“Nyɛkɛ Gbɔmɛi Fɛɛ Ahia Shi Yɛ Hejɔlɛ Mli”
“Nyɛkɛ Gbɔmɛi Fɛɛ Ahia Shi Yɛ Hejɔlɛ Mli”
“Kɛ aaaho lɛ nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.”—ROM. 12:18.
1, 2. (a) Mɛɛ kɔkɔ Yesu bɔ esɛɛnyiɛlɔi lɛ? (b) Nɛgbɛ wɔbaanyɛ wɔná bɔ ni esa akɛ wɔfee wɔnii wɔha kɛ́ ate shi awo wɔ lɛ he ŋaawoo yɛ?
YESU bɔ esɛɛnyiɛlɔi lɛ kɔkɔ akɛ jeŋmaji lɛ baate shi awo amɛ, ni yɛ gbi gbɛkɛ ní enɔ jetsɛremɔ lɛ abaagbe lɛ lɛ, etsɔɔ amɛ nɔ hewɔ ni abaate shi awo amɛ lɛ. Ekɛɛ ebɔfoi lɛ akɛ: ‘Eji je lɛŋ nyɛjɛ kulɛ, je lɛ aaasumɔ lɛ diɛŋtsɛ emɛi, shi akɛni nyɛjɛɛɛ je lɛŋ, shi mi moŋ mihala nyɛ kɛjɛ je lɛŋ lɛ, no hewɔ je lɛ nyɛɔ nyɛ lɛ.’—Yoh. 15:19.
2 Yesu wiemɔi lɛ ba mli anɔkwale yɛ bɔfo Paulo gbɛfaŋ. Paulo kɛɛ enaanyo oblanyo fioo Timoteo yɛ wolo ni ji enyɔ ni eŋma eyaha lɛ lɛ mli akɛ: “Onyiɛ misɛɛ yɛ mitsɔɔmɔ, mijeŋba, miyiŋtoo, mihemɔkɛyeli, mitsuishitoo, misuɔmɔ, mitsuishiŋmɛɛ, miyiwalɛi, mimanehului . . . lɛ amli.” Paulo kɛfata he akɛ: “Mɛi fɛɛ hu ni taoɔ akɛ amɛaahi shi yɛ Nyɔŋmɔ-jamɔ naa yɛ Kristo Yesu mli lɛ, aaawa amɛyi.” (2 Tim. 3:10-12) Paulo kɛ ŋaawoo kpakpa ha Kristofoi ni yɔɔ Roma lɛ yɛ wolo ni eŋma eyaha amɛ lɛ, yitso 12 lɛ mli, ni etsɔɔ bɔ ni esa akɛ amɛfee amɛnii amɛha kɛ́ ate shi awo amɛ. Ewiemɔi lɛ baanyɛ atsɔɔ wɔ gbɛ yɛ naagbee be nɛɛ mli.
“Nyɛjwɛŋa Nɔ ni Yɔɔ Fɛo Nɔ”
3, 4. Mɛɛ gbɛ nɔ wɔɔtsɔ wɔkɛ ŋaawoo ni yɔɔ Romabii 12:17 lɛ atsu nii (a) yɛ wekui ni amɛmli bii lɛ ateŋ mɛi komɛi jaaa Yehowa lɛ amli? (b) yɛ bɔ ni wɔkɛ wɔkutsoŋbii lɛ yeɔ haa lɛ mli?
3 Nyɛkanea Romabii 12:17. Paulo tsɔɔ akɛ kɛ́ mɛi fee wɔ efɔŋ lɛ, esaaa akɛ wɔtoɔ amɛ najiaŋ. Ehe miihia waa ni akɛ eŋaawoo lɛ atsu nii yɛ wekui ni amɛmli bii lɛ ateŋ mɛi komɛi jaaa Yehowa lɛ amli. Esa akɛ Kristofonyo ni ebote gbalashihilɛ mli lɛ amia ehiɛ ní ekadãi jɛmɔ ni ehefatalɔ ní jeee Kristofonyo lɛ jɛɔ lɛ lɛ sɛɛ, ní ekafee lɛ efɔŋ eto efɔŋ najiaŋ. Kɛ́ ‘aŋɔ efɔŋ ato efɔŋ najiaŋ’ lɛ, nɔ̃ kpakpa ko kwraa jɛɛɛ mli kɛbaaa. Yɛ no najiaŋ lɛ, ebaaha shihilɛ lɛ mli awo wu moŋ.
