Petro Wolo Ni Ji Enyɔ Lɛ 1:1-21
1 Simon Petro, ni ji Yesu Kristo nyɔŋ kɛ bɔfo lɛ, kɛ wolo nɛɛ miimaje mɛi ni tsɔ wɔ-Nyɔŋmɔ lɛ jalɛ lɛ kɛ Yiwalaherelɔ Yesu Kristo jalɛ lɛ nɔ amɛná hemɔkɛyeli ni jara wa tamɔ wɔnɔ lɛ nɔŋŋ* lɛ:
2 Nyɔŋmɔ kɛ Yesu, wɔ-Nuŋtsɔ lɛ he nilee krɔŋŋ+ lɛ ahã nyɛná dromɔ kɛ toiŋjɔlɛ babaoo,
3 ejaakɛ e-Nyɔŋmɔ hewalɛ lɛ kɛ nibii fɛɛ ni hi hã wala kɛ Nyɔŋmɔjamɔ lɛ ehã wɔ* yɛ mɔ ni tsɔ lɛ diɛŋtsɛ enunyam kɛ ejeŋba kpakpa nɔ etsɛ wɔ+ lɛ he nilee krɔŋŋ lɛ mli.
4 Etsɔ nibii nɛɛ anɔ ekɛ shiwoi kpelei ni jara wa lɛ ehã wɔ,*+ koni nyɛtsɔmɔ enɛɛmɛi anɔ nyɛná Nyɔŋmɔ su lɛ mli gbɛfaŋnɔ,+ akɛni nyɛjo fitemɔ ni yɔɔ je lɛ mli ni jɛɔ nibii fɔji ni ashweɔ lɛ* mli kɛbaa lɛ naa foi lɛ hewɔ.
5 Enɛ nɔŋŋ hewɔ lɛ, nyɛbɔa mɔdɛŋ fɛɛ ni nyɛaanyɛ+ ni nyɛkɛ jeŋba kpakpa+ afataa nyɛhemɔkɛyeli lɛ he, ni nyɛkɛ nilee+ afataa nyɛjeŋba kpakpa lɛ he,
6 ni nyɛkɛ henɔyeli afataa nyɛnilee lɛ he, ni nyɛkɛ shifimɔ afataa nyɛhenɔyeli+ lɛ he, ni nyɛkɛ Nyɔŋmɔjamɔ+ afataa nyɛshifimɔ lɛ he,
7 ni nyɛkɛ nyɛmimɛi ateŋ suɔmɔ afataa nyɛ-Nyɔŋmɔjamɔ lɛ he, ni nyɛkɛ suɔmɔ afataa nyɛnyɛmimɛi ateŋ suɔmɔ+ lɛ he.
8 Ejaakɛ kɛ́ nibii nɛɛ yɛ nyɛmli ni efa kɛteke nɔ lɛ, ehãŋ nyɛfee mɛi ni tara shi efolo ni amɛtsuuu nɔ ko loo mɛi ni wooo yibii+ yɛ wɔ-Nuŋtsɔ Yesu Kristo he nilee krɔŋŋ lɛ gbɛfaŋ.
9 Ejaakɛ mɔ fɛɛ mɔ ni bɛ nɛkɛ nibii nɛɛ, shwilafo ji lɛ, eŋamɔ ehiŋmɛii ewo la lɛ,*+ ni ehiɛ ekpa nɔ akɛ afee lɛ krɔŋkrɔŋ kɛjɛ eshai ni efee+ tsutsu lɛ amli.
10 No hewɔ lɛ, nyɛmimɛi, nyɛbɔa mɔdɛŋ fɛɛ ni nyɛaanyɛ ni nyɛhã nyɛtsɛmɔ+ kɛ nyɛhalamɔ lɛ afee nɔ ni ama nɔ mi ahã nyɛ, ejaakɛ kɛ́ nyɛtee nɔ nyɛfee nibii nɛɛ, nyɛgbeŋ shi kɔkɔɔkɔ.+
11 Anɔkwa, nɛkɛ gbɛ nɔ abaatsɔ ahã nyɛná gbɛ ni yɔɔ nyam kɛbote wɔ-Nuŋtsɔ kɛ Yiwalaherelɔ Yesu Kristo naanɔ Maŋtsɛyeli lɛ mli.+
12 Enɛ hewɔ lɛ, mito miyiŋ akɛ makai nyɛ nibii nɛɛ be fɛɛ be, eyɛ mli akɛ nyɛle nibii nɛɛ, ni nyɛnane emɔ shi jogbaŋŋ yɛ anɔkwale ni yɔɔ nyɛmli lɛ mli moŋ.
