1. Mɛni esa akɛ wɔfee koni wɔhiɛ hemɔkɛyeli ni mli wa ni wɔyɔɔ lɛ mli?

MƐI babaoo kɛɔ akɛ, nɔ ni amɛkɛ amɛhiŋmɛii naa lɛ pɛ amɛheɔ amɛyeɔ. Shi Biblia lɛ kɛɔ akɛ, “Nyɔŋmɔ lɛ, mɔ ko enako lɛ pɛŋ.” (Yoh. 1:18) Enɛ hewɔ lɛ, te wɔɔfee tɛŋŋ wɔye wɔbua mɛi ni tamɔ nɛkɛ ni amɛhe Yehowa amɛye lɛ? Ni wɔ hu, te wɔɔfee tɛŋŋ wɔhiɛ hemɔkɛyeli ni mli wa ni wɔyɔɔ yɛ Yehowa, ni ji “Nyɔŋmɔ ni anaaa lɛ” mli lɛ mli lɛ? (Kol. 1:15) Nɔ klɛŋklɛŋ ni esa akɛ wɔfee ji, ni wɔyɔse tsɔɔmɔi ni ehà anɔkwale ni kɔɔ Yehowa he lɛ nɔ lɛ. Kɛkɛ lɛ, wɔtsɔ Biblia lɛ nɔ wɔkumɔ susumɔ fɛɛ susumɔ ni “woɔ ehe nɔ eshiɔ Nyɔŋmɔ nilee lɛ.”—2 Kor. 10:4, 5.

2, 3. Mɛɛ tsɔɔmɔi enyɔ komɛi haaa mɛi ale anɔkwale ni kɔɔ Nyɔŋmɔ he lɛ?

² Apasa tsɔɔmɔi ni ehe shi waa ni haaa mɛi ale anɔkwale ni kɔɔ Nyɔŋmɔ he lɛ ateŋ ekome ji sutsakemɔ tsɔɔmɔ lɛ. Nɛkɛ adesai atsɔɔmɔ nɛɛ teɔ shi ewoɔ Biblia lɛ, ni ehaaa mɛi aná hiɛnɔkamɔ. Kɛ́ wɔɔkɛɛ lɛ, nɔ ni sutsakemɔ tsɔɔmɔ lɛ tsɔɔ ji akɛ, abɔɔɔ adesai kɛ kooloi, amɛba kɛkɛ; ni tsɔɔ akɛ adesai leee yiŋtoo pɔtɛɛ hewɔ ni amɛyɔɔ shihilɛ mli.

³ Kristendombii komɛi hu ni kɔɔ Biblia mli saji hiɛaŋhiɛaŋ lɛ tsɔɔ akɛ, jeŋ muu lɛ fɛɛ, ní shikpɔŋ lɛ kɛ enɔ bɔɔ nii fɛɛ fata he lɛ, eye afii akpei fioo komɛi pɛ. Nɛkɛ mɛi nɛɛ, ní ekolɛ amɛheɔ amɛyeɔ akɛ Biblia lɛ jɛ Nyɔŋmɔ ŋɔɔ lɛ kɛɔ akɛ Nyɔŋmɔ kɛ gbii ekpaa, ni eko fɛɛ eko heɔ ŋmɛlɛtswai 24 bɔ nɔ fɛɛ nɔ aaafee afii akpei fioo komɛi ni eho nɛ. Mɛi ni heɔ tsɔɔmɔ nɛɛ amɛyeɔ lɛ kpoɔ odaseyelii fɛɛ ni jeŋ shikpalɔi kɛhaa ni kɛ amɛtsɔɔmɔ lɛ eyaaa lɛ. Enɛ hewɔ lɛ, tsɔɔmɔ nɛɛ haa ewaa kɛhaa mɛi akɛ amɛaahe Biblia lɛ amɛye, ni ehaa efeɔ tamɔ nɔ ni nilee bɛ Biblia mli saji lɛ amli, ni amɛjaaa. Mɛi ni tsɔɔ tsɔɔmɔ nɛɛ haa wɔkaiɔ mɛi komɛi ni hi shi yɛ klɛŋklɛŋ afii 100 lɛ mli ni hiɛ dɔɔ yɛ Nyɔŋmɔ he moŋ, “shi jeee nilee naa” lɛ. (Rom. 10:2) Te wɔɔfee tɛŋŋ wɔkɛ Nyɔŋmɔ Wiemɔ lɛ atsu nii kɛkumɔ “mɔji wuji,” ni ji sutsakemɔ tsɔɔmɔ lɛ kɛ apasa tsɔɔmɔi  krokomɛi lɛ? * Ja wɔ diɛŋtsɛ lɛ, wɔmia wɔhiɛ wɔná nibii ni Biblia lɛ tsɔɔ lɛ ahe anɔkwa nilee dani wɔbaanyɛ wɔfee enɛ.