4 Paulo tsɔɔ gbɛ kpakpa ni esa akɛ atsɔ nɔ atsu shihilɛ nɛɛ he nii. Ekɛɛ akɛ: “Nyɛjwɛŋa nɔ ni yɔɔ fɛo nɔ nyɛtoa yɛ gbɔmɛi fɛɛ hiɛ.” Kɛ́ wu ni jeee héyelilɔ lɛ gbe eŋa ni ji héyelilɔ lɛ jamɔ he guɔ shi ŋa lɛ tee nɔ ejie mlihilɛ diɛŋtsɛ kpo etsɔɔ lɛ lɛ, ekolɛ no baatsi béi naa. (Abɛi 31:12) Nuu ko te shi wo eŋa waa. Amɛbi nuu ko ni atsɛɔ lɛ Carlos ní amrɔ nɛɛ eesɔmɔ yɛ Betel lɛ tsɔɔ akɛ emami tsɔ mlihilɛ kɛ shĩa ni ekwɛ jogbaŋŋ lɛ nɔ eye shiteekɛwoo lɛ nɔ. “Awo wo wɔ hewalɛ ní wɔjie bulɛ kpo wɔtsɔɔ wɔpapa daa. Awo sumɔɔ ni mikɛ mipapa ashwɛ Frɛntsibii ashwɛmɔ ko koni wɔkɛjie wɔhiɛtserɛ, eyɛ mli moŋ akɛ minyaaa nakai shwɛmɔ lɛ he. Shi kɛ́ mifee nakai lɛ ehaa mipapa náa miishɛɛ.” Yɛ naagbee lɛ ebabɔi Biblia lɛ kasemɔ ni abaptisi lɛ. Akɛni Yehowa Odasefoi ‘jwɛŋɔ nɔ ni yɔɔ fɛo nɔ amɛtoɔ yɛ gbɔmɛi fɛɛ hiɛ’ hewɔ lɛ, bei pii kɛ́ adebɔɔ naa oshara ko ba lɛ, amɛyeɔ amɛbuaa amɛkutsoŋbii lɛ, ni no haa amɛjieɔ Odasefoi lɛ ahe jwɛŋmɔ fɔŋ ni amɛyɔɔ lɛ.
Esa akɛ Wɔkɛ “Ŋai kɛ La” Asere Shiteekɛwoo
5, 6. (a) Kɛ́ akɛɛ abua “ŋai kɛ la” naa ashwie henyɛlɔ ko yiteŋ lɛ, mɛni ji eshishi? (b) Gbaa niiashikpamɔ ko ni ba yɛ maŋ nɛɛ mli ní tsɔɔ akɛ kɛ́ wɔkɛ ŋaawoo ni yɔɔ Romabii 12:20 lɛ tsu nii lɛ, ebaanyɛ ewo yibii kpakpai.
