1, 2. (a) Ŋmɛnɛ lɛ, mɛɛ naagbai gbɔi kɛkpeɔ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni bɔfo Paulo wo Kristofoi hewalɛ ni amɛfee? Mɛɛ sanebimɔi ahe wɔbaasusu?

NƆ NI fe afii 30 ni eho nɛ lɛ, nuu ko ni jɛ Ghana ni atsɛɔ lɛ Osei lɛ, ^[1] fã kɛtee Yuropa maji lɛ eko nɔ. No mli lɛ jeee Odasefonyo ji lɛ. Ewie bɔ ni enu he ehã be ni eyashɛ jɛmɛ lɛ he akɛ: “Eyeee be ko ni miyɔse akɛ, mɛi pii bɛ mihe dekã. Fɛ̃i hu ye mi waa. Be ni mije kpo kɛjɛ kɔɔyɔŋ lɛji adaamɔhe lɛ, ni fɛ̃i lɛ bɔi mi yeli lɛ, mijwa yaafo. Kɛjɛ be ni afɔ mi lɛ, fɛ̃i yeko mi nakai dã.” Afi kɛ sɛɛ ni Osei náaa nitsumɔ kpakpa ko etsu, ejaakɛ enuuu amɛwiemɔ lɛ jogbaŋŋ. Ehe fee shoo, ni ehiɛ tse shĩa waa.

² Eji bo ji Osei kulɛ, te obaasumɔ ni mɛi kɛ bo aye ahã tɛŋŋ? Ekɔɔɔ he eko maŋ nɔ ni ojɛ loo ohewolonɔ su lɛ, obaasumɔ ni mɛi ahere bo hiɛmɛɛ kɛ́ otee Maŋtsɛyeli Asa lɛ nɔ. Biblia lɛ woɔ anɔkwa Kristofoi hewalɛ ni amɛya nɔ ‘amɛjie mlihilɛ kpo amɛtsɔɔ gbɔi.’ (Heb. 13:2, sh. niŋ.) No hewɔ lɛ, nyɛhãa wɔsusua sanebimɔi ni nyiɛ sɛɛ nɛɛ ahe: Te Yehowa naa gbɔi ehãa tɛŋŋ?  Mɛni hewɔ ekolɛ ehe baahia ni wɔtsake jwɛŋmɔ ni wɔhiɛ yɛ gbɔi ahe lɛ? Kɛ́ nyɛmimɛi ni yɔɔ wɔsafo lɛ mli lɛ ateŋ mɛi komɛi jɛ maji krokomɛi anɔ lɛ, mɛni wɔbaanyɛ wɔfee kɛye wɔbua amɛ koni amɛhiɛ amɛ?

3, 4. Yɛ nɔ ni aŋma yɛ 2 Mose 23:9 lɛ naa lɛ, te Nyɔŋmɔ kɛɛ Israelbii lɛ akɛ amɛkɛ gbɔi aye ahã tɛŋŋ? Ni mɛni hewɔ?

³ Mlai komɛi ni Yehowa kɛhã ewebii lɛ be ni ekpɔ̃ amɛ kɛje Ejipt lɛ hã amɛna akɛ, esa akɛ amɛjie mlihilɛ kpo amɛtsɔɔ gbɔi ni ebafata amɛhe lɛ. (2 Mose 12:38, 49; 22:21) Yehowa le akɛ, jeee be fɛɛ be gbɔi ni ebaje ewebii lɛ ateŋ lɛ baaná shihilɛ mlɛo, no hewɔ lɛ, ejɛ suɔmɔ mli eto gbɛjianɔ ehã amɛ. Akɛ nɔkwɛmɔnɔ lɛ, ewo mla akɛ gbɔi baanyɛ aye kpɛkpɛo yɛ mɛi aŋmɔshi.​—3 Mose 19:9, 10.

