1, 2. Kɛ́ wɔsusu Yehowa gbɛjianɔtoo ni yɔɔ ŋwɛi kɛ shikpɔŋ lɛ nɔ lɛ he lɛ, mɛni etsirɛɔ wɔ ni wɔfee?

KƐ WƆJWƐŊ bɔ ni wɔfata jeŋ muu fɛɛ gbɛjianɔtoo kpele ko he lɛ nɔ lɛ, wɔjwɛŋmɔ nyɛɛɛ akpele he. Ninai ni yɔɔ Ezekiel yitso 1 lɛ kɛ Daniel yitso 7 lɛ haa wɔnaa gbɛ ni Yehowa tsɔɔ nɔ koni eha eyiŋtoo lɛ aba mli lɛ faŋŋ. Yesu ji mɔ ni nyiɛ Yehowa gbɛjianɔtoo lɛ fã ni yɔɔ shikpɔŋ lɛ nɔ lɛ hiɛ, ni ekɛ gbɛtsɔɔmɔ miiha koni anyɛ atsu shiɛmɔ nitsumɔ lɛ, atsɔse mɛi ni kɛ amɛhe woɔ mli lɛ ni awo amɛ hewalɛ, ni aye abua mɛi krokomɛi ni amɛbajá Yehowa. Enɛ haa wɔnáa hekɛnɔfɔɔ yɛ Yehowa gbɛjianɔtoo lɛ mli waa!—Mat. 24:45.

² Ani okɛ gbɛjianɔtoo ni nɔ bɛ nɛɛ miinyiɛ pɛpɛɛpɛ? Ani bɔ ni ohiɛ dɔɔ yɛ anɔkwale lɛ he lɛ naa miiwa loo eeba shi? Kɛ́ wɔmiisusu saji ni tamɔ nɛkɛ lɛ ahe lɛ, ekolɛ wɔbaayɔse akɛ wɔnijiaŋ miije wui loo hiɛdɔɔ ni wɔkɛje shishi lɛ naa eba shi. Enɛ baanyɛ aba. Ehe bahia ni bɔfo Paulo awo klɛŋklɛŋ afii 100 lɛ mli Kristofoi lɛ hewalɛ ni amɛkɛ hiɛdɔɔ atsu amɛsɔɔmɔ lɛ taakɛ Yesu fee lɛ. Paulo kɛɛ no baaye abua amɛ koni nitsumɔ lɛ ‘akaje amɛtsine ni amɛsusumai anijiaŋ miije wui.’ (Heb. 12:3) Nakai nɔŋŋ kɛ́ wɔsusu nikasemɔ ni tsɔ hiɛ ni tsɔɔ nɔ ni Yehowa gbɛjianɔtoo lɛ tsuɔ amrɔ nɛɛ lɛ he jogbaŋŋ lɛ, ebaaye ebua wɔ koni wɔya nɔ wɔkɛ ekãa kɛ hiɛmiamɔ atsu nitsumɔ lɛ.

3. Mɛni esa akɛ wɔfee koni wɔnijiaŋ akaje wui, ni mɛni he wɔbaasusu yɛ nikasemɔ nɛɛ mli?

³ Shi Paulo tsɔɔ akɛ, ehe miihia ni wɔfee babaoo koni wɔnijiaŋ akaje wui. Etsɔɔ akɛ esaaa akɛ wɔhaa ‘ekpakpafeemɔ tɔɔ wɔ.’ (Gal. 6:9) No hewɔ lɛ, ebiɔ ni wɔfee nɔ ko. Nyɛhaa wɔsusua nibii enumɔ komɛi ni baanyɛ aye abua wɔ koni wɔhiɛdɔɔ lɛ naa akaba shi, ni wɔya nɔ wɔkɛ Yehowa gbɛjianɔtoo lɛ anyiɛ pɛpɛɛpɛ lɛ ahe wɔkwɛa. No sɛɛ lɛ, wɔbaanyɛ  wɔkwɛ nibii nɛɛ ateŋ nɔ ni ehe hiaa ni wɔ loo wɔwekui lɛ afee tsakemɔi yɛ mli.

