Mɛɛ Be Abaawu Harmagedon Ta Lɛ?

“Mikwɛ, ni naa, asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli . . . jɛ amanehulu kpeteŋkpele lɛ mli.”​—KPOJIEMƆ 7:9, 14.

AMRƆ nɛɛ nɔ fɛɛ nɔ eshɛ kɛha Harmagedon ta lɛ. Yɛ mɛɛ gbɛ nɔ?

Amrɔ nɛɛ ayɛ mɛi ni miisɔmɔ Yehowa yɛ jeŋ fɛɛ ni hiɔ shi yɛ Biblia mli shishitoo mlai ni nɔ kwɔlɔ lɛ anaa. Yɛ Nyɔŋmɔ yelikɛbuamɔ naa lɛ, mɛi akpekpei abɔ ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli lɛ miibua amɛhe naa akɛ nyɛmimɛi ni suɔmɔ kɛ ekomefeemɔ yɔɔ amɛteŋ. Yehowa Odasefoi ateŋ pɛ anaa nyɛmifeemɔ ni tamɔ nɛkɛ lɛ yɛ.—Yohane 13:35.

Etsɛŋ Satan baabua etabilɔi lɛ anaa koni amɛfã ta ni naa wa fe fɛɛ amɛshi mɛi ni sumɔɔ toiŋjɔlɛ ni etamɔ nɔ ni amɛnyɛɛɛ amɛfã amɛhe nɛɛ. (Ezekiel 38:8-12; Kpojiemɔ 16:13, 14, 16) Te ooofee tɛŋŋ oná nɔmimaa akɛ enɛ ji anɔkwale lɛ? Biblia lɛ haa wɔleɔ nibii pɔtɛi ni baaha wɔle be ni abaawu Harmagedon ta lɛ. Nibii ni etsɔɔ lɛ ateŋ babaoo miiná amɛmlibaa.

Gbalɛi ní Oona akɛ Amɛmiiba Mli

Yesu kaselɔi lɛ bi lɛ koni etsɔɔ amɛ bɔ ni mɛi aaafee amɛle be ni “je nɛŋ naagbee lɛ” baaba. (Mateo 24:3) Yesu gbala jwɛŋmɔ kɛtee be pɔtɛɛ ko nɔ yɛ hetoo ni eha lɛ mli akɛ, nakai beaŋ lɛ, “maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔ̃ji kɛ tsɛŋemɔ-helai kɛ shikpɔŋhosomɔi aaaba hei srɔtoi fɛɛ.” No sɛɛ lɛ, ekɛɛ akɛ: “Enɛɛmɛi fɛɛ lɛ kɔ̃ɔmɔi lɛ abɔimɔŋ.” (Mateo 24:7, 8) Bɔfo Paulo tsɛ be kome nɛɛ nɔŋŋ akɛ “naagbee gbii lɛ,” ni ekɛɛ akɛ nakai gbii lɛ baafee “jaramɔ bei.” (2 Timoteo 3:1) Ani kɛ́ okwɛ lɛ, gbalɛi nɛɛ miiwie nibii ni yaa nɔ ŋmɛnɛ lɛ ahe?

Mɛni hewɔ be nɛɛ baafee be ni jaraa waa lɛ? Bɔfo Yohane tsɔɔ nɔ hewɔ. Egba akɛ Satan  kɛ edaimonioi lɛ baajie amɛhiɛ amɛka mɛi ni yɔɔ shikpɔŋ lɛ nɔ lɛ waa yɛ “be fioo” ko mli. Awie Satan he akɛ “egiri naakpa” yɛ be nɛɛ mli. (Kpojiemɔ 12:7-12) Ani onaaa akɛ ŋmɛnɛ lɛ, mɛi amli fuɔ waa ni amɛfeɔ yiwalɛ nii, jeee yɛ he kome pɛ shi yɛ jeŋ fɛɛ?

Yesu wie hu akɛ abaatsu nitsumɔ kpele ko yɛ be ni jaraa waa nɛɛ mli. Ekɛɛ akɛ: “Aaashiɛ [Nyɔŋmɔ] maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) Ŋmɛnɛ lɛ, Yehowa Odasefoi miishiɛ Nyɔŋmɔ Maŋtsɛyeli lɛ he sanekpakpa lɛ yɛ wiemɔi ni fa fe 500 mli yɛ shikpɔji ni fa fe 235 anɔ. Buu-Mɔɔ kɛ Awake! lɛ, ni ji woji ni amɛfeɔ, ni amɛmli wiemɔi lɛ damɔ Biblia lɛ nɔ lɛ, ji woji tɛtrɛbii ni ajaraa fe fɛɛ yɛ jeŋ fɛɛ. Odasefoi lɛ etsɔɔ Biblia lɛ shishi hu kɛtee wiemɔi aaafee 100 mli. Mɛi ni kɛ amɛhe eha ni awooo amɛ nyɔmɔ ji mɛi ni tsuɔ nitsumɔ nɛɛ, ni mɛi jɛɔ amɛsuɔmɔ mli amɛtsuɔ onia kɛfiɔ nitsumɔ nɛɛ sɛɛ. Ani shiɛmɔ nitsumɔ kpele nɛɛ baanyɛ afee Yesu gbalɛ lɛ mlibaa?