⁴ Akɛni Yehowa miisumɔ ni Israelbii lɛ ajɛ amɛtsuiŋ amɛjie bulɛ kpo amɛtsɔɔ gbɔi hewɔ lɛ, ekɛɛ amɛ ni amɛkai bɔ ni amɛnu he amɛhã be ni amɛ hu amɛji gbɔi lɛ. (Kanemɔ 2 Mose 23:9.) Akɛni esoro mɛi ni amɛji kɛ Mɔ ni amɛjáa hewɔ lɛ, be ni amɛyaje Ejipt akɛ gbɔi lɛ, Ejiptbii lɛ kɛ amɛ yeee jogbaŋŋ. (1 Mose 43:32; 46:34; 2 Mose 1:11-14) Sɛɛ mli po lɛ, amɛbatsɔmɔ nyɔji. Anɔkwa, amɛnáaa shihilɛ mlɛo kwraa. No hewɔ lɛ, Yehowa kɛɛ amɛ ni amɛkai enɛ, koni no atsirɛ amɛ ni amɛjie mlihilɛ kpo amɛtsɔɔ gbɔi.​—3 Mose 19:33, 34.

5. Mɛni baaye abua wɔ ni wɔjie mlihilɛ kpo wɔtsɔɔ gbɔi taakɛ Yehowa feɔ lɛ?

⁵ Yehowa tsakeko. No hewɔ lɛ, wɔle akɛ, gbɔi ni baa asafoŋ kpeei yɛ wɔ-Maŋtsɛyeli Asa lɛ nɔ lɛ asane kã etsui nɔ waa. (5 Mose 10:17-19; Mal. 3:5, 6) Gbɔi nɛɛ kɛ naagbai pii kpeɔ. Akɛ nɔkwɛmɔnɔ lɛ, amɛteŋ mɛi komɛi nuuu wɔwiemɔ lɛ jogbaŋŋ, aloo mɛi kɛ amɛ yeee jogbaŋŋ. Kɛ́ wɔsusu naagbai nɛɛ kɛ ekrokomɛi ni amɛkɛkpeɔ lɛ ahe lɛ, ebaaye ebua wɔ ni wɔjie mlihilɛ kpo wɔtsɔɔ amɛ ni wɔna nibii ni wɔbaanyɛ wɔfee kɛye wɔbua amɛ.​—1 Pet. 3:8.

6, 7. Mɛni hãa wɔnaa akɛ Kristofoi ni hi shi yɛ klɛŋklɛŋ afii 100 lɛ mli lɛ mia amɛhiɛ amɛye su gbonyo ni Yudafoi lɛ jie lɛ kpo lɛ nɔ?

⁶ Yudafoi ni hi shi yɛ klɛŋklɛŋ afii 100 lɛ mli lɛ ateŋ mɛi pii ehiɛɛɛ mɛi krokomɛi ahe jwɛŋmɔ kpakpa kwraa. Shi Kristofoi ni hi shi yɛ nakai beiaŋ lɛ mia amɛhiɛ amɛye su gbonyo nɛɛ nɔ. Akɛ nɔkwɛmɔnɔ lɛ, yɛ afi 33 Pentekoste gbi lɛ nɔ lɛ, Kristofoi ni yɔɔ Yerusalem lɛ fee mɛi ni jɛ maji krokomɛi anɔ ni batsɔmɔ Kristofoi nakai gbi lɛ gbɔ. (Bɔf. 2:5, 44-47) Amɛkɛ amɛnifeemɔ tsɔɔ akɛ, amɛnuɔ wiemɔ ni ji “gbɔfeemɔ” lɛ shishi jogbaŋŋ.

⁷ Shi naagba ko bate shi. Yudafoi ni wieɔ Hela lɛ wie akɛ aaku hiɛ aashwie amɛyei okulafoi lɛ anɔ. (Bɔf. 6:1) No hewɔ lɛ, bɔfoi lɛ hala hii kpawo, koni amɛkwɛ ni akaku hiɛ ashwie mɔ ko mɔ ko nɔ. Hii ni bɔfoi lɛ hala lɛ fɛɛ hiɛ Hela gbɛ́i, ni eeenyɛ efee akɛ, amɛje gbɛ amɛfee nakai bɔ ni afee ni okulafoi lɛ aná nɔmimaa akɛ, abaatsu sane lɛ he nii jogbaŋŋ.​—Bɔf. 6:2-6.

