Mra mli yɛ afi 1942, beni United States kɛ ehe yawo Jeŋ Ta II lɛ mli sɛɛ etsɛɛɛ lɛ, no mli lɛ, miná afii enumɔ yɛ kɔlegi, ni eshwɛ nyɔji fioo ko kɛkɛ ni minine baashɛ miyijiemɔ wolo nɔ akɛ tsumaa he ŋaalɔ. No mli lɛ mikɛ mɛi enyɔ krokomɛi yɔɔ tsu kome mli. Amɛteŋ mɔ kome kɛɛ mi akɛ, mikɛ mɔ ni “basaraa oblahii lɛ yɛ ŋwɛitsu lɛ shishi” lɛ awie. Jɛmɛ mikɛ John O. (Johnny) Brehmer, ni ji Yehowa Odasefoi ateŋ mɔ kome lɛ kpe yɛ. Bɔ ni ejɛɔ Biblia lɛ mli ehaa sanebimɔi lɛ fɛɛ eko hetoo lɛ ha minaa kpɛ mihe. Mihiɛ ni sɔ Johnny sɔŋŋ hewɔ lɛ, miha ekɛ mi bɔi Biblia lɛ kasemɔ, ni be fɛɛ be ni mana gbɛ lɛ mifataa ehe kɛyaa shiɛmɔ.

Johnny papa, ni atsɛɔ lɛ Otto lɛ batsɔ Odasefonyo beni eji shikatoohe ko nɔkwɛlɔ yɛ Walnut, Iowa lɛ. Otto ŋmɛɛ nakai gbɛnaa lɛ he, ni ekɛ ebe babaoo tsu shiɛmɔ nitsumɔ lɛ daa nyɔɔŋ. Fee sɛɛ lɛ, nɔkwɛmɔnɔ kpakpa nɛɛ ni ekɛ eweku lɛ fee lɛ wo mi hewalɛ ni mikpɛ yiŋ ko ni he hiaa waa.

Gbi ko lɛ, onukpa ni kwɛɔ yunivɛsiti lɛ nɔ lɛ kɛɛ mi akɛ mimɔdɛŋbɔɔ lɛ naa eba shi kwraa, ni jeee mitsutsu mɔdɛŋbɔi lɛ abaakwɛ ni aha mi yijiemɔ wolo. Mikaiɔ akɛ mikɛ hiɛdɔɔ sɔle kɛbi Yehowa Nyɔŋmɔ koni etsɔɔ mi gbɛ. No sɛɛ etsɛɛɛ lɛ, abi koni mikɛ mitsɔɔlɔ nukpa lɛ ayakpe. Ekɛɛ mi akɛ, enine eshɛ tɛligram ko nɔ akɛ aatao tsumaa he ŋaalɔ, ni edamɔ minajiaŋ eha amɛ hetoo akɛ mibakpɛlɛ hegbɛ nɛɛ nɔ. Mida tsɔɔlɔ nukpa lɛ shi, kɛlɛ mitsɔɔ lɛ nɔ hewɔ ni mikpɛ mli akɛ mikɛ Yehowa sɔɔmɔ baafee minitsumɔ lɛ. Abaptisi mi yɛ June 17 afi 1942, ni no sɛɛ etsɛɛɛ nɔŋŋ ni akplɛ minɔ ni masɔmɔ akɛ daa gbɛgbalɔ, taakɛ atsɛɔ Yehowa Odasefoi ni amɛkɛ ŋmɛlɛtswai babaoo shiɛɔ lɛ.

Fee sɛɛ yɛ afi 1942 mli lɛ, minine shɛ wolo ko nɔ akɛ miyasɔmɔ akɛ asraafonyo, ni mikɛ skul onukpai lɛ yakpe ni migbala nɔ hewɔ ni mihenilee eŋmɛŋ mi gbɛ ni maya ta lɛ mli mitsɔɔ amɛ. Mikɛ woji ni kɔlegi tsɔɔlɔi nukpai ŋmala yɛ mihe ni tsɔɔ bɔ ni mibaa mijeŋ jogbaŋŋ kɛ hesai krɛdɛɛ ni miyɔɔ akɛ tsumaa he ŋaalɔ lɛ tsɔɔ amɛ. Nibii kpakpai ni aŋmala yɛ mihe lɛ fɛɛ sɛɛ lɛ, agbe mi shika gbele ni naa shɛɔ Amerika dɔlai 10,000, ni asaa ayawo mi tsuŋ afii enumɔ yɛ Amerika mɔɔ ko ni yɔɔ Leavenworth, Kansas lɛ mli.