4. Mɛni hewɔ wɔbaanyɛ wɔkɛɛ akɛ kpeei ji anɔkwa jamɔ lɛ fã ko ni he hiaa waa lɛ?

⁴ He naa ni abuaa kutuu lɛ ji nɔ ko ni he hiaa Yehowa tsuji waa. Bei komɛi lɛ, Yehowa kɛ ŋwɛi bɔfoi lɛ feɔ kpee yɛ ŋwɛi. (1 Maŋ. 22:19; Hiob 1:6; 2:1; Dan. 7:10) Yɛ blema Israel lɛ, Nyɔŋmɔ bi ni maŋ lɛ abua amɛhe naa “koni amɛnu, ni amɛkase.” (5 Mose 31:10-12) Yudafoi ni hi shi yɛ klɛŋklɛŋ afii 100 lɛ mli lɛ kpeɔ yɛ amɛkpeehei lɛ ni amɛkaneɔ Ŋmalɛi lɛ. (Luka 4:16; Bɔf. 15:21) Beni ato Kristofoi asafo lɛ shishi lɛ, amɛtee nɔ amɛbu kpeei lɛ akɛ nɔ ko ni he hiaa waa, ni nakai nɔŋŋ eji ŋmɛnɛ hu. Anɔkwa Kristofoi ‘ahiɛ dɔɔ suɔmɔ kɛ nitsumɔi kpakpai ahe.’ Esa akɛ wɔya nɔ ‘wɔwowoo wɔhe ŋaa, titri lɛ akɛni wɔnaa akɛ Yehowa gbi lɛ miibɛŋkɛ nɛɛ.’—Heb. 10:24, 25.

5. Te wɔɔfee tɛŋŋ wɔwowoo wɔhe hewalɛ kɛ́ wɔtee asafoŋ kpeei?

5. Mɛɛ gbɛi anɔ wɔkpeei lɛ yeɔ ebuaa koni wɔhe awa yɛ mumɔŋ?

⁵ Kpeei lɛ amli ni wɔkɛ wɔhe woɔ lɛ ji gbɛ kome ni sa jogbaŋŋ ni wɔtsɔɔ nɔ wɔwowoɔ wɔhe hewalɛ. Akɛ nɔkwɛmɔnɔ lɛ, wɔbaanyɛ wɔha sanebimɔ ko hetoo, wɔwie ŋmalɛ ko he, loo wɔgba niiashikpamɔ kuku ko ni tsɔɔ bɔ ni Biblia mli shishitoo mla ko baanyɛ aye abua wɔ. (Lala 22:23; 40:10) Wɔ fɛɛ wɔkpɛlɛɔ nɔ akɛ, ekɔɔɔ he eko afii abɔ ni wɔkɛtee asafoŋ kpeei lɛ, saji ahetoi ni wɔnyɛmimɛi hii kɛ yei—gbekɛbii kɛ onukpai—lɛ jɛɔ amɛtsuiŋ amɛhaa lɛ woɔ wɔ hewalɛ waa.

⁶ Mɛɛ yiŋtoi krokomɛi ahewɔ wɔ-Nyɔŋmɔ lɛ buɔ kpeei srɔtoi ni wɔyaa daa lɛ akɛ nɔ ko ni he hiaa lɛ? Asafoŋ kpeei, kpeei bibii, kɛ kpeei wuji yeɔ amɛbuaa wɔ koni wɔná ekãa kɛshiɛ wɔtsɔɔ mɛi fɛɛ, ni shiteekɛwolɔi kɛ mɛi ni booo wɔ toi yɛ wɔshikpɔŋkuku lɛ mli lɛ po fata he. (Bɔf. 4:23, 31) Saji ni asusuɔ he kɛjɛɔ Ŋmalɛ lɛ mli lɛ wajeɔ wɔhemɔkɛyeli lɛ. (Bɔf. 15:32; Rom. 1:11, 12) Nibii ni atsɔɔ yɛ kpeei lɛ ashishi kɛ wɔhe hewalɛ ni wɔwowoɔ lɛ yeɔ ebuaa wɔ ni wɔnáa anɔkwa miishɛɛ, ni ‘ehaa wɔhe jɔɔ wɔ yɛ fĩmɔ gbii amli.’ (Lala 94:12, 13) Gbɛtsɔɔmɔ Kuu lɛ mli Nitsɔɔmɔ Ajinafoi Akuu lɛ ji mɛi ni toɔ nitsɔɔmɔi ni Yehowa webii ni yɔɔ jeŋ fɛɛ lɛ anine shɛɔ nɔ yɛ kpeei ashishi lɛ fɛɛ he gbɛjianɔ. Eŋɔɔ wɔnaa waa akɛ atoɔ nitsɔɔmɔi ni tswaa mɔ emaa shi jogbaŋŋ he gbɛjianɔ yɛ kpeei ashishi otsi fɛɛ otsi yɛ afi lɛ mli!

