GBALASHIHILƐ baanyɛ afee shihilɛ ni kãaa shi akɔɔɔ, shi kɛ́ hela ni ehiii tsamɔ mɔ gbalashihilɛ mli hefatalɔi lɛ ateŋ mɔ kome yɛ be mli ni mɔ kroko lɛ he yeee lɛ, ebaanyɛ eha amɛshihilɛ afee nɔ ni jaraa. * Ani oyɛ hefatalɔ ko ni bɛ hewalɛ ni ookwɛ lɛ? Kɛ́ nakai ni lɛ, ani ohaoɔ yɛ sanebimɔi ni nyiɛ sɛɛ nɛɛ ateŋ eko he? Nomɛi ji: ‘Te mafee tɛŋŋ kɛ́ mihefatalɔ lɛ hela lɛ mli wo wu? Ani manyɛ maya nɔ makwɛ mihefatalɔ lɛ ni yɛ nakai beaŋ nɔŋŋ lɛ mahoo niyenii, masaa shĩa lɛ mli, ni matsu nii? Mɛni hewɔ minuɔ fɔyeli he akɛ mi moŋ miyɛ hewalɛ lɛ?’

Shi kɛ́ bo ji hefatalɔ ni he yeɔ lɛ, ekolɛ obaabi ohe akɛ: ‘Akɛni minyɛɛɛ matsu misɔ̃i ahe nii hewɔ lɛ, te mafee tɛŋŋ manu he akɛ sɛɛnamɔ yɛ mihe? Ani mihefatalɔ lɛ mli efu mi yɛ hewalɛ ni mibɛ lɛ hewɔ? Ani wɔnáŋ miishɛɛ dɔŋŋ akɛ hefatalɔi?’

Dɔlɛ sane ji akɛ, naagbai ni helai ni ehiii tsamɔ lɛ kɛbaa lɛ eha gbalashihilɛi komɛi amli etse. Kɛlɛ, enɛ etsɔɔɔ akɛ bɔ fɛɛ bɔ ni fee lɛ ogbalashihilɛ lɛ yeŋ omanye.

Gbalashihilɛi babaoo etee nɔ ehi shi kɛ miishɛɛ yɛ hefatalɔi lɛ ateŋ mɔ kome ni miiye hela ko ni ehiii tsamɔ lɛ fɛɛ sɛɛ. Ákɛ nɔkwɛmɔnɔ lɛ, susumɔ Yoshiaki kɛ Kazuko ahe okwɛ. Naagba ko ni ba Yoshiaki mliteŋ wu lɛ he lɛ haaa enyɛ etsi ehe fioo ko po kɛji mɔ ko yeee ebuaaa lɛ. Kazuko kɛɛ akɛ: “Esa akɛ aye abua miwu yɛ nɔ fɛɛ nɔ mli. Kwɛmɔ ni mikwɛɔ lɛ lɛ ha mikuɛ, mikɔ̃ji, kɛ miniji bɔi mihe waa, ni amrɔ nɛɛ miyaa helatsamɔhe ni akwɛɔ mɛi ni yeɔ talɔiaŋ kɛ wuiaŋ hela yɛ lɛ kɛha kwɛmɔ. Bei pii lɛ, minuɔ he akɛ helatsɛ kwɛmɔ haa mɔ feɔ gbedee.” Shi yɛ naagbai nɛɛ fɛɛ asɛɛ lɛ, Kazuko kɛɛ akɛ: “Ákɛ gbalashihilɛ mli hefatalɔi lɛ, wekukpãa ni kã wɔteŋ lɛ mli ewa.”

