Te Ooofee Tɛŋŋ Oná Bɔ ni Yehowa Kɛ Eshai Faa lɛ He Sɛɛ?
Te Ooofee Tɛŋŋ Oná Bɔ ni Yehowa Kɛ Eshai Faa lɛ He Sɛɛ?
‘Yehowa ji Nyɔŋmɔ musuŋtsɔlɔ kɛ durolɔ ní toɔ tsui ní ŋɔɔ tɔmɔ kɛ efɔŋ kɛ esha efaa.’—2 MOSE 34:6, 7.
TAOMƆ SANEBIMƆI NƐƐ AHETOO
Mɛni Yehowa fee yɛ esha ni David kɛ Manase fee lɛ he, ni mɛni hewɔ?
Mɛni hewɔ Yehowa kɛ Israel maŋ lɛ he eshai efaaa amɛ lɛ?
Mɛni esa akɛ wɔfee koni Yehowa kɛ wɔhe eshai afa wɔ?
1, 2. (a) Mɛɛ Nyɔŋmɔ nɛkɛ Yehowa ha Israelbii lɛ na akɛ eji? (b) Mɛni he wɔbaasusu yɛ nikasemɔ nɛɛ mli?
YƐ Nehemia beaŋ lɛ, Levibii komɛi wie yɛ sɔlemɔ mli akɛ, amɛtsɛmɛi lɛ ‘ekpɛlɛɛɛ Yehowa kitai lɛ atoi boo.’ Shi Yehowa ha ana shii abɔ akɛ eji ‘eshaifaa Nyɔŋmɔ, odomfoɔ kɛ musuŋtsɔlɔ, ni toɔ etsui shi, ni mɔbɔnalɛ fá.’ Yehowa tee nɔ ena nomii nɛɛ ni ku amɛsɛɛ yɛ Nehemia beaŋ lɛ mɔbɔ.—Neh. 9:16, 17.
2 Wɔteŋ mɔ fɛɛ mɔ baanyɛ abi ehe akɛ, ‘Te mafee tɛŋŋ maná bɔ ni Yehowa kɛ eshai faa lɛ he sɛɛ lɛ?’ Kɛha sanebimɔ ni he hiaa nɛɛ hetoo lɛ, nyɛhaa wɔsusua bɔ ni Nyɔŋmɔ kɛ maŋtsɛmɛi enyɔ komɛi—David kɛ Manase—ahe eshai fa amɛ, kɛ bɔ ni amɛná he sɛɛ lɛ he wɔkwɛa.
DAVID FEE ESHAI NI YƆƆ HIƐDƆƆ
3-5. Mɛɛ eshai ni yɔɔ hiɛdɔɔ David fee?
3 Eyɛ mli akɛ David sheɔ Nyɔŋmɔ gbeyei moŋ, shi efee eshai ni yɔɔ hiɛdɔɔ. Eshai nɛɛ ateŋ enyɔ kɔɔ Uria kɛ eŋa Batsheba he. Nɔ ni jɛ eshai nɛɛ amli kɛba lɛ sa David, Uria, kɛ Batsheba fɛɛ he. Shi gbɛ nɔ ni Nyɔŋmɔ tsɔ ejaje David lɛ tsɔɔ wɔ nɔ ko yɛ bɔ ni Yehowa kɛ eshai faa lɛ he. Nyɛhaa wɔsusua nɔ ni ba lɛ he.
4 David wo Israel ta lɛ gbɛ koni amɛyabɔ nsara amɛwo Amonbii lɛ amaŋtiase ni ji Raba lɛ. Maŋ nɛɛ kã Yerusalem bokagbɛ aaafee kilomitai 80, yɛ Yordan Faa lɛ sɛɛ. Beni tabilɔi lɛ tee ta lɛ, David jɛ emaŋtsɛtsũ lɛ yiteŋ ena Batsheba—ni eji mɔ ko ŋa lɛ—miiju ehe. Ewu fata tabilɔi lɛ ahe. David tee nɔ ekwɛ Batsheba aahu akɛ ehenumɔi te shi, ni etsu ayaŋɔ lɛ kɛba emaŋtsɛwe lɛ, ni ekɛ lɛ fite gbala.—2 Sam. 11:1-4.
