Afɔ mi yɛ Ciudad Mante, ni ji maŋ fɛfɛo ko ni yɔɔ Tamaulipas, yɛ Mexico. Maŋ bii lɛ feɔ ejurɔ waa, ni amɛmli hi hu. Shi dɔlɛ sane ji akɛ, awuiyelɔi akui fa yɛ maŋ lɛ mli, ni enɛ hewɔ lɛ, he ni wɔyɔɔ lɛ yɛ oshara waa.

Afɔ wɔ hii sɔŋŋ ejwɛ, ni mi ji enyɔ nɔ. Mifɔlɔi hã asɔle mi awo Katolik jamɔ lɛ mli, ni sɛɛ mli lɛ miyafata kuu ni láa hãa wɔsɔlemɔ lɛ he. Mibɔ mɔdɛŋ akɛ mafee nibii ni baasa Nyɔŋmɔ hiɛ, ejaakɛ miishe gbeyei akɛ kɛ́ mifeee nakai lɛ, abaakojo mi, ni asha mi yɛ hɛl la mli kɛya naanɔ.

Be ni miye afii enumɔ lɛ, mipapa shi wɔ. Enɛ gba minaa waa, ni ehã mitsui kumɔ hu. Minuuu nɔ hewɔ ni eshi wɔ lɛ shishi, ejaakɛ wɔsumɔɔ lɛ waa. Enɛ hã mimami kɛ ŋmɛlɛtswai babaoo tsu nii bɔ ni afee ni enyɛ ekwɛ wɔyi ejwɛ lɛ fɛɛ.

Akɛni mimami fɔɔ wɔ shimɔ hewɔ lɛ, mijoɔ foi yɛ skul mikɛ gbekɛbii ni ye mi onukpa lɛ yabɔɔ. Amɛtsɔɔ mi mɔjɛmɔ, tawa shɛremɔ, juu, kɛ nɔmɔ. Akɛni misumɔɔ akɛ maye mɛi anɔ hewɔ lɛ, mikase atswɛrɛ nɔmɔ, abɔtiri fɔ̃ɔ, bɔ ni akɛ kaklai kɛ tũi nɔɔ, kɛ ekrokomɛi. Mibatsɔ oblanyo ni yeɔ awui waa. Bei pii lɛ, wɔkɛ tũ nɔɔ, ni be ni abaagbe naa lɛ mihe eyi tsɔɔ kɛ lá, kɛkɛ lɛ ashi mi afɔ̃ lɔle gbɛ lɛ he koni magbo. Be fɛɛ be ni mimami baana mi nakai lɛ, ehaoɔ waa, kɛkɛ lɛ ewo mi gidigidi kɛtee helatsamɔhe!

Be ni miye afii 16 lɛ, oblanyo ko ni mikɛ lɛ je nɔ, ni atsɛɔ lɛ Jorge lɛ ba wɔshĩa lɛ. Ekɛɛ wɔ akɛ eji Yehowa Odasefonyo, ni akɛ, eetao ekɛ wɔ agba sane ko ni he hiaa waa. Ebɔi ehemɔkɛyeli lɛ he wiemɔ kɛjɛ Biblia lɛ mli. No mli lɛ, mikaneko Biblia lɛ dã, ni be ni etsɔɔ wɔ Nyɔŋmɔ gbɛ́i kɛ eyiŋtoi lɛ, mimii shɛ mihe waa. Jorge kɛɛ ekɛ wɔ baakase Biblia lɛ, ni wɔkpɛlɛ.

Be ni mibale anɔkwale ni kɔɔ hɛl la lɛ he, akɛ ebɛ Biblia lɛ mli lɛ, mitsui nyɔ mimli waa. (Lala 146:4; Jajelɔ 9:5) Nɔ ni mikase lɛ hã mina Nyɔŋmɔ akɛ ejeee mɔ ko ni yitsoŋ wa. Moŋ lɛ mibana lɛ akɛ Tsɛ ko ni yɔɔ suɔmɔ, ni miisumɔ ni ebii aná miishɛɛ.

