Klɛŋklɛŋ Wolo Ni Akɛmaje Tesalonikabii Lɛ 5:1-28
5 Agbɛnɛ, nyɛmimɛi, yɛ bei lɛ kɛ gbii ni ato lɛ agbɛfaŋ lɛ, ehe ehiaaa ni aŋma nyɛ he nɔ ko.
2 Ejaakɛ nyɛ diɛŋtsɛ nyɛle jogbaŋŋ akɛ Yehowa* gbi+ lɛ miiba tamɔ bɔ ni julɔ baa nyɔɔŋ lɛ pɛpɛɛpɛ.+
3 Be mli ni amɛbaakɛɛ akɛ, “Toiŋjɔlɛ kɛ shweshweeshwe!” lɛ, no mli nɔŋŋ ni hiɛkpatamɔ baabati amɛ shi trukaa,+ tamɔ bɔ ni kɔ̃ɔmɔ taa yoo ni hiɛ musu he lɛ, ni amɛjeŋ mli kɔkɔɔkɔ.
4 Shi nyɛmimɛi, nyɛ lɛ, nyɛbɛ duŋ mli ni gbi lɛ baabati nyɛ shi tamɔ bɔ ni jetsɛremɔ batiɔ julɔi ashi lɛ,
5 ejaakɛ nyɛ fɛɛ lɛ, la bii kɛ jetsɛremɔ bii ji nyɛ.+ Wɔjeee jenamɔ loo duŋ bii.+
6 No hewɔ lɛ, agbɛnɛ, nyɛkahãa wɔwɔa tamɔ mɛi ni eshwɛ lɛ feɔ lɛ,+ shi moŋ nyɛhãa wɔyaa nɔ wɔshia kpe+ ni wɔhiɛ ahia wɔhe nɔ.*+
7 Ejaakɛ mɛi ni wɔɔ lɛ, nyɔɔŋ amɛwɔɔ, ni mɛi ni tɔrɔɔ dãa lɛ, nyɔɔŋ amɛtɔrɔɔ.+
8 Shi wɔ mɛi ni wɔji jetsɛremɔ bii lɛ, nyɛhãa wɔhiɛ ahia wɔhe nɔ* ni wɔwo hemɔkɛyeli kɛ suɔmɔ akɛ dama, kɛ yiwalaheremɔ he hiɛnɔkamɔ lɛ akɛ dade fai,+
9 ejaakɛ Nyɔŋmɔ halaaa wɔ ehãaa mlifu, shi moŋ ehala wɔ koni wɔtsɔ wɔ-Nuŋtsɔ Yesu Kristo nɔ wɔná yiwalaheremɔ.+
