Nɔ Ni Yohane Ŋma 19:1-42
19 Kɛkɛ ni Pilato hã agwao Yesu.+
2 Ni asraafoi lɛ lo ŋmei akekere ni amɛkɛbu eyitso ni amɛwo lɛ atade kakadaŋŋ ko ni hiɛ pɛpol kɔla,+
3 ni amɛbaa eŋɔɔ amɛbakɛɔ akɛ: “Wɔmiiŋa bo,* Yudafoi lɛ a-Maŋtsɛ!” Agbɛnɛ hu, amɛgbála ehiɛ mai.+
4 Pilato je kpo ekoŋŋ ni ekɛɛ amɛ akɛ: “Nyɛkwɛa! Mikɛ lɛ eje kpo kɛba nyɛŋɔɔ bɔ ni afee ni nyɛna akɛ minaaa tɔmɔ ko yɛ ehe.”+
5 No hewɔ lɛ, Yesu je kpo, ni ŋmei akekere lɛ bu eyitso ni ewo atade kakadaŋŋ ni hiɛ pɛpol kɔla. Ni Pilato kɛɛ amɛ akɛ: “Naa! Nuu lɛ nɛ!”
6 Shi be ni osɔfoi hiɛnaanɔbii lɛ kɛ bulɔi lɛ na lɛ lɛ, amɛbolɔ amɛkɛɛ: “Gbee lɛ! Gbee lɛ!”*+ Pilato kɛɛ amɛ akɛ: “Nyɛ diɛŋtsɛ nyɛkɛ lɛ ayaa ni nyɛyagbea lɛ,* ejaakɛ mi lɛ, minaaa tɔmɔ ko yɛ ehe.”+
7 Yudafoi lɛ hã lɛ hetoo akɛ: “Wɔyɛ mla, ni yɛ mla lɛ naa lɛ esa akɛ egbo,+ ejaakɛ eetsɛ ehe Nyɔŋmɔ bi.”+
8 Be ni Pilato nu nɔ ni amɛwieɔ lɛ, eshe gbeyei fe tsutsu lɛ,
9 ni esaa ebote amralo lɛ shĩa lɛ ni ebi Yesu akɛ: “Nɛgbɛ ojɛ?” Shi Yesu efooo edaaŋ.+
10 No hewɔ lɛ, Pilato bi lɛ akɛ: “Okɛ mi ewieee? Ani oleee akɛ miyɛ hegbɛ akɛ miŋmɛɔ ohe, ni miyɛ hegbɛ hu akɛ migbeɔ bo?”*
11 Yesu hã lɛ hetoo akɛ: “Onáŋ hegbɛ ko kwraa yɛ minɔ kɛjeee ŋwɛi ajɛ akɛhã bo. Enɛ hewɔ ni mɔ ni kɛ mi wo odɛŋ lɛ he esha lɛ da fe onɔ lɛ.”
12 Enɛ hewɔ lɛ, Pilato tee nɔ etao gbɛ ni ebaatsɔ nɔ eŋmɛɛ ehe, shi Yudafoi lɛ bolɔ akɛ: “Kɛ́ oŋmɛɛ nuu nɛɛ he lɛ, jeee Kaisare naanyo ji bo. Mɔ fɛɛ mɔ ni feɔ ehe maŋtsɛ lɛ, eewie eeshi* Kaisare.”+
13 Kɛkɛ ni be ni Pilato nu wiemɔi nɛɛ, ekɛ Yesu je kpo, ni eho eta kojomɔ sɛi ko nɔ yɛ he ko ni atsɛɔ jɛmɛ Shikpɔŋ Ni Akala Tɛi Awo Nɔ, shi yɛ Hebri mli lɛ, atsɛɔ lɛ Gabata lɛ.
14 Agbɛnɛ, Hesaamɔkɛtoo Gbi+ kɛhã Hehoo lɛ ni; aaafee ŋmɛlɛtswaa ni ji ekpaa lɛ nɔ.* Ni ekɛɛ Yudafoi lɛ akɛ: “Naa! Nyɛmaŋtsɛ lɛ nɛ!”
15 Shi amɛbolɔ akɛ: “Okɛ lɛ aya! Okɛ lɛ aya! Gbee lɛ!”* Pilato bi amɛ akɛ: “Ani migbe nyɛmaŋtsɛ lɛ?” Osɔfoi hiɛnaanɔbii lɛ hã hetoo akɛ: “Wɔbɛ maŋtsɛ ko akɛ ja Kaisare.”
16 Kɛkɛ ni ekɛ lɛ hã amɛ koni amɛyagbe lɛ yɛ tso jaŋŋ nɔ.+
No hewɔ lɛ, amɛkɛ Yesu tee.