5 Nyɛkanea Romabii 12:20. Beni Paulo ŋmaa ŋmalɛ nɛɛ mli wiemɔi lɛ, ekã shi faŋŋ akɛ no mli lɛ eetsɛ́ Abɛi 25:21, 22 lɛ yisɛɛ, ni jɛmɛ kaneɔ akɛ: “Kɛji hɔmɔ miiye ohenyɛlɔ lɛ, ha lɛ aboloo eye, ni kɛji kumai miiye lɛ lɛ, ha lɛ nu enu. Ejaakɛ ŋãi kɛ la naa obuaa oshwieɔ eyiteŋ lɛ, ni Yehowa aaawoo he nyɔmɔ.” Yɛ ŋaa ni Paulo wo yɛ Romabii yitso 12 lɛ mli hewɔ lɛ, ekã shi faŋŋ akɛ Paulo etsɔɔɔ akɛ abua ŋãi kɛ la lɛ naa ashwie shiteekɛwolɔ lɛ yiteŋ koni akɛgbala etoi loo akɛha ehiɛ agbo. Yɛ no najiaŋ lɛ, etamɔ nɔ ni wiemɔi ni yɔɔ abɛ lɛ mli kɛ wiemɔi ni tamɔ nakai nɔŋŋ ni Paulo kɛtsu nii yɛ Romabii awolo lɛ mli lɛ kɔɔ gbɛ ni atsɔɔ nɔ asereɔ dade yɛ blema lɛ he. Woloŋlelɔ ko ni jɛ Britain ni atsɛɔ lɛ Charles Bridges ní hi shi yɛ afi 1800 afii lɛ amli lɛ kɛɛ akɛ: “Akɛ dade ni wa waa lɛ fɔ̃ɔ ŋai kɛ la lɛ nɔ, ni akɛ ŋai kɛ la lɛ eko hu shwieɔ nɔ. Kɛ́ wɔjie tsuishitoo, heshibaa, kɛ suɔmɔ kpo lɛ, esereɔ mɛi ni tsui wa lɛ ateŋ mɛi pii atsui, ni amɛhe jɔɔ.”
6 Kɛ́ wɔjie mlihilɛ kpo lɛ, ebaanyɛ eta shiteekɛwolɔi lɛ atsuiiaŋ, ni ekolɛ ebaasere wɔyi ni amɛwaa lɛ tamɔ bɔ ni “ŋai kɛ la” sereɔ dade lɛ. Mlihilɛ kpo ni Yehowa webii aaajie lɛ baanyɛ aha mɛi aná amɛhe jwɛŋmɔ kpakpa ní amɛbo Biblia mli shɛɛ sane ni amɛshiɛɔ lɛ toi. Bɔfo Petro ŋma akɛ: ‘Nyɛbaa nyɛjeŋ jogbaŋŋ yɛ jeŋmajiaŋbii lɛ ateŋ, koni nɔ̃ mli ni amɛwieɔ nyɛhe yɛ akɛ efɔŋfeelɔi lɛ, nyɛnitsumɔi kpakpai lɛ ni amɛnaa lɛ amɛkɛwo Nyɔŋmɔ hiɛ nyam, yɛ saramɔ gbi lɛ nɔ.’—1 Pet. 2:12.
“Nyɛkɛ Gbɔmɛi Fɛɛ Ahia Shi yɛ Hejɔlɛ Mli”
7. Mɛni ji hejɔlɛ ni Kristo shi eha ekaselɔi lɛ, ni mɛni esa akɛ enɛ atsirɛ wɔ ni wɔfee?
7 Nyɛkanea Romabii 12:18. Yɛ gbi gbɛkɛ dani enɔ jetsɛremɔ lɛ abaagbe Yesu lɛ, ekɛɛ ebɔfoi lɛ akɛ: “Hejɔlɛ mishiɔ maha nyɛ, hejɔlɛ ni ji minɔ lɛ miŋɔhaa nyɛ.” (Yoh. 14:27) Kɛ́ Kristo kaselɔi lɛ nu he akɛ Yehowa Nyɔŋmɔ kɛ esuɔmɔ Bi lɛ sumɔɔ amɛ, ni akɛ amɛkpɛlɛɔ amɛ nɔ hu lɛ, ehaa kaselɔi nɛɛ atsui nyɔɔ amɛmli, ni no ji hejɔlɛ ni Kristo shi eha amɛ lɛ. Esa akɛ wɔtsui ni nyɔɔ wɔ mli nɛɛ atsirɛ wɔ ni wɔkɛ mɛi ahi shi yɛ hejɔlɛ loo toiŋjɔlɛ mli. Anɔkwa Kristofoi sumɔɔ toiŋjɔlɛ ni amɛkpãtãa.—Mat. 5:9.