Belɛ, yɛ shihilɛi ni tamɔ nɛkɛ amli lɛ, mɛni ji nɔ tuuntu ni baaha miishɛɛ ahi weku lɛ mli? Nɔ̃ kome ji akɛ, hefatalɔi ni naa hela lɛ akɛ ebatswa amɛyi enyɔ lɛ fɛɛ ojo shi jeee hefatalɔ ni he miiye lɛ pɛ lɛ yaa nɔ amɛnáa miishɛɛ bɔ ni sa yɛ amɛgbalashihilɛ lɛ mli ni amɛtsuii hu nyɔɔ amɛmli.  Yɛ anɔkwale mli lɛ, kɛ́ hefatalɔ kome he miiye lɛ, esaa amɛyi enyɔ lɛ fɛɛ he waa, kɛ́ yɛ gbɛ̀i srɔtoi anɔ po. Nɛkɛ wekukpãa ni yɔɔ wu kɛ eŋa teŋ ni haa amɛfoɔ amɛteŋ mɔ fɛɛ mɔ nɔ̃ mli lɛ ji nɔ ni awie he yɛ 1 Mose 2:24 lɛ akɛ: ‘Nuu aaashĩ etsɛ kɛ enyɛ, ni eeekpɛtɛ eŋa he, ni amɛaatsɔ̃ heloo kome.’ No hewɔ lɛ, kɛ́ hefatalɔ ko miiye hela ko ni ehiii tsamɔ lɛ, ehe miihia waa ni wu kɛ ŋa lɛ fɛɛ afee ekome kɛdamɔ naagba lɛ naa.

Kɛfata he lɛ, niiamlipɛimɔ eha ana akɛ gbalashihilɛ mli hefatalɔi ni haa wekukpãa kpakpa hiɔ amɛteŋ kɛji mɔ kome he miiye ni ehiii tsamɔ lɛ kpɛlɛɔ shihilɛ lɛ nɔ, ni amɛkaseɔ gbɛ̀i ni hi jogbaŋŋ ni amɛaatsɔ nɔ amɛkpee shihilɛ lɛ naa. Gbɛ̀i srɔtoi ni atsɔɔ nɔ akpeɔ shihilɛi nɛɛ anaa ni amɛkase lɛ ateŋ babaoo kɛ Biblia mli ŋaawoo ni be hooo lɛ kpãa gbee. Susumɔ ŋaawoi etɛ ni nyiɛ sɛɛ nɛɛ ahe okwɛ.

Jajelɔ 4:9 lɛ kɛɔ akɛ: “Mɛi enyɔ hi fe mɔ kome.” Mɛni hewɔ? Ejaakɛ kuku 10 lɛ tsɔɔ mli akɛ, “kɛ́ shi amɛgbee lɛ, mɔ kome aaawó enaanyo nɔ.” Ani okɛ hiɛsɔɔ wiemɔi ‘woɔ ohefatalɔ lɛ nɔ’?

Ani nyɛbaanyɛ nyɛtao gbɛ̀i kpakpai anɔ ni nyɛaatsɔ nyɛye nyɛbua nyɛhe? Yong ni eŋa gbɔmɔtso lɛ fã egbo lɛ kɛɛ akɛ: “Be fɛɛ be lɛ, mibɔɔ mɔdɛŋ akɛ manu he maha miŋa. Be fɛɛ be ni kumai baaye mi lɛ, minuɔ he akɛ ekolɛ lɛ hu kumai miiye lɛ. Kɛ́ miitao maya agbo lɛ naa ni miyakwɛ nibii ni yɔɔ fɛo lɛ, mibiɔ lɛ kɛji ebaasumɔ ni efata mihe kɛya. Mi kɛ lɛ fɛɛ feɔ ekome kɛpiŋɔ, ni wɔfeɔ ekome kɛdamɔɔ shihilɛ lɛ naa.”

Shi kɛ́ bo ji hefatalɔ ni bɛ hewalɛ lɛ, ani nibii komɛi yɛ ni obaanyɛ ofee oha ohe ni haŋ ohela lɛ mli awo wu? Kɛ́ nakai ni lɛ, no feemɔ baanyɛ eha onu he akɛ ohe yɛ sɛɛnamɔ, ni ebaanyɛ eha ohefatalɔ lɛ anyɛ aya nɔ akwɛ bo jogbaŋŋ.

Yɛ nɔ najiaŋ ni ooosusu akɛ ole gbɛ ni hi jogbaŋŋ ni oootsɔ nɔ ojie mɔhesusumɔ kpo otsɔɔ ohefatalɔ lɛ, mɛni hewɔ obiii lɛ ni etsɔɔ bo nɔ ni kɛ́ ofee lɛ ebaanya he waa? Yɛ naagbee lɛ, Nancy ni atsi etã kɛtsɔ hiɛ lɛ kɛɛ ewu bɔ ni enu he eha beni ewu lɛ haaa ele amɛweku lɛ shika he saji lɛ. Amrɔ nɛɛ, ewu lɛ bɔɔ mɔdɛŋ akɛ ekɛ lɛ baagba enɛ he saji babaoo.