7, 8. (a) Mɛni ji yiŋtoo titri hewɔ ni wɔyaa asafoŋ kpeei lɛ? (b) Mɛɛ gbɛ nɔ kpeei lɛ yeɔ ebuaa bo?

⁷ Shi nɔ kroko hu yɛ ni he hiaa fe sɛɛnamɔi ni wɔnáa yɛ wɔkpeei lɛ ashishi lɛ. Yiŋtoo titri hewɔ ni wɔkpeɔ kutuu lɛ ji, ni wɔjá Yehowa. (Nyɛkanea Lala 95:6.) Kwɛ hegbɛ kpele ni wɔná akɛ wɔɔjie wɔ-Nyɔŋmɔ ni nɔ bɛ lɛ yi! (Kol. 3:16) Wɔjáa Yehowa daa kɛtsɔ kpeei ni wɔyaa kɛ saji ahetoo ni wɔhaa lɛ nɔ. (Kpoj. 4:11) Ebɛ naakpɛɛ mɔ akɛ awoɔ wɔ hewalɛ ni “wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ”!—Heb. 10:25.

⁸ Ani wɔnaa asafoŋ kpeei lɛ akɛ gbɛ ni Yehowa tsɔɔ nɔ eyeɔ ebuaa wɔ koni wɔfĩ shi yɛ nibii agbɛjianɔtoo fɔŋ nɛɛ mli kɛyashi ebaajie kɛya? Kɛ́ nakai lɛ, wɔbaabu asafoŋ kpeei lɛ akɛ efata “nii ni hi titri” lɛ ahe, ni no hewɔ lɛ wɔbaamia wɔhiɛ wɔya daa yɛ dekã ni wɔbɛ lɛ fɛɛ sɛɛ. (Fil. 1:10) Esaaa akɛ wɔfoɔ asafoŋ kpee ko kwraa mli, ja nɔ ni ba wa.

9. Te wɔfeɔ tɛŋŋ wɔleɔ akɛ shiɛmɔ nitsumɔ lɛ he hiaa waa lɛ?

⁹ Kɛ́ wɔkɛ Yehowa gbɛjianɔtoo lɛ baanyiɛ pɛpɛɛpɛ lɛ, esa akɛ wɔkɛ wɔhe awo shiɛmɔ nitsumɔ lɛ mli kɛmɔ shi. Yesu ji mɔ ni je shiɛmɔ nitsumɔ lɛ shishi beni eyɔɔ shikpɔŋ lɛ nɔ lɛ. (Mat. 28:19, 20) Kɛjɛ no sɛɛ kɛbaa nɛɛ, Maŋtsɛyeli shiɛmɔ kɛ kaselɔfeemɔ nitsumɔ lɛ efee oti titri ni Yehowa gbɛjianɔtoo lɛ tsuɔ he nii. Niiashikpamɔi babaoo yɛ ŋmɛnɛ ni tsɔɔ akɛ ŋwɛi bɔfoi miifĩ wɔnitsumɔ lɛ sɛɛ, ni amɛmiiye amɛmiibua wɔ kɛmiiya mɛi ni “ajie ato naanɔ wala lɛ” aŋɔɔ. (Bɔf. 13:48; Kpoj. 14:6, 7) Yehowa gbɛjianɔtoo lɛ fã ni yɔɔ shikpɔŋ lɛ nɔ lɛ toɔ shiɛmɔ nitsumɔ lɛ he gbɛjianɔ, ni efĩɔ sɛɛ. Ani shiɛmɔ nitsumɔ lɛ ji nɔ ni he hiaa fe fɛɛ yɛ oshihilɛ mli?

10. (a) Mɛɛ gbɛ nɔ nyɛmi nuu ko tsɔɔ ewajeɔ suɔmɔ ni eyɔɔ kɛha anɔkwale lɛ? (b) Mɛɛ gbɛ nɔ shiɛmɔ nitsumɔ lɛ eye ebua bo koni onijiaŋ akaje wui?

