Harmagedon He Anɔkwalei
Harmagedon He Anɔkwalei
‘Daimonioi amumɔi yaa maŋtsɛmɛi ni yɔɔ jeŋ muu lɛ fɛɛ lɛ aŋɔɔ; ni amɛyabua amɛnaa kɛtee he ko ni atsɛɔ jɛi yɛ Hebri wiemɔ mli akɛ Harmagedon lɛ.’—KPOJIEMƆ 16:14, 16.
HARMAGEDON ji he ko gbɛ́i. Shi etamɔ nɔ ni abɛ he ko pɔtɛɛ diɛŋtsɛ yɛ shikpɔŋ lɛ nɔ ni atsɛ jɛmɛ nakai.
Belɛ mɛni ji wiemɔ “Harmagedon” lɛ shishi diɛŋtsɛ mɔ? Mɛni hewɔ ni bei pii lɛ akɛtoɔ nifeemɔ ko, tamɔ ta he lɛ?
Abua Amɛnaa Kɛtee He ko ni Atsɛɔ Jɛi Harmagedon
Hebri wiemɔ ni ji Har–Magedon lɛ shishi diɛŋtsɛ ji “Megido Gɔŋ.” Eyɛ mli akɛ gɔŋ diɛŋtsɛ ko ni tamɔ nakai bɛ shikpɔŋ lɛ nɔ moŋ, shi ayɛ he ko ni atsɛɔ jɛi akɛ Megido. Ekã gbɛŋta ko he, yɛ he ni no mli lɛ blema Israel maŋ lɛ yɔɔ lɛ kooyi-anaigbɛ, ni he ni ekã lɛ sa jogbaŋŋ. Tai babaoo ni awu yɛ jɛmɛ niiaŋ lɛ, afã kome yeɔ afã kroko lɛ nɔ butuu. No hewɔ lɛ, abale gbɛ́i Megido akɛ ekɔɔ ta he. *
Kɛlɛ, jeee tai ni awu yɛ Megido lɛ ji nɔ ni he hiaa lɛ, shi moŋ nɔ hewɔ ni awu tai lɛ. Megido ji Shiwoo Shikpɔŋ ni Yehowa Nyɔŋmɔ kɛha Israelbii lɛ fã. (2 Mose 33:1; Yoshua 12:7, 21) Ewo amɛ shi akɛ ebaafã amɛhe kɛ́ mɛi batutua amɛ, ni efee nakai hu. (5 Mose 6:18, 19) Ákɛ nɔkwɛmɔnɔ lɛ, beni Kanaan Maŋtsɛ Yabin kɛ esraafoi, kɛ etatsɛ nukpa Sisera batutua Israelbii lɛ, Yehowa tsɔ naakpɛɛ gbɛ nɔ ewu eha Israelbii lɛ yɛ Megido.—Kojolɔi 4:14-16.
No hewɔ lɛ, wiemɔ ni ji “Harmagedon” lɛ hiɛ mfonirifeemɔŋ shishinumɔ ni he hiaa waa. Akɛtoɔ ta, ní afãi enyɔ ni he wa waa wuɔ lɛ he.
Gbalɛ ni yɔɔ Kpojiemɔ wolo lɛ mli lɛ tsɔɔ akɛ, etsɛŋ, Satan kɛ edaimonioi lɛ baatsirɛ adesai nɔyelii koni amɛbua amɛtabilɔi anaa, ni amɛkɛ no baate shi amɛwo Nyɔŋmɔ tsuji kɛ amɛnitsumɔ lɛ. Nɔ ni baajɛ tutuamɔ nɛɛ mli aba ji, mɛi akpekpei abɔ baagboi beni Nyɔŋmɔ kpãtaa shiteekɛwolɔi nɛɛ ahiɛ lɛ.—Kpojiemɔ 19:11-18.