8. Mɛɛ gbɛ nɔ wɔɔtsɔ wɔtsɔmɔ mɛi ni sumɔɔ toiŋjɔlɛ yɛ wɔweku lɛ kɛ asafo lɛ mli?
8 Gbɛ kome ni wɔɔtsɔ nɔ wɔtsɔɔ akɛ wɔsumɔɔ toiŋjɔlɛ yɛ weku lɛ mli ji ní wɔsaa béi oya nɔŋŋ fe nɔ ni wɔɔŋmɛ gbɛ ni béi lɛ mli awo wu. (Abɛi 15:18; Efe. 4:26) Nakai nɔŋŋ esa akɛ wɔfee yɛ Kristofoi asafo lɛ hu mli. Bɔfo Petro tsɔɔ akɛ tsakpãa yɛ toiŋjɔlɛ sɛɛ ni wɔɔtiu lɛ kɛ wɔlilɛi lɛ mli ni wɔɔmɔ lɛ teŋ. (1 Pet. 3:10, 11) Yakobo hu kɛ ŋaawoo ni yɔɔ shiŋŋ ha kɛtsɔɔ bɔ ni esa ákɛ akɛ lilɛi lɛ atsu nii jogbaŋŋ, ní akwa awuŋayeli kɛ béi, ni no sɛɛ lɛ eŋma akɛ: “Nilee ni jɛ ŋwɛi lɛ, tsutsu lɛ ehe tse, no sɛɛ lɛ ehe jɔ, ehiɛ ka shi, eboɔ toi, eyi obɔ kɛ mɔbɔnalɛ kɛ yibii kpakpai, ejeee ŋwane, efeee osato. Shi jalɛ yibii lɛ, hejɔlɛ mli aduɔ yɛ ahaa mɛi ni feɔ hejɔlɛ nii lɛ.”—Yak. 3:17, 18.
9. Be mli ni wɔbɔɔ mɔdɛŋ koni ‘wɔkɛ gbɔmɛi fɛɛ ahi shi yɛ hejɔlɛ mli’ lɛ, mɛni esa akɛ wɔha ehi wɔjwɛŋmɔ mli?
9 Nɔ ni Paulo wie yɛ Romabii 12:18 lɛ yaa shɔŋŋ fe toiŋjɔlɛ ni wɔɔha ehi wɔweku lɛ kɛ asafo lɛ mli lɛ kɛkɛ. Etsɔɔ akɛ esa akɛ ‘wɔkɛ gbɔmɛi fɛɛ ahi shi yɛ hejɔlɛ mli.’ Enɛ kɔɔ wɔkutsoŋbii, mɛi ni wɔkɛtsuɔ nii, mɛi ni wɔkɛyaa skul, kɛ mɛi ni wɔkɛkpeɔ yɛ shiɛmɔ nitsumɔ lɛ mli lɛ ahe. Shi wiemɔ kuku ko fata Paulo ŋaawoo lɛ he akɛ: “Kɛ aaaho lɛ nyɛgbɛfaŋ lɛ.” Enɛ tsɔɔ akɛ esa akɛ wɔfee nɔ fɛɛ nɔ ni wɔɔnyɛ koni ‘wɔkɛ gbɔmɛi fɛɛ ahi shi yɛ hejɔlɛ mli,’ shi no etsɔɔɔ akɛ wɔku Nyɔŋmɔ shishitoo mlai lɛ amli kɛfee nakai.
Yehowa Nɔ̃ Ji Oweletɔɔ Lɛ
10, 11. Mɛɛ gbɛ nɔ wɔɔtsɔ ‘wɔŋmɛ mlifu lɛ gbɛ,’ ni mɛni hewɔ enɛ feemɔ sa jogbaŋŋ lɛ?