13 Shi gbii abɔ ni miyɔɔ mama tsũ nɛɛ mli* lɛ,+ mibuɔ akɛ eja gbɛ akɛ mikɛ kaimɔi akanya nyɛ,+
14 ejaakɛ mile akɛ etsɛŋ ni abaajie mimama tsũ lɛ kɛya, tamɔ bɔ ni wɔ-Nuŋtsɔ Yesu Kristo hu ejie kpo faŋŋ etsɔɔ mi lɛ.+
15 Mafee bɔ fɛɛ bɔ ni manyɛ be fɛɛ be koni kɛ́ mishi lɛ, nyɛ diɛŋtsɛ nyɛnyɛ nyɛkai nibii nɛɛ* nyɛhã nyɛhe.
16 Dabi, jeee adesãi ni afo atã yɛ ŋaa mli asɛɛ wɔnyiɛ wɔjaje wɔ-Nuŋtsɔ Yesu Kristo hewalɛ kɛ be ni eba lɛ he sane wɔtsɔɔ nyɛ, shi moŋ, wɔna enunyam kpele lɛ kɛ wɔhiŋmɛii.+
17 Ejaakɛ enine shɛ woo kɛ anunyam nɔ kɛjɛ Nyɔŋmɔ, ni ji Tsɛ lɛ ŋɔɔ, be ni anunyam kpele lɛ wie wiemɔi nɛɛ etsɔɔ lɛ lɛ,* akɛ: “Mɔ nɛ ji mi-Bi ni misumɔɔ lɛ lɛ, mɔ ni mi diɛŋtsɛ miná ehe miishɛɛ lɛ.”+
18 Hɛɛ, wɔnu wiemɔi nɛɛ akɛ ejɛ ŋwɛi be mli ni wɔkɛ lɛ yɔɔ gɔŋ krɔŋkrɔŋ lɛ nɔ lɛ.
19 No hewɔ lɛ, ama gbalɛ wiemɔ lɛ nɔ mi ahã wɔ fe tsutsu lɛ, ni nyɛmiibɔ mɔdɛŋ jogbaŋŋ akɛ nyɛkɛ nyɛjwɛŋmɔ miima nɔ akɛ kane+ ni miitso yɛ duŋ mli (kɛyashi je baatsɛre ni leebi ŋulami+ lɛ* baate shi) yɛ nyɛtsuii amli.
20 Ejaakɛ klɛŋklɛŋ kwraa lɛ, nyɛle akɛ Ŋmalɛ mli gbalɛ ko gbalɛ ko jɛɛɛ gbɔmɔ ko niiamlitsɔɔmɔ mli.
21 Ejaakɛ gbalɛ ko bako yɛ gbɔmɔ suɔmɔ naa pɛŋ,+ shi moŋ mumɔ krɔŋkrɔŋ lɛ tsirɛ* gbɔmɛi ni amɛwie wiemɔi ni jɛ Nyɔŋmɔ ŋɔɔ.+
Shishigbɛ Niŋmaa
^ Loo “amɛná hemɔkɛyeli ni ji hegbɛ ni kɛ wɔnɔ lɛ yeɔ egbɔ.”
^ Loo “eke wɔ tswaa.”
^ Loo “eke wɔ tswaa.”
^ Loo “ni jɛɔ akɔnɔ fɔŋ.”
^ Shishitsɔɔmɔi komɛi kɛɔ akɛ, “eshwila, enaaa shɔŋŋ nii.”
^ Loo “agba nɛɛ shishi,” ni ji, eshikpɔŋ nɔ gbɔmɔtso lɛ.
^ Loo “nyɛnyɛ nyɛtsĩ nibii nɛɛ atã.”
^ Greek sht. ŋm., “kɛ gbee nɛɛ wie tsɔɔ lɛ.”
^ Loo “toloo lɛ.”
^ Greek sht. ŋm., “kpala.”