Awo Odasefoi oblahii ni fa fe 230 atsuŋ koni amɛyatsu nii yɛ Leavenworth kpabuu lɛ ŋmɔ lɛ mli. Ŋmɔ nɛɛ mli ni bulɔi srɔtoi ni kwɛɔ wɔnɔ lɛ  haa wɔtsuɔ nii yɛ. Bulɔi nɛɛ ateŋ mɛi komɛi le wɔ-Kristofoi ashidaamɔ akɛ wɔfiii afã ko sɛɛ, no hewɔ lɛ amɛnuɔ wɔ shishi.

Bulɔi lɛ ateŋ mɛi fioo ŋmɛ wɔ gbɛ koni wɔya nɔ wɔkpe kɛkase Biblia lɛ. Kɛfata he lɛ, amɛyeɔ amɛbuaa ni wɔnine shɛɔ Yehowa Odasefoi awoji anɔ yɛ tsuŋwoohe lɛ. Onukpa ni kwɛɔ tsuŋwoohe lɛ nɔ lɛ po bi koni akɛ Consolation wolo (amrɔ nɛɛ Awake!) lɛ eko fɛɛ eko ni baaba lɛ amaje lɛ.

Beni mikɛ afii etɛ esɔmɔ yɛ tsuŋwoohe lɛ yɛ afii enumɔ ni aha mi lɛ mli lɛ, ajie mi yɛ February 16, 1946, beni agbe Jeŋ Ta II lɛ naa nyɔji fioo komɛi asɛɛ. Amrɔ nɔŋŋ kɛkɛ ni mikɛ mihe wo be fɛɛ sɔɔmɔ lɛ mli ekoŋŋ akɛ gbɛgbalɔ. Shikpɔŋkuku ni akɛha mi akɛ miyashiɛ yɛ mli lɛ ji Kansas maŋtiase ni ji Leavenworth. Miyanáaa nakai susumɔ lɛ he miishɛɛ, ejaakɛ abɛ Yehowa Odasefoi ahe jwɛŋmɔ ni ja yɛ maŋtiase nɛɛ mli. Ebawa kɛha mi akɛ maná nitsumɔ kɛkwɛ mihe, ni wɔɔhe hu nakai nɔŋŋ.

Mikaiɔ akɛ bulɔ ko ni mikɛkpe lɛ bó wo miyi ekɛɛ, “Jeee biɛ ni oya!” Beni mina tso ko ni akɛtswaa bɔɔl yɛ edɛŋ lɛ, mitsui fa naakpa, ni oya nɔŋŋ ni mishi jɛmɛ. Shĩa ko hu ni mibote mli lɛ, yoo ko ni mikɛkpe lɛ kɛɛ mi akɛ, “Mɛɛ mi! miiba nɔŋŋ” kɛkɛ ni eŋa shinaa lɛ. Mihiɛ mɛɛ kɛkɛ ni agbele samfɛlɛ ni yɔɔ ŋwɛigbɛ lɛ, ni atsi nu ni akɛsha nibii amli ashwie minɔ ni mifɔ tsɔɔ. Fɛɛ sɛɛ lɛ, misɔɔmɔ nitsumɔ lɛ wo yibii. Sɛɛ mli lɛ, mibaná mile akɛ mɛi ni ŋɔ wɔwoji ni mikɛha amɛ lɛ ekomɛi batsɔmɔ Odasefoi.

Yɛ afi 1943 mli lɛ, ato skul hee ko shishi yɛ New York kooyigbɛ ní akɛbaatsɔse maŋsɛɛ sɔɔlɔi. Sɛɛ mli lɛ afɔ mi nine kɛtee skul nɛɛ, ni mifata skulbii ni ji nyɔŋma nɔ ni gbe naa yɛ February 8, 1948 lɛ ahe. Abale skul nɛɛ akɛ Buu-Mɔɔ Gilead Biblia Skul. Beni migbe naa lɛ, atsu mi kɛtee Gold Coast, ni amrɔ nɛɛ atsɛɔ lɛ Ghana lɛ.

