ fɛɛ mli lɛ, kɛ́ fɔlɔi lɛ hi shi ni amɛtseee gbãla lɛ, nibii yaa lɛ jogbaŋŋ hãa amɛbii lɛ, ni bii lɛ bɔɔ mɔdɛŋ.

 Enɛ etsɔɔɔ kɔkɔɔkɔ akɛ anyɛŋ atse gbãla. Anɔkwa, Biblia lɛ ŋmɛɔ gbɛ akɛ abaanyɛ adamɔ ajwamaŋbɔɔ loo bɔlɛnamɔ jeŋba sha nɔ atse gbãla. (Mateo19:9) Kɛ̃lɛ, Biblia lɛ kɛɔ hu akɛ, “hiɛtɛlɔ kwɛɔ enaji famɔi jogbaŋŋ.” (Abɛi 14:15) No hewɔ lɛ, esa akɛ wumɛi kɛ ŋamɛi ni miiná naagbai yɛ amɛgbalashihilɛ mli ni miitao amɛtse gbãla lɛ asusu nibii fɛɛ ahe jogbaŋŋ dani amɛkpɛ yiŋ​—esa akɛ amɛsusu bɔ ni gbalatsemɔ baanyɛ asa amɛbii lɛ ahe ehã lɛ he.

 Anɔkwa, akɛ abaafĩ shi yɛ gbalashihilɛ mli lɛ biɔ babaoo fe ni abaakpee emli naagbai lɛ anaa kɛkɛ. Biblia lɛ kɛ ŋaawoi kpakpai ni baanyɛ aye abua wumɛi kɛ ŋamɛi koni amɛná sui kpakpai, ni amɛnyɛ amɛfi shi yɛ amɛgbalashihilɛ lɛ mli, ni miishɛɛ hu ahi mli lɛ hãa. Enɛ bɛ naakpɛɛ kwraa ejaakɛ Yehowa, ni ji Biblia lɛ ŋmalɔ lɛ, ji mɔ ni to gbalashihilɛ gbɛjianɔtoo lɛ shishi.​—Mateo 19:4-6.

 Biblia mli shishitoo mla: “Mi Yehowa, miji o-Nyɔŋmɔ lɛ, Mɔ ni tsɔɔ bo nii koni oná he sɛɛ lɛ.”​—Yesaia 48:17.