5 Beni David ná ele akɛ Batsheba ená musu lɛ, etsu ayatsɛ ewu Uria kɛjɛ ta lɛ naa kɛba Yerusalem, ni ekɛɛ lɛ ni eya shĩa, kɛjwɛŋmɔ lɛ akɛ ebaaya ni ekɛ eŋa lɛ ayaná bɔlɛ. Shi yɛ David mɔdɛŋbɔɔ lɛ fɛɛ sɛɛ lɛ, Uria emiii shĩa yaa. No hewɔ lɛ, maŋtsɛ lɛ ŋma wolo emaje tatsɛnukpa lɛ, koni aŋɔ Uria ato “ta lɛ mli he ni wa lɛ hiɛ,” ní aha enanemɛi asraafoi lɛ agbala amɛhe shi kɛje jɛmɛ. Enɛ ha agbe Uria yɛ ta lɛ naa, taakɛ David to eyiŋ lɛ. (2 Sam. 11:12-17) No hewɔ lɛ, jeee gbala pɛ maŋtsɛ lɛ fite, shi moŋ ewo esane lɛ mli wu kɛtsɔ lá ni eye bem ni eha ashwie shi lɛ nɔ.
DAVID TSAKE ETSUI
6. Mɛni Nyɔŋmɔ fee yɛ eshai ni David fee lɛ he, ni mɛni enɛ tsɔɔ wɔ yɛ Yehowa he?
6 Yehowa na nɔ ni tee nɔ lɛ fɛɛ. Afeee nɔ ko nɔ ko ateee lɛ. (Abɛi 15:3) Eyɛ mli akɛ maŋtsɛ lɛ kɛ Batsheba bote gbalashihilɛ mli moŋ, “shi sane ni David ye nɛɛ eŋɔɔɔ Yehowa naa.” (2 Sam. 11:27) No hewɔ lɛ, mɛni Nyɔŋmɔ fee yɛ eshai ni yɔɔ hiɛdɔɔ ni David fee lɛ he? Etsu egbalɔ Natan kɛtee David ŋɔɔ. Akɛni Yehowa ji Nyɔŋmɔ ni ŋɔɔ eshai efaa hewɔ lɛ, eeenyɛ efee akɛ etao nɔ ko ni eeedamɔ nɔ ena David mɔbɔ. Ani onyaaa gbɛ ni Yehowa tsɔ nɔ etsu sane lɛ he nii lɛ he? Enyɛɛɛ David nɔ akɛ ejaje eshai ni efee lɛ etsɔɔ, moŋ lɛ, eha Natan gba maŋtsɛ lɛ sane ko ni baaha ena hiɛdɔɔ ni yɔɔ eshai ni efee lɛ ahe. (Nyɛkanea 2 Samuel 12:1-4.) Gbɛ ni Yehowa tsɔ nɔ etsu sane lɛ he nii lɛ nɔ bɛ kwraa!
7. Te David fee enii eha tɛŋŋ yɛ nɔ ni Natan kɛɛ lɛ lɛ he?
7 Sane ni Natan kɛtsu nii lɛ ha David na amrɔ nɔŋŋ akɛ aye sane ni ejaaa. David mli fu nuu niiatsɛ ni yɔɔ Natan sane lɛ mli lɛ, ni ekɛɛ akɛ: “Gbii abɔ ni Yehowa hiɛ kã nɛɛ, nuu ni ye nɛkɛ sane nɛɛ, esa gbele!” Kɛfata he lɛ, David kɛɛ esa akɛ ato mɔ ni aye lɛ sane fɔŋ nɛɛ najiaŋ. Kɛkɛ ni Natan kɛ sane lɛ ma David hiɛ akɛ: “Bo ji nakai nuu lɛ!” Natan kɛɛ David akɛ, enifeemɔ lɛ hewɔ lɛ, “klante” kpaŋ yɛ ewe lɛ kɔkɔɔkɔ, ni abaatee efɔŋ shi awo ewe lɛ. Ni abaashwie ehiɛaŋ shi hu yɛ mɛi fɛɛ ahiɛ yɛ ehe eshai lɛ ahewɔ. David na hiɛdɔɔ ni yɔɔ nɔ ni efee lɛ he, ni eshwa ehe, ni ekɛɛ: “Mifee Yehowa shishi esha.”—2 Sam. 12:5-14.
DAVID SƆLE, NI NYƆŊMƆ ŊƆFA LƐ
8, 9. Mɛɛ gbɛ nɔ Lala 51 lɛ haa wɔnaa bɔ ni David nu he eha yɛ eshai ni efee lɛ he, ni mɛni no tsɔɔ wɔ yɛ Yehowa he?
