1 Mose 40:1-23
40 Nibii nɛɛ asɛɛ lɛ, Ejipt maŋtsɛ lɛ dãawolɔnukpa+ lɛ kɛ enishãlɔnukpa lɛ fee esha amɛshi amɛnuŋtsɔ, ni ji Ejipt maŋtsɛ lɛ.
2 No hewɔ lɛ, Farao mli fu etsuji-nukpai enyɔ lɛ, ni ji dãawolɔnukpa lɛ kɛ nishãlɔnukpa lɛ waa,+
3 ni eyawo amɛ tsuŋ yɛ tsuŋwoohe ni yɔɔ bulɔi lɛ anɔ onukpa+ lɛ shĩa lɛ, he ni Yosef hu yɔɔ akɛ gboklɛfonyo lɛ.+
4 Ni bulɔi lɛ anɔ onukpa lɛ kɛɛ Yosef akɛ ekɛ amɛ ahi shi ní ekwɛ amɛ,+ ni amɛhi tsuŋwoohe lɛ kɛyashi be ko.*
5 Ejipt maŋtsɛ lɛ dãawolɔ lɛ kɛ nishãlɔ lɛ ní awo amɛ tsuŋ lɛ ateŋ mɔ fɛɛ mɔ la lamɔ ko yɛ gbɛkɛ* kome too mli, ni lamɔi lɛ eko fɛɛ eko yɛ eshishitsɔɔmɔ.
6 Enɔ jetsɛremɔ leebi be ni Yosef ba ní ena amɛ lɛ, amɛfee mɔbɔmɔbɔ.
7 No hewɔ lɛ, ebi Farao tsuji-nukpai ní awo amɛ kɛ lɛ fɛɛ tsuŋ yɛ enuŋtsɔ lɛ shĩa lɛ akɛ: “Mɛni hewɔ nyɛhiɛ efee mɔbɔmɔbɔ ŋmɛnɛ nɛkɛ?”
8 Kɛkɛ ni amɛkɛɛ lɛ akɛ: “Wɔteŋ mɔ fɛɛ mɔ la lamɔ ko, shi wɔbɛ mɔ ko ní baatsɔɔ wɔ shishi.” Yosef kɛɛ amɛ akɛ: “Ani niiashishitsɔɔmɔi lɛ, jeee Nyɔŋmɔ nɔ ni?+ Nyɛfainɛ, nyɛgbaa mi.”
9 No hewɔ lɛ, dãawolɔnukpa lɛ gba Yosef elamɔ lɛ ekɛɛ: “Yɛ milamɔ lɛ mli lɛ, mina wain tso ko ma mihiɛ.
10 Ni wain tso lɛ egbala niji etɛ, ni be ni etsɛ̃rɛ̃ niji fɔbii lɛ, egba afoforo, ni ewain yibii shabii lɛ tsu.
11 Ni mihiɛ Farao kɔɔpoo lɛ yɛ midɛŋ, ni miloo wain yibii lɛ, ni miŋa miwo Farao kɔɔpoo lɛ mli. No sɛɛ lɛ, mikɛ kɔɔpoo lɛ wo Farao dɛŋ.”
12 Kɛkɛ ni Yosef kɛɛ lɛ akɛ: “Eshishitsɔɔmɔ nɛ: Niji etɛ lɛ, gbii etɛ ni.
13 Biɛ gbii etɛ lɛ, Farao baajie bo,* ni ebaasaa ekɛ ogbɛnaa lɛ ahã bo ekoŋŋ,+ ni okɛ Farao kɔɔpoo lɛ baawo edɛŋ, tamɔ bɔ ni ofeɔ tsutsu be ni oji edãawolɔ+ lɛ.
14 Shi kɛ́ nibii hi hã bo lɛ, kaimɔ mi. Ofainɛ, jiemɔ suɔmɔ ni tsakeee kpo otsɔɔ mi ní otsĩ mitã otsɔɔ Farao, bɔ ni afee ni abajie mi kɛje biɛ.
15 Anɔkwa, aju mi kɛjɛ Hebribii lɛ ashikpɔŋ lɛ nɔ,+ ni biɛ hu, mifeko nɔ ko ní sa akɛ awo mi tsuŋ.”*+
16 Be ni nishãlɔnukpa lɛ na akɛ Yosef niiashishitsɔɔmɔ lɛ hi jogbaŋŋ lɛ, ekɛɛ lɛ akɛ: “Mi hu, yɛ milamɔ lɛ mli lɛ, mina ní mitere kɛntɛŋi etɛ ní blodoi yɛji yɛ mli,
17 ni nibii srɔtoi fɛɛ ni ashã ahã Farao yɛ kɛntɛŋ ni ma yiteŋ lɛ mli, ni loofɔji miiye yɛ kɛntɛŋ lɛ mli yɛ miyiteŋ.”
18 Kɛkɛ ni Yosef hã hetoo akɛ, “Eshishitsɔɔmɔ nɛ: Kɛntɛŋi etɛ lɛ, gbii etɛ ni.
19 Biɛ gbii etɛ lɛ, Farao baafo oyitso,* ni ebaasɛŋ bo yɛ tso jaŋŋ nɔ, ni loofɔji lɛ baaye oheloo yɛ ohe.”+
20 Agbɛnɛ, gbi ni ji etɛ lɛ ji Farao fɔmɔ gbi,+ ni eŋmɛ etsuji lɛ fɛɛ okpɔlɔ, ni ejie dãawolɔnukpa lɛ kɛ nishãlɔnukpa lɛ fɛɛ* ni ekɛ amɛ ba etsuji lɛ ahiɛ.
21 Ni ekɛ dãawolɔnukpa lɛ gbɛnaa akɛ dãawolɔ lɛ saa hã lɛ ekoŋŋ, ni etee nɔ ekɛ kɔɔpoo lɛ wo Farao dɛŋ.
22 Shi esɛŋ nishãlɔnukpa lɛ, tamɔ bɔ ni Yosef tsɔɔ amɛ shishi lɛ pɛpɛɛpɛ.+
23 Shi dãawolɔnukpa lɛ kaiii Yosef; ehiɛ kpa enɔ.+
Shishigbɛ Niŋmaa
^ Hebri sht. ŋm., “gbii komɛi.”
^ Loo “nyɔɔŋ.”
^ Hebri sht. ŋm., “baawó oyitso nɔ.”
^ Hebri sht. ŋm., “akɛ mi awo bu ní akɛtoɔ nu lɛ mli; akɛ mi awo bu lɛ mli.”
^ Hebri sht. ŋm., “baawó oyitso kɛje onɔ.”
^ Hebri sht. ŋm., “ehole dãawolɔnukpa lɛ kɛ nishãlɔnukpa lɛ fɛɛ yitsei anɔ.”