Biblia lɛ hu tsɔɔ nibii pɔtɛi ni baaha ta ate shi yɛ Yehowa Nyɔŋmɔ kɛ mɛi ni teɔ shi woɔ lɛ lɛ ateŋ. Susumɔ gbalɛi nɛɛ ateŋ etɛ ní obaana akɛ amɛmiiba mli lɛ ahe okwɛ.

Gbalɛi ni Etsɛŋ Obaana akɛ Amɛmiiba Mli

Gbalɛ 1. Biblia lɛ kɛɔ akɛ jeŋmaji lɛ baajaje yɛ gbɛ ni sa kadimɔ waa nɔ akɛ, “hejɔlɛ [loo toiŋjɔlɛ] yɛ ni wɔyɛ shweshweeshwe.” Ekolɛ amɛbaasusu akɛ amɛná je lɛŋ naagbai wuji lɛ anaa tsabaa amɛtã. Shi nibii ni baanyiɛ nakai sanejajemɔ lɛ sɛɛ kɛba lɛ jeee toiŋjɔlɛ sane kwraa.—1 Tesalonikabii 5:1-3.

Gbalɛ 2. Enɛ sɛɛ lɛ, nɔyelii srɔtoi baate shi amɛwo je lɛŋ jamɔ kui lɛ. Akɛ kooloo ko feɔ nɔyelii nɛɛ ahe mfoniri yɛ Biblia lɛ mli; ni akɛ yoo ko ni ta kooloo lɛ nɔ lɛ feɔ je lɛŋ apasa jamɔi lɛ ahe mfoniri. (Kpojiemɔ 17:3, 15-18) Mfonirifeemɔŋ kooloo lɛ baatsu Nyɔŋmɔ yiŋtoo he nii ní eleee, ni ji akɛ ebaakpata jamɔi ni kɛɔ akɛ amɛjáa Nyɔŋmɔ, shi yɛ anɔkwale mli lɛ amɛmiimale lɛ ahiɛ.

Bɔfo Yohane wie nifeemɔ nɛɛ he yɛ okadifeemɔ gbɛ nɔ akɛ: “Akolontoi nyɔŋma ni ona lɛ, kɛ kooloo lɛ, amɛaanyɛ ajwamaŋ lɛ, ni amɛaafee lɛ amaŋfɔ, ni amɛaaŋmɛ lɛ yayai, ni amɛaaye eheloo, ni amɛkɛ la aaashã lɛ. Ejaakɛ Nyɔŋmɔ kɛwo amɛtsuiiaŋ koni amɛfee eyiŋtoo nii lɛ.”—Kpojiemɔ 17:16, 17.

Gbalɛ 3. Beni atutua apasa jamɔ ni aye enɔ kunim sɛɛ lɛ, Satan baatsirɛ jeŋmaji lɛ koni amɛyatutua mɛi ni jáa Yehowa Nyɔŋmɔ lɛ.—Kpojiemɔ 7:14; Mateo 24:21.

Te Ebaasa Ohe Eha Tɛŋŋ?

Kɛ́ onako hegbɛ okase Biblia lɛ jogbaŋŋ lɛ, ekolɛ ebaawa akɛ ooohe oye akɛ nibii ni awie kɛtsɔ hiɛ lɛ baaba mli. Shi yiŋtoo kpakpa ko hewɔ esa akɛ ohe oye akɛ nɔ fɛɛ nɔ ni awie he lɛ baaba mli pɛpɛɛpɛ lɛ, ni ákɛ etsɛŋ kwraa ni nibii nɛɛ baaba mli. Biblia mli gbalɛi babaoo ni eba mli momo lɛ maa enɛ nɔ mi. *

Mɛni hewɔ oheee be fioo ni okɛtao nɔ hewɔ ni Yehowa Odasefoi heɔ amɛyeɔ akɛ “Nyɔŋmɔ Ofe lɛ gbi wulu lɛ nɔ ta lɛ” ebɛŋkɛ kpaakpa lɛ mli, kɛ nɔ hewɔ ni ehe ehiaaa ni oshe Harmagedon gbeyei lɛ? Ha amɛtsɔɔ bo nɔ ni Biblia lɛ kɛɔ akɛ esa akɛ ofee koni ofata mɛi ni Yehowa Nyɔŋmɔ baabaa amɛyi lɛ ahe. (Kpojiemɔ 16:14) Nɔ ni obaakase lɛ baanyɛ atsake susumɔ ni ohiɛ yɛ wɔsɛɛ he lɛ.—w12-E 02/1.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 8]

Ani Yehowa Odasefoi anitsumɔ lɛ baanyɛ afee Biblia gbalɛ mlibaa?