Biblia Lɛ Tsakeɔ Mɛi

MƐNI ha Rastafonyo ko shɛ mpɛsɛ ni efee ewo eyiteŋ lɛ, ni ejie nyɛɛ ni eyɔɔ kɛha blɔfomɛi lɛ kɛjɛ etsui mli? Ni mɛni ha oblanyo ko ni hiɛ yɔɔ laŋlaŋ ni yabiɔ nyɔmɔ ehaa mɛi ni hɔɔ tsofai fɔji lɛ ŋmɛɛ esa jeŋba lɛ he? Naa nɔ ni aŋkroaŋkroi nɛɛ yɔɔ kɛɛmɔ.

“Miye nyɛɛ ni miná miha mɛi lɛ po nɔ.”​—HAFENI NGHAMA

AFII NI EYE: 34

MAŊ NƆ NI EJƐ: ZAMBIA

MƆ NI EJI TSUTSU: RASTAFONYO

MITSUTSU SHIHILƐ: Afɔ mi yɛ abobalɔi aŋsara ko mli yɛ Zambia. Minyɛ Awo jo foi kɛjɛ Namibia, be ni awuɔ ta yɛ jɛmɛ lɛ, ni ekɛ ehe yadɔmɔ kuu ko ni atsɛɔ amɛ akɛ South West Africa People’s Organization (SWAPO) lɛ. No mli lɛ, South Africa yeɔ Namibia nɔ, ni SWAPO kuu lɛ kɛ South Africa nɔyeli lɛ miitswa.

Kɛjɛ be ni afɔ mi kɛyashi miye afii 15 lɛ, mihi abobalɔi aŋsarai srɔtoi amli. Atsɔse oblahii kɛ oblayei ni yɔɔ SWAPO kuu lɛ mli lɛ koni amɛfi kuu ni miitao heyeli nɛɛ sɛɛ. Adu maŋkwramɔ mumɔ awo wɔ mli, ni atsɔse wɔ koni wɔnyɛ blɔfomɛi.

Beni miye afii 11 lɛ, no mli lɛ miisumɔ akɛ matsɔ sɔlemɔ ni yɔɔ ŋsara lɛ mli lɛ mlinyo akɛ Kristofonyo. Roma Katolikbii, Lutherbii, Anglikanbii kɛ mɛi krokomɛi yɛ nakai sɔlemɔ lɛ mli. Osɔfo ni mikɛgba enɛ he sane lɛ je minijiaŋ wui. Kɛjɛ nakai beaŋ kɛbaa lɛ miheee miyeee akɛ Nyɔŋmɔ yɛ. Kɛlɛ, beni miye afii 15 lɛ, mibanya reggae lalai ahe ni miná shwelɛ akɛ mafo niseniianii ni afeɔ Afrika mɛi diji lɛ ekomɛi asɛɛ, enɛ ha mikɛ mihe yadɔmɔ Rastabii akuu lɛ. Mifee mpɛsɛ miwo miyiteŋ, mishɛreɔ wii, mikpa laŋloo yeli, ni mifĩ sɛɛ akɛ esa akɛ mɛi diji aná heyeli. Shi kɛlɛ, miŋmɛɛɛ mijeŋba sha lɛ he ni mikpaaa sinii ni kɔɔ yiwalɛ nifeemɔ he lɛ akwɛmɔ. Ni miwieɔ wiemɔ sha.

BƆ NI BIBLIA LƐ TSAKE MISHIHILƐ: Afi 1995 beni miye aaafee afii 20 lɛ, mikɛ hiɛdɔɔ bɔi nibii ni esa akɛ mafee yɛ mishihilɛ mli lɛ ahe susumɔ. No mli lɛ, mikaseɔ Rastajamɔ he woji fɛɛ ni minine shɛɔ nɔ. Atsɛ Biblia mli wiemɔ kukuji komɛi yɛ ekomɛi amli, shi minuuu bɔ ni agbala mli aha lɛ shishi. No hewɔ lɛ, mikpɛ miyiŋ akɛ mi diɛŋtsɛ makane Biblia lɛ.