8 Wiemɔi ni yɔɔ lala ko ni Maŋtsɛ David fo yɛ sɛɛ mli lɛ mli lɛ haa anaa bɔ ni ejɛ etsuiŋ tɔɔ eshwa ehe. Fai ni David kpa Yehowa ni yɔɔ Lala 51 lɛ tsɔɔ akɛ jeee etɔmɔi lɛ anɔ pɛ kɛkɛ ekpɛlɛ, shi moŋ etsake etsui hu. Nɔ titri ni kã David tsui nɔ ji wekukpaa ni yɔɔ ekɛ Nyɔŋmɔ teŋ lɛ. Ejaje akɛ: “Bo okome too mifee esha mishi.” Ni ekpa Yehowa fai akɛ: “Nyɔŋmɔ, bɔɔ tsui ni he tse oha mi, ni ofee mumɔ ni fĩɔ shi ehee yɛ mimli! . . . Okɛ oyiwalaheremɔ lɛ he nyamɔ lɛ aku sɛɛ aha mi, ni toiboo mumɔ lɛ amɔ mimli!” (Lala 51:3-6, 9-14) Kɛ́ otɔ̃ lɛ, ani ofɔseɔ otsuiŋ fɛɛ oshwieɔ Yehowa hiɛ?
9 Yehowa ejieee nibii gbohii ni jɛ eshai ni David fee lɛ amli kɛba lɛ kɛyaaa. Nɔ ni efee lɛ ha ekɛ naagbai komɛi kpe ewala beaŋ fɛɛ. Shi beni Yehowa na bɔ ni David etsake etsui—‘etsui ní werɛ eho ehe ní tswiaa shi kɛ dɔlɛ’—lɛ, ekɛ ehe eshai lɛ fa lɛ. (Nyɛkanea Lala 32:5; Lala 51:19) Nyɔŋmɔ Ofe lɛ nuɔ nɔ tuuntu ni haa mɔ ko feɔ esha lɛ shishi. No hewɔ lɛ, yɛ nɔ najiaŋ ni Yehowa aaaha adesai adamɔ Mose Mla lɛ nɔ akojo David kɛ Batsheba, ní agbe amɛ yɛ gbãla ni amɛfite lɛ hewɔ lɛ, lɛ diɛŋtsɛ ejɛ mɔbɔnalɛ mli etsu sane lɛ he nii. (3 Mose 20:10) Nyɔŋmɔ ha amɛbi Salomo baye David sɛɛ akɛ Israel maŋtsɛ.—1 Kron. 22:9, 10.
10. (a) Mɛni ekolɛ Yehowa damɔ nɔ ekɛ David he eshai lɛ fa lɛ? (b) Mɛni esa akɛ mɔ ko afee dani Yehowa kɛ ehe eshai afa lɛ?
10 Eeenyɛ efee akɛ nɔ kroko ni ha Yehowa kɛfa David ji bɔ ni David na Saul mɔbɔ lɛ. (1 Sam. 24:5-8) Taakɛ Yesu tsɔɔ mli lɛ, Yehowa kɛ wɔ yeɔ yɛ bɔ ni wɔkɛ mɛi yeɔ haa lɛ naa. Yesu kɛɛ akɛ: “Nyɛkakojoa, koni akakojo nyɛ. Shi nɔ̃ kojomɔ ni nyɛŋɔkojoɔ lɛ, aaaŋɔkojo nyɛ; ni nɔ̃ susumɔnɔ̃ ni nyɛŋɔsusuɔ lɛ, aaaŋɔsusu aha nyɛ.” (Mat. 7:1, 2) Kwɛ bɔ ni wɔtsui nyɔɔ wɔmli akɛ wɔɔle akɛ Yehowa kɛ wɔhe eshai lɛ baafa wɔ, kɛ́ eji gbalafitemɔ loo gbɔmɔgbee po! Shi dani ekɛbaafa wɔ lɛ, ja wɔ hu wɔkɛfa mɛi, ni wɔjaje wɔtɔmɔi lɛ wɔtsɔɔ lɛ, ni wɔtsake wɔsu yɛ nibii gbohii ni wɔfeɔ lɛ ahe. Kɛ́ eshafeelɔi tsake amɛtsui lɛɛlɛŋ lɛ, Yehowa baaha amɛná “hejɔɔmɔ yinɔ,” loo henilee kpakpa.—Nyɛkanea Bɔfoi lɛ Asaji 3:19, 20.