4. Mɛni nɔ esa akɛ wɔtsɔ wɔná hemɔkɛyeli?

⁴ Biblia lɛ woɔ wɔ hewalɛ ni wɔtao nilee tamɔ ataoɔ jwetri lɛ. (Abɛi 10:14) Yehowa miisumɔ ni wɔtsɔ anɔkwa saji kɛ niiahesusumɔ nɔ wɔhe lɛ wɔye, shi jeee adesai anilee loo jamɔŋ blemasaji. (Nyɛkanea Hebribii 11:1.) Shi dani wɔbaahe Nyɔŋmɔ nɔ wɔye lɛ, ja wɔná nɔmimaa akɛ Yehowa yɛ. (Nyɛkanea Hebribii 11:6.) Jeee nɔ ko ni wɔmiitao wɔhe wɔye kɛkɛ lɛ hewɔ wɔheɔ wɔyeɔ akɛ eyɛ lɛ, shi moŋ akɛni wɔpɛi anɔkwa saji lɛ amli ni wɔjwɛŋ amɛnɔ jogbaŋŋ lɛ hewɔ.—Rom. 12:1.

5. Mɛni ji yiŋtoo kome hewɔ ni wɔbaanyɛ wɔná nɔmimaa akɛ Nyɔŋmɔ yɛ?

⁵ Eyɛ mli akɛ wɔnaaa Nyɔŋmɔ moŋ, shi bɔfo Paulo tsɔɔ yiŋtoo kome hewɔ ni wɔbaanyɛ wɔná nɔmimaa akɛ Nyɔŋmɔ yɛ lɛ. Paulo ŋma yɛ Yehowa he akɛ: “Ehe nii ni anaaa ni ji enaanɔ hewalɛ kɛ nyɔŋmɔyeli lɛ fɛɛ lɛ, kɛjɛ jeŋbɔɔ mli beebe lɛ atsɔɔ enii ni efee lɛ anɔ ayɔseɔ ni anaa faŋŋ.” (Rom. 1:20) Te ooofee tɛŋŋ oye obua mɔ ko ni heee yeee akɛ Nyɔŋmɔ yɛ lɛ koni ehe nɔ ni Paulo kɛɛ nɛɛ eye lɛ? Obaanyɛ okɛ lɛ asusu adebɔɔ nibii ni nyiɛ sɛɛ nɛɛ ni haa anaa akɛ wɔ-Bɔlɔ lɛ yɛ hewalɛ kɛ nilee lɛ ahe.

6, 7. Mɛɛ gbɛ nɔ anaa hewalɛ ni Yehowa yɔɔ lɛ yɛ adebɔɔ nibii enyɔ komɛi ni buɔ shikpɔŋ lɛ he lɛ amli?

⁶ Anaa hewalɛ ni Yehowa yɔɔ lɛ yɛ nibii enyɔ komɛi ni efee ni buɔ wɔhe lɛ amli, nomɛi ji kɔɔyɔɔ kɛ stiili hewalɛ ni ebɔle shikpɔŋ lɛ. Akɛ nɔkwɛmɔnɔ lɛ, kɔɔyɔɔ ni ebɔle shikpɔŋ lɛ yeɔ ebuaa wɔ yɛ gbɛi babaoo nɔ fe kɔɔyɔɔ ni ehaa wɔnáa wɔmuɔ lɛ kɛkɛ. Tɛi wuji komɛi ni hoɔ kɛfoi yɛ ŋwɛiniiaŋ, ni kɛ́ eko tse ebagbee shikpɔŋ lɛ nɔ lɛ, ebaanyɛ efite nii waa. Shi bei pii lɛ, tɛi nɛɛ shɛɛɛ shikpɔŋ lɛ nɔ, ejaakɛ kɛ́ amɛbote kɔɔyɔɔ ni ebɔle shikpɔŋ nɛɛ he lɛ mli lɛ, amɛshãa. Kɛ́ eko miishã beni je ena lɛ, ekpɛlɛɔ tamɔ ŋulami ni etse yɛ ŋwɛiniiaŋ.