Beni mishɛ Gold Coast lɛ, nitsumɔ ni akɛwo midɛŋ ji miyashiɛ miha amralo lɛ onukpai lɛ kɛ Yuropabii. Daa otsi naagbee lɛ, miyayeɔ mibuaa Yehowa Odasefoi asafo ko yɛ shĩa kɛ shĩa shiɛmɔ nitsumɔ lɛ mli. Agbɛnɛ hu lɛ, miyaa hei ni etse amɛhe banee ni Odasefoi yɔɔ lɛ ni miyatsɔɔ amɛ gbɛi anɔ ni atsɔɔ ashiɛɔ. Kɛfata he lɛ, misɔmɔ akɛ nɔkwɛlɔ gbɛfalɔ yɛ maŋ ni bɛŋkɛ ni ji Ivory Coast, ni amrɔ nɛɛ atsɛɔ lɛ Côte d’Ivoire lɛ mli.

Beni misɔmɔɔ yɛ hei nɛɛ lɛ, mikase Afrikabii ashihilɛ, ni mihi shi nakai—miwɔɔ su tsu mli, mikɛ minine yeɔ nii, ni miyaa niiaŋ yɛ jwɛiaŋ tamɔ bɔ ni Israelbii lɛ fee yɛ ŋa lɛ nɔ lɛ. (5 Mose 23:12-14) Enɛ ye ebua mi kɛ maŋsɛɛ sɔɔlɔi krokomɛi lɛ ni wɔná  mɛi lɛ ahe jwɛŋmɔ ni ja. Amralo lɛ onukpai lɛ ekomɛi aŋamɛi kpɛlɛ ni wɔkɛ amɛ bɔi Biblia lɛ kasemɔ. No hewɔ lɛ, kɛ́ shiteekɛwolɔi bɔi wɔnaa gbamɔ ni aha amɛ hegbɛ koni afo wɔvisai lɛ amli lɛ, onukpai nɛɛ aŋamɛi lɛ kɔneɔ amɛwumɛi lɛ ayiŋ ni atswaa nakai yiŋkpɛi lɛ afɔ̃ɔ!

Taakɛ eba lɛ yɛ maŋsɛɛ sɔɔlɔi saŋŋ ni yɔɔ Afrika lɛ agbɛfaŋ lɛ, atiridii mɔ mi. Mihe dɔɔ ni miyitso gbaa mi, ni ehaa mifeɔ minii tamɔ mɔ ko ni bɛ pɔtɛɛ. Bei komɛi po lɛ, ehe bahiaa ni mamɔ mikadaa mli koni ekpa hosomɔ. Fɛɛ sɛɛ lɛ, mitee nɔ misɔmɔ, ni no ha miná miishɛɛ ni mitsui nyɔ mimli.

Klɛŋklɛŋ afii ejwɛ ni miye yɛ Afrika lɛ, mikɛ Eva Hallquist, ni mikɛ lɛ kpe dani mishi United States lɛ sharaa. Mibaná mile akɛ efata skulbii 21 nɔ ni baagbe Gilead Skul lɛ naa yɛ July 19, 1953 lɛ ahe yɛ majimaji ateŋ kpee ko ni Yehowa Odasefoi fee yɛ Yankee Stadium ni yɔɔ New York lɛ shishi. Mikɛ meele kudɔɔtsɛ ko to gbɛjianɔ koni eha matsu nii yɛ meele lɛ mli kɛwo migbɛfãa kɛmiiya United States lɛ he nyɔmɔ.

Beni wɔyɔɔ ŋshɔ lɛ hiɛ lɛ, bei komɛi lɛ ehiɛ feɔ hamahama, shi gbii 22 sɛɛ lɛ miyashɛ, ni miyi mli koni mikɛ Eva ayakpe yɛ Yehowa Odasefoi anitsumɔhe yitso ni yɔɔ Brooklyn lɛ. Kɛ́ odamɔ nitsumɔhe lɛ ŋwɛitsu lɛ yiteŋ lɛ, onaa New York lɛjiadaamɔhe lɛ kɛ bɔ ni efee tamɔ atatu kɛ ŋshɔ lɛ tsa lɛ, jɛmɛ ni mibi Eva suɔmɔ yɛ. Sɛɛ mli lɛ, Eva ba Gold Coast ni ebafata mihe kɛsɔmɔ.