10 Egbo ehã wɔ,+ koni kɛ́ wɔmiishi kpe jio, wɔmiiwɔ* jio, wɔ kɛ lɛ fɛɛ ahi wala mli.+
11 No hewɔ lɛ, nyɛyaa nɔ nyɛwowoa nyɛhe hewalɛ,* ni nyɛtswaa nyɛhe nyɛmaa shi,+ tamɔ bɔ ni yɛ anɔkwale mli lɛ nyɛfeɔ lɛ.
12 Nyɛmimɛi, agbɛnɛ, wɔmiikpa nyɛ fai akɛ, nyɛjiea bulɛ kpo nyɛtsɔa mɛi ni tsuɔ nii waa yɛ nyɛteŋ, ni amɛkwɛɔ nyɛnɔ yɛ Nuŋtsɔ lɛ mli, ni amɛwieɔ amɛtsɔɔ nyɛ lɛ;
13 ni nyɛhiɛ asɔ amɛ waa diɛŋtsɛ yɛ suɔmɔ mli yɛ nitsumɔ ni amɛtsuɔ lɛ hewɔ.+ Nyɛhãa toiŋjɔlɛ ahia nyɛteŋ.+
14 Shi nyɛmimɛi, wɔmiikpa nyɛ fai ni nyɛbɔ mɛi ni enyiɛɛɛ yɛ gbɛjianɔtoo naa lɛ kɔkɔ,*+ nyɛshɛjea mɛi ni ehao* lɛ amii, nyɛyea nyɛbuaa mɛi ni he waaa lɛ, nyɛtoa nyɛtsui shi nyɛhãa mɛi fɛɛ.+
15 Nyɛkwɛa ni mɔ ko kɛ efɔŋ akato efɔŋ najiaŋ,+ shi moŋ be fɛɛ be lɛ, nyɛtiua ekpakpa sɛɛ nyɛhãa nyɛhe kɛ mɛi krokomɛi fɛɛ.+
16 Nyɛmii ashɛa nyɛhe jogbaŋŋ be fɛɛ be.+
17 Nyɛsɔlea daa ni nyɛkakpaa.+
18 Nyɛdaa shi yɛ nɔ fɛɛ nɔ he.+ Enɛ ji nɔ ni Nyɔŋmɔ sumɔɔ akɛ nyɛfee yɛ Kristo Yesu mli.
19 Nyɛkagbea mumɔ lɛ la lɛ.+
20 Nyɛkanyaŋea gbalɛi.+
21 Nyɛkaa nii fɛɛ nyɛkwɛa;+ nyɛmɔa nɔ ni hi lɛ mli kpɛŋŋ.
22 Nyɛtsia nyɛhe kɛjea efɔŋfeemɔ fɛɛ efɔŋfeemɔ he.+
23 Toiŋjɔlɛ Nyɔŋmɔ lɛ diɛŋtsɛ afee nyɛ krɔŋkrɔŋ kɛmɔ shi. Ni abaa nyɛmumɔ kɛ nyɛsusuma* kɛ nyɛgbɔmɔtso lɛ yi akɛ nɔ ni eye emuu yɛ gbɛ fɛɛ gbɛ nɔ ni shwamɔ ko bɛ he yɛ be ni wɔ-Nuŋtsɔ Yesu Kristo eba lɛ mli.+
24 Anɔkwafo ji mɔ ni tsɛɔ nyɛ lɛ, ni bɔ fɛɛ bɔ ni fee lɛ, ebaafee nakai.
25 Nyɛmimɛi, nyɛyaa nɔ nyɛsɔlea nyɛhãa wɔ.+
26 Nyɛŋaa nyɛmimɛi lɛ fɛɛ kɛ naashɔmɔ krɔŋkrɔŋ.
27 Mikɛ sɔ̃ ni yɔɔ hiɛdɔɔ miifɔ̃ nyɛnɔ yɛ Nuŋtsɔ lɛ gbɛ́i mli akɛ nyɛhãa akanea wolo nɛɛ ahãa nyɛmimɛi lɛ fɛɛ.+
28 Wɔ-Nuŋtsɔ Yesu dromɔ lɛ kɛ nyɛ ahia shi.
Shishigbɛ Niŋmaa
^ Kwɛmɔ Saji Krokomɛi A5 lɛ.
^ Loo “ni wɔya nɔ wɔhã nyɛmɔi ní wɔkɛsusuɔ nii ahe lɛ atsua nii jogbaŋŋ.”
^ Loo “nyɛhãa wɔyaa nɔ wɔhãa nyɛmɔi ní wɔkɛsusuɔ nii ahe lɛ atsua nii jogbaŋŋ.”
^ Loo “wɔgboi.”
^ Loo “nyɛshɛjeshɛjea nyɛmii.”
^ Loo “nyɛwiea nyɛtsɔa mɛi ni enyiɛɛɛ yɛ gbɛjianɔtoo naa lɛ.”
^ Loo “mɛi ni nijiaŋ eje wui.” Greek sht. ŋm., “mɛi ni yɔɔ susuma bibioo.”
^ Loo “nyɛwala.” Kwɛmɔ Wiemɔi Titrii Amligbalamɔ lɛ.