⁷ Stiili hewalɛ ni ebɔle shikpɔŋ lɛ hu buɔ wɔhe. Nɛkɛ hewalɛ nɛɛ jɛɔ shikpɔŋ lɛ shishi tɔ̃ɔ. Dade ni esere etsɔ tamɔ ŋmɔtɔ ni mli edɔ ni yɛ shikpɔŋ lɛ shishi tɔ̃ɔ. Ni ŋmɔtɔ ni bɔleɔ ehe nɛɛ mli stiili hewalɛ lɛ jɛɔ ni ekpeleɔ shikpɔŋ lɛ kɛ ehewɔŋ fɛɛ kɛyaa ŋwɛiniiaŋ po. Nɛkɛ hewalɛ nɛɛ buɔ wɔhe kɛjɛɔ dɔlɛ ni baanyɛ aye mɔ awui ni jɛɔ hulu lɛ mli kɛbaa shikpɔŋ lɛ nɔ lɛ he. Jeee stiili hewalɛ nɛɛ kulɛ, dɔlɛ ni jɛɔ hulu lɛ mli lɛ baashã nɔ fɛɛ nɔ ni yɔɔ shikpɔŋ lɛ nɔ lɛ. Shi stiili hewalɛ nɛɛ saa dɔlɛ nɛɛ naa loo ehaa ekuɔ esɛɛ kɛyaa ŋwɛiniiaŋ ekoŋŋ. Anaa bɔ ni stiili hewalɛ nɛɛ tsuɔ nii ehaa lɛ yɛ kanei fɛfɛji ni kɛ́ je na lɛ amɛhoɔ yɛ kɔɔyɔɔ lɛ mli yɛ shikpɔŋ lɛ kooyi kɛ ewuoyi lɛ. Enɛ tsɔɔ faŋŋ akɛ Yehowa yɛ ‘hewalɛ kpele.’—Nyɛkanea Yesaia 40:26.

8, 9. Mɛɛ gbɛ nɔ gbɛjianɔ ni Yehowa eto ni ekɛbaa wala yi lɛ haa anaa akɛ ele nii?

⁸ Wɔnaa Yehowa nilee lɛ yɛ gbɛjianɔ ni eto koni ekɛbaa wala yi yɛ shikpɔŋ nɔ lɛ mli. Ŋɔɔ lɛ akɛ oyɛ maŋ ko ni atswa gbogbo awo he kɛ emli mɛi akpekpei abɔ mli. Nu ni mli tse baaa maŋ lɛ mli, ni anyɛɛɛ ajie jwɛi kɛ nu muji ni yɔɔ jɛmɛ lɛ kɛya he ko hu. Etsɛŋ ni maŋ ni tamɔ nɛkɛ lɛ mli baawo muji kpɔtɔɔ ni jɛmɛ hilɛ baajara. Yɛ gbɛ ko nɔ lɛ, wɔshikpɔŋ lɛ tamɔ maŋ ni atswa gbogbo awo he nɛɛ. Nu ni mli tse ni yɔɔ nɔ lɛ faaa, ni anyɛɛɛ ajie jwɛi kɛ nu muji ni yɔɔ mli lɛ kɛya ŋwɛiniiaŋ. Kɛlɛ, nɛkɛ maŋ ni atswa gbogbo awo he nɛɛ  yeɔ ebuaa bɔɔ nii ni hiɛ kamɔ aaafee akpekpei toi akpei abɔ ni yɔɔ mli lɛ ni amɛhiɔ wala mli. Mɛni hewɔ ebaa lɛ nakai? Nɔ hewɔ lɛ ji akɛ, shikpɔŋ lɛ tsɔɔ naakpɛɛ gbɛ nɔ ehaa bɔɔ nii komɛi nyɛɔ amɛkɛ nibii ni bɔɔ nii krokomɛi kɛtsu nii momo lɛ tsuɔ nii ekoŋŋ koni amɛ fɛɛ amɛya nɔ amɛhi wala mli.