8, 9. (a) Mɛni baanyɛ ahã wɔna kɛji wɔhiɛ mɛi ni esoro he ni amɛjɛ loo amɛhewolonɔ su lɛ ahe jwɛŋmɔ fɔŋ? (b) Mɛni esa akɛ wɔfã kɛ eshishi kɛje wɔtsui mli? (1 Pet. 1:22)

⁸ Wɔle jio, wɔleee jio lɛ, bɔ ni atsɔse wɔ ahã lɛ náa bɔ ni wɔsusuɔ nii ahe wɔhãa lɛ nɔ hewalɛ waa. (Rom. 12:2) Kɛfata he lɛ, daa nɛɛ wɔnuɔ ni wɔkutsoŋbii, mɛi ni wɔkɛtsuɔ nii, kɛ mɛi ni wɔkɛyaa skul lɛ miiwie nibii gbohii yɛ mɛi ni esoro amɛhewolonɔ su loo he ni amɛjɛ lɛ ahe. Ani nibii gbohii ni mɛi wieɔ nɛɛ kɛ agbɛnɛ hu bɔ ni atsɔse wɔ ahã lɛ ehã wɔná gbɔi ahe jwɛŋmɔ fɔŋ? Kɛ́ mɔ ko wie maŋ nɔ ni wɔjɛ lɛ loo bɔ ni  atsɔse wɔ ahã lɛ he efɔŋ lɛ, te wɔfeɔ wɔnii wɔhãa tɛŋŋ?

⁹ No mli lɛ, bɔfo Petro hiɛ mɛi ni jeee Yudafoi lɛ ahe jwɛŋmɔ gbonyo. Shi fiofio lɛ, enyɛ etsake. (Bɔf. 10:28, 34, 35; Gal. 2:11-14) Wɔ hu, kɛ́ wɔna akɛ wɔyɛ mɛi krokomɛi ahe jwɛŋmɔ fɔŋ fioo ko po lɛ, esa akɛ wɔmia wɔhiɛ waa ni wɔfã kɛ eshishi kɛje wɔtsui mli. (Kanemɔ 1 Petro 1:22.) Mɛni baaye abua wɔ ni wɔnyɛ wɔfee nakai? Esa akɛ wɔhã ehi wɔjwɛŋmɔŋ be fɛɛ be akɛ, ekɔɔɔ he eko maŋ nɔ ni wɔjɛ lɛ, wɔ fɛɛ wɔyeee emuu, ni no hewɔ lɛ, wɔteŋ mɔ ko mɔ ko bɛ ni sa yiwalaheremɔ. (Rom. 3:9, 10, 21-24) No hewɔ lɛ, mɛni hewɔ esa akɛ wɔnu he akɛ wɔhi fe mɛi krokomɛi? (1 Kor. 4:7) Esa akɛ wɔnu he taakɛ bɔfo Paulo nu he lɛ. Ekɛɛ enyɛmimɛi Kristofoi ni afɔ amɛ mu lɛ akɛ, “jeee gbɔi kɛ maŋsɛɛbii” ji amɛ dɔŋŋ, moŋ lɛ, “Nyɔŋmɔ shĩa lɛ mli bii” ji amɛ. (Efe. 2:19) Kɛ́ wɔmia wɔhiɛ wɔjie susumɔi ni ejaaa ni wɔhiɛ yɛ mɛi ahe lɛ kɛje wɔtsui mli lɛ, ebaaye ebua wɔ ni wɔnyɛ wɔwo subaŋ hee lɛ.​—Kol. 3:10, 11.

10, 11. Mɛɛ gbɛ nɔ bɔ ni Boaz kɛ Rut ye ehã lɛ hãa wɔnaa akɛ ekase Yehowa ni ená jwɛŋmɔ ni ja yɛ gbɔi ahe?

¹⁰ Bɔ ni Boaz kɛ Rut, Moabnyo lɛ ye ehã lɛ tsɔɔ akɛ ekase Yehowa, ni ená jwɛŋmɔ ni ja yɛ gbɔi ahe. Be ni eba ni ebakwɛ bɔ ni nikpamɔ lɛ yaa lɛ ehãa yɛ eŋmɔ lɛ mli lɛ, ena Rut ni eeye kpɛkpɛo. Yɛ Mose Mla lɛ naa lɛ, Rut yɛ hegbɛ akɛ efeɔ nakai, ní ebiii mɔ ko mɔ ko. Shi be ni eba Boaz ŋmɔ lɛ mli lɛ, ebi gbɛ dani ebɔi kpɛkpɛo lɛ yeli. Be ni agba Boaz enɛ lɛ, eta etsuiŋ waa ni eŋmɛ Rut gbɛ ni eye kpɛkpɛo yɛ akoko kei ni abua naa lɛ po ateŋ.​—Kanemɔ Rut 2:5-7, 15, 16.

