Nɔ Ni Yohane Ŋma 20:1-31
20 Otsi lɛ mli klɛŋklɛŋ gbi lɛ nɔ lɛ, Maria Magdalena ba gbonyobu* lɛ naa leebi maŋkpa,+ be ni duŋ ewo lolo, ni ena akɛ ajie tɛ lɛ yɛ gbonyobu* lɛ naa momo.+
2 No hewɔ lɛ, ejo foi ni eba Simon Petro kɛ kaselɔ kroko lɛ, mɔ ni Yesu sumɔɔ esane+ lɛ ŋɔɔ, ni ekɛɛ amɛ akɛ: “Amɛjie Nuŋtsɔ lɛ kɛje gbonyobu lɛ mli,+ ni wɔleee he ni amɛkɛ lɛ eyafɔ̃.”
3 Kɛkɛ ni Petro kɛ kaselɔ kroko lɛ yi mli akɛ amɛmiiya gbonyobu lɛ he.
4 Amɛyi enyɔ lɛ fɛɛ amɛwo foi, shi kaselɔ kroko lɛ he fee oya fe Petro ni eyashɛ gbonyobu lɛ naa klɛŋklɛŋ.
5 Be ni edɔ emli ekwɛ mli lɛ, ena klalai lɛ jwere jɛmɛ,+ shi eboteee mli.
6 Kɛkɛ ni Simon Petro hu nyiɛ esɛɛ kɛba, ni ebabote gbonyobu lɛ mli. Ni ena klalai lɛ jwere jɛmɛ.
7 Mama ni akɛfi eyitso lɛ kãaa mamai krokomɛi ni akɛbala lɛ lɛ amasɛi, shi moŋ akota ni ekã he kroko banee.
8 Kɛkɛ ni kaselɔ kroko ni yashɛ gbonyobu lɛ naa klɛŋklɛŋ lɛ hu bote mli, ni ena, ni ehe eye.
9 Shi no mli lɛ, amɛnuko ŋmalɛ lɛ shishi akɛ esa akɛ ete shi kɛjɛ gbohii ateŋ.+
10 No hewɔ lɛ, kaselɔi lɛ ku amɛsɛɛ kɛtee amɛshĩai.
11 Shi Maria tee nɔ edamɔ gbonyobu lɛ masɛi, ni eefó. Be ni efóɔ lɛ, edɔ emli ekwɛ gbonyobu lɛ mli,
12 ni ena ŋwɛibɔfoi enyɔ+ ni wo atadei yɛji tara shi yɛ he ni akɛ Yesu gbonyo lɛ fɔ̃ lɛ, mɔ kome yɛ yitsogbɛ, ni mɔ kome hu yɛ najiashigbɛ.
13 Ni amɛkɛɛ lɛ akɛ: “Yoo, mɛni hewɔ ofóɔ?” Ekɛɛ amɛ akɛ: “Amɛjie mi-Nuŋtsɔ lɛ kɛtee, ni mileee he ni amɛkɛ lɛ eyafɔ̃.”
14 Be ni ewie enɛ lɛ, etsɔ ehe ni ena Yesu damɔ shi, shi eyɔseee akɛ Yesu ni.+
15 Yesu bi lɛ akɛ: “Yoo, mɛni hewɔ ofóɔ? Namɔ otaoɔ?” Shi lɛ lɛ, esusu akɛ abɔɔ nɔkwɛlɔ lɛ ni, ni ekɛɛ lɛ akɛ: “Onukpa, kɛ́ bo owó lɛ kɛtee lɛ, kɛɛmɔ mi he ni okɛ lɛ eyafɔ̃, ni mayawó lɛ kɛya.”
16 Yesu kɛɛ lɛ akɛ: “Maria!” Be ni Maria tsɔ ehe lɛ, ekɛɛ lɛ yɛ Hebri mli akɛ: “Rabuni!” (eshishi ji “Tsɔɔlɔ!” )
17 Yesu kɛɛ lɛ akɛ: “Kpa mimli mɔmɔ, ejaakɛ mináko makwɔ kɛya Tsɛ lɛ ŋɔɔ. Shi yaa minyɛmimɛi lɛ aŋɔɔ+ ni oyakɛɛ amɛ akɛ, ‘Miikwɔ kɛmiiya mi-Tsɛ+ kɛ nyɛ hu nyɛ-Tsɛ, kɛ mi-Nyɔŋmɔ+ kɛ nyɛ hu nyɛ-Nyɔŋmɔ lɛ ŋɔɔ.’”