⁹ Nyɛhaa wɔsusuɔ bɔ ni feɔ ni shikpɔŋ lɛ haa wɔnáa kɔɔyɔɔ ni wɔmuɔ lɛ (oxygen) he wɔkwɛa. Gbɔmɛi kɛ kooloi akpekpei toi akpei abɔ muɔ kɔɔyɔɔ nɛɛ, ni amɛjieɔ kɔɔyɔɔ kroko (carbon dioxide) kpo. Fɛɛ sɛɛ po lɛ, kɔɔyɔɔ ni wɔmuɔ lɛ babaoo yɛ lolo, ni etãaa da. Mɛni hewɔ? Ejaakɛ tsei gbalaa kɔɔyɔɔ ni wɔjieɔ lɛ kpo lɛ kɛfataa nu, dɔlɛ ni jɛɔ hulu la lɛ mli, kɛ niyenii hewalɛ ni yɔɔ sũ mli lɛ he ni amɛkɛfeɔ niyenii, ni amɛjieɔ kɔɔyɔɔ ni wɔmuɔ lɛ kpo. Kɛ́ wɔmu kɔɔyɔɔ ni tsei jieɔ lɛ kpo lɛ, belɛ wɔmiije nifeemɔ nɛɛ shishi ekoŋŋ. Atsɛɔ nifeemɔ nɛɛ yɛ Blɔfo mli akɛ fotosintɛsis. No hewɔ lɛ yɛ gbɛ ko nɔ lɛ, Yehowa bɔ tsei lɛ koni etsɔ nɔ eha ‘adesai wala kɛ mumɔ.’ (Bɔf. 17:25) Enɛ ji nilee ni nɔ bɛ diɛŋtsɛ!

10, 11. Mɛɛ gbɛ nɔ bɔ ni Yehowa bɔ abɛi ko kɛ gɛnsɛgɛnsɛ lɛ haa wɔnaa akɛ ele nii waa?

¹⁰ Anaa bɔ ni Yehowa le nii lɛ yɛ adebɔɔ nibii srɔtoi ni wala yɔɔ amɛmli ni yɔɔ shikpɔŋ nɔ lɛ hu mli. Niiamlitaolɔi tsɔɔ akɛ, ayɛ bɔɔ nii ni hiɛ kamɔ nɛɛ aaafee akpekpei 2 kɛmiimɔ akpekpei 100 yɛ shikpɔŋ lɛ nɔ. (Nyɛkanea Lala 104:24.) Nyɛhaa wɔsusua bɔ ni ejɛ nilee mli ebɔ nibii nɛɛ ekomɛi lɛ he wɔkwɛa.

¹¹ Akɛ nɔkwɛmɔnɔ lɛ, ayɛ abɛi ko (monarch butterfly) ni e-ansɔ dalɛ kɛ pɛn naabu baafee pɛ. Kɛlɛ, hulu lɛ yeɔ ebuaa abɛi nɛɛ ni enyɛɔ efilikiɔ aaafee kilomitai 3,000 kɛjɛɔ Canada kɛyaa koo ko mli yɛ Mexico. Shi akɛni hulu lɛ jɛɔ shikpɔŋ lɛ afã kome kɛyaa afã kroko hewɔ lɛ, te abɛi nɛɛ feɔ tɛŋŋ eyashɛɔ ní elaajeee lɛ? Yehowa fee abɛi nɛɛ ansɔ bibioo lɛ bɔ ni baaha eyɔse bɔ ni hulu lɛ tsiɔ ehe lɛ, ni enyɛ eyashɛ he ni eyaa lɛ ni elaajeee. Agbɛnɛ, susumɔ gɛnsɛgɛnsɛ, ni mɛi komɛi tsɛɔ lɛ gbekɛbii aligɔta lɛ he okwɛ. Kooloo nɛɛ yɛ hiŋmɛi wuji enyɔ. Eyɛ nɔ ni yɔɔ hiŋmɛi mli ni haa anaa nii (lens) lɛ ekomekomei aaafee 30,000 sɔŋŋ yɛ ehiŋmɛii lɛ eko fɛɛ eko mli. Bɔ ni kooloo nɛɛ hiŋmɛii lɛ yɔɔ hewɔ lɛ, kulɛ esa akɛ kɛ́ eekwɛ nɔ ko lɛ, ena lɛ pii ni eyiŋ afutu lɛ, shi e-ansɔ bibioo lɛ haa enyɛɔ enaa nii lɛ jogbaŋŋ ni enyɛɔ enaa nɔ fɛɛ nɔ ni tsiɔ ehe bibioo po yɛ he ni eyɔɔ lɛ.