10 Nyɛkanea Romabii 12:19. Esa akɛ ‘wɔto wɔtsui shi wɔha efɔŋ’ ní wɔkɛ mɛi ni nyaaa wɔshiɛmɔ nitsumɔ lɛ kɛ wɔshɛɛ sane lɛ he lɛ, ní ‘mɛi ni kuɔ wɔnaa’ lɛ po fata he lɛ aye kɛ “mlijɔlɛ.” (2 Tim. 2:23-25) Paulo wo Kristofoi ŋaa akɛ amɛkatɔ amɛ diɛŋtsɛ amɛhe owele, shi moŋ ‘amɛŋmɛ mlifu lɛ gbɛ.’ Namɔ mlifu he Paulo wieɔ lɛ? Jeee wɔ diɛŋtsɛ wɔmlifu ní wɔɔŋmɛ lɛ gbɛ lɛ he Paulo wieɔ lɛ. Ekã shi faŋŋ akɛ Nyɔŋmɔ mlifu lɛ gbɛ esa akɛ wɔŋmɛ lɛ. Ákɛ Kristofoi lɛ, wɔle akɛ ejeee wɔgbɛnaa akɛ wɔɔtɔ owele. Lalatsɛ lɛ ŋma akɛ: “Ha mlifu sɛɛ afo ni oshɛ mlila ofɔ̃; kaawo otsui la hu, efɔŋfeemɔ mli kɛkɛ ekɛ mɔ yaa.” (Lala 37:8) Ni Salomo hu wo ŋaa akɛ: “Kaakɛɛ akɛ: Mato efɔŋ najiaŋ! Mɛɛ Yehowa, ni eeehere oyiwala.”—Abɛi 20:22.
11 Kɛ́ shiteekɛwolɔi ye wɔ awui lɛ, nilee yɛ mli akɛ wɔɔshi sane lɛ wɔha Yehowa koni lɛ diɛŋtsɛ egbala amɛ toi yɛ be ni sa mli kɛ́ ena akɛ nakai feemɔ he miihia. Akɛni Yehowa mlifu lɛ ji nɔ ni yɔɔ Paulo jwɛŋmɔ mli hewɔ lɛ, ewie kɛfata he akɛ: “Aŋma akɛ: ‘Minɔ̃ ji oweletɔɔ, mi mato najiaŋ, Nuŋtsɔ [Yehowa] kɛɛ.’” (Nyɛkɛtoa 5 Mose 32:35 lɛ he.) Eji henɔwomɔ akɛ wɔɔtɔ wɔ diɛŋtsɛ wɔhe owele, ejaakɛ kɛ́ wɔfee nakai lɛ etsɔɔ akɛ wɔŋɔ hegbɛ ni ji Yehowa pɛ nɔ̃ lɛ wɔfɔ̃ wɔ nɔ. Kɛfata he lɛ, nakai feemɔ baatsɔɔ akɛ wɔbɛ hemɔkɛyeli yɛ shi ni Yehowa ewo akɛ: “Mi mato najiaŋ” lɛ mli.
12. Mɛɛ be Yehowa baajie emlifu lɛ kpo, ni yɛ mɛɛ gbɛ nɔ?
12 Paulo wie yɛ Romabii awolo lɛ shishijee gbɛ akɛ: “Ajieɔ Nyɔŋmɔ mlifu kpo kɛjɛɔ ŋwɛi kɛbaa gbɔmɛi, ní kɛ nishaianii tsĩɔ anɔkwale lɛ gbɛ lɛ, amusubɔɔ kɛ nishaianii lɛ fɛɛ nɔ.” (Rom. 1:18) Kɛ́ “amanehulu kpeteŋkpele lɛ” shɛ lɛ, Yehowa baajɛ ŋwɛi ajie emlifu lɛ kpo kɛtsɔ e-Bi lɛ nɔ. (Kpoj. 7:14) Paulo wie enɛ he yɛ wolo kroko ni akɛ mumɔ tsirɛ lɛ ní eŋma lɛ mli akɛ eji “Nyɔŋmɔ kojomɔ ni ja gbɛ lɛ he okadi ní anaa faŋŋ.” Etsɔɔ mli akɛ: “Kɛji eyɛ mli nakai akɛ eja yɛ Nyɔŋmɔ hiɛ akɛ mɛi ni haoɔ nyɛ lɛ eeehao amɛ eto najiaŋ, ni nyɛ mɛi ní ahao nyɛ lɛ, eeeha nyɛkɛ wɔ fɛɛ hejɔɔmɔ, beni aaajie Nuŋtsɔ Yesu kpo kɛaajɛ ŋwɛi kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ anɔ lɛ.”—2 Tes. 1:5-8.