18 Maria Magdalena ba ni ebabɔ kaselɔi lɛ amaniɛ akɛ: “Mina Nuŋtsɔ lɛ!” Ni ekɛɛ amɛ nɔ ni Yesu kɛɛ lɛ lɛ.+
19 Agbɛnɛ, nakai gbi lɛ gbɛkɛ, ni ji otsi lɛ mli klɛŋklɛŋ gbi lɛ, be ni Yudafoi lɛ agbeyeishemɔ hewɔ lɛ aŋamɔ he ni kaselɔi lɛ yɔɔ lɛ shinai lɛ, Yesu ba ni ebadamɔ amɛteŋ ni ekɛɛ amɛ akɛ: “Toiŋjɔlɛ ahã nyɛ.”+
20 Be ni ewie enɛ lɛ, ekɛ eniji kɛ eŋmawuiaŋ tsɔɔ amɛ.+ Kɛkɛ ni kaselɔi lɛ ná miishɛɛ waa diɛŋtsɛ akɛ amɛna Nuŋtsɔ lɛ.+
21 Yesu saa ekɛɛ amɛ akɛ: “Toiŋjɔlɛ ahã nyɛ.+ Bɔ ni Tsɛ lɛ tsu mi lɛ,+ nakai nɔŋŋ mi hu mitsuɔ nyɛ nɛɛ.”+
22 Be ni ewie enɛ lɛ, efili kɔɔyɔɔ eshwie amɛnɔ ni ekɛɛ amɛ akɛ: “Nyɛhea mumɔ krɔŋkrɔŋ.+
23 Kɛ́ nyɛkɛ mɛi ahe eshai ke amɛ lɛ, akɛke amɛ; kɛ́ nyɛkɛ mɛi ahe eshai ekeee amɛ lɛ, akɛkeko amɛ.”
24 Shi no mli lɛ, Toma,+ Mɛi Nyɔŋma Kɛ Enyɔ lɛ ateŋ mɔ kome ni atsɛɔ lɛ Hãaji lɛ, fataaa amɛhe be ni Yesu ba lɛ.
25 No hewɔ lɛ, kaselɔi krokomɛi lɛ kɛɛ lɛ akɛ: “Wɔna Nuŋtsɔ lɛ!” Shi ekɛɛ amɛ akɛ: “Kɛ́ minaaa plɛkoobii lɛ anaa yɛ edɛŋ ni mikɛ miwao wooo plɛkoobii lɛ anaa, ni mikɛ minine wooo eŋmawuiaŋ lɛ,+ miheŋ miyeŋ kɔkɔɔkɔ.”
26 Enɔ gbii kpaanyɔ sɛɛ lɛ, ekaselɔi lɛ yɛ tsũ mli ekoŋŋ, ni Toma fata amɛhe. Eyɛ mli akɛ aŋamɔ shinai lɛ moŋ, shi Yesu ba, ni ebadamɔ amɛteŋ ni ekɛɛ: “Toiŋjɔlɛ ahã nyɛ.”+
27 No sɛɛ lɛ, ekɛɛ Toma akɛ: “Okɛ owao awo biɛ, ni okwɛ midɛ̃, ni okɛ onine awo miŋmawuiaŋ, ni okpa ŋwanejee lɛ,* shi moŋ hemɔ oye.”
28 Toma hã lɛ hetoo akɛ: “Mi-Nuŋtsɔ kɛ mi-Nyɔŋmɔ!”
29 Yesu kɛɛ lɛ akɛ: “Ni ona mi hewɔ lɛ, ohe oye agbɛnɛ? Mɛi ni enaaa shi amɛheɔ amɛyeɔ lɛ yɛ miishɛɛ.”
30 Anɔkwa, Yesu fee okadii krokomɛi babaoo hu yɛ kaselɔi lɛ ahiɛ, ni aŋmalako ashwieko shi yɛ wolokpo* nɛɛ mli.+
31 Shi aŋmala enɛɛmɛi ashwie shi koni nyɛhe nyɛye akɛ Yesu ji Kristo lɛ, Nyɔŋmɔ Bi lɛ, ni akɛni nyɛheɔ nyɛyeɔ hewɔ lɛ, nyɛbaatsɔ egbɛ́i lɛ nɔ nyɛná wala.+
Shishigbɛ Niŋmaa
^ Loo “gbonyo kaimɔ bu.”
^ Loo “gbonyo kaimɔ bu.”
^ Greek sht. ŋm., “ni okpa he ni oheee oyeee lɛ.”
^ Wolo kakadaŋŋ ni akotaa awoɔ tso he.