Nilelɔ Maŋtsɛ Salomo ŋma akɛ: “Nɔ fɛɛ nɔ yɛ ebe ní ato.” (Jajelɔ 3:1) Shi, akɛni hela ni ehiii tsamɔ baanyɛ atsake nyɛweku lɛ daa gbi nifeemɔi trukaa hewɔ lɛ, ekolɛ nyɛbaasusu akɛ nyɛnyɛŋ nyɛya nɔ nyɛkɛ gbɛjianɔtoo kpakpa atsu nii. Mɛni nyɛbaanyɛ nyɛfee koni kɛ́ hooo kwraa lɛ, nyɛnyɛ nyɛkɛ gbɛjianɔtoo ko atsu nii?

Nyɛbaanyɛ nyɛto gbɛjianɔ koni yɛ be kɛ beaŋ lɛ nyɛfee ekome kɛfee nibii komɛi ni hela lɛ etsiii nyɛ gbɛ akɛ nyɛkafee lɛ. Ani nyɛbaanyɛ nyɛya nɔ nyɛfee nibii komɛi ni nyɛfeɔ ekome kɛfeɔ dani hela lɛ batswa nyɛ ojo lɛ? Kɛ́ jeee nakai lɛ, mɛɛ nibii hei komɛi nyɛbaanyɛ nyɛka amɛfeemɔ nyɛkwɛ? Ebaanyɛ efee nɔ ko ni yɔɔ mlɛo tamɔ nii ni nyɛaakane nyɛha nyɛhe, aloo ebaanyɛ efee nɔ ko ni kãaa shi akɔɔɔ tamɔ wiemɔ hee ko kasemɔ. Kɛ́ nyɛfeɔ ekome kɛfeɔ nibii ni hela lɛ etsiii nyɛ gbɛ akɛ nyɛkafee lɛ, ebaaha ‘nyɛheloo kome’ wekukpãa lɛ mli awa—ni nyɛmiishɛɛ lɛ baafa pii.

Nɔ kroko ni baaye abua nyɛ ni nyɛya nɔ nyɛhiɛ gbɛjianɔtoo kpakpa mli ji mɛi krokomɛi ni nyɛkɛaabɔ. Biblia lɛ kɛɔ yɛ Abɛi 18:1 lɛ akɛ: “Mɔ ni etse ehe lɛ, [ekɔnɔ] nii etaoɔ, ni etseɔ nɔ ni hi ha lɛ fɛɛ hiɛ atũa.” Ani okadi akɛ ŋmalɛ nɛɛ miitsɔɔ akɛ kɛ́ mɔ ko tse ehe lɛ, no baaná hewalɛ gbonyo yɛ ejwɛŋmɔ nɔ? Nɔ ni tamɔɔɔ nakai lɛ, kɛ́ okɛ mɛi krokomɛi bɔɔ yɛ be kɛ beaŋ lɛ, ebaanyɛ eha otsui mii ashɛ ehe ni eha osusu nii ahe jogbaŋŋ. Mɛni hewɔ oŋɔɔɔ hegbɛ ni okɛfɔ̃ mɔ ko nine ni ebasara bo?