12, 13. Mɛni haa bɔ ni Yehowa fee wala yibii ni yɔɔ ogbɔmɔtso lɛ mli lɛ feɔ bo naakpɛɛ lɛ?

¹² Bɔ ni Yehowa fee wala yibii ni yɔɔ bɔɔ nii fɛɛ ni hiɛ kamɔ lɛ amli lɛ yɛ naakpɛɛ po fe nibii ni wɔsusu he nɛɛ. Akɛ nɔkwɛmɔnɔ lɛ, wala yibii aaafee akpekpe toi akpekpei 100 yɛ wɔgbɔmɔtso lɛ mli. Ayɛ nɔ ko tamɔ kpãa yɛ wala yibii nɛɛ ateŋ eko fɛɛ eko mli ni atsɛɔ lɛ DNA (deoxyribonucleic acid). Saji titrii ni tsɔɔ bɔ ni esa akɛ mɔ ko gbɔmɔtso aji aha, tamɔ ekwɔlɛ, ehiŋmɛii adaramɔ, ehewolo nɔ su, kɛ ekrokomɛi yɛ DNA lɛ mli.

 ¹³ Te saji ni yɔɔ DNA lɛ mli lɛ fa ha tɛŋŋ? Ha wɔkɛ saji ni yɔɔ DNA ni egbi ni falɛ ji awale bibioo kome lɛ mli lɛ ato saji ni abaanyɛ akɛwo CD nɔ lɛ he wɔkwɛ. Abaanyɛ akɛ saji fɛɛ ni yɔɔ dishinari mli lɛ awo CD kome nɔ, ni enɛ ji nɔ ko ni yɔɔ naakpɛɛ waa, ejaakɛ CD ji nɔ ko bibioo ko kɛkɛ. Shi kɛ́ akɛɛ akɛ saji ni yɔɔ DNA ni egbi ni falɛ ji awale bibioo kome lɛ mli lɛ baawo CD nɔ lɛ, ebaahe CD komekomei akpekpe toi akpekpei enumɔ!

14. Te nibii ni jeŋ shikpalɔi ena lɛ haa onuɔ he ohaa tɛŋŋ?

¹⁴ Maŋtsɛ David tsɔɔ akɛ etamɔ nɔ ni Yehowa eŋma saji ni he hiaa kɛha adesa gbɔmɔtso lɛ bɔɔ lɛ yɛ wolo mli. Ewie Yehowa Nyɔŋmɔ he akɛ: “Beni miji lá kukuli kɛkɛ lɛ, ohiŋmɛii na; ni gbii ni atotoi ni amɛteŋ ekome folo shɛko lɛ, aŋma fɛɛ yɛ owolo lɛ mli.” (Lala 139:16) Enɛ haa wɔnaa nɔ hewɔ ni David jie Yehowa yi beni ejwɛŋ bɔ ni abɔ lɛ yɛ naakpɛɛ gbɛ nɔ aha lɛ he lɛ. Nibii komɛi ni jeŋ shikpalɔi ena yɛ afii fioo komɛi ni eho nɛ lɛ amli lɛ haa wɔnaa kpɛɔ wɔhe waa kɛ́ wɔjwɛŋ bɔ ni Yehowa bɔ wɔ eha lɛ he. Nibii ni amɛna nɛɛ haa wɔnuɔ he taakɛ lalatsɛ lɛ nu he lɛ nɔŋŋ. Ewie akɛ: “Miidao shi, ejaakɛ bɔ ni atsɔ afee mi lɛ yɛ gbeyei kɛ naakpɛɛ; onitsumɔi lɛ yɛ naakpɛɛ, ni misusuma le enɛ krɛdɛɛ.” (Lala 139:14) Adebɔɔ nibii ni ebɔle wɔ lɛ haa wɔnaa faŋŋ akɛ Nyɔŋmɔ yɛ!

