BIBLIA LƐ JEEE JEŊ SHIKPAMƆ HE WOLO, KƐ̃LƐ, NIBII KOMƐI YƐ NI EWIE HE KWRAA DANI JEŊ SHIKPALƆI NA. NAA NƆKWƐMƆNII FIOO KOMƐI.

Ani je lɛ yɛ shishijee?

Tsutsu ko lɛ, jeŋ shikpalɔi ni ehe gbɛ́i lɛ kɛɛ je lɛ bɛ shishijee. Shi amrɔ nɛɛ, amɛteŋ mɛi pii kpɛlɛɔ nɔ akɛ eyɛ shishijee. Biblia lɛ ewie jeeŋmɔ akɛ, je lɛ yɛ shishijee.​—1 Mose 1:1.

Te shikpɔŋ lɛ yɔɔ hã tɛŋŋ?

Yɛ blema lɛ, mɛi pii susu akɛ shikpɔŋ lɛ yɛ tɛtrɛɛ. Afi 500 kɛmiimɔ afi 400 D.Ŋ.B. lɛ, Greek jeŋ shikpalɔi wie akɛ eyɛ kokloo. Shi no mli lɛ, Biblia ŋmalɔ Yesaia ewie aaafee afii 300 sɔŋŋ kɛtsɔ hiɛ akɛ, shikpɔŋ lɛ yɛ “kokloo.”​—Yesaia 40:22; shishigbɛ niŋmaa.

Ani ŋwɛi ni wɔnaa nɛɛ baanyɛ afite?

Greek jeŋ shikpalɔ ko ni atsɛɔ lɛ Aristotle, ni hi shi yɛ afi 400 kɛmiimɔ afi 300 D.Ŋ.B. lɛ tsɔɔ mɛi akɛ, shikpɔŋ lɛ nɔ pɛ nibii fiteɔ yɛ, shi ŋulamii lɛ kɛ nibii ni yɔɔ ŋwɛi lɛ tsakeŋ, ni amɛfiteŋ kɔkɔɔkɔ. Mɛi hiɛ susumɔ nɛɛ mli afii ohai abɔ. Shi afi 1800 kɛmiimɔ afi 1900 mli lɛ, jeŋ shikpalɔi tsɔɔ akɛ adebɔɔ nibii nyɛɔ amɛfiteɔ. Amɛtsɔɔ mli akɛ, ekɔɔɔ he eko he ni adebɔɔ nɔ ko yɔɔ, ŋwɛi jio, shikpɔŋ jio lɛ, ebaanyɛ efite. Jeŋ shikpalɔi ni hã susumɔ nɛɛ he shi lɛ ateŋ mɔ kome ni atsɛɔ lɛ Lord Kelvin lɛ wie akɛ, Biblia lɛ wieɔ yɛ ŋwɛi kɛ shikpɔŋ lɛ he akɛ: “Amɛbaafite tamɔ atade fiteɔ lɛ.” (Lala 102:25, 26) Kelvin he eye akɛ, Nyɔŋmɔ baanyɛ akpɛ eyiŋ akɛ eŋmɛŋ gbɛ ni nibii ni fiteɔ nɛɛ akpãtã edebɔɔ nibii lɛ ahiɛ, ni nakai pɛpɛɛpɛ Biblia lɛ tsɔɔ.​—Jajelɔ 1:4.

Mɛni hiɛ shibɔlemɔ ŋulamii tamɔ wɔshikpɔŋ lɛ mli?

Aristotle tsɔɔ mɛi akɛ, ŋulamii kɛ shibɔlemɔ ŋulamii fɛɛ ni yɔɔ ŋwɛi lɛ hɔlɔ nibii komɛi ni tamɔ glasei koklobii amli, ni glase lɛ eko hɔ eko mli, ni glase ni shikpɔŋ lɛ hɔ mli lɛ yɛ teŋ tuuntu. Kɛjɛ afi 1700 Ŋ.B. kɛbaa lɛ, jeŋ shikpalɔi na akɛ, etamɔ nɔ ni ŋulamii kɛ shibɔlemɔ ŋulamii lɛ tsotsoro shi yɛ kɔɔyɔɔ lɛ mli. Shi Hiob wolo lɛ ni aŋma aaafee afi 1473 D.Ŋ.B. lɛ wie akɛ, shikpɔŋ lɛ Bɔlɔ lɛ kɛ “shikpɔŋ lɛ etsotsoro shi, ni etsotsorooo nɔ ko nɔ ko nɔ.”​—Hiob 26:7.