Be ni akɛ mi kaseɔ Biblia lɛ, mibayɔse akɛ esa akɛ mafee tsakemɔi komɛi yɛ mishihilɛ mli. Ehe bahia ni makase heshibaa,  ni makpa awuiyeli nifeemɔi lɛ. Ŋaawoo ni yɔɔ 1 Korintobii 15:33 lɛ ye ebua mi. Jɛmɛ kɛɔ akɛ: “Naanyobɔɔ gbonyo fiteɔ sui kpakpai,” loo taakɛ shishigbɛ niŋmaa lɛ tsɔɔ lɛ, ‘efiteɔ jeŋba kpakpai.’ Mina akɛ, dani manyɛ matsake mijeŋba lɛ, ja mikɛ mɛi ni baaa amɛjeŋ jogbaŋŋ ni baanyɛ aná minɔ hewalɛ gbonyo lɛ ekpa bɔɔ. No hewɔ lɛ, mikɛ mitsutsu nanemɛi lɛ kpa bɔɔ, ni mikɛ nanemɛi kpakpai ni yɔɔ Kristofoi asafo lɛ mli​—jeee mɛi ni kɛ atswɛrɛ loo awuiyeli saa bei, shi moŋ amɛkɛ Biblia mli shishitoo mlai feɔ nakai lɛ, bɔi bɔɔ.

Ŋmalɛ kroko ni ná minɔ hewalɛ waa ji Romabii 12:17-19 lɛ. Jɛmɛ kɛɔ akɛ: “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ. . . . Kɛ́ aaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ. . . . Nyɛkatɔa nyɛ diɛŋtsɛ nyɛhe owele, . . . ejaakɛ aŋma akɛ: ‘“Minɔ ji oweletɔɔ lɛ; mi mato najiaŋ,” Yehowa kɛɛ.’” Mibanu shishi akɛ, Yehowa diɛŋtsɛ baatsu jalɛsane ni ayeee ni yaa nɔ lɛ he nii yɛ be ni sa mli. Fiofio lɛ, mikpa awuiyeli nifeemɔi lɛ.

Gbi gbɛkɛ ko be ni mijɛ he ko kɛmiiya shĩa lɛ, nɔ ko ba ní mihiɛ kpaŋ nɔ kɔkɔɔkɔ. Oblahii komɛi ni jɛ kuu ko ni kɛ kuu ni miyɔɔ mli tsutsu lɛ yeee kwraa lɛ batutua mi, ni amɛhiɛnyiɛlɔ lɛ mã misɛɛ atswɛrɛ, ni ebo ewo mi akɛ, “Fã ohe wɔkwɛ!” Nɔŋŋ kɛkɛ ni misɔle kuku, ni mikɛɛ Yehowa koni eye ebua mi ni manyɛ makpee naa. Eyɛ mli akɛ minu he waa yɛ mimli akɛ mito amɛ najiaŋ moŋ, shi mibɔ mɔdɛŋ mishi amɛ. Enɔ jetsɛremɔ lɛ, mikɛ amɛhiɛnyiɛlɔ lɛ kpe ní ekome too pɛ enyiɛ. Minu he waa akɛ mito lɛ najiaŋ, shi shi kome ekoŋŋ lɛ, misɔle yɛ miyitsoŋ, ni mikpa Yehowa fai koni eye ebua mi ni manyɛ maye mihe nɔ. Shi oblanyo lɛ ba miŋɔɔ tɛ̃ɛ ni ebakɛɛ mi akɛ: “Okɛ nɔ ni mifee bo nyɛgbɛkɛ lɛ ake mi. Ole, miitao matsɔ tamɔ bo. Miitao makase Biblia lɛ.” Enɛ hã minaa kpɛ mihe waa. Miná miishɛɛ waa akɛ minyɛ miye mihe nɔ! Enɛ hã mikɛ lɛ bɔi Biblia lɛ kasemɔ.