15, 16. Mɛɛ gbɛ nɔ wɔwoji lɛ eye ebua mɛi ni eha amɛkase Yehowa adebɔɔ nibii lɛ ahe nii?

¹⁵ Awake! wolo tɛtrɛɛ lɛ kɛ afii nyɔŋmai abɔ eye ebua mɛi akpekpei abɔ koni amɛkase Nyɔŋmɔ he nii kɛtsɔ nibii ni ebɔ lɛ anɔ. Akɛ nɔkwɛmɔnɔ lɛ, September 2006 Awake! lɛ hiɛ yitso akɛ, “Is There a Creator?” (Ani Bɔlɔ ko Yɛ?) Aje gbɛ afee koni akɛye abua mɛi ni sutsakemɔ tsɔɔmɔ lɛ kɛ apasa tsɔɔmɔi krokomɛi eshwila amɛ lɛ koni amɛna anɔkwale lɛ. Nyɛmi yoo ko ni yɔɔ United States nitsumɔhe nine lɛ wie wolo krɛdɛɛ nɛɛ he akɛ: “Wolo krɛdɛɛ nɛɛ he tafãa lɛ tee nɔ jogbaŋŋ. Yoo ko bi ní miha lɛ wolo lɛ 20. Eji tsɔɔlɔ ni tsɔɔ adebɔɔ nibii ahe nii ni eesumɔ ni eskulbii lɛ ateŋ mɔ fɛɛ mɔ aná wolo lɛ eko.” Nyɛmi nuu ko hu ŋma akɛ: “Mikɛ mihe ewo shiɛmɔ nitsumɔ lɛ mli kɛjɛ afi 1940 naagbee afii lɛ amli ni miihe maye afii 75, shi mináko miishɛɛ ni tamɔ nɛkɛ dã yɛ shiɛmɔ nitsumɔ lɛ mli tamɔ bɔ ni miná yɛ nyɔɔŋ nɛɛ nɔ beni wɔjaa Awake! wolo krɛdɛɛ lɛ.”

¹⁶ Kɛjɛ afi 2008 kɛbaa nɛɛ, akɛ sane ni yitso ji, “Was It Designed?” (Ani Aje Gbɛ Afee?) lɛ ewo Awake! wolo tɛtrɛɛ lɛ babaoo mli. Nɛkɛ saji ni sɛɛ kɛlɛɛɛ nɛɛ haa anaa bɔ ni gbɛ ni atsɔ nɔ abɔ nibii lɛ yɔɔ naakpɛɛ ha, ni etsɔɔ gbɛi anɔ ni adesai ebɔ mɔdɛŋ akɛ amɛaasue Bɔlɔ lɛ. Beni ajie wolo bibioo ni ji, Was Life Created? (Ani Abɔ Nibii ni Wala Yɔɔ Amɛmli Lɛ?) lɛ kpo yɛ afi 2010 mli lɛ, eye ebua mɛi ni amɛwo Nyɔŋmɔ hiɛ nyam. Ato mfonirii fɛfɛji kɛ akrabatsai ni yɔɔ mli lɛ ahe gbɛjianɔ koni eha wɔná Yehowa adebɔɔ nibii lɛ ahe miishɛɛ fe tsutsu lɛ. Sanebimɔi ni yɔɔ fã fɛɛ fã naagbee lɛ yeɔ ebuaa nikanelɔ lɛ koni eshwie eyiŋ yɛ sane ni ekane lɛ he. Ani onyɛ okɛ wolo bibioo nɛɛ etsu nii beni oshiɛɔ yɛ shĩa kɛ shĩa, oyeɔ odase yɛ maŋ, loo beni oyeɔ odase ni onyiɛɛɛ shiɛmɔ nɔ?

17, 18. (a) Fɔlɔi, te nyɛaafee tɛŋŋ nyɛye nyɛbua nyɛbii lɛ ni amɛná ekãa babaoo kɛfã amɛhemɔkɛyeli lɛ he lɛ? (b) Mɛɛ gbɛ nɔ okɛ woji bibii ni kɔɔ adebɔɔ he lɛ etsu nii yɛ nyɛnikasemɔ mli akɛ weku?

