Mumɔ Krɔŋkrɔŋ Lɛ Hewalɛ ni Esa akɛ Oná yɛ Oshihilɛ Mli

“KAAJIE mi yɛ ohiɛ oshɛ́ ofɔ̃, ni kaaŋɔ o-Mumɔ krɔŋkrɔŋ lɛ kɛmiijɛ mimli!” (Lala 51:13) Wiemɔi nɛɛ ji sɔlemɔ ni jɛ tsuiŋ tɔ̃ɔ ni Maŋtsɛ David sɔle beni etɔ̃ tɔmɔ ko ni yɔɔ hiɛdɔɔ lɛ sɛɛ lɛ.

Yɛ David wala shihilɛ mli fɛɛ lɛ, ena hewalɛ ni mumɔ krɔŋkrɔŋ lɛ yɔɔ. Beni eji oblanyo fioo lɛ, mumɔ krɔŋkrɔŋ lɛ ye ebua lɛ ni eye Goliat ni ji asraafonyo ni he yɔɔ gbeyei lɛ nɔ kunim. (1 Samuel 17:45-50) Eye ebua lɛ hu ni eŋmala lalai ni ŋɔɔ waa ni afo yɛ yinɔsane mli pɛŋ lɛ ateŋ ekomɛi. David tsɔɔ mli akɛ: “Yehowa Mumɔ lɛ tsɔ minɔ wie, ni ewiemɔ lɛ kã mililɛi nɔ.”—2 Samuel 23:2.

Yesu Kristo diɛŋtsɛ ma nɔ mi akɛ mumɔ krɔŋkrɔŋ lɛ ná David shihilɛ nɔ hewalɛ. Be ko lɛ, Yesu kɛɛ etoibolɔi lɛ akɛ: “David diɛŋtsɛ kɛɛ yɛ Mumɔ krɔŋkrɔŋ lɛ naa akɛ: ‘Nuŋtsɔ [Yehowa] kɛɛ mi-Nuŋtsɔ lɛ akɛ: Ta mininejurɔ nɔ kɛyashi beyinɔ ni maŋɔ ohenyɛlɔi mafee onane shishi maaŋoo!’” (Marko 12:36; Lala 110:1) Yesu le akɛ mumɔ krɔŋkrɔŋ lɛ ji nɔ ni kudɔ David ni eŋmala elalai lɛ. Ani nakai mumɔ krɔŋkrɔŋ lɛ nɔŋŋ baanyɛ aye abua wɔ ŋmɛnɛ?

“Nyɛbia, ni Aaaha Nyɛ”

Ekolɛ bo lɛ, oŋmaŋ lalai ni akɛbaatsu nii yɛ jamɔ mli. Shi obaanyɛ okɛ naagbai wuji akpe tamɔ bɔ ni David kɛ Goliat ni ji oblaŋ lɛ kpe lɛ. Ákɛ nɔkwɛmɔnɔ lɛ, susumɔ yoo ko ni atsɛɔ lɛ Isabel * lɛ he okwɛ. Ewu shi lɛ ni ekɛ yoo kroko ni ji oblayoo yahi shi. Ewu shi nyɔmɔ babaoo efɔ̃ enɔ, ni eyeee ebuaaa lɛ kɛ shika ko kwraa koni enyɛ ekɛkwɛ amɛbiyei bibii enyɔ lɛ. Isabel kɛɛ akɛ: “Minu he akɛ eha minine enyɛ shi, ni ekɛ mi eye tamɔ nɔ ni  miji tumo nɔ nɔ̃ ko. Fɛɛ sɛɛ lɛ, kɛjɛ beni eshi mi lɛ, minuɔ he akɛ Nyɔŋmɔ mumɔ krɔŋkrɔŋ lɛ wajeɔ mi.”

Ani Isabel kpa gbɛ akɛ enine baashɛ mumɔ krɔŋkrɔŋ lɛ nɔ yakatswaa? Dabi, ekpa Nyɔŋmɔ fai daa gbi koni eha lɛ emumɔ lɛ. Ele akɛ esa akɛ eha Nyɔŋmɔ awaje lɛ koni enyɛ ekpee nibii ni ekɛbaakpe wɔsɛɛ lɛ anaa kɛ ekãa, ekwɛ ebii lɛ jogbaŋŋ, ni ená bulɛ eha ehe ekoŋŋ. Ekɛ Yesu wiemɔi ni nyiɛ sɛɛ nɛɛ tsu nii: “Nyɛbia, ni aaaha nyɛ; nyɛtaoa, ni nyɛaana; nyɛshia, ni aaagbele aha nyɛ.”—Mateo 7:7.

