KƐ́ MƆ KO hefatalɔ je esɛɛ lɛ, eyɛ dɔlɛ waa. Mɛi komɛi yɛ ni kɛ́ amɛhefatalɔi je amɛsɛɛ ni amɛshwa amɛhe lɛ, amɛnyɛɔ amɛkɛkeɔ amɛ ni amɛŋmɛɔ saji ahe. a Shi kɛ́ amɛtsa gbãla lɛ nɔ jio, amɛtsaaa nɔ jio lɛ, mɔ ni atɔ̃ enɔ lɛ nuɔ dɔlɛ he waa lolo. Te mɛi nɛɛ aaafee tɛŋŋ amɛkpee dɔlɛ ni naa wa nɛɛ naa lɛ?

Yɛ dɔlɛ ni naa wa ni mɛi ni hefatalɔi eje amɛsɛɛ lɛ nuɔ he lɛ fɛɛ sɛɛ lɛ, Biblia lɛ eshɛje amɛteŋ mɛi pii amii. Amɛna akɛ Nyɔŋmɔ naa amɛyaafonui lɛ, ni enuɔ he ehãa amɛ.​—Maleaki 2:13-16.

“Kɛ́ tsuiyelii hã mifee gbedee lɛ, oshɛjeɔ mimii ni ohãa mimii shɛɔ mihe.”​—Lala 94:19.

Bill wie akɛ: “Kɛ́ miikane ŋmalɛ nɛɛ, minuɔ he tamɔ nɔ ni Yehowa miishɛje mimii, tamɔ tsɛ ko ni musuŋ tsɔɔ lɛ.”

“Mɔ ni yeɔ anɔkwa lɛ, oyeɔ lɛ anɔkwa.”​—Lala 18:25.

Carmen ni ewu je esɛɛ nyɔji abɔ lɛ wie akɛ: “Miwu yeee mi anɔkwa. Shi manyɛ mikɛ mihiɛ afɔ̃ Yehowa nɔ. Ehãŋ minine anyɛ shi kɔkɔɔkɔ.”

‘Nyɛkayea nyɛtsui yɛ nɔ ko nɔ ko he, shi moŋ yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ni akɛ hiɛdɔɔ kpaa nɔ nyɛhãa Nyɔŋmɔ alea nyɛnibimɔi lɛ; ni Nyɔŋmɔ toiŋjɔlɛ ni fe niiashishinumɔi fɛɛ lɛ baabu nyɛtsuii ahe.’​—Filipibii 4:6, 7.

Yoo ko ni atsɛɔ lɛ Sasha lɛ wie akɛ: “Mitee nɔ mikane ŋmalɛ nɛɛ shii abɔ. Misɔle hu waa, ni Nyɔŋmɔ hã mihe jɔ mi.”

Kulɛ bei komɛi lɛ, mɛi ni atsĩ amɛtã nɛɛ fɛɛ nuɔ he akɛ jeŋ shihilɛ eje amɛtsine. Shi amɛkɛ amɛhiɛ fɔ̃ Yehowa Nyɔŋmɔ nɔ, amɛkase e-Wiemɔ lɛ, ni no waje amɛ. Bill wie akɛ: “Mihemɔkɛyeli lɛ ji nɔ ni hã minyɛ mikpee shihilɛ lɛ naa be ni efee tamɔ nɔ ni nibii fɛɛ efite lɛ. Eyɛ mli akɛ miyanyiɛ ‘jɔɔ voo ni mli ewo duŋ kpii lɛ mli’ be fioo ko moŋ, shi Nyɔŋmɔ shiii mi.”​—Lala 23:4.