17 Lɛ diɛŋtsɛ etere piŋmɔ tso* lɛ kɛje kpo kɛtee he ni atsɛɔ jɛmɛ Yitsoŋoŋohe,+ ni atsɛɔ lɛ yɛ Hebri mli akɛ Golgota lɛ.+
18 Amɛkala lɛ amɛkpɛtɛ tso jaŋŋ lɛ he yɛ jɛmɛ,+ yɛ hii enyɔ krokomɛi amasɛi, mɔ kome yɛ biɛ ni mɔ kome hu yɛ biɛ, ni Yesu yɛ teŋ.+
19 Pilato ŋma gbɛnaa gbɛ́i ko hu ni ekɛkpɛtɛ piŋmɔ tso* lɛ he. Nɔ ni aŋma nɛ: “Yesu, Nazaretnyo lɛ, Yudafoi lɛ a-Maŋtsɛ lɛ.”+
20 Yudafoi lɛ ateŋ mɛi babaoo kane gbɛnaa gbɛ́i nɛɛ, ejaakɛ he ni akala Yesu akpɛtɛ tso jaŋŋ lɛ he yɛ lɛ bɛŋkɛ maŋ lɛ, ni aŋma yɛ Hebri, kɛ Latin, kɛ Greek wiemɔ mli.
21 Shi Yudafoi lɛ asɔfoi hiɛnaanɔbii lɛ kɛɛ Pilato akɛ: “Kaaŋma akɛ, ‘Yudafoi lɛ a-Maŋtsɛ lɛ,’ shi moŋ akɛ lɛ ekɛɛ akɛ, ‘Miji Yudafoi lɛ a-Maŋtsɛ lɛ.’”
22 Pilato hã hetoo akɛ: “Nɔ ni miŋma lɛ, miŋma.”
23 Agbɛnɛ, be ni asraafoi lɛ kala Yesu amɛkpɛtɛ tso jaŋŋ lɛ he lɛ, amɛkɔlɔ etadei anɔhaanɔi lɛ ni amɛjara mli ejwɛ, ni asraafoi lɛ ateŋ mɔ fɛɛ mɔ kɔ ekome, ni amɛkɔ etade ni ewoɔ yɛ etade shishi lɛ hu. Shi etade ni ewoɔ yɛ etade shishi lɛ bɛ tsamɔhe, ejaakɛ alo kɛjɛ ŋwɛi kɛyi shi.
24 No hewɔ lɛ, amɛkɛɛkɛɛ amɛhe akɛ: “Nyɛkahãa wɔgbálaa no mli, shi moŋ nyɛhãa wɔfɔ̃a nɔ oshiki kɛna mɔ nɔ ni ebaatsɔ.”+ Enɛ ba lɛ nakai koni ŋmalɛ lɛ aba mli akɛ: “Amɛjara mitadei lɛ amli amɛhã amɛhe, ni amɛfɔ̃ mitade lɛ nɔ oshiki.”+ No hewɔ lɛ, asraafoi lɛ fee nibii nɛɛ lɛɛlɛŋ.
25 Shi no mli lɛ, Yesu mami+ kɛ emami nyɛmi yoo damɔ Yesu piŋmɔ tso* lɛ he; Maria ni ji Klopa ŋa lɛ kɛ Maria Magdalena.+
26 No hewɔ lɛ, be ni Yesu na emami kɛ kaselɔ ni esumɔɔ lɛ+ lɛ damɔ jɛmɛ lɛ, ekɛɛ emami akɛ: “Yoo, naa! Obinuu nɛ!”
27 No sɛɛ lɛ, ekɛɛ kaselɔ lɛ akɛ: “Naa! Omami nɛ!” Ni kɛjɛ nakai ŋmɛlɛtswaa lɛ nɔ kɛyaa lɛ, kaselɔ lɛ kɛ lɛ tee lɛ diɛŋtsɛ eshĩa.