Roberto hu nu he akɛ esa akɛ ená Nyɔŋmɔ mumɔ lɛ yelikɛbuamɔ, shi esoro yiŋtoi ahewɔ ni enu he nakai lɛ. No mli lɛ, tawa kɛ wii shɛremɔ eka ehe, ni enɛɛmɛi gbooo yɛ enaa. Ekɛ afii enyɔ sɔŋŋ bɔ mɔdɛŋ akɛ ebaakpa subaŋ gbonyo nɛɛ, shi bei pii lɛ kɛ́ ekpa ni be ko shwie mli nɔŋŋ kɛkɛ lɛ eku sɛɛ ebɔi shɛremɔ ekoŋŋ. Roberto tsɔɔ mli akɛ: “Kɛ́ okpa tsofai fɔji kɛnitsumɔ lɛ, ehaa ohaoɔ. Daa gbi lɛ, nakai tsofai lɛ baa gbɔmɔtso lɛ tsine.”

Roberto kɛshi sɛɛ akɛ: “Shi no mli lɛ, mitswa mifai shi akɛ matsake mijeŋba koni manyɛ masɔmɔ Nyɔŋmɔ yɛ gbɛ ni ekpɛlɛɔ nɔ lɛ nɔ. Mibɔ mɔdɛŋ akɛ mikɛ susumɔi kpakpai ni yɔɔ Biblia lɛ mli lɛ baawo mijwɛŋmɔŋ obɔ. Misɔleɔ kɛjɛɔ mitsuiŋ tɔ̃ɔ daa gbi, ni mibiɔ Nyɔŋmɔ koni eha mi hewalɛ ni mikɛtsake mijeŋba. Mile akɛ minyɛŋ maye omanye yɛ mi diɛŋtsɛ mihewalɛ naa. Ni mina akɛ Yehowa ha misɔlemɔi lɛ ahetoo, titri lɛ be mli ni miyashɛre tawa loo wii ekoŋŋ ni no eha minijiaŋ eje wui lɛ. Miheɔ miyeɔ akɛ Nyɔŋmɔ mumɔ krɔŋkrɔŋ lɛ ha mi hewalɛ hee; kɛ́ jeee emumɔ lɛ hewɔ kulɛ, minyɛŋ maye su gbonyo nɛɛ nɔ.”—Filipibii 4:6-8.

Amɛholeɔ “Amɛfiji Anɔ Tamɔ Okropɔŋi”

Taakɛ eji yɛ Isabel kɛ Roberto agbɛfaŋ lɛ, mumɔ krɔŋkrɔŋ lɛ náa Yehowa Odasefoi akpekpei abɔ ashihilɛi anɔ hewalɛ. Onine baanyɛ ashɛ Yehowa mumɔ krɔŋkrɔŋ lɛ, ni ji hewalɛ ni ekɛbɔ jeŋ muu lɛ fɛɛ lɛ nɔ, kɛji oosumɔ. Nyɔŋmɔ miisumɔ, ni eyɛ he miishɛɛ hu akɛ eeeha bo emumɔ lɛ kɛ́ okɛ hiɛdɔɔ sɔle kɛbi lɛ. Shi dani onine baashɛ mumɔ krɔŋkrɔŋ lɛ nɔ lɛ, esa akɛ okase Nyɔŋmɔ he anɔkwale lɛ ni ojɛ otsuiŋ ofee esuɔmɔnaa nii.—Yesaia 55:6; Hebribii 11:6.

Mumɔ krɔŋkrɔŋ lɛ baanyɛ awo bo hewalɛ koni onyɛ osɔmɔ Nyɔŋmɔ jogbaŋŋ, ni onyɛ okpee naagba fɛɛ naagba ni ekolɛ okɛbaakpe yɛ oshihilɛ mli lɛ naa. Naa nɔmimaa ni Biblia lɛ kɛhaa wɔ: “[Yehowa] haa mɔ ni egbɔjɔ lɛ hewalɛ, ni mɔ ni bɛ nyɛmɔ lɛ ehaa ehewalɛ fáa.  . . . Mɛi ni hiɛ kã Yehowa nɔ lɛ náa hewalɛ hee, amɛholeɔ amɛfiji anɔ tamɔ okropɔŋi, amɛjoɔ foi, ni etɔɔɔ amɛ, amɛnyiɛɔ hu, ni amɛgbɔjɔɔɔ.”—Yesaia 40:28-31.—w09-E 10/1.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 8]

‘Misɔleɔ kɛjɛɔ mitsuiŋ tɔ̃ɔ daa gbi, ni mibiɔ Nyɔŋmɔ koni eha mi hewalɛ. Mile akɛ minyɛŋ maye omanye yɛ mi diɛŋtsɛ mihewalɛ naa. Ni mina akɛ Yehowa eha misɔlemɔi lɛ ahetoo’