Bei komɛi lɛ, ewaa kɛhaa mɛi ni miikwɛ amɛhefatalɔi ni he miiye lɛ akɛ amɛaato gbɛjianɔ kpakpa. Amɛteŋ mɛi komɛi ŋɔɔ nitsumɔi ni fa fe amɛ amɛfɔ̃ɔ amɛnɔ, ni fiofio lɛ, egbɔjɔɔ amɛ, ni no kɛ amɛgbɔmɔtsoŋ hewalɛnamɔ woɔ oshara mli. Naagbee lɛ, no baanyɛ eha amɛkanyɛ amɛtee nɔ amɛkwɛ amɛsuɔlɔ ni he yeɔ lɛ po. No  hewɔ lɛ, kɛ́ ookwɛ ohefatalɔ ní miiye hela ko ni ehiii tsamɔ lɛ, kaaku ohiɛ oshwie bo diɛŋtsɛ ohiamɔ nii anɔ. Too be ko ní okome too okɛbaafee nɔ ko kɛwaje ohe yɛ be kɛ beaŋ. * Mɛi komɛi ena akɛ kɛ́ hii ji amɛ ni amɛkɛ amɛnaanyo nuu, loo yei ji amɛ ni amɛkɛ amɛnaanyo yoo ko ni amɛmuɔ amɛfɔ̃ɔ enɔ gba amɛhaomɔi ahe sane lɛ, ehaa amɛhe jɔɔ amɛ naakpa.

Biblia lɛ bɔɔ wɔ kɔkɔ akɛ: “Kaakɛɛ akɛ: Mɛɛba ni tsutsu gbii lɛ hi fe enɛɛmɛi nɛɛ?” (Jajelɔ 7:10) No hewɔ lɛ, kaajwɛŋ bɔ ni shihilɛ lɛ baaji aha eji hela mɔko nyɛteŋ mɔ kome kulɛ he. Kaimɔ akɛ, yɛ je nɛɛ mli lɛ, mɔ ko mɔ ko bɛ ni baanyɛ aná miishɛɛ kɛmɔ shi. Nɔ ni he hiaa yɛ sane nɛɛ mli ji akɛ, esa akɛ okpɛlɛ oshihilɛ lɛ nɔ, ni otsu he nii yɛ gbɛ ni hi jogbaŋŋ nɔ.

Mɛni baanyɛ aye abua bo kɛ ohefatalɔ lɛ yɛ enɛ gbɛfaŋ? Nyɛfea ekome kɛsusua jɔɔmɔi ni nyɛná lɛ ahe. Nyɛmii ashɛa nyɛhe yɛ hiɛyaa fioo po ni nyɛaaná yɛ gbɔmɔtsoŋ hewalɛnamɔ mli lɛ he. Nyɛfea ekome kɛkpaa nibii komɛi agbɛ, ni nyɛfea ekome ni nyɛkɛ otii ni nyɛbaanyɛ nyɛshɛ he amamɔa nyɛhiɛ.

Gbalashihilɛ mli hefatalɔi ni atsɛɔ amɛ Shoji kɛ Akiko lɛ kɛ ŋaawoo nɛɛ tsu nii, ni ewo yibii kpakpai. Beni ana akɛ Akiko miiye hela ko ni tamɔ twetweetwe ni atsɛɔ lɛ yɛ blɔfo mli akɛ fibromyalgia lɛ, ehe bahia ni amɛshi amɛ-Kristofoi anitsumɔ krɛdɛɛ ni amɛkɛ amɛbe fɛɛ tsuɔ lɛ. Ani enɛ hao amɛ? Mɔ ko bɛ ni shihilɛ ni tamɔ nɛkɛ haŋ ehao. Kɛlɛ, Shoji woɔ mɛi ni yɔɔ shihilɛ ni tamɔ nɛkɛ mli lɛ ŋaa akɛ: “Kaajwɛŋ nibii ni onyɛɛɛ ofee dɔŋŋ lɛ ahe koni onijiaŋ akaje wui. Yaa nɔ oná jwɛŋmɔ ni ja. Kɛji nyɛyi enyɔ lɛ fɛɛ yɛ hiɛnɔkamɔ akɛ nibii baasaa afee tamɔ bɔ ni eyɔɔ tsutsu lɛ po lɛ, amrɔ nɛɛ nyɛkɛ nyɛjwɛŋmɔ amaa shihilɛ mli ni nyɛyɔɔ bianɛ lɛ nɔ. Yɛ migbɛfaŋ lɛ, no tsɔɔ akɛ mikɛ mijwɛŋmɔ baama miŋa nɔ, ni maye mabua lɛ.” Kɛ́ ohefatalɔ miiye hela ko ni ehiii tsamɔ lɛ, ŋaawoo kpakpa nɛɛ baanyɛ aye abua bo hu.—w09-E 11/1.