Okɛ Ekpakpafeemɔ Aye Efɔŋ nɔ Kunim
13, 14. (a) Mɛni hewɔ efeee wɔ naakpɛɛ kɛ́ ate shi awo wɔ lɛ? (b) Mɛɛ gbɛ nɔ wɔɔtsɔ wɔjɔɔ mɛi ni waa wɔ yi lɛ?
13 Nyɛkanea Romabii 12:14, 21. Akɛni wɔyɛ nɔmimaa akɛ Yehowa baatsu eyiŋtoi fɛɛ ahe nii hewɔ lɛ, wɔkɛ wɔhewalɛ fɛɛ tsuɔ nitsumɔ ni etuu ewo wɔdɛŋ, ni ji “maŋtsɛyeli lɛ he sanekpakpa” lɛ ní wɔɔshiɛ ‘wɔtsɔɔ je nɛŋ fɛɛ’ lɛ. (Mat. 24:14) Wɔle akɛ wɔshiɛmɔ nitsumɔ nɛɛ baaha wɔhenyɛlɔi lɛ amli awo la, ejaakɛ Yesu bɔ wɔ kɔkɔ akɛ: “Migbɛi lɛ hewɔ lɛ jeŋmaji fɛɛ aaanyɛ nyɛ.” (Mat. 24:9) Enɛ hewɔ lɛ, kɛ́ ate shi awo wɔ lɛ, efeee wɔ naakpɛɛ ni wɔnijiaŋ ejeee wui hu. Bɔfo Petro ŋma akɛ: “Suɔmɔmɛi, nyɛkahaa amanehulu la ni aŋɔkaa nyɛ lɛ miifee nyɛ sane srɔto ko, tamɔ akɛ nɔ ko srɔto ko feɔ nyɛ lɛ, shi moŋ babaoo ni nyɛnaa Kristo amanehului lɛ eko lɛ, nyɛmii ashɛa.”—1 Pet. 4:12, 13.
14 Yɛ nɔ̃ najiaŋ ni wɔhe aaatsɛ̃ mɛi ni waa wɔ yi lɛ, wɔbɔɔ mɔdɛŋ wɔshiɛɔ wɔhaa amɛ, ejaakɛ wɔle akɛ lé ni amɛteŋ mɛi komɛi leee hewɔ amɛfeɔ wɔ nakai lɛ. (2 Kor. 4:4) Wɔbɔɔ mɔdɛŋ akɛ wɔbo Paulo ŋaawoo nɛɛ toi akɛ: “Nyɛjɔɔa mɛi ni waa nyɛ yi lɛ, nyɛjɔɔa ni nyɛkalomɔa.” (Rom. 12:14) Gbɛ kome ni wɔɔtsɔ nɔ wɔjɔɔ mɛi ni teɔ shi amɛwoɔ wɔ lɛ ji ni wɔsɔle wɔha amɛ. Yesu wie yɛ e-Gɔŋ nɔ Shiɛmɔ lɛ mli akɛ: “Nyɛsumɔa nyɛhenyɛlɔi; nyɛfea mɛi ní he tsɛɔ nyɛ lɛ ejurɔ; nyɛjɔɔa mɛi ní lomɔɔ nyɛ; nyɛsɔlea nyɛhaa mɛi ní feɔ nyɛ niseniianii.” (Luka 6:27, 28) Bɔfo Paulo diɛŋtsɛ niiashikpamɔ lɛ ha ena akɛ mɛi ni waa Kristofoi ayi lɛ ateŋ mɛi komɛi baanyɛ atsake ní amɛbatsɔmɔ Kristo kaselɔi anɔkwafoi kɛ Yehowa tsuji ni kɛ hiɛdɔɔ tsuɔ nii. (Gal. 1:13-16, 23) Paulo wie yɛ wolo kroko ni eŋma lɛ mli akɛ: “Beni ajɛɔ wɔ lɛ, wɔmiijɔɔ; beni awaa wɔ yi lɛ, wɔtoɔ tsui; beni afiteɔ wɔgbɛi lɛ, wɔmiikpa fai.”—1 Kor. 4:12, 13.