¹⁰ Kɛ́ wɔkɛ hiɛdɔɔ shiɛ lɛ, ebaaha suɔmɔ ni wɔyɔɔ kɛha anɔkwale lɛ mli awa. Naa nɔ ni Mitchel, ni ji asafoŋ onukpa ko ni kɛ afii babaoo esɔmɔ, ni eji daa gbɛgbalɔ lɛ kɛɛ: “Misumɔɔ akɛ mikɛ mɛi agba anɔkwale lɛ he sane. Kɛ́ mina sane hee ko yɛ Buu-Mɔɔ loo Awake! lɛ mli lɛ, minyaa nilee, niiashishinumɔ, kɛ bɔ ni akɛ ŋaa ŋmala saji lɛ he waa. Mihe tswaa shi kɛkɛ ni mikɛyatsu nii yɛ shiɛmɔ nitsumɔ lɛ mli, ni makwɛ bɔ ni  mɛi baafee amɛnii yɛ he amɛha, kɛ bɔ ni mafee matee amɛmiishɛɛ shi.” Mitchel kɛɛ hu akɛ, shiɛmɔ nitsumɔ lɛ yeɔ ebuaa lɛ ni ekɛ nibii ni he hiaa waa lɛ yeɔ klɛŋklɛŋ gbɛhe yɛ eshihilɛ mli, ni ehaaa nɔ ko nɔ ko afite be ni eto kɛha shiɛmɔ nitsumɔ lɛ. Wɔ hu kɛ́ wɔkɛ hiɛdɔɔ tsu sɔɔmɔ ni Nyɔŋmɔ etu ewo wɔdɛŋ lɛ, ebaaye ebua wɔ ni wɔya nɔ wɔfĩ shi shiŋŋ yɛ naagbee gbii nɛɛ amli.—Nyɛkanea 1 Korintobii 15:58.

11. Mɛni hewɔ esa akɛ wɔkane woji fɛɛ ni wɔnine shɛɔ nɔ lɛ ni wɔjwɛŋ nɔ lɛ?

¹¹ Woji babaoo ni Yehowa haa akalaa lɛ ji gbɛ kome ni etsɔɔ nɔ ewajeɔ wɔ. Ekolɛ okane wɔwoji lɛ eko ni owie pɛŋ akɛ: ‘Enɛ lɛ mi aŋma aha! Etamɔ nɔ ni Yehowa ha aŋma wolo nɛɛ aha mi!’ Nɔ ko hewɔ onu he nakai lɛ. Yehowa tsɔɔ enɛɛmɛi anɔ etsɔɔ wɔ nii, ni etsɔɔ wɔ gbɛ hu. Ewie akɛ: “Magbele ojwɛŋmɔ mli ni matsɔɔo gbɛ ni onyiɛ nɔ.” (Lala 32:8) Ani wɔbɔɔ mɔdɛŋ akɛ wɔbaakane woji fɛɛ ni wɔnine shɛɔ nɔ lɛ, ni wɔjwɛŋ nɔ? Kɛ́ wɔfee nakai lɛ, wɔbaaya nɔ wɔkɛ hiɛdɔɔ atsu nii yɛ naagbee gbii ni jaraa nɛɛ amli.—Nyɛkanea Lala 1:1-3; 35:28; 119:97.

12. Mɛni kɛ́ wɔfee lɛ ebaaha wɔhiɛ asɔ wɔwoji lɛ?

¹² Kɛ́ wɔjwɛŋ nɔ ni atsuɔ dani wɔnine shɛɔ wɔwoji lɛ anɔ daa lɛ nɔ lɛ, ebaaha wɔhiɛ asɔ wɔwoji lɛ waa. Dani abaakala wɔwoji lɛ eko loo akɛbaawo wɔ-Wɛb saiti lɛ nɔ lɛ, Gbɛtsɔɔmɔ Kuu lɛ mli Niŋmaa Ajinafoi Akuu lɛ kwɛɔ ni ataoɔ nii amli, aŋmalaa, akaneɔ nɔ ni aŋmala lɛ mli, akɛ mfonirii woɔ mli, ni atsɔɔ shishi kɛyaa wiemɔi krokomɛi amli. Nitsumɔhe niji ni kalaa woji lɛ kɛ woji lɛ majeɔ asafoi srɔtoi ni yɔɔ jeŋ fɛɛ lɛ. Mɛni hewɔ atsuɔ enɛɛmɛi fɛɛ lɛ? Bɔni afee ni anyɛ alɛ Yehowa webii lɛ jogbaŋŋ yɛ mumɔŋ. (Yes. 65:13) Nyɛhaa wɔkanea woji fɛɛ ni wɔnine shɛɔ nɔ kɛtsɔ Yehowa gbɛjianɔtoo lɛ nɔ lɛ, koni wɔná he sɛɛ.—Lala 119:27.

13, 14. Namɛi fĩɔ Yehowa gbɛjianɔtoo lɛ sɛɛ yɛ ŋwɛi, ni te wɔɔfee tɛŋŋ wɔfee nakai nɔŋŋ yɛ shikpɔŋ lɛ nɔ lɛ?