BIBLIA LƐ JEEE TSOFAFEEMƆ HE WOLO, SHI HELATSAMƆ HE SAJI NI AKPA SHI ANA LƐ PII YƐ NI EWO ŊAA YƐ HE MOMO.

Helatsɛmɛi ni ahãaa amɛfutu mɛi.

Mose Mla lɛ wie akɛ, akahã mɛi ni miiye kpiti lɛ futu mɛi krokomɛi. Afi 500 kɛmiimɔ afi 1500 Ŋ.B. lɛ, tsɛŋemɔ helai ba waa, ni no hã datrɛfoi na akɛ esaaa akɛ amɛkɛ mɛi ni yeɔ tsɛŋemɔ helai futuɔ mɛi krokomɛi. Kɛbashi ŋmɛnɛ lɛ, akɛ helatsamɔ gbɛ nɛɛ miitsu nii.​—3 Mose, yitso 13 kɛ 14.

Dɛ̃ ni afɔɔ kɛ́ ata gbonyo he.

Be ko ni eho lɛ, kɛ́ datrɛfoi yatsu gbohii ahe nii lɛ, amɛfɔɔɔ amɛdɛ̃, kɛkɛ lɛ, amɛyakwɛ helatsɛmɛi. Enɛ hã mɛi pii gboi. Nifeemɔ nɛɛ tee nɔ aahu kɛyashi aaafee afi 1900 Ŋ.B. Shi Mose Mla lɛ wie akɛ, mɔ fɛɛ mɔ ni baata gbonyo he lɛ, ehe tseee yɛ kusum naa. Ewie po akɛ, kɛ́ mɔ ko yata gbonyo he lɛ, esa akɛ etsuu ehe, ni ekɛ nu afee nakai. Jamɔŋ nifeemɔi nɛɛ hã mɛi ná gbɔmɔtsoŋ hewalɛ kpakpa.​—4 Mose 19:11, 19.

Bɔ ni sa akɛ ato wamɔ he gbɛjianɔ ahã.

Daa afi lɛ, musuŋtsɔmɔ hela gbeɔ gbekɛbii ni fa fe 500,000, ejaakɛ atooo wamɔ he gbɛjianɔ jogbaŋŋ yɛ hei ni amɛteŋ mɛi pii yɔɔ lɛ. Mose Mla lɛ tsɔɔ akɛ, esa akɛ aya niiasɛɛ yɛ he ko ni bɛŋkɛɛɛ gbɔmɛi, ni kɛ́ agbe naa hu lɛ, atsĩ nɔ.​—5 Mose 23:13.

Be ni esa akɛ afo mɔ ketia.

Nyɔŋmɔ Mla lɛ kɛɛ kɛ́ afɔ binuu lɛ, afo lɛ ketia yɛ gbi ni ji kpaanyɔ lɛ nɔ. (3 Mose 12:3) Ana akɛ, kɛ́ afɔ gbekɛ ŋmɔŋ lɛ, otsi sɛɛ dani elá nyɛɔ ewɔɔ. Shi dani jeŋ shikpalɔi baale enɛ lɛ, gbɛtsɔɔmɔ ni nilee yɔɔ mli ni Biblia lɛ kɛhã nɛɛ bu gbekɛbii ahe waa.

Bɔ ni wɔhenumɔi baanyɛ asa wɔgbɔmɔtsoŋ hewalɛnamɔ he.

Mɛi ni taoɔ tsofafeemɔ saji amli kɛ jeŋ shikpalɔi kɛɛ henumɔi kɛ sui kpakpai tamɔ miishɛɛ, hiɛnɔkamɔ, hiɛsɔɔ, kɛ tɔmɔi ni akɛkeɔ lɛ hi kɛhã wɔgbɔmɔtso lɛ. Biblia lɛ kɛɔ akɛ: “Tsui ni yɔɔ miishɛɛ lɛ, eji tsofa kpakpa, shi tsui ni ekumɔ lɛ, egbɔjɔɔ mɔ.”​—Abɛi 17:22.