MANASE FEE ESHA KPELE, SHI ETSAKE ETSUI
11. Mɛɛ nibii gbohii Maŋtsɛ Manase fee?
11 Ha wɔsusu Biblia mli nɔkwɛmɔnɔ kroko ni tsɔɔ akɛ Yehowa miisumɔ ni ekɛ eshai kpelei po afa lɛ he. David nɔyeli lɛ sɛɛ aaafee afii 360 lɛ, Manase baye Yuda nɔ maŋtsɛ. Yɛ afii 55 ni ekɛye nɔ lɛ fɛɛ mli lɛ, efɔŋ sɔŋŋ kɛkɛ efee, ni no ha Yehowa mli fu lɛ waa. Ákɛ nɔkwɛmɔnɔ lɛ, Manase mamɔ afɔleshaa latɛi eha Baal, ejá “ŋwɛi asafo lɛ fɛɛ,” eha ebihii tsɔ la mli, ni eha maŋbii lɛ kɛ amɛhe wo mumɔi atsɛmɔ mli. Hɛɛ, “efee efɔŋ babaoo yɛ Yehowa hiɛ.”—2 Kron. 33:1-6.
12. Mɛɛ gbɛ nɔ Manase tsɔ eku esɛɛ kɛba Yehowa ŋɔɔ?
12 Naagbee lɛ, aŋɔ Manase nom kɛtee Babilon ni ayawo lɛ tsuŋ. Eeenyɛ efee akɛ beni eyɔɔ jɛmɛ lɛ, ekai nɔ ni Mose kɛɛ Israelbii lɛ, akɛ: “Be mli ni oyɔɔ amanehulu mli ni enɛɛmɛi fɛɛ eba onɔ yɛ naagbee gbii lɛ anɔ lɛ, no lɛ oooku osɛɛ kɛaaba Yehowa, o-Nyɔŋmɔ lɛ, ŋɔɔ, ni ooobo egbee toi.” (5 Mose 4:30) Manase ku esɛɛ kɛba Yehowa ŋɔɔ. Yɛ mɛɛ gbɛ nɔ? “Eba ehe shi babaoo” yɛ Nyɔŋmɔ hiɛ, ni etee nɔ “ekpa lɛ fai” (taakɛ mfoniri ni yɔɔ baafa 21 lɛ tsɔɔ lɛ). (2 Kron. 33:12, 13) Biblia lɛ etsɔɔɔ wiemɔi pɔtɛi ni Manase kɛtsu nii yɛ esɔlemɔ lɛ mli, shi eeenyɛ efee akɛ etamɔ wiemɔi ni Maŋtsɛ David kɛtsu nii yɛ Lala 51 lɛ nɔŋŋ. Bɔ fɛɛ bɔ ni sane lɛ ji lɛ, Manase tsake etsui kwraa.
13. Mɛni hewɔ ni Yehowa kɛ Manase he eshai lɛ fa lɛ lɛ?
13 Mɛni Yehowa fee yɛ Manase sɔlemɔ lɛ he? “Ebo [Manase] toi, ni enu esɔlemɔ lɛ.” Taakɛ David fee lɛ, Manase yɔse bɔ ni eshai ni efee lɛ yɔɔ hiɛdɔɔ ha, ni etsake etsui. No hewɔ ni Nyɔŋmɔ kɛfa Manase, ni eha eyaye maŋtsɛ yɛ Yerusalem ekoŋŋ lɛ. Enɛ ha “Manase ná le akɛ Yehowa lɛ, lɛ ji Nyɔŋmɔ.” (2 Kron. 33:13) Nɔkwɛmɔnɔ nɛɛ eha wɔna bɔ ni Nyɔŋmɔ naa mɔbɔ, kɛ bɔ ni ekɛ mɛi ni tsakeɔ amɛtsui lɛɛlɛŋ lɛ ahe eshai faa amɛ, ni enɛ shɛjeɔ wɔmii waa!
ANI YEHOWA KƐ ESHAI FAA BE FƐƐ BE?