¹¹ Bɔ ni Boaz kɛ Rut ye ehã yɛ no sɛɛ lɛ hãa wɔnaa akɛ, ele naagbai ni gbɔi kɛkpeɔ, ni eshwe akɛ eye ebua Rut. Ewo lɛ ŋaa ni ekɛ eblayei lɛ abɔ koni hii ni tsuɔ nii yɛ eŋmɔ lɛ mli lɛ akagba enaa. Agbɛnɛ hu, eto niyenii kɛ nu he gbɛjianɔ ehã lɛ, taakɛ efee ehã mɛi ni tsuɔ nii amɛhãa lɛ lɛ. Kɛfata he lɛ, eyɛ mli akɛ Rut jɛ maŋsɛɛ ni ohiafo ji lɛ moŋ, shi Boaz kɛ lɛ ewieee tamɔ nɔ ni ebɛ nɔ ko mli, moŋ lɛ, ewo lɛ hewalɛ.​—Rut 2:8-10, 13, 14.

12. Kɛ́ wɔjie mlihilɛ kpo wɔtsɔɔ gbɔi lɛ, mɛɛ gbɛ nɔ ebaanyɛ ená amɛnɔ hewalɛ?

¹² Boaz jie mlihilɛ kpo etsɔɔ Rut yɛ suɔmɔ ni tsakeee ni ejie lɛ kpo etsɔɔ eshaayoo Naomi lɛ hewɔ. Shi nɔ kroko hu ni kanya lɛ ni efee nakai ji akɛ, Rut batsɔ Yehowa tsulɔ. Bɔ ni Boaz kɛ Rut ye ehã lɛ, nakai pɛpɛɛpɛ Yehowa kpaa gbɛ akɛ akɛ mɛi fɛɛ ni ‘babaa abo yɛ efiji ashishi’ lɛ baaye ahã. (Rut 2:12, 20; Abɛi 19:17) Ŋmɛnɛ lɛ, kɛ́ wɔ hu wɔjie mlihilɛ kpo wɔtsɔɔ mɛi lɛ, wɔbaanyɛ wɔye wɔbua “gbɔmɛi srɔtoi fɛɛ” ni amɛbale anɔkwale lɛ, ni amɛna akɛ Yehowa sumɔɔ amɛ waa.​—1 Tim. 2:3, 4.

13, 14. (a) Mɛni hewɔ esa akɛ wɔbɔ mɔdɛŋ wɔŋa gbɔi ni baa wɔ-Maŋtsɛyeli Asa lɛ nɔ lɛ? (b) Kɛ́ ewa kɛhã bo akɛ okɛ mɛi ni jɛ hei krokomɛi lɛ baagba sane lɛ, mɛni obaanyɛ ofee?

¹³ Gbɛ kome ni wɔbaanyɛ wɔtsɔ nɔ wɔjie mlihilɛ kpo wɔtsɔɔ gbɔi ni baa Maŋtsɛyeli Asa lɛ nɔ lɛ ji, ni wɔbaaŋa amɛ ni wɔhere amɛ atuu. Ekolɛ wɔyɔse akɛ, bei komɛi lɛ gbɔi ahiɛ gboɔ ni amɛmiisumɔ ni amɛta amɛhe ko diŋŋ. Amɛteŋ mɛi komɛi yɛ ni hei ni amɛdara yɛ lɛ hewɔ lɛ, amɛnuɔ he akɛ mɛi ni jɛ maji krokomɛi anɔ, loo amɛhiɛ hewolonɔ su kroko lɛ hi fe amɛ. No hewɔ lɛ, esa akɛ wɔ tsutsu wɔŋa amɛ, wɔjie mlihilɛ kpo wɔtsɔɔ amɛ, ni wɔhã amɛna akɛ amɛsane kã wɔtsui nɔ. Kɛ́ wɔyɛ JW Language lɛ yɛ wɔmaŋ wiemɔ lɛ mli lɛ, wɔbaanyɛ wɔkɛkase ŋamɔi yɛ gbɔi lɛ amaŋ wiemɔ mli.​—Kanemɔ Filipibii 2:3, 4.