15. Mɛni ji gbɛ ni hi fe fɛɛ ni wɔɔtsɔ nɔ wɔkɛ ekpakpafeemɔ aye efɔŋ nɔ kunim?
15 Enɛ hewɔ lɛ, esa akɛ anɔkwa Kristofoi abo Romabii awolo lɛ, yitso 12 lɛ naagbee kuku lɛ toi: “Kaaha efɔŋ miiye onɔ kunim, shi moŋ okɛ ekpakpafeemɔ aye efɔŋ nɔ kunim.” Satan Abonsam ji mɔ ni kɛ efɔŋfeemɔ ba. (Yoh. 8:44; 1 Yoh. 5:19) Yɛ kpojiemɔ ni aŋɔha bɔfo Yohane lɛ mli lɛ, Yesu ha ale akɛ enyɛmimɛi ni afɔ amɛ mu lɛ kɛ ‘toobi lɛ lá lɛ kɛ amɛ diɛŋtsɛ amɛdaseyeli wiemɔ lɛ eye Satan nɔ kunim.’ (Kpoj. 12:11) Enɛ tsɔɔ akɛ esa akɛ wɔfee ekpakpa kɛtsɔ Maŋtsɛyeli lɛ he sanekpakpa lɛ ni wɔɔshiɛ kɛye mɛi odase lɛ nɔ. No ji gbɛ ni hi fe fɛɛ ni wɔɔtsɔ nɔ wɔye Satan nɔ kunim ní wɔkaha efɔŋfeemɔ ni eha egbɛ eshwa je lɛŋ fɛɛ lɛ miiná wɔnɔ hewalɛ.
Nyɛnyaa yɛ Hiɛnɔkamɔ Mli
16, 17. Mɛni wɔkase kɛjɛ Romabii awolo lɛ, yitso 12 lɛ mli ni tsɔɔ (a) bɔ ni esa akɛ wɔhi shi wɔha? (b) bɔ ni esa akɛ wɔfee wɔnii wɔha yɛ asafo lɛ mli? (d) bɔ ni esa akɛ wɔkɛ mɛi ni teɔ shi amɛwoɔ wɔ lɛ aye aha?
16 Wolo ni Paulo ŋma eyaha Kristofoi ni hi Roma lɛ, yitso 12 lɛ he ni wɔsusu kuku nɛɛ eha wɔkase nibii babaoo. Wɔkase akɛ ákɛ Yehowa tsuji ni wɔjɔɔ wɔhe nɔ lɛ, esa akɛ wɔná he miishɛɛ akɛ wɔkɛ wɔhe aaashã afɔle. Nyɔŋmɔ mumɔ lɛ tsirɛɔ wɔ ni wɔjɛɔ wɔsuɔmɔ mli wɔkɛ wɔhe shãa afɔle, ejaakɛ wɔyoo akɛ eji Nyɔŋmɔ suɔmɔnaa nii. Wɔhe dɔɔ la yɛ mumɔ lɛ naa, ni wɔkɛ wɔduromɔ keenii srɔtoisrɔtoi lɛ tsuɔ nii kɛ hiɛdɔɔ. Wɔkɛ heshibaa sɔmɔɔ, ni wɔfeɔ nɔ fɛɛ nɔ ni wɔɔnyɛ koni ekomefeemɔ ahi asafo lɛ mli. Wɔbɔɔ gbɔfeemɔ he mɔdɛŋ, ni wɔnanaa wɔhaa wɔhe.