Dɔlɛ sane ji akɛ, mimami kɛ minyɛmimɛi lɛ kpa Biblia lɛ kasemɔ. Shi mikpɛ miyiŋ akɛ matsa Biblia lɛ kasemɔ nɔ, ni mihaŋ mɔ ko mɔ ko loo nɔ ko nɔ ko atsĩ minaa. Mile akɛ kɛ́ mitee nɔ mikɛ Nyɔŋmɔ webii lɛ bɔ daa lɛ, ebaahã awerɛho ni miyeɔ yɛ miweku lɛ he lɛ sɛɛ afo, ni maná weku hee. Mitee mihiɛ yɛ Biblia lɛ kasemɔ mli, ni yɛ afi 1991 lɛ, abaptisi mi akɛ Yehowa Odasefonyo.

Kulɛ mi ji mɔ ko ni bɛ miishɛɛ, ni sumɔɔ akɛ eye mɛi anɔ, ni yeɔ awui. Shi Biblia lɛ etsake mi kwraa. Amrɔ nɛɛ lɛ, migbaa mɛi toiŋjɔlɛ he sane ni yɔɔ Biblia lɛ mli lɛ. Afii 23 sɔŋŋ nɛ ní miisɔmɔ akɛ shiɛlɔ ni kɛ be babaoo tsɔɔ mɛi Nyɔŋmɔ Maŋtsɛyeli lɛ he sane.

Miyaye mibua fioo kɛtsu nii yɛ Yehowa Odasefoi anitsumɔhe nine ni yɔɔ Mexico lɛ. Be ni mitsuɔ nii yɛ jɛmɛ lɛ, mikɛ Kristofonyo oblayoo ko ni hiɛ wa, ni tsuɔ nii waa, ni atsɛɔ lɛ Claudia lɛ kpe, ni yɛ afi 1999 lɛ, wɔbote gbalashihilɛ mli. Midaa Yehowa shi waa akɛ ekɛ hefatalɔ ni yeɔ anɔkwa nɛɛ duro mi!

Mi kɛ lɛ fɛɛ sɔmɔ yɛ Mexico Mumui Awiemɔ asafo ko mli, ni wɔtsɔɔ mumui babaoo Yehowa he nii. Sɛɛ mli lɛ, afɔ̃ wɔ nine kɛtee Belize koni wɔkɛ mɛi ni yɔɔ jɛmɛ lɛ ayakase Biblia lɛ. Eyɛ mli akɛ wɔbɛ nii tsɔ̃ yɛ Belize moŋ, shi wɔyɛ nɔ fɛɛ nɔ ni baahã wɔná miishɛɛ. Wɔhaŋ nɔ ko nɔ ko afite nakai miishɛɛ lɛ.

Sɛɛ mli lɛ mimami bɔi Biblia lɛ kasemɔ ekoŋŋ, ni abaptisi lɛ. Amrɔ nɛɛ lɛ, minyɛmi nukpa lɛ, eŋa, kɛ amɛbii etɛ lɛ fɛɛ ebatsɔmɔ Yehowa Odasefoi. Agbɛnɛ hu lɛ, mitsutsu nanemɛi ni mishiɛ mihã amɛ lɛ ekomɛi ebatsɔmɔ Yehowa Odasefoi.

Dɔlɛ sane ji akɛ, miweku lɛ mli bii lɛ ateŋ mɛi komɛi egboi, akɛni amɛtsakeee amɛtsui ni shaa amɛ oya lɛ hewɔ. Eji mitsakeee kulɛ, be nɛ ekolɛ mi hu migbo. Midaa Yehowa shi akɛ ehã mitsɔ enaanyo, ni mibafata etsuji ni baa amɛhe shi ni jɛ mlihilɛ mli amɛtsɔɔ mi bɔ ni ahiɔ shi yɛ Biblia mli shishitoo mlai anaa lɛ ahe.