¹⁴ Ekolɛ ebaawa ehã wɔ akɛ wɔkɛ mɛi ni jɛ hei krokomɛi lɛ baagba sane. Shi nɔ  kome ni baaye abua wɔ ji, ni wɔbaagba amɛ wɔhe sane fioo. Kɛ́ wɔfee nakai lɛ, ekolɛ wɔbaana akɛ srɔto tsɔ ko bɛ wɔ kɛ amɛ teŋ. Esaaa akɛ wɔhiɛ kpaa nɔ akɛ, he fɛɛ he kɛ nɔ ni amɛbɔɔ he mɔdɛŋ.

15. Mɛni baaye abua wɔ ni wɔnu gbɔi ni yɔɔ wɔteŋ lɛ ashishi?

¹⁵ Kɛ́ wɔmiitao wɔhã gbɔi ahiɛ amɛ yɛ asafo lɛ mli lɛ, wɔbaanyɛ wɔbi wɔhe akɛ, ‘Eji mi mitee maŋ kroko nɔ kulɛ, te masumɔ ni akɛ mi aye ahã tɛŋŋ?’ (Mat. 7:12) Esa akɛ wɔto wɔtsui shi wɔhã gbɔi lɛ be ni amɛbɔɔ mɔdɛŋ ni amɛkase bɔ ni afeɔ nibii ahãa yɛ wɔmaŋ lɛ mli lɛ. Ekolɛ, yɛ shishijee mli lɛ, wɔnuŋ nibii komɛi ni amɛfeɔ lɛ shishi. Shi yɛ nɔ najiaŋ ni wɔbaanyɛ amɛnɔ ni amɛtsake ni amɛfee amɛnii tamɔ wɔ lɛ, mɛni hewɔ wɔ moŋ wɔsaaa wɔjwɛŋmɔ ni wɔkɛ amɛ hi shi bɔ ni amɛyɔɔ lɛ nɔŋŋ?​—Kanemɔ Romabii 15:7, shishigbɛ niŋmaa.

16, 17. (a) Kɛ́ wɔmiitao ni wɔkɛ mɛi ni jɛ maji krokomɛi anɔ lɛ abɔ naanyo lɛ, mɛɛ nibii komɛi wɔbaanyɛ wɔfee? (b) Mɛni wɔbaanyɛ wɔfee kɛye wɔbua gbɔi ni yɔɔ wɔsafoi lɛ amli lɛ?

¹⁶ Kɛ́ wɔhe be kɛkase mɛi ni jɛ maji krokomɛi anɔ lɛ ahe nii lɛ, ekolɛ no baahã efee mlɛo kɛhã wɔ akɛ wɔkɛ amɛ baashara. Wɔbaanyɛ wɔkɛ be ni wɔkɛfeɔ weku jamɔ lɛ eko akase bɔ ni gbɔi ni eba wɔsafo lɛ loo wɔshikpɔŋkuku lɛ mli lɛ hiɔ shi amɛhãa lɛ he nii. Gbɛ kroko ni wɔbaanyɛ wɔtsɔ nɔ wɔkɛ gbɔi ni yɔɔ wɔsafo lɛ mli lɛ abɔ naanyo ji, ni wɔbaafɔ̃ amɛ nine kɛba wɔshĩai amli ni wɔkɛ amɛ aye nii. Yehowa “egbele hemɔkɛyeli shinaa lɛ ehã jeŋmaji lɛ,” no hewɔ lɛ, esa akɛ wɔ hu wɔhere gbɔi ni ebatsɔmɔ “wɔwekumɛi yɛ hemɔkɛyeli lɛ mli” lɛ atuu kɛba wɔshĩai amli.​—Bɔf. 14:27; Gal. 6:10; Hiob 31:32.