17 Romabii awolo lɛ, yitso 12 lɛ woɔ wɔ ŋaa srɔtoi hu yɛ bɔ ni esa akɛ wɔfee wɔnii wɔha kɛ́ ate shi awo wɔ. Esaaa akɛ wɔŋɔɔ efɔŋ wɔtoɔ efɔŋ najiaŋ. Esa akɛ wɔbɔ mɔdɛŋ wɔjie mlihilɛ kpo kɛ́ aate shi aawo wɔ. Esa akɛ wɔfee nɔ fɛɛ nɔ ni wɔɔnyɛ koni wɔkɛ gbɔmɛi fɛɛ ahi shi yɛ hejɔlɛ mli kɛ́ no haaa wɔku Biblia mli shishitoo mlai amli. Esa akɛ wɔkɛ ŋaawoo nɛɛ atsu nii yɛ wɔweku lɛ mli, yɛ asafo lɛ mli, yɛ nitsumɔhe, yɛ skul, yɛ shiɛmɔ nitsumɔ lɛ mli, kɛ agbɛnɛ hu be mli ni wɔkɛ wɔkutsoŋbii sharaa lɛ. Kɛ́ mɛi fee wɔ efɔŋ po lɛ, esa akɛ wɔbɔ mɔdɛŋ ni wɔkɛ ekpakpafeemɔ aye efɔŋ nɔ kunim, ní wɔkai akɛ Yehowa nɔ̃ ji oweletɔɔ lɛ.
18. Mɛɛ nibii etɛ komɛi Romabii 12:12 lɛ woɔ wɔ hewalɛ ni wɔfee?
18 Nyɛkanea Romabii 12:12. Paulo kɛ ŋaawoi etɛ hu ha kɛfata ŋaawoi kpakpai fɛɛ ni wɔsusu he nɛɛ ahe. Akɛni wɔnyɛŋ nibii nɛɛ fɛɛ wɔfee ní Yehowa yelikɛbuamɔ fataaa he hewɔ lɛ, Paulo wo ŋaa koni ‘wɔhiɛ sɔlemɔ mli daa.’ Enɛ baaye abua wɔ koni wɔkɛ ŋaa ni ewo akɛ ‘wɔmia wɔhiɛ yɛ amanehulu mli’ lɛ atsu nii. Nɔ ni ji naagbee lɛ, kɛ́ wɔyɛ hiɛnɔkamɔ akɛ wɔbaaya ŋwɛi jio, wɔbaahi shikpɔŋ lɛ nɔ jio lɛ, esa akɛ wɔkɛ wɔjwɛŋmɔ ama nibii ni Yehowa ewo he shi lɛ anɔ, ní ‘wɔnya yɛ’ naanɔ wala he ‘hiɛnɔkamɔ lɛ mli.’
Emlitĩi
• Kɛ́ ate shi awo wɔ lɛ, te esa akɛ wɔfee wɔnii wɔha tɛŋŋ?
• Mɛɛ shihilɛi amli esa akɛ wɔtiu toiŋjɔlɛ sɛɛ, ni mɛɛ gbɛ nɔ wɔɔtsɔ wɔfee nakai?
• Mɛni hewɔ esaaa akɛ wɔtɔɔ wɔ diɛŋtsɛ wɔhe owele lɛ?
[Nikasemɔ lɛ he Sanebimɔi]
[Mfoniri ni yɔɔ baafa 8]
Kɛ́ wɔye wɔbua wɔkutsoŋbii lɛ, no baanyɛ ajie wɔhe jwɛŋmɔ fɔŋ ni amɛyɔɔ lɛ
[Mfoniri ni yɔɔ baafa 9]
Ani obɔɔ mɔdɛŋ ni oha toiŋjɔlɛ ahi asafo lɛ mli?