¹³ Yɛ ninaa ni ajie atsɔɔ bɔfo Yohane lɛ mli lɛ, ena Yesu ni eta okpɔŋɔ yɛŋ ko nɔ ni eyaakpata mɛi ni tseɔ Yehowa hiɛ atua lɛ ahiɛ. (Kpoj. 19:11-15) Ena bɔfoi anɔkwafoi lɛ kɛ mɛi ni afɔ amɛ mu lɛ ateŋ mɛi ni atee amɛ shi kɛtee ŋwɛi momo lɛ fata Yesu he kɛmiiwu, ni enɛ woɔ wɔhemɔkɛyeli lɛ mli hewalɛ waa! (Kpoj. 2:26, 27) Enɛ ji nɔkwɛmɔnɔ fɛfɛo ni tsɔɔ wɔ bɔ ni esa akɛ wɔfĩ mɛi ni nyiɛ hiɛ yɛ Yehowa gbɛjianɔtoo lɛ mli lɛ asɛɛ!

¹⁴ Yɛ gbɛ ni tamɔ nakai nɔŋŋ nɔ lɛ, asafo babaoo lɛ fĩɔ nitsumɔ ni Kristo nyɛmimɛi ni afɔ amɛ mu ni yɔɔ shikpɔŋ lɛ nɔ lolo, ni nyiɛɔ asafo lɛ hiɛ lɛ tsuɔ lɛ sɛɛ. (Nyɛkanea Zakaria 8:23.) Mɛɛ gbɛ nɔ wɔbaatsɔ wɔtsɔɔ akɛ wɔfĩɔ Yehowa gbɛjianɔtoo lɛ sɛɛ? Gbɛ kome ji, ni wɔbaaba wɔhe shi wɔha mɛi ni nyiɛ hiɛ lɛ. (Heb. 13:7, 17) Esa akɛ oje enɛ shishi kɛjɛ osafo lɛ mli. Ani bɔ ni wɔwieɔ asafoŋ onukpai ahe wɔhaa lɛ tsɔɔ akɛ wɔbuɔ amɛ kɛ nitsumɔ ni amɛtsuɔ lɛ? Ani wɔtsɔɔ wɔbii lɛ ni amɛjie bulɛ kpo amɛtsɔɔ hii anɔkwafoi nɛɛ, ni amɛbo amɛŋaawoo ni damɔ Biblia lɛ nɔ lɛ toi? Kɛfata he lɛ, ani wɔkɛ wɔwekui lɛ susuɔ bɔ ni wɔɔfee wɔtsu onia kɛfĩ jeŋ muu fɛɛ nitsumɔ lɛ sɛɛ lɛ he? (Abɛi 3:9; 1 Kor. 16:2; 2 Kor. 8:12) Ani wɔnaa wɔhe ni wɔkɛwoɔ Maŋtsɛyeli Asa lɛ nɔ saamɔ lɛ mli lɛ akɛ hegbɛ kpele? Kɛ́ Yehowa na akɛ wɔmiifĩ egbɛjianɔtoo lɛ sɛɛ yɛ nɛkɛ gbɛ nɔ lɛ, ehaa wɔ emumɔ  krɔŋkrɔŋ lɛ. Ni emumɔ lɛ yaa nɔ ewajeɔ wɔ bɔni afee ni wɔnijiaŋ akaje wui yɛ naagbee gbii nɛɛ amli.—Yes. 40:29-31.

15. Mɛni hewɔ esa akɛ wɔya nɔ wɔmia wɔhiɛ ni wɔfee nɔ ni sa Yehowa hiɛ lɛ?

¹⁵ Kɛ́ wɔmiitao ni wɔfĩ shi, ni wɔkɛ Yehowa gbɛjianɔtoo lɛ anyiɛ lɛ, esa akɛ wɔhi shi yɛ gbɛ ni saa Yehowa hiɛ lɛ nɔ. (Efe. 5:10, 11) Satan, jeŋ fɔŋ nɛɛ, kɛ emuu ni wɔyeee lɛ haa ewaa kɛhaa wɔ akɛ wɔɔfee nɔ ni ja. Ehe miihia ni nyɛteŋ mɛi komɛi amia nyɛhiɛ waa daa gbi koni nyɛnyɛ nyɛhiɛ nyɛkɛ Yehowa teŋ wekukpaa lɛ mli. Enɛ haa Yehowa sumɔɔ nyɛsane waa. Nyɛnijiaŋ akajea wui! Kɛ́ wɔhi shi yɛ gbɛ ni saa Yehowa hiɛ lɛ nɔ lɛ, wɔtsui baanyɔ wɔmli, wɔbaaná miishɛɛ, ni Yehowa baakpɛlɛ wɔnɔ.—1 Kor. 9:24-27.

