Wolo Ni Akɛmaje Galatiabii Lɛ 2:1-21
2 Kɛkɛ ni no sɛɛ afii 14 lɛ, mi kɛ Barnaba+ kwɔ kɛtee Yerusalem ekoŋŋ, ni mikɛ Tito hu fata mihe.+
2 Mikwɔ kɛtee yɛ kpojiemɔ ko hewɔ, ni mikɛ sane kpakpa ni mishiɛɔ yɛ jeŋmaji lɛ ateŋ lɛ yafɔ̃ amɛhiɛ. Shi mifee enɛ yɛ hii ni abuɔ amɛ waa lɛ pɛ ahiɛ, bɔ ni afee ni maná nɔmimaa akɛ foi ni midaa lɛ, aloo nɔ ni mida lɛ, efeko efolo.
3 Shi eyɛ mli akɛ Tito+ ni fata mihe lɛ ji Greeknyo moŋ, shi lɛ po anyɛɛɛ enɔ akɛ efo ketia.+
4 Shi nɛkɛ sane nɛɛ te shi yɛ amale nyɛmimɛi ni ba asafo lɛ mli nigii lɛ ahewɔ;+ amɛju shi kɛba mli koni amɛbakpá heyeli+ ni wɔyɔɔ yɛ ekome ni wɔ kɛ Kristo Yesu efee lɛ mli lɛ shi amɛkwɛ, koni amɛye wɔ nyɔŋ;+
5 wɔŋmɛɛɛ wɔhe wɔhãaa mɛi nɛɛ, ni wɔbaaa wɔhe shi wɔhãaa amɛ hu,+ dabi, wɔfeee nakai be fioo ko po,* koni sane kpakpa lɛ anɔkwale lɛ aya nɔ ahi shi ahã nyɛ.
6 Shi yɛ mɛi ni etamɔ nɔ ni amɛhe hiaa lɛ agbɛfaŋ lɛ+—bɔ fɛɛ bɔ ni amɛyɔɔ tsutsu ko lɛ, no jeee mihe sane ko, ejaakɛ Nyɔŋmɔ kwɛɛɛ bɔ ni mɔ ko ji yɛ kponɔgbɛ—hii ni abuɔ amɛ waa nɛɛ etsɔɔɔ mi nɔ ko hee ko.
7 Shi moŋ, be ni amɛna akɛ akɛwo midɛŋ akɛ mijaje sane kpakpa lɛ mitsɔɔ mɛi ni afolɔko amɛ ketia,+ tamɔ bɔ ni akɛwo Petro hu dɛŋ akɛ ejaje etsɔɔ mɛi ni afolɔ amɛ ketia lɛ—
8 ejaakɛ mɔ ni hã Petro hewalɛ akɛ etsu bɔfo nitsumɔ yɛ mɛi ni afolɔ amɛ ketia lɛ ateŋ lɛ, lɛ nɔŋŋ ehã mi hu hewalɛ akɛ mifee nakai yɛ jeŋmaji lɛ ateŋ+—
9 ni be ni amɛna dromɔ ni akɛhã mi lɛ,+ Yakobo+ kɛ Kefa* kɛ Yohane, mɛi ni abuɔ amɛ akɛ akulashiŋi lɛ, kɛ naanyobɔɔ* ninejurɔ lɛ ta mi kɛ Barnaba dɛ̃,+ koni wɔ lɛ wɔya jeŋmaji lɛ aŋɔɔ, shi amɛ lɛ, amɛya mɛi ni afolɔ amɛ ketia lɛ aŋɔɔ.
10 Nɔ ni amɛkɛɛ wɔ kɛkɛ ji akɛ wɔhã ohiafoi lɛ ahi wɔjwɛŋmɔ mli, ni enɛ nɔŋŋ he mɔdɛŋ mi hu mikɛ hiɛdɔɔ bɔɔ akɛ mafee.+
11 Shi be ni Kefa*+ ba Antiokia+ lɛ, mikɛma ehiɛ akɛ nɔ ni efee lɛ ehiii,* ejaakɛ eyɛ faŋŋ akɛ eye sane ni ejaaa.*
12 Ejaakɛ dani hii komɛi ni jɛ Yakobo+ ŋɔɔ lɛ baaba lɛ, no mli lɛ, ekɛ jeŋmajiaŋbii lɛ yeɔ nii;+ shi be ni amɛba lɛ, ekpa nakai feemɔ ni etse ehe ejaakɛ eeshe mɛi ni fiɔ ketiafoo sɛɛ lɛ gbeyei.+