Sɛɛ mli lɛ, minaanyo Rastafonyo ko ha mi Biblia kasemɔ wolo ko ni Yehowa Odasefoi fee. Mi diɛŋtsɛ mikase wolo nɛɛ kɛ Biblia lɛ. Sɛɛ mli lɛ, mikɛ Yehowa Odasefoi kpe ni amɛkɛ mi tsa Biblia kasemɔ lɛ nɔ.

 Mibɔ mɔdɛŋ waa ni mikpa wii shɛremɔ kɛ dãanumɔ babaoo. (2 Korintobii 7:1) Mishɛ mpɛsɛ lɛ, mikpa bɔlɛnamɔ he mfonirii kɛ sinii akwɛmɔ, ni mikpa sinii ni afeɔ yiwalɛ nii yɛ mli lɛ akwɛmɔ, agbɛnɛ hu mikpa wiemɔ sha kɛ nitsumɔ. (Efesobii 5:3, 4) Naagbee lɛ, minyɛ mijie nyɛɛ ni miná miha blɔfomɛi lɛ po kɛjɛ mitsuiŋ. (Bɔfoi lɛ Asaji 10:34, 35) Bɔni afee ni manyɛ mafee tsakemɔi nɛɛ, ehe bahia ni makpa lalai ni woɔ mligbalamɔ he hewalɛ lɛ atoiboo, ní mikɛ mitsutsu nanemɛi lɛ afo tako mli ejaakɛ amɛbaanyɛ amɛwo mi hewalɛ koni mikɛ mihe awo misa jeŋbai lɛ amli.

Be ni mifee tsakemɔi nɛɛ sɛɛ lɛ, mitao he ni Yehowa Odasefoi a-Maŋtsɛyeli Asa yɔɔ ni mibi koni amɛha mafata amɛhe. Akɛ mi kase Biblia lɛ. Beni mikpɛ miyiŋ akɛ maha abaptisi mi akɛ Yehowa Odasefonyo lɛ, miweku lɛ naaa he miishɛɛ. Mimami kɛɛ mi akɛ miyatao sɔlemɔ kroko shi jeee Yehowa Odasefoi. Mimami wekunyo ko ni eji nɔyeli lɛ mlinyo ko ni ale lɛ waa lɛ, wie eshi yiŋ ni mikpɛ akɛ mikɛ Odasefoi baabɔ lɛ be kɛ be fɛɛ.

Kɛlɛ, beni mikase bɔ ni Yesu kɛ mɛi ye ha, ni mikɛ eŋaawoo lɛ tsu nii lɛ, minyɛ mikpee shiteekɛwoo kɛ hefɛoyeli naa. Beni mikɛ nɔ ni Odasefoi lɛ tsɔɔ lɛ to nɔ ni Biblia lɛ kɛɔ lɛ he lɛ, miná nɔmimaa akɛ mina anɔkwa jamɔ lɛ. Ákɛ nɔkwɛmɔnɔ lɛ, amɛyeɔ famɔ ni Biblia lɛ kɛhaa akɛ ashiɛ atsɔɔ mɛi krokomɛi lɛ nɔ. (Mateo 28:19, 20; Bɔfoi lɛ Asaji 15:14) Ni amɛkɛ amɛhe wooo maŋkwramɔŋ saji amli.—Lala 146:3, 4; Yohane 15:17, 18.

BƆ NI MINÁ HE SƐƐ: Biblia mli shishitoo mlai ni mikɛtsu nii yɛ mishihilɛ mli lɛ eye ebua mi yɛ gbɛi srɔtoi anɔ. Ákɛ nɔkwɛmɔnɔ lɛ, wii ni mikpa shɛremɔ lɛ haa mibaa dɔlai ohai abɔ yi daa nyɔŋ kome. Yaka ninaai lɛ asɛɛ efo, miyɛ gbɔmɔtsoŋ hewalɛ fe tsutsu lɛ, ni mijwɛŋmɔ hu miitsu ni jogbaŋŋ.