16, 17. (a) Kɛ́ wɔfee esha ni yɔɔ hiɛdɔɔ lɛ, mɛni esa akɛ wɔfee? (b) Mɛni wɔbaanyɛ wɔkase kɛjɛ Anne nɔkwɛmɔnɔ lɛ mli?

¹⁶ Shi kɛ́ ofee esha ni yɔɔ hiɛdɔɔ lɛ, mɛni esa akɛ ofee? Bɔɔ mɔdɛŋ ni oha aye abua bo. Kɛ́ otsĩmɔ nibii anɔ lɛ, sane lɛ mli baawo wu. Kaimɔ nɔ ni David wie beni ekɛ eshai ni efee lɛ tee lɛ. Ekɛɛ akɛ: “Miwui ahe kwa yɛ mimli yɛ midaa hũumɔ hewɔ.” (Lala 32:3) Kɛ́ wɔbɔ mɔdɛŋ akɛ wɔbaatsĩmɔ eshai ni wɔfee lɛ anɔ lɛ, ebaaha wɔmiishɛɛ atã, ni ekolɛ ebaafite wɔ kɛ Yehowa teŋ wekukpaa lɛ. Shi kɛ́ wɔjaje lɛ, ‘aaana wɔ mɔbɔ.’—Abɛi 28:13.

¹⁷ Susumɔ nyɛmi yoo ko ni atsɛɔ lɛ Anne * lɛ nɔkwɛmɔnɔ lɛ he okwɛ. Beni Anne eye aaafee afii 18 lɛ, esɔmɔ akɛ daa gbɛgbalɔ. Shi ebɔi nibii gbohii komɛi feemɔ. Enɛ ha ehenilee yi lɛ waa. Ekɛɛ akɛ: “Mimiishɛɛ fɛɛ tã, ni mihao.” Mɛni efee? Ekɛɛ gbi ko lɛ asusu Yakobo 5:14, 15 lɛ he yɛ asafoŋ kpee ko shishi. Enɛ ha Anne yɔse akɛ yelikɛbuamɔ he miihia lɛ, no hewɔ lɛ eyana asafoŋ onukpai lɛ. Sɛɛ mli lɛ ewie akɛ: “Nakai ŋmalɛ lɛ bafee tamɔ tsofa ko ni Yehowa ŋma eha mi beni mihe yeɔ yɛ mumɔŋ lɛ. Tsofa lɛ kɔmɔ wa, shi etsaa mɔ. Mikɛ ŋaawoo ni ajɛ ŋmalɛi lɛ amli akɛha mi lɛ tsu nii, ni eye ebua mi.” Amrɔ nɛɛ Anne kɛ ekãa miisɔmɔ Yehowa ekoŋŋ, ni ehenilee eyiii lɛ dɔŋŋ.

18. Mɛni esa akɛ efee wɔfaishitswaa?

¹⁸ Kwɛ hegbɛ kpele ni eji akɛ wɔyɛ Yehowa gbɛjianɔtoo ni nɔ bɛ nɛɛ mli yɛ naagbee gbii nɛɛ amli! Nyɛhaa wɔtswaa wɔfai shi akɛ wɔbuŋ nɔ ni wɔyɔɔ lɛ flɛflɛ. Moŋ lɛ, nyɛhaa wɔfea ekome akɛ weku kɛya asafoŋ kpeei daa, wɔkɛ hiɛdɔɔ ashiɛ wɔha mɛi ni yɔɔ wɔshikpɔŋkuku lɛ mli lɛ, ni wɔkane wɔwoji lɛ fɛɛ ni wɔná he sɛɛ. Kɛfata he lɛ, nyɛhaa wɔyaa nɔ wɔfĩa mɛi ni atu sɔɔmɔ hegbɛi awo amɛdɛŋ lɛ asɛɛ, ni wɔhi shi yɛ gbɛ ni saa Yehowa hiɛ lɛ nɔ. Kɛ́ wɔfee nakai lɛ, ebaaha wɔkɛ Yehowa gbɛjianɔtoo lɛ anyiɛ pɛpɛɛpɛ ní wɔnijiaŋ ejeee wui!