13 Yudafoi ni eshwɛ lɛ hu yafata ehe kɛfee nakai osato lɛ, ni amɛgbala Barnaba po amɛwo amɛsatofeemɔ lɛ mli.
14 Shi be ni mina akɛ amɛnyiɛɛɛ yɛ sane kpakpa lɛ anɔkwale lɛ naa lɛ,+ mikɛɛ Kefa* yɛ amɛ fɛɛ amɛhiɛ akɛ: “Kɛ́ bo ni oji Yudanyo lɛ ohiɔ shi tamɔ bɔ ni jeŋmaji lɛ feɔ lɛ, ni jeee tamɔ bɔ ni Yudafoi feɔ lɛ, te tɛŋŋ ni onyɛɔ jeŋmajiaŋbii lɛ anɔ ni amɛhi shi yɛ Yudafoi akusum naa lɛ?”+
15 Wɔ ni afɔ wɔ akɛ Yudafoi ni wɔtamɔɔɔ eshafeelɔi ni jɛ jeŋmaji lɛ amli lɛ,
16 wɔyɔse akɛ atsɔɔɔ mla nitsumɔi anɔ abuuu gbɔmɔ ko jalɔ, moŋ lɛ, atsɔɔ hemɔkɛyeli+ yɛ Yesu Kristo+ mli pɛ nɔ afeɔ nakai. No hewɔ lɛ, wɔná hemɔkɛyeli yɛ Kristo Yesu mli koni atsɔ Kristo mli hemɔkɛyeli nɔ abu wɔ jalɔi, shi jeee kɛtsɔ mla nitsumɔi anɔ, ejaakɛ mɔ ko mɔ ko* bɛ ni abaatsɔ mla nitsumɔi anɔ abu lɛ jalɔ.+
17 Agbɛnɛ, kɛ́ abuɔ wɔ hu akɛ eshafeelɔi akɛni wɔmiitao ni atsɔ Kristo nɔ abu wɔ jalɔi hewɔ lɛ, belɛ ani no tsɔɔ akɛ Kristo ji esha sɔɔlɔ? Dabida!
18 Kɛ́ nibii ni mikumɔ lɛ nɔŋŋ mitswaa mimaa shi ekoŋŋ lɛ, belɛ miitsɔɔ akɛ mlatɔlɔ ji mi.
19 Ejaakɛ mi lɛ mitsɔ mla nɔ migbo yɛ mla gbɛfaŋ+ koni mihiɛ akã yɛ Nyɔŋmɔ gbɛfaŋ.
20 Akala mi akpɛtɛ tso jaŋŋ lɛ he afata Kristo he.+ Jeee mi mihiɛ kã dɔŋŋ,+ shi moŋ Kristo ji mɔ ni hiɛ kã ni ekɛ mi efee ekome.* Anɔkwa, mihiɛ ni kã yɛ heloo lɛ mli amrɔ nɛɛ, hemɔkɛyeli ni miyɔɔ yɛ Nyɔŋmɔ Bi+ lɛ ni sumɔ mi ni ekɛ ehe hã yɛ mihewɔ lɛ mli mihiɛ kã yɛ.+
21 Mikpooo Nyɔŋmɔ dromɔ lɛ,*+ ejaakɛ kɛ́ mla nɔ jalɛ tsɔɔ kɛbaa lɛ, belɛ, yɛ anɔkwale mli lɛ, Kristo lɛ gbo efolo.+
Shishigbɛ Niŋmaa
^ Greek sht. ŋm., “ŋmɛlɛtswaa kome po.”
^ Atsɛɔ lɛ Petro hu.
^ Loo “nyɛmifeemɔ.”
^ Loo “ejaakɛ eyeɔ fɔ.”
^ Loo “mikɛ nibii yamamɔ ehiɛ.”
^ Atsɛɔ lɛ Petro hu.
^ Atsɛɔ lɛ Petro hu.
^ Greek sht. ŋm., “heloo ko.”
^ Greek sht. ŋm., “Kristo hiɛ kã yɛ mimli.”
^ Loo “mitswaaa Nyɔŋmɔ dromɔ lɛ mifɔ̃ɔɔ afã.”