Amrɔ nɛɛ miihi shi bɔ ni kulɛ mitao akɛ mahi shi maha beni miji oblanyo fioo lɛ. Nɔ ni fe fɛɛ lɛ, amrɔ nɛɛ lɛ minuɔ he akɛ mitsi mibɛŋkɛ Nyɔŋmɔ.—Yakobo 4:8.

“Minyɛɔ miyeɔ mlifu nɔ agbɛnɛ.”​—MARTINO PEDRETTI

AFII NI EYE: 43

MAŊ NƆ NI EJƐ: AUSTRALIA

MƆ NI EJI TSUTSU: EHƆƆ TSOFAI FƆJI

MITSUTSU SHIHILƐ: Miweku lɛ ehiii maŋ kome mli ní atsɛ beni midaa lɛ. Mihi maji bibii kɛ maŋtiasei amli, ni mihi Australia shikwɛɛbii ashihilɛhe ko ni etse ehe banee lɛ hu mli be kukuoo ko. Mikaiɔ nibii komɛi ni yɔɔ miishɛɛ ni mikɛ minyɛkwɛmɛi abii kɛ mitsɛkwɛmɛi lɛ fee—loo shamɔ, gbɔbimɔ, tsei komɛi ni wɔfeɔ kɛshwɛɔ, kɛ nibii krokomɛi hu ni wɔgbɔɔ.

 Mipapa nɔɔ atswɛrɛ, ni etsɔɔ mi atswɛrɛnɔmɔ beni midako kwraa. Daa nɛɛ, milɛmɔ atswɛrɛ naa miwo mɛi. Beni miji oblanyo fioo lɛ, miyeɔ be babaoo yɛ dãanumɔhe ni miinu dãa. Mikɛ minanemɛi lɛ yatsɔɔ bei. Wɔkɛ kakalai kɛ tso kpotii yatutuaa mɛi aaafee 20 loo nɔ ni fe nakai.

Miná shika kɛjɛ tsofai fɔji ni mihɔɔ kɛ nibii ni mɛi ni tsuɔ nii yɛ meelei adaamɔhe lɛ juɔ kɛbahaa mi ni mihɔɔ lɛ mli. Mɛi ni hɔɔ tsofai fɔji lɛ bɔɔ mi apaa ni mikɛ tui yabiɔ nyɔmɔ mihaa amɛ. Oti ni ma mihiɛ ji ni matsɔ mɔ ni juɔ shi egbeɔ mɔ. Nɔ ni mifɔɔ kɛɛmɔ ji kɛ́ onine shɛ enɔ lɛ gbee lɛ, lɛ hu kɛ́ ená bo lɛ ebaagbe bo.

BƆ NI BIBLIA LƐ TSAKE MISHIHILƐ: Beni mihiɛ bɔi famɔ lɛ minu Yehowa Odasefoi ahe. Mikaiɔ akɛ beni miye aaafee afii 22 lɛ, mibi minyɛ awo akɛ ani ele he ni Odasefoi lɛ ateŋ mɔ ko yɔɔ lo? Gbii enyɔ sɛɛ lɛ, Odasefonyo ko ni atsɛɔ lɛ Dixon lɛ bashi mishinaa lɛ. Wɔgba sane saŋŋ, ni no sɛɛ lɛ efɔ̃ mi nine kɛha Yehowa Odasefoi akpee ko. Mitee kpee lɛ, ni nɔ ni fe afii 20 nɛ lɛ, minane kpako yɛ kpeei nɛɛ ashishi. Odasefoi lɛ kɛ Biblia lɛ tsu nii kɛha misanebimɔi fɛɛ ahetoo.