14. Mɛni baaha Yehowa kɛ eshafeelɔ ko he eshai afa lɛ?
14 Ŋmɛnɛ lɛ, ekolɛ Nyɔŋmɔ jálɔi lɛ ateŋ mɛi fioo ko pɛ baabi ni akɛ eshai ni yɔɔ hiɛdɔɔ tamɔ David kɛ Manase nɔ lɛ afa amɛ. Kɛlɛ, fa ni Yehowa kɛfa maŋtsɛmɛi enyɔ nɛɛ lɛ haa wɔnaa akɛ, wɔ-Nyɔŋmɔ lɛ miisumɔ ni ekɛ eshai ni yɔɔ hiɛdɔɔ po afa, kɛji eshafeelɔ lɛ tsake etsui lɛɛlɛŋ.
15. Te wɔfeɔ tɛŋŋ wɔleɔ akɛ Yehowa kɛ adesai fɛɛ ahe eshai efaaa amɛ yakatswaa lɛ?
15 Wɔnyɛŋ wɔkɛɛ kɛ nɔmimaa akɛ Yehowa kɛ adesai fɛɛ ahe eshai faa amɛ be fɛɛ be. Nyɛhaa wɔkɛ su ni David kɛ Manase jie lɛ kpo lɛ atoa su ni Israelbii kɛ Yudafoi toigbolɔi lɛ jie lɛ kpo lɛ he wɔkwɛa. Beni David fee esha lɛ, Nyɔŋmɔ ha lɛ hegbɛ ni ekɛtsake etsui, kɛtsɔ Natan ni etsu kɛtee eŋɔɔ lɛ nɔ. David kpɛlɛ hegbɛ nɛɛ nɔ, ni etsake etsui. Beni Manase yaje shihilɛ ni jaraa mli lɛ, eyɔse akɛ ehe miihia ni etsake etsui. Shi bei pii lɛ, Israelbii lɛ kɛ Yudafoi lɛ tsakeee amɛtsui, eyɛ mli akɛ Yehowa tsu egbalɔi lɛ shii abɔ kɛtee amɛŋɔɔ koni amɛyajaje amɛnifɔjianii lɛ amɛtsɔɔ amɛ. No hewɔ lɛ, Yehowa kɛ amɛhe eshai lɛ efaaa amɛ. (Nyɛkanea Nehemia 9:30.) Beni nomii lɛ ku amɛsɛɛ kɛjɛ Babilon kɛtee amɛmaŋ ekoŋŋ po lɛ, Yehowa tee nɔ etsu etsuji anɔkwafoi tamɔ osɔfo Ezra kɛ gbalɔ Maleaki kɛtee amɛŋɔɔ. Beni maŋbii lɛ fee Yehowa suɔmɔnaa nii lɛ, amɛná miishɛɛ kpele.—Neh. 12:43-47.
16. (a) Mɛni ba Israel maŋ muu lɛ fɛɛ nɔ yɛ amɛtsui ni amɛtsakeee lɛ hewɔ? (b) Mɛɛ hegbɛ Yehowa kɛbaaha aŋkroaŋkroi ni ji blema Israelbii lɛ?
16 Beni Yehowa ha Yesu ba shikpɔŋ lɛ nɔ ni ekɛ ewala ni eye emuu lɛ bashã afɔle kɛkpɔ̃ wɔ lɛ sɛɛ lɛ, ekpɛlɛɛɛ afɔlei ni Israelbii lɛ kɛ kooloi shãa lɛ anɔ dɔŋŋ. (1 Yoh. 4:9, 10) Beni Yesu yɔɔ shikpɔŋ lɛ nɔ lɛ, etsɔɔ bɔ ni e-Tsɛ lɛ nuɔ he ehaa yɛ Yerusalem he beni ekɛɛ akɛ: “Yerusalem, Yerusalem, bo mɔ ni ogbeɔ gbalɔi lɛ ní otswiaa mɛi ni atsuɔ amɛ oŋɔɔ lɛ atɛi: shii enyiɛ mitao akɛ kulɛ mibuaa obii anaa tamɔ bɔ ni wuɔ buaa ebii anaa ewoɔ efiji ashishi lɛ, ni nyɛkpɛlɛɛɛ!” No hewɔ lɛ Yesu kɛɛ akɛ: “Naa, aaashi nyɛwe lɛ amaŋfɔ aha nyɛ!” (Mat. 23:37, 38) Enɛ ha akɛ mumɔŋ Israel baye maŋ ni tsakeee etsui nɛɛ najiaŋ. (Mat. 21:43; Gal. 6:16) Shi ani abaanyɛ akɛ aŋkroaŋkroi ni ji heloonaa Israelbii lɛ ahe eshai afa amɛ? Hɛɛ, Yehowa kɛ amɛhe eshai lɛ baafa amɛ aahu, ni ebaana amɛ mɔbɔ kɛ́ amɛná hemɔkɛyeli yɛ Nyɔŋmɔ mli, ni amɛná hemɔkɛyeli yɛ Yesu Kristo afɔleshaa lɛ hu mli. Kɛ́ atee mɛi ni tsakeee amɛtsui dani amɛgboi lɛ ashi kɛba shikpɔŋ lɛ nɔ lɛ, amɛ hu amɛbaaná hegbɛ kɛfee nakai koni akɛ amɛhe eshai lɛ afa amɛ.—Yoh. 5:28, 29; Bɔf. 24:15.
