Hiob 29:1-25
29 Hiob tsa ewiemɔ* lɛ nɔ ekɛɛ:
2 “Miná kulɛ miyɛ nyɔji ni eho lɛ amli,Gbii ni Nyɔŋmɔ kwɛɔ minɔ lɛ,
3 Be ni ehãa ekane lɛ kpɛɔ yɛ miyiteŋ,Ní ela lɛ hãa minyiɛɔ yɛ duŋ mli lɛ,+
4 Be ni miyɔɔ hewalɛ ní nibii yaa lɛ jogbaŋŋ hãa mi,*Ní minuɔ he akɛ Nyɔŋmɔ naanyobɔɔ lɛ yɛ mimama tsũ lɛ mli lɛ,+
5 Be ni Ofe lɛ kɛ mi yɔɔ lolo,Ní mibii* hu ebɔle mihe kɛkpe lɛ,
6 Be ni hei ni mikɛ minaji mamɔɔ lɛ eyi kɛ bɔta,Ní tɛsai fɔseɔ mu babaoo amɛhãa mi tamɔ fai lɛ.+
7 Be ni mijeɔ kpo kɛyaa maŋ lɛ agbó lɛ naa+Ní miyataa shi yɛ henaabuamɔhe lɛ,+
8 Oblahii naa mi, ni amɛdamɔɔ afã,*Ni hiimeji po teɔ shi, ni amɛyaa nɔ amɛdamɔɔ shi.+
9 Lumɛi kpaa wiemɔ;Amɛkɛ amɛniji toɔ amɛnaa.
10 Anuuu gbɔmɛi wuji agbei;Ni amɛlilɛii hu kpɛtɛɔ amɛdaaŋ.
11 Mɔ fɛɛ mɔ ni nuɔ migbee lɛ wieɔ mihe ekpakpa,Ni mɛi ni na mi lɛ ye odase amɛhã mi.
12 Ejaakɛ mihereɔ* ohiafo ni bolɔɔ koni aye abua lɛ lɛ,+Kɛ gbekɛ ni bɛ tsɛ,* kɛ mɔ fɛɛ mɔ ni bɛ mɔ ko ni yeɔ ebuaa lɛ lɛ hu.+
13 Mɔ ni hiɛ miihe akpãtã lɛ jɔɔ mi,+Ni mihã yoo okulafo tsui mii shɛ ehe.+
14 Miwo jalɛ tamɔ atade;Ni mijalɛsaneyeli hu tamɔ atade kakadaŋŋ* kɛ yitsofiinɔ.
15 Mitsɔ hiŋmɛii mihã shwilafoiKɛ naji hu mihã akpaketsɛmɛi.
16 Mitsɔ tsɛ mihã ohiafoi;+Mitao mɛi ni mileee amɛ lɛ asane mli mihã amɛ.+
17 Mijwara efɔŋfeelɔ kadai+Ni mishɔ̃ nii ni emɔ lɛ yɛ enyanyɔji ateŋ.
18 No mli lɛ mikɛɔ akɛ, ‘Magbo yɛ mi diɛŋtsɛ mishĩa,*+Ni migbii baafa babaoo tamɔ ŋshɔnaa shia.
19 Mishishifãi lɛ baalɛɛ shi kɛya nui amli,Ni bɔ́ baahi miniji lɛ anɔ jenamɔ muu fɛɛ.
20 Minunyam lɛ tsɔɔ ehee be fɛɛ be,Ni miyaa nɔ mitsɛ̃ɔ gãi ni yɔɔ midɛŋ lɛ.’
21 Mɛi kwɛɔ mi gbɛ ni amɛboɔ mi toi,Amɛfeɔ diŋŋ amɛmɛɔ miŋaawoo.+
22 Kɛji miwie migbe naa lɛ, amɛwieee nɔ ko nɔ ko dɔŋŋ;Miwiemɔi lɛ nyɔɔ shi blɛoo yɛ amɛtoiiaŋ.*
23 Amɛkwɛɔ mi gbɛ tamɔ akwɛɔ nugbɔ gbɛ lɛ;Amɛgbɛɔ amɛdaaŋ hatoo tamɔ amɛmiimɛ sɛɛkpee nugbɔ.*+
24 Kɛ́ miŋmɔ mitsɔɔ amɛ lɛ, amɛnaa kpɛɔ amɛhe;Ni mihiɛ ní kpɛɔ lɛ woɔ amɛ hewalɛ.*
25 Mitsɔɔ amɛ gbɛ akɛ amɛyitso,Ni mihi shi tamɔ maŋtsɛ yɛ esraafoi ateŋ,+Tamɔ mɔ ko ni shɛjeɔ awerɛhoyelɔi amii.+
Shishigbɛ Niŋmaa
^ Hebri sht. ŋm., “ebɛbua.”
^ Hebri sht. ŋm., “Be ni miyɔɔ migbii lɛ amli.”
^ Loo “misɔɔlɔi.”
^ Hebri sht. ŋm., “ni amɛteɔ amɛhe.”
^ Loo “mijieɔ.”
^ Loo “awusã.”
^ Loo “atade ni nine bɛ he.”
^ Hebri sht. ŋm., “yɛ mitsũ (miloofɔlɔ tsũ) mli.”
^ Hebri sht. ŋm., “tsereɔ shwieɔ amɛtoii anɔ.”
^ Yɛ Biblia lɛ mli lɛ, “sɛɛkpee nugbɔ” ji nugbɔnɛmɔ ni jeɔ shishi aaafee April teŋgbɛ.
^ Shishitsɔɔmɔi komɛi kɛɔ akɛ, “Amɛhãaa mihiɛ la lɛ awo duŋ.”