Beni mibaná mile akɛ Yehowa yɛ mɛi fɛɛ, ni mɛi fɔji hu fata he lɛ ahe miishɛɛ lɛ, mimii shɛ mihe waa. (2 Petro 3:9) Mibayɔse akɛ eji Tsɛ ni yɔɔ suɔmɔ, ni kɛ́ mɛi fɛɛ aaakwa mi tete po lɛ, lɛ lɛ ekwaŋ mi. Mitsui hu nyɔ mimli jogbaŋŋ beni mibale akɛ ebaaŋɔ mihe eshai lɛ efa mi kɛji mitsake bɔ ni mihiɔ shi mihaa lɛ. Wiemɔi ni yɔɔ Biblia lɛ mli yɛ Efesobii 4:22-24 lɛ ye ebua mi diɛŋtsɛ. Nakai ŋmalɛ lɛ wo mi hewalɛ koni ‘mashɛ gbɔmɔ momo lɛ mafɔ’ ni mawo “gbɔmɔ hee ni abɔ yɛ Nyɔŋmɔ subaŋ nɔ lɛ.”

Ehe mi be dani minyɛ mifee tsakemɔ yɛ mishihilɛ mli. Mihiɔ shi yɛ otsi lɛ mli ní mikɛ tsofai fɔji tsuuu nii, shi kɛshɛ otsi lɛ naagbee ni mikɛ minanemɛi lɛ yakpe lɛ amɛhaa mikɛ mihe woɔ mli. Mibayɔse akɛ dani manyɛ mafee tsakemɔ lɛ ja mitsi mihe kɛjɛ minanemɛi lɛ ahe. No hewɔ lɛ, mikpɛ miyiŋ akɛ mashi kɛya maŋtiase kroko mli. Minanemɛi lɛ ateŋ mɛi komɛi kɛɛ amɛbaaya amɛyajie mi gbɛ, ni mikpɛlɛ. Beni wɔyaa lɛ amɛbɔi wii shɛremɔ, ni amɛha mi eko. Mikɛɛ amɛ akɛ mikpa nakai nifeemɔ lɛ, ni mikɛ amɛ gbɛlɛ mli beni wɔshɛ maŋ lɛ klotia lɛ. Be ko sɛɛ lɛ, miná mile akɛ mitsutsu nanemɛi lɛ kɔlɔ tui kɛyaju yɛ shikatoohe ko.

BƆ NI MINÁ HE SƐƐ: Beni mikɛ minanemɛi lɛ fo tako mli lɛ, minyɛ mifee tsakemɔi yɛ gbɛ ni waaa nɔ. Yɛ afi 1989 lɛ, abaptisi mi ni mibatsɔ Odasefonyo. Beni abaptisi mi sɛɛ lɛ, minyɛmi yoo, mimami, kɛ mipapa fɛɛ hu batsɔmɔ Yehowa sɔɔlɔi.

Afii 17 nɛ ni mibote gbalashihilɛ mli, ni wɔyɛ bii fɛfɛji etɛ ni amɛhe yɛ miishɛɛ. Amrɔ nɛɛ kɛ́ mɔ ko wo mitsui he la po lɛ, mibɔɔ mɔdɛŋ miyeɔ mimlifu lɛ nɔ. Miná suɔmɔ miha gbɔmɛi fɛɛ ekɔɔɔ he eko ‘maŋ nɔ ni amɛjɛ, wiemɔ ni amɛwieɔ, loo amɛhewolonɔ su.’ (Kpojiemɔ 7:9) Efeɔ mi akɛ Yesu wiemɔi lɛ eba mli yɛ migbɛfaŋ. Ekɛɛ akɛ: “Kɛji nyɛhi shi yɛ miwiemɔ lɛ mli lɛ, minɔkwa kaselɔi ji nyɛ, ni nyɛaale anɔkwale lɛ, ni anɔkwale lɛ aaaha nyɛye nyɛhe.”—Yohane 8:31, 32.—w10-E 02/1.

[Wiemɔ ni akɔ ni akɛmiitsu nii ni yɔɔ baafa 15]

Ehe bahia ni makpa lalai ni woɔ mligbalamɔ he hewalɛ lɛ atoiboo

[Wiemɔ ni akɔ ni akɛmiitsu nii ni yɔɔ baafa 16]

Mikɛ minanemɛi lɛ yatsɔɔ bei. Wɔkɛ kakalai kɛ tso kpotii yatutuaa mɛi aaafee 20 loo nɔ ni fe nakai