NÁ YEHOWA ESHAIFAA LƐ HE SƐƐ
17, 18. Mɛni esa akɛ wɔfee koni Yehowa kɛ wɔhe eshai lɛ afa wɔ?
17 Akɛni Yehowa miisumɔ ni ekɛ wɔhe eshai lɛ afa wɔ hewɔ lɛ, mɛni esa akɛ wɔfee? Esa akɛ wɔfee wɔnii tamɔ David kɛ Manase. Esa akɛ wɔkpɛlɛ wɔtɔmɔi anɔ, wɔtsake wɔtsui, wɔkpa Yehowa fai ni ekɛ wɔtɔmɔi ake wɔ, ni wɔbi lɛ ni eye ebua wɔ ní wɔkwa esha feemɔ. (Lala 51:12) Kɛ́ wɔfee esha ni yɔɔ hiɛdɔɔ lɛ, esa akɛ wɔkɛɛ asafoŋ onukpai lɛ ni amɛye amɛbua wɔ. (Yak. 5:14, 15) Ekɔɔɔ he eko bɔ ni esha ni wɔfee lɛ yɔɔ hiɛdɔɔ ha lɛ, kɛ́ wɔkai bɔ ni Yehowa wie lɛ diɛŋtsɛ ehe etsɔɔ Mose lɛ, ebaanyɛ eshɛje wɔmii waa. Eha ele akɛ eji, “Nyɔŋmɔ musuŋtsɔlɔ kɛ durolɔ ní toɔ tsui, ní mɔbɔnalɛ kɛ anɔkwale fá pii, ní hiɛɔ mɔbɔnalɛ mli ehaa mɛi akpei abɔ, ní ŋɔɔ tɔmɔ kɛ efɔŋ kɛ esha efaa.” Yehowa tsakeko.—2 Mose 34:6, 7.
18 Yehowa kɛ nɔkwɛmɔnɔ ko ni sa tsu nii kɛwo Israelbii ni tsakeee amɛtsui lɛ shi akɛ ebaajie amɛhe eshai lɛ kwraa, ni kɛ́ etsuɔ tamɔ “lá” po, ebaaha eyɛ tamɔ “snoo.” (Nyɛkanea Yesaia 1:18.) No hewɔ lɛ, te obaafee tɛŋŋ oná bɔ ni Yehowa kɛ eshai faa lɛ he sɛɛ lɛ? Kɛ́ wɔhiɛ sɔ bɔ ni Yehowa kɛ eshai faa, ni wɔtsake wɔtsui lɛ, ekɛ wɔhe eshai lɛ baafa wɔ kwraa.
19. Mɛni he wɔbaasusu yɛ nikasemɔ ni nyiɛ sɛɛ lɛ mli?
19 Te wɔɔfee tɛŋŋ wɔkase bɔ ni Yehowa kɛ mɛi ahe eshai faa amɛ lɛ? Te wɔɔfee tɛŋŋ wɔkɛ mɛi ni efee esha ni yɔɔ hiɛdɔɔ shi amɛtsake amɛtsui lɛɛlɛŋ lɛ ahe eshai afa amɛ lɛ? Nikasemɔ ni nyiɛ sɛɛ lɛ baaye abua wɔ ni wɔpɛi wɔ diɛŋtsɛ wɔmli wɔkwɛ, koni wɔfee wɔnii tamɔ wɔ-Tsɛ, Yehowa, mɔ ni ‘hi ni eŋɔfaa mra’ lɛ.—Lala 86:5.
[Nikasemɔ lɛ he Sanebimɔi]
[Mfoniri ni yɔɔ baafa 24]
Akɛni Yehowa kɛ Manase he eshai fa lɛ hewɔ lɛ, eha eyaye maŋtsɛ ekoŋŋ yɛ Yerusalem