Beni mikɛ Eva esɔmɔ afii saŋŋ yɛ Afrika lɛ, mimami ŋma mi wolo akɛ mipapa miiye kansa hela ni eehe egbo. Beni mibi gbɛ ni akpɛlɛ nɔ lɛ, mikɛ Eva shi kɛtee United States. Mipapa hela lɛ mli bawo wu oyayaayai, etsɛɛɛ kwraa ni egbo.

Aaafee afii ejwɛ sɛɛ beni wɔku wɔsɛɛ kɛba Ghana lɛ, awo wɔtoi nɔ akɛ mimami he miiye waa. Wɔnanemɛi komɛi kɛ wɔ susu nii ahe akɛ kɛ́ ebaahi lɛ wɔku wɔsɛɛ wɔyakwɛ lɛ. No ji yiŋkpɛɛ ko ni bawa fe fɛɛ kɛha wɔ. Beni mikɛ afii 15 ehi maŋsɛɛ sɔɔmɔ nitsumɔ lɛ mli, ni emli 11 lɛ mikɛ Eva sɔmɔ lɛ, wɔku wɔsɛɛ kɛtee United States.

Afii ni nyiɛ sɛɛ kɛba lɛ, wɔto naa kɛkwɛ mimami, wɔyeɔ wɔbuaa lɛ kɛyaa asafoŋ kpee kɛ́ eyɛ enyɛmɔ mli lɛ. Yɛ January 17, 1976 lɛ, egbo beni eye afii 86. Shi shihilɛ ni naa wa fe enɛ po ba afii nɛɛhu sɛɛ. Datrɛfoi kpa shi amɛna akɛ Eva miiye kansa hela. Wɔfee nɔ fɛɛ nɔ ni wɔbaanyɛ yɛ hela lɛ he, shi Eva eyanyɛɛɛ hela lɛ, ni naagbee lɛ egbo yɛ June 4, 1985, beni eye afii 70.

Afi 1988 beni abaajɔɔ nitsumɔhe nine hee lɛ nɔ yɛ Ghana lɛ, afɔ̃ mi nine. Eji nɔ ko ni mihiɛ kpaŋ nɔ kɔkɔɔkɔ! Aaafee afii 40 ni eho beni migbe Gilead naa ni miyashɛ Ghana lɛ, no mli lɛ Odasefoi ohai fioo ko pɛ yɔɔ jɛmɛ. Beni afi 1988 shɛɔ lɛ, aná Odasefoi ni fa fe 34,000, ni amrɔ nɛɛ amɛmiihe ashɛ 114,000!

Beni miyasara Ghana lɛ, afii enyɔ sɛɛ yɛ August 6, 1990 lɛ, mikɛ Eva naanyo kpaakpa ni atsɛɔ lɛ Betty Miller lɛ bote gbalashihilɛ mli. Mikɛ Betty etee nɔ wɔkɛ Yehowa sɔɔmɔ efee wɔnitsumɔ. Wɔmiikpa be ni wɔbaana wɔniimɛi kɛ wɔnaamɛi, wɔfɔlɔi, kɛ Eva ekoŋŋ beni atee amɛ shi yɛ Paradeiso yɛ shikpɔŋ lɛ nɔ lɛ.—Bɔfoi lɛ Asaji 24:15.

Kɛ́ mikwɛ bɔ ni Yehowa kɛ mi etsu nii afii 70 kɛ sɛɛ sɔŋŋ lɛ, minuɔ he akɛ eji hegbɛ kpele diɛŋtsɛ, ni no haa mimii shɛɔ mihe waa ni mihiŋmɛiiaŋ kpalaa nu. Midaa lɛ shi be fɛɛ be akɛ eye ebua mi ni mikɛ esɔɔmɔ fee minitsumɔ. Eyɛ mli akɛ amrɔ nɛɛ miihe maná afii 100 moŋ, shi Yehowa ni ji tsumaa he ŋaalɔ fe fɛɛ yɛ jeŋ fɛɛ lɛ etee nɔ ewaje mi, ni ewo mi hewalɛ koni maya nɔ mikɛ esɔɔmɔ lɛ afee minitsumɔ.