Mɛni hewɔ Nyɔŋmɔ, ni Biblia lɛ wieɔ ehe akɛ eji ‘musuŋtsɔlɔ, ni toɔ etsui shi ni mɔbɔnalɛ fá’ lɛ baagbe gbɔmɛi babaoo nakai? (Nehemia 9:17) Bɔni afee ni wɔnu nɔ hewɔ ni Nyɔŋmɔ baafee nakai lɛ shishi lɛ, esa akɛ wɔha sanebimɔi etɛ nɛɛ ahetoo: (1) Namɔ tsutsu baafã ta lɛ? (2) Mɛni hewɔ Nyɔŋmɔ kɛ ehe baawo ta nɛɛ mli lɛ? (3) Mɛɛ gbɛ nɔ ta nɛɛ baasa shikpɔŋ lɛ kɛ enɔ bii lɛ ahe kɛya naanɔ?
1. NAMƆ TSUTSU BAAFÃ TA LƐ?
Harmagedon ta lɛ jeee nifeemɔ ko ni Nyɔŋmɔ kɛbaaye mɛi awui. Moŋ lɛ, Nyɔŋmɔ baafã mɛi kpakpai ahe koni mɛi ni taoɔ akpata amɛhiɛ lɛ anine akashɛ amɛnɔ. “Maŋtsɛmɛi ni yɔɔ jeŋ muu lɛ fɛɛ,” ni ji je lɛŋ nɔyelɔi lɛ ji mɛi tsutsu ni baafã ta nɛɛ. Mɛni hewɔ amɛbaafã ta lɛ? Ejaakɛ Satan baakudɔ nɔyelii kɛ asraafoi akui, tamɔ akudɔɔ koliko lɛ, koni amɛkɛ amɛhewalɛ fɛɛ ayatutua mɛi ni jáa Yehowa Nyɔŋmɔ lɛ.—Kpojiemɔ 16:13, 14; 19:17, 18.
Akɛni ŋmɛnɛ lɛ, yɛ maji komɛi anɔ lɛ, mɛi yɛ hegbɛ akɛ amɛkɛ amɛhe dɔmɔɔ jamɔ ni amɛsumɔɔ, ní amɛtsɔɔ amɛsusumɔ hu be fɛɛ be hewɔ lɛ, ewa akɛ abaahe aye akɛ nɔyelii lɛ baagu loo amɛbaabule jamɔi fɛɛ shishi. Shi tutuamɔi ni tamɔ nɛkɛ tee nɔ yɛ afi 1900 afii lɛ amli, ni amɛmiiya nɔ amrɔ nɛɛ po. * Ni kɛlɛ, kɛ́ hooo lɛ, srɔtofeemɔi wuji enyɔ yɛ tutuamɔi ni eho lɛ, kɛ nɔ ni baaya nɔ yɛ Harmagedon lɛ teŋ. Klɛŋklɛŋ lɛ, tutuamɔ nɛɛ baakpele jeŋ fɛɛ. Nɔ ni ji enyɔ lɛ, Yehowa Nyɔŋmɔ baatsu saji ahe nii yɛ gbɛ ni da waa nɔ, bɔ ni efeko nakai pɛŋ. (Yeremia 25:32, 33) Biblia lɛ wieɔ ta nɛɛ he akɛ “Nyɔŋmɔ Ofe lɛ gbi wulu lɛ nɔ ta lɛ.”
2. MƐNI HEWƆ NYƆŊMƆ KƐ EHE BAAWO TA NƐƐ MLI LƐ?
Yehowa fãa etsuji koni amɛkɛ amɛhe ahi shi yɛ toiŋjɔlɛ mli, ni amɛsumɔ amɛhenyɛlɔi hu. (Mika 4:1-3; Mateo 5:43, 44; 26:52) No hewɔ lɛ, kɛ́ tutuamɔ ni naa wa nɛɛ ba lɛ, amɛkɔlɔŋ tawuu nii kɛfaŋ amɛhe. Kɛ́ Nyɔŋmɔ kɛ ehe wooo sane lɛ mli koni ehere ewebii lɛ, abaabule amɛshishi. Enɛ baaha Yehowa Nyɔŋmɔ gbɛ́i lɛ he aba sane. Kɛ́ mɛi ni fã ta lɛ nyɛ amɛkpata Yehowa webii ahiɛ lɛ, no baaha ana Yehowa akɛ ebɛ suɔmɔ, eyeee jalɛ sane, loo enyɛɛɛ efã ewebii ahe. Enyɛŋ eba lɛ nakai kɔkɔɔkɔ!—Lala 37:28, 29.