 [Akrabatsa/Mfonirii ni yɔɔ baafa 7]

NƆ NI MUMƆ KRƆŊKRƆŊ LƐ ENYƐ ETSU

Nyɔŋmɔ kɛ mumɔ krɔŋkrɔŋ lɛ tsu nii kɛbɔ shikpɔŋ lɛ kɛ nibii krokomɛi fɛɛ ni yɔɔ jeŋ muu lɛ fɛɛ lɛ. Lalatsɛ lɛ jaje akɛ: “Yehowa, kwɛ bɔ ni onitsumɔi lɛ fá ha! Nilee okɛfee fɛɛ; shikpɔŋ lɛ nɔ eyi tɔ́ kɛ onibɔɔ nii lɛ!” Ekɛshi sɛɛ akɛ: “Otsuɔ omumɔ lɛ kɛbaa, ni abɔɔ amɛ.”—Lala 104:24, 30; 1 Mose 1:2; Hiob 33:4.

Mumɔ krɔŋkrɔŋ lɛ tsirɛ hii Nyɔŋmɔ gbeyeishelɔi ni amɛŋmala Biblia lɛ. Bɔfo Paulo ŋma akɛ: “Ŋmalɛ fɛɛ ŋmalɛ lɛ ejɛ Nyɔŋmɔ Mumɔ lɛ mli, ni ehe yɛ sɛɛnamɔ.” (2 Timoteo 3:16, Ga Biblia hee) Hela wiemɔ ni atsɔɔ shishi akɛ “ejɛ Nyɔŋmɔ Mumɔ lɛ mli” lɛ shishi diɛŋtsɛ ji, “Nyɔŋmɔ mu ewo mli.” Yehowa mumɔ lɛ kudɔ Biblia ŋmalɔi lɛ ajwɛŋmɔ, ni amɛŋmala “Nyɔŋmɔ wiemɔ” lɛ.—1 Tesalonikabii 2:13.

Mumɔ krɔŋkrɔŋ lɛ ha Nyɔŋmɔ tsuji ná hewalɛ kɛgba anɔkwa gbalɛi ni kɔɔ wɔsɛɛ he. Bɔfo Petro tsɔɔ mli akɛ: “Ŋmalɛ lɛŋ gbalɛ fɛɛ gbalɛ lɛ ejɛɛɛ gbɔmɔ ko shishitsɔɔmɔ mli. Ejaakɛ gbalɛ ko bako yɛ gbɔmɔ suɔmɔ naa pɛŋ, shi moŋ Mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.”—2 Petro 1:20, 21; Yoel 2:28.

Mumɔ krɔŋkrɔŋ lɛ ye ebua Yesu kɛ hii anɔkwafoi krokomɛi ni amɛshiɛ Nyɔŋmɔ Maŋtsɛyeli lɛ he sanekpakpa lɛ ni amɛfee naakpɛɛ nii. Yesu kɛɛ akɛ: “Nuŋtsɔ [Yehowa] Mumɔ lɛ yɛ minɔ, no hewɔ lɛ efɔ mi mu, koni mijaje sanekpakpa lɛ mitsɔɔ ohiafoi; . . . koni mishiɛ heyeli mitsɔɔ nomii lɛ, kɛ hiŋmɛigbelemɔ ha shwilafoi.”—Luka 4:18, 19; Mateo 12:28.

 [Akrabatsa/Mfonirii ni yɔɔ baafa 9]

GBƐ̀I ANƆ NI MUMƆ KRƆŊKRƆŊ LƐ BAANYƐ AYE ABUA WƆ

Mumɔ krɔŋkrɔŋ lɛ baanyɛ awaje bo koni onyɛ owu oshi kaa, ní oye sui gbohii anɔ. Bɔfo Paulo kɛɛ akɛ: “Anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ní nyɛje mli hu, koni nyɛnyɛ mli nyɛmɔ.”—1 Korintobii 10:13.

Mumɔ krɔŋkrɔŋ lɛ baanyɛ aye abua bo ní oná sui ni saa Nyɔŋmɔ hiɛ. “Mumɔ lɛ yibii ji suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, kpoofeemɔ, henɔyeli.”—Galatabii 5:22, 23, Ga Biblia hee.

Mumɔ krɔŋkrɔŋ lɛ baanyɛ awaje bo koni ofi shi yɛ kai amli. “Minyɛɔ nii fɛɛ mifeɔ yɛ mɔ ni wajeɔ mi . . . lɛ mli.”—Filipibii 4:13.