28 Enɛ sɛɛ lɛ, be ni Yesu na akɛ agbe nibii fɛɛ naa lɛ, bɔ ni afee ni ŋmalɛ lɛ aba mli lɛ, ekɛɛ akɛ: “Kumai miiye mi.”+
29 No mli lɛ, gbɛ́ ko ma jɛmɛ ni wain ni joɔ eyi lɛ obɔ. No hewɔ lɛ, amɛkɛ kotsa ni wain ni joɔ efɔ lɛ tsɔɔ ma hisopo* tso naa ni amɛwó nɔ kɛto enaa.+
30 Be ni Yesu he wain ni joɔ lɛ, ekɛɛ akɛ: “Agbe naa!”+ ni ema eyi shi, ni ekɛ emumɔ hã.*+
31 Akɛni Hesaamɔkɛtoo Gbi ni hewɔ lɛ,+ Yudafoi lɛ bi Pilato koni ehã akumɔ amɛnaji ni ajie gbohii lɛ kɛya, koni gbohii lɛ akahi piŋmɔ tsei lɛ anɔ+ yɛ Hejɔɔmɔ Gbi lɛ nɔ, (ejaakɛ nakai Hejɔɔmɔ Gbi lɛ, Hejɔɔmɔ Gbi wulu ni).+
32 No hewɔ lɛ, asraafoi lɛ ba, ni amɛbakumɔ mɛi ni yɔɔ tsei jaŋŋi anɔ yɛ emasɛi lɛ anaji, klɛŋklɛŋ mɔ lɛ kɛ mɔ kroko lɛ fɛɛ.
33 Shi be ni amɛshɛ Yesu nɔ lɛ, amɛna akɛ egbo momo, no hewɔ lɛ, amɛkumɔɔɔ enaji.
34 Shi asraafoi lɛ ateŋ mɔ kome kɛ akpɔlɔ tsu eŋmawuiaŋ,+ ni amrɔ lɛ lá kɛ nu je mli ho.
35 Ni mɔ ni na lɛ, lɛ eye he odase nɛɛ, ni edase lɛ, anɔkwale ni, ni ele akɛ nɔ ni ewieɔ lɛ anɔkwale ni, koni nyɛ hu nyɛhe nyɛye.+
36 Anɔkwa, nibii nɛɛ ba koni ŋmalɛ lɛ aba mli akɛ: “Akuŋ* ewu ko.”+
37 Ni ŋmalɛ kroko hu kɛɛ akɛ: “Amɛbaakwɛ mɔ ni amɛtsu lɛ nɔ lɛ.”+
38 Agbɛnɛ, nibii nɛɛ asɛɛ lɛ, Yosef ni jɛ Arimatia, ni ji Yesu kaselɔ, shi Yudafoi lɛ agbeyeishemɔ hewɔ lɛ, ejieee ehe shi+ lɛ yabi Pilato kɛji ebaanyɛ ewó Yesu gbonyo lɛ kɛya, ni Pilato ŋmɛ lɛ gbɛ. No hewɔ lɛ, eba ebawó gbonyo lɛ kɛtee.+
39 Nikodemo,+ mɔ ni tsutsu ko lɛ eba Yesu ŋɔɔ nyɔɔŋ lɛ hu ba, ni ekɛ mire kɛ aloe ni afutu* aaafee nsɛnii tɛi oha* ba.+
40 No hewɔ lɛ, amɛwó Yesu gbonyo lɛ, ni amɛkɛ klalai ni tsofai ni jeɔ ŋma lɛ yɔɔ mli lɛ bala lɛ,+ tamɔ bɔ ni Yudafoi lɛ feɔ kɛfuɔ mɔ yɛ kusum naa lɛ.
41 Shi he ni agbe lɛ* yɛ lɛ, abɔɔ ko yɛ jɛmɛ, ni gbonyobu* hee+ ko ni akɛ mɔ ko efɔ̃ko mli dã yɛ abɔɔ lɛ mli.
42 Akɛni Yudafoi lɛ a-Hesaamɔkɛtoo gbi ni,+ ni gbonyobu lɛ bɛŋkɛ hewɔ lɛ, amɛkɛ Yesu yafɔ̃ jɛmɛ.
Shishigbɛ Niŋmaa
^ Loo “Yijiemɔ ahã bo.”
^ Loo “Gbee lɛ yɛ tso jaŋŋ lɛ nɔ! Gbee lɛ yɛ tso jaŋŋ lɛ nɔ!”
^ Loo “nyɛyagbea lɛ yɛ tso jaŋŋ lɛ nɔ.”
^ Loo “migbeɔ bo yɛ tso jaŋŋ lɛ nɔ.”
^ Loo “eete shi eewo.”
^ Ni ji, aaafee shwane ŋmɛlɛ 12.
^ Loo “Gbee lɛ yɛ tso jaŋŋ lɛ nɔ!”
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Loo “ni egbo.”
^ Loo “Ajwaraŋ.”
^ Shishitsɔɔmɔi komɛi kɛɔ akɛ, “ni afi.”
^ Ni ji, Roma nsɛnii tɛi. Aaafee kilogram 32.7. Kwɛmɔ Saji Krokomɛi B14 lɛ.
^ Loo “agbe lɛ yɛ tso jaŋŋ lɛ nɔ.”
^ Loo “gbonyo kaimɔ bu.”