¹⁷ Kɛ́ wɔhe be wɔkɛ gbɔi ni eba wɔsafo lɛ mli lɛ kɛ amɛwekui lɛ gba sane lɛ, wɔhiɛ baasɔ amɛ waa. Wɔbaana akɛ, amɛmiimia amɛhiɛ waa amɛmiifee tsakemɔi yɛ  amɛshihilɛ mli koni amɛnyɛ amɛhi wɔmaŋ lɛ mli. Ekolɛ wɔbaayɔse akɛ eetɔ amɛ kɛ wɔmaŋ wiemɔ lɛ kasemɔ, ni no hewɔ lɛ, ehe baahia ni wɔye wɔbua amɛ. Aloo ekolɛ, eetɔ amɛ kɛ wɔɔhe kɛ nitsumɔ taomɔ, ni no hewɔ lɛ, ehe baahia ni wɔtsɔɔ amɛ hei ni kɛ́ amɛtee lɛ, abaaye abua amɛ. Kɛ́ wɔfee nibii ni tamɔ nɛkɛ wɔhã wɔnyɛmimɛi lɛ, wɔye wɔbua amɛ waa.​—Abɛi 3:27.

18. Mɛɛ gbɛ nɔ Rut nɔkwɛmɔnɔ lɛ baanyɛ aye abua gbɔi ni amɛjie bulɛ kpo ni amɛhiɛ asɔ nii?

¹⁸ Esa akɛ mɛi ni eyato gbɔ lɛ hu amia amɛhiɛ amɛfee tsakemɔi yɛ amɛshihilɛ mli. Rut fee nɔkwɛmɔnɔ kpakpa yɛ enɛ gbɛfaŋ. Be ni etee Israel lɛ, ekɛ enifeemɔ tsɔɔ akɛ, eesumɔ ni ehi shi yɛ mlai kɛ gbɛjianɔtoi ni yɔɔ jɛmɛ lɛ naa. No hewɔ lɛ, be ni eyaaye kpɛkpɛo lɛ, ebi gbɛ dã. (Rut 2:7) Ehiɛ sɔ hegbɛ ni ená lɛ, ni efeee enii tamɔ nɔ ni eji ŋmɔtsɛ lɛ sɔ̃ akɛ efee lɛ ejurɔ. Agbɛnɛ hu, eda Boaz shi yɛ mlihilɛ kpo ni ejie etsɔɔ lɛ lɛ hewɔ. (Rut 2:13) Kɛji gbɔi jie sui ni tamɔ nɛkɛ kpo lɛ, ekolɛ no baahã amɛkutsoŋbii lɛ kɛ nyɛmimɛi lɛ abu amɛ.

19. Mɛni hewɔ esa akɛ wɔhere gbɔi ni yɔɔ wɔteŋ lɛ atuu lɛ?

¹⁹ Eŋɔɔ wɔnaa waa akɛ Yehowa ejɛ emlihilɛ kpele lɛ mli ehã gbɔmɛi srɔtoi fɛɛ hegbɛ ni amɛnu sane kpakpa lɛ. Mɛi komɛi yɛ ni amɛnáaa hegbɛ amɛkase Biblia lɛ loo amɛkɛ Yehowa webii lɛ abɔ yɛ maŋ nɔ ni amɛjɛ lɛ. Shi amrɔ nɛɛ, amɛná hegbɛ lɛ, ni amɛkɛ wɔ efee ekome kɛmiisɔmɔ. No hewɔ lɛ, ani esaaa akɛ wɔyeɔ wɔbuaa amɛ koni amɛhiɛ amɛ? Ekolɛ wɔbɛ shika tsɔ, ni nɔ ko tsɔ bɛ ni wɔbaanyɛ wɔfee kɛye wɔbua amɛ. Shi kɛ́ wɔjie mlihilɛ kpo wɔtsɔɔ amɛ lɛ, no baatsɔɔ akɛ wɔmiikase Yehowa, ejaakɛ esumɔɔ gbɔi nɛɛ asane. No hewɔ lɛ, nyɛhãa wɔyaa nɔ ‘wɔkasea Nyɔŋmɔ,’ ni wɔfee nɔ fɛɛ nɔ ni wɔbaanyɛ kɛhere gbɔi ni yɔɔ wɔteŋ lɛ atuu.​—Efe. 5:1, 2.