Nyɔŋmɔ sumɔɔɔ ni ekpata mɔ ko kwraa hiɛ, no hewɔ lɛ etsɔɔ hiɛ ebɔɔ nɔ ni ebaafee lɛ he kɔkɔ. (2 Petro 3:9) Etsɔɔ Biblia lɛ nɔ ehaa mɛi fɛɛ leɔ akɛ kɛjɛ blema tɔ̃ɔ lɛ, kɛ́ atutua ewebii lɛ, efãa amɛhe. (2 Maŋtsɛmɛi 19:35) Biblia lɛ bɔɔ kɔkɔ hu akɛ wɔsɛɛ kɛ́ Satan kɛ adesai ni ekudɔɔ amɛ lɛ tutua Nyɔŋmɔ webii lɛ, Yehowa baawo ehe nɔ ekoŋŋ ní ekɛ amɛ akpe hiɛ kɛ hiɛ. Yɛ anɔkwale mli lɛ, Nyɔŋmɔ Wiemɔ lɛ gba efɔ̃ shi jeeŋmɔ akɛ Yehowa baakpata mɛi fɔji ahiɛ. (Abɛi 2:21, 22; 2 Tesalonikabii 1:6-9) Nakai beaŋ lɛ, tutualɔi lɛ baana faŋŋ akɛ amɛkɛ Ofe lɛ diɛŋtsɛ ekpe.—Ezekiel 38:21-23.
3. MƐƐ GBƐ NƆ TA NƐƐ BAASA SHIKPƆŊ LƐ KƐ ENƆ BII LƐ AHE KƐYA NAANƆ?
Abaatsɔ Harmagedon ta lɛ nɔ ahere mɛi akpekpei abɔ ayiwala. Yɛ anɔkwale mli lɛ, no kɛ toiŋjɔlɛ baaba shikpɔŋ lɛ nɔ.—Kpojiemɔ 21:3, 4.
Kpojiemɔ wolo lɛ wieɔ “asafo babaoo” ko ni anyɛŋ akane ní baaná yibaamɔ yɛ ta nɛɛ mli lɛ ahe. (Kpojiemɔ 7:9, 14) Nyɔŋmɔ baatsɔɔ amɛ gbɛ, ni amɛbaaye amɛbua kɛsaa shikpɔŋ lɛ koni etsɔ Paradeiso ekoŋŋ tamɔ bɔ ni Yehowa to kɛjɛ shishijee lɛ.
Ani wɔle be ni abaatutua Nyɔŋmɔ webii lɛ?
[Shishigbɛ niŋmai]
^ kk. 6 Ejeee nɔ ko hee ákɛ akɛ he ko aaato ta he. Ákɛ nɔkwɛmɔnɔ lɛ, amrɔ nɛɛ akɛ Japan maŋ ni ji Hiroshima, ní akɛ atɔmiki okpɛlɛmi kpata hiɛ lɛ feɔ nuklea ta ní baanyɛ afɛ lɛ he mfoniri.
^ kk. 13 Yudafoi aseshi lɛ shishi ni Nazibii lɛ ka bulemɔ lɛ ji nɔkwɛmɔnɔ kome ni tsɔɔ bɔ ni nɔyeli ko ka akɛ ebaabule jamɔi kɛ wekui ashishi. Yɛ Soviet nɔyeli beaŋ lɛ, atsĩ jamɔ kui fɛɛ ni yɔɔ tsutsu Russia nɔyeli lɛ shishi lɛ naa kwraa. Kwɛmɔ sane ni ji “A Peaceable People Defend Their Good Name,” ni je kpo yɛ May 1, 2011 Blɔfo Buu-Mɔɔ ní Yehowa Odasefoi fee lɛ mli lɛ.
[Mfoniri ni yɔɔ baafa 6]
Yehowa Nyɔŋmɔ fã ewebii lɛ ahe yɛ blema
[Mfoniri ni yɔɔ baafa 7]
Yehowa baafã ewebii lɛ ahe ekoŋŋ yɛ Harmagedon ta lɛ mli