¹⁷ Fɔlɔi, ani nyɛkɛ nyɛbii lɛ esusu wolo bibioo ni yɔɔ fɛo nɛɛ he yɛ nibii ni nyɛkaseɔ akɛ weku lɛ mli? Kɛ́ nyɛfee nakai lɛ, ebaaye ebua nyɛbii lɛ koni hemɔkɛyeli ni amɛyɔɔ yɛ Nyɔŋmɔ hiɛkalɔ lɛ mli lɛ mli awa. Ekolɛ oyɛ bii ni eye kɛjɛ afii 13 kɛyaa ni miiya sɛkɛndre skul. Amɛji mɛi titri ni mɛi ni tsɔɔ  sutsakemɔ tsɔɔmɔ lɛ lakaa. Jeŋ shikpalɔi, tsɔɔlɔi, adebɔɔ nibii ahe saji kɛ sinii ni ajieɔ yɛ TV nɔ lɛ tsɔɔ akɛ adesa ba jeŋ kɛtsɔ sutsakemɔ nɔ. Obaanyɛ okɛ wolo bibioo kroko hu ni ji, The Origin of Life—Five Questions Worth Asking (Bɔ ni Fee ni Nibii ni Wala Yɔɔ Amɛmli lɛ Ba—Saji Enumɔ ni Sa Bimɔ) ni ajie lɛ kpo yɛ afi 2010 mli lɛ atsu nii kɛye obua obii lɛ ni amɛnyɛ amɛfã anɔkwale lɛ he. Taakɛ wolo bibioo ni ji Was Life Created? lɛ ji lɛ, afee enɛ hu koni eye ebua oblahii kɛ oblayei ni amɛnyɛ ‘amɛjwɛŋ’ saji anɔ jogbaŋŋ. (Abɛi 2:10, 11) Etsɔɔ amɛ bɔ ni amɛaafee amɛna kɛji nilee yɛ nɔ ni atsɔɔ amɛ yɛ skul lɛ mli.

¹⁸ Afee Origin of Life wolo bibioo lɛ koni eye ebua mɔ ni kaneɔ lɛ ni esusu nibii komɛi ni akɛɛ jeŋ shikpalɔi ena ni yeɔ odase akɛ adesa ba kɛtsɔ sutsakemɔ nɔ lɛ ahe jogbaŋŋ. Eyeɔ ebuaa amɛ koni amɛ diɛŋtsɛ amɛsusu he amɛkwɛ kɛji nakai saji lɛ tsɔɔ lɛɛlɛŋ akɛ adesai jɛ kooloi amli. Etsɔɔ amɛ bɔ ni amɛaafee amɛjie amɛnaa yɛ saji ni awieɔ akɛ jeŋ shikpalɔi enyɛ efee nibii komɛi kɛtsɔɔ akɛ adebɔɔ nibii baanyɛ aba wala mli kɛkɛ ni jeee mɔ ko bɔ lɛ ahe. Fɔlɔi, nyɛkɛ wolo bibioo nɛɛ ayea abuaa nyɛbii lɛ koni amɛná ekãa babaoo kɛfã hemɔkɛyeli ni amɛyɔɔ yɛ Bɔlɔ lɛ mli lɛ he.—Nyɛkanea 1 Petro 3:15.

19. Mɛɛ hegbɛ kpele wɔ fɛɛ wɔná?

¹⁹ Kɛ́ wɔkane woji ni Yehowa asafo lɛ ekala ni wieɔ adebɔɔ nibii ahe lɛ, ebaaye ebua wɔ ni wɔle Yehowa sui ni nɔ bɛ lɛ ahe nii babaoo. Odaseyelii nɛɛ fɛɛ haa wɔjɛɔ wɔtsuiŋ tɔ̃ɔ wɔjieɔ Nyɔŋmɔ yi. (Lala 19:2, 3) Eji hegbɛ kpele ni wɔná akɛ wɔkɛ woo kɛ anunyam ni sa Yehowa, ni ji nibii fɛɛ a-Bɔlɔ lɛ aaaha lɛ!—